FEEMƆ shihilɛ nɛɛ he mfoniri okwɛ. Stefano damɔ hii 71 ni mli efu lɛ waa lɛ ahiɛ. Hii nɛɛ ji kojolɔi yɛ Sanhedrin lɛ, ni ji saneyelihe wulu fe fɛɛ ni yɔɔ Israel lɛ, ni abuɔ amɛ waa. Osɔfonukpa Kaiafa, mɔ ni kwɛ ni abu Yesu gbele fɔ nyɔji fioo komɛi ni eho lɛ etsɛ amɛ kpee. (Mat. 26:57, 59; Bɔf. 6:8-12) Sanhedrin lɛ hã amale odasefoi bafolɔ Stefano naa. Shi amɛyɔse nɔ ko ni yɔɔ naakpɛɛ waa yɛ ehe. Yɛ nɔ najiaŋ ni etsui baafã ni eshe gbeyei lɛ, “amɛna ehiɛ tamɔ ŋwɛibɔfo hiɛ.”​—Bɔf. 6:13-15.

Mɛni ye ebua Stefano ni etsui efãaa yɛ shihilɛ ni yɔɔ gbeyei nɛɛ mli? Dani abaamɔ Stefano kɛya Sanhedrin lɛ hiɛ lɛ, no mli lɛ Nyɔŋmɔ mumɔ lɛ miiye eebua lɛ ni eetsu esɔɔmɔ nitsumɔ lɛ kɛ ekãa. (Bɔf. 6:3-7) Be ni ayeɔ esane lɛ, mumɔ nɛɛ nɔŋŋ shɛje emii ni eye ebua lɛ ni ekai nibii ni ekase lɛ. (Yoh. 14:16, shn.) Amaniɛbɔɔ ni yɔɔ Bɔfoi yitso 7 lɛ hãa wɔnaa akɛ, be ni Stefano kɛ ekãa fãa ehemɔkɛyeli lɛ he lɛ, etsɛ Hebri Ŋmalɛ lɛ mli saji 20 loo nɔ ni fe nakai ayisɛɛ, ni ekã shi faŋŋ akɛ, mumɔ krɔŋkrɔŋ lɛ ni ye ebua lɛ ni ekai saji nɛɛ. (Yoh. 14:26) Nɔ kroko ni waje Stefano ji na ni ena Yesu damɔ Nyɔŋmɔ ninejurɔ nɔ yɛ ninaa ko mli lɛ.​—Bɔf. 7:54-56, 59, 60.

Ekolɛ wɔ hu mɛi baate shi amɛwo wɔ ni amɛbaawa wɔ yi. (Yoh. 15:20) Kɛ́ wɔkase Nyɔŋmɔ Wiemɔ lɛ be fɛɛ be ni wɔkɛ ekãa tsu sɔɔmɔ nitsumɔ lɛ daa lɛ, Yehowa mumɔ lɛ baaye abua wɔ. Tamɔ bɔ ni eba lɛ yɛ Stefano gbɛfaŋ lɛ, wɔ hu wɔbaaná ekãa kɛdamɔ shiteekɛwoo naa, ni wɔtsui efãŋ.​—1 Pet. 4:12-14.