ESTEBAN yaʼan tiʼ tʼejl junmojt wiñicob jontoloʼ bʌ, 71 juezob chaʼan jiñi ñuc bʌ melobʌjʌl i chaʼan judíojob, cʌmbil bʌ jaʼel bajcheʼ Sanedrín. Ili wiñicob añob wen ñuc bʌ i yeʼtel tiʼ tojlel jiñi tejclum. Tsiʼ tempayob cʼotel jiñi cʼax ñuc bʌ motomaj Caifás, maxto bʌ añic cabʌl uw tsiʼ yʌlʌ chaʼan miʼ tsʌnsʌntel Jesús (Mt. 26:57, 59; Hch. 6:8-12). Miʼ pʌjyel cʼotel wiñicob chaʼan miʼ chaʼleñob jopʼtʼan tiʼ contra Esteban. Pero jiñi ochemoʼ bʌ ti Sanedrín toj sajtelob i pusicʼal cheʼ bʌ miʼ qʼuelbeñob i wut jiñi Esteban come lajal bajcheʼ i wut juntiquil ángel (Hch. 6:13-15).

¿Bajcheʼ tsaʼ mejli i taj i ñʌchʼtʌlel Esteban cheʼ woliʼ ñusan jiñi bʌbʌqʼuen bʌ wocol? Cheʼ bʌ maxto i pʌyʌyob majlel yaʼ ti Sanedrín, tsiʼ ñumen acʼʌ i ñaʼtʌbal ti i yeʼtel yaʼ ti congregación yicʼot i coltaya i yespíritu Dios (Hch. 6:3-7). Cheʼ bʌ woli jiñi mel bʌ, jiñi espíritu jiñʌch tsaʼ bʌ i ñuqʼuesʌbe i pusicʼal yicʼot tsiʼ colta i cʼajtesan i chaʼan bʌ Dios (Jn. 14:16). Cheʼ bajcheʼ mi laj qʼuel yaʼ ti capítulo 7 i chaʼan Hechos, cheʼ bʌ woliʼ coltan i bʌ yaʼ ti melobʌjʌl yicʼot i chʼejlel, jiñi chʼujul bʌ espíritu tsiʼ cʼajtesʌbe cheʼ bʌ 20 texto tac am bʌ ti Tsʼijbujel Hebreo (Jn. 14:26). Pero jiñi i ñopoñel Esteban tsaʼ ñumen pʼʌtʼa cheʼ bʌ tsaʼ aqʼuenti i qʼuel chaʼan Jesús yaʼ waʼal tiʼ ñoj Dios (Hch. 7:54-56, 59, 60).

Tajol ti jumpʼejl bʌ qʼuin miʼ mejlel lac ñusan ticʼlʌntel yicʼot contrajintel jaʼel (Jn. 15:20). Mi ñʌmʌlonla lac pʼʌtʼesan lac bʌ tiʼ Tʼan Dios yicʼot yaʼan lac ñaʼtʌbal tiʼ melol i yeʼtel, mi caj la cʌcʼ chaʼan jiñi i yespíritu Jehová miʼ mel i troñel ti lac tojlel. Yicʼot jaʼel, mi caj i yʌqʼueñonla lac pʼʌtʌlel chaʼan mi laj cuch laj contrajintel yicʼot chaʼan bej an i ñʌchʼtʌlel lac pusicʼal (1 P. 4:12-14).