STEFANO e oboso ba dimuti la bato ba njo. Kana ba tano̱ nde bō̱ ba mwemba ma bakaisedi bande̱ne̱ ba Israel, mu 71 ma bakaisedi ba ta nde bato ba ngińa ba tumba ba buki be̱se̱. Ba ta ba ko̱to̱me̱ omboa Prisi Ninde̱ne̱ Kaifa, ńena nu ta nu te̱se̱be̱ ka prisi ninde̱ne̱ myo̱di to̱ mininga oboso ná Yesu a makaisabe̱ na bakwabe̱ mbako a kwedi. (Mat. 26:57, 59; Bebolo 6:8-12) Niponda ba tano̱ ba te̱se̱ mboṅ a lobango po̱ te̱ ombusa nine̱, na babo̱ be̱ne̱ lambo la betańsedi jombwea Stefano​—boso bao bo ta nde “ka boso ba ange̱l.”​—Bebolo 6:13-15.

Ne̱ni Stefano a we̱lino̱ be̱ pī na musango o ninka bete̱medi ba ndutu e? Obiana a mawanabe̱ oboso ba mwemba ma bakaisedi bande̱ne̱, Stefano a ta a we̱le̱ mo̱me̱ne̱ mususu o ebol’ao ya dikalo owas’a ngińa ninde̱ne̱ ńa mudī ma Loba. (Bebolo 6:3-7) Niponda a tano̱ owas’a mitakisan, mu mudī me̱ne̱ mu ta mu lo̱ko̱ mo̱ na jo̱nge̱le̱ pe̱ mo̱ nje ye̱se̱ okono̱. (Yohane 14:16) Niponda Stefano a tano̱ a lingea mbale̱, ka nje te̱ e tilabe̱no̱ o Bebolo bepasi 7, mudī-musangi mo̱nge̱le̱ mo̱ lambo ka 20 ma bepasi ba Betiledi ba Bonahebe̱r to̱ buka nika. (Yohane 14:26) Nde dube̱ la Stefano di bengi jembame̱ ponda e̱nno̱ o je̱ne̱ a kusino̱, Yesu a te̱m o dia la mom la Loba.​—Bebolo 7:54-56, 59, 60.

Biso̱ pe̱ je ná di so̱be̱ buńa bō̱ owas’a musemako na mitakisan. (Yohane 15:20) Di ko̱lo̱ngo̱ne̱ te̱ da da la mudī, Eyal’a Loba, ponda te̱ na be̱ pe̱ yē̱yē̱ o dikalo, di mabola mudī ma Loba epolo ná mu bole ebolo o longe̱ lasu. Di me̱nde̱ pe̱ be̱ne̱ ngińa o lembe̱ mitakisan na kombe̱ pe̱ musango masu ma teten.​—1 Pet. 4:12-14.