E STIVIN keghi mudia ye uwu ẹbu ikpia ni ma zẹdẹ gha maan ẹko ẹre. Ikpia na kegha re ikpia ni bu ẹzọ vbe iko ọghe Sanhedrin, nọ re owa ẹzọ ọghe Ivbi e Ju nọ ghi yo sẹ. Ọbuohiẹn 71 ẹre ọ bu ẹzọ vbe iko na. Ogiohẹn ighẹ Kaiafas ẹre ọ tie iko na. Irẹn ẹre ọ vbe siẹnro iko na vbe ẹghẹ ne iran ya buohiẹn uwu gbe Jesu. (Mat 26:57, 59; Iwinna 6:8-12) Emwa eso ghi ladian do gha sẹ osẹe ohoghe gbe Stivin, emwi ọyunnuan keghi sunu. Emwa ni rre iko nii hia ke wa tọn aro ye Stivin egbe rhunmwuda, ugbaro e Stivin na wa “yevbe ugbaro odibosa.”—Iwinna 6:13-15.

Vbọ ye orhiọn e Stivin sẹ otọ vbe ọ rre uwu ẹbu ikpia vberriọ? A te miẹn wẹẹ iran si e Stivin gha rrie iko e Sanhedrin, te ọ wa ya ekhọe hia rhiegba ye iwinna ne avbe ukọ waa re. Ọrhiọn nọhuanrẹn ẹre ọ rhie ẹtin nẹẹn ne ọ na sẹtin musọe. (Iwinna 6:3-7) Orhiọn nọhuanrẹn nii, ẹre ọ vbe ru iyobọ nẹẹn vbe ọ rre odaro iko e Sanhedrin. Ọ keghi fu ẹre ẹko rre, ọ na vbe yae ye emwi nibun rre. (Jọn 14:16) E Stivin ghi suẹn gha ya udinmwẹ sinmwi oseghe ne egbe ẹre, orhiọn nọhuanrẹn keghi ru iyobọ nẹẹn ya yerre, ako ọghe Evbagbẹn Nọhuanrẹn ne ọ gberra 20 vbe abọ ọghe Baibol ne a ya urhuẹvbo e Hibru gbẹn. Ẹmwẹ ne ọ tae na, ẹre ọ rre ebe Iwinna uhunmwu ẹnrẹn 7. (Jọn 14:26) Amuẹtinyan ọghe Stivin keghi wegbe sayọ, vbe ọ miẹn umian ọghe Jesu vbe ọ mudia ye obọ erha ọmwa ọghe Osanobua.—Iwinna 7:54-56, 59, 60.

Ma sẹtin vbe werriẹ aro daa ukpokpo nọ wegbe vbe na ghee Stivin. (Jọn 15:20) Ma ghaa tie Baibol vbe ẹghẹ hia, ma na vbe gha zọghae vbe iwinna ikporhu iyẹn nọ maan, orhiọn nọhuanrẹn ghi vbe gha dia ima. Ẹghẹ nii, orhiọn ima ghi vbe sẹ otọ vbe ima gha werriẹ aro daa edanmwẹ nọ wegbe.—1 Pit 4:12-14.