ETIYƐNI be kititigɛla 71 cɛma ani u b’a kɔniya. Yahutuw ka kititigɛlaw jɛnkulu mɔgɔw lo ani u lɔyɔrɔ ka bon Israɛl. Sarakalasebagaw kuntigiba Kayifu lo y’u weele. Kalo damanin ka kɔn o ɲɛ, ale lo tun ye kititigɛlaw ɲɛminɛ u ye kiti tigɛ Yezu kan ko a ka kan ka faga (Mat. 26:57, 59; Kɛw. 6:8-12). U ye seere ngalontigɛla dɔw weele walisa u ka na ngalon tigɛ ka la Etiyɛni kan. K’u to o la, koo kabakoman dɔ kɛra. U y’a kɔrɔsi ko Etiyɛni “ɲaa kɛra i n’a fɔ mɛlɛkɛ ta.”—Kɛw. 6:13-15.

O kitiko ɲɔgɔn na, mɔgɔ ka teli ka siran. Nka, mun lo ye Etiyɛni dɛmɛ a hakili siginin tora? Sanni u ka taga ni Etiyɛni ye kititigɛlaw jɛnkulu ɲɛfɛ, a tun cɛsirinin lo a ka cidenya baara la hakili senu barika la (Kɛw. 6:3-7). Kititigɛso la, a ye dususalo sɔrɔ ani a hakili jigira koo dɔw la hakili senu sababu la (Zan 14:16). Tuma min na Etiyɛni tun b’a yɛrɛ lafasara, hakili senu y’a hakili jigi vɛrise 20 ni kɔ la minw be sɔrɔ Heburukan sɛbɛninw kɔnɔ. A ye min fɔ k’a yɛrɛ lafasa, o be sɔrɔ Kɛwaliw sapitiri 7 kɔnɔ (Zan 14:26). Fɛɛn wɛrɛ min ye Etiyɛni ka limaniya barika bonya kosɔbɛ, o ye yelifɛn dɔ ye. A ye Yezu lɔnin ye Ala kinibolo fɛ.—Kɛw. 7:54-56, 59, 60.

Loon dɔ, mɔgɔw be se k’an tɔɔrɔ wala k’a ɲini ka koo jugu kɛ an na (Zan 15:20). N’an be Ala ka Kuma kalan loon o loon ani k’an seen don waajuli la bɛrɛbɛrɛ, an b’a to Jehova ka hakili senu k’an ɲɛminɛ. O la, an bena fanga sɔrɔ ka kɔrɔbɔliw muɲu ani an hakili siginin bena to.—1 Piyɛri 4:12-14.