E KAAITARA Tetebano ma te koraki ni mwaane aika riribaia. Ngkai boni kaain te boowi ae rietata i Iteraera ae te Tanirim taani moti aika 71 aikai, boni mwaane aika rangi ni mwaaka i buakon te natannaomata anne. E ikotiia naakai te Ibonga ae Rietata ae Kaiaba, are te tia babaire naba n te boowi tabeua te namwakaina n nako ngke e motikaki taekan Iesu bwa e na kamateaki. (Mat. 26:57, 59; Mwa. 6:8-12) Ngke a kakeerakeia taani kakoaua aika kewe temanna imwin temanna, a a nora te bwai ae kamimi iroun Tetebano bwa ubuna “kaanga ai aron ubun te anera.”—Mwa. 6:13-15.

E kangaa Tetebano ni kona n teimatoa n rau n te tai ae kakamaaku aei? Imwaini katikan Tetebano nakon te Tanirim, e kabanea ana tai n ana beku i aani kairana n taamnein te Atua. (Mwa. 6:3-7) N teina n te boowi, e mwamwakuri naba te taamnei anne i aona, n riki bwa te tia kabebetea ao te tia kauringnga. (Ioa. 14:16, kbn.) Ngke e kaekaa bukinana ma te ninikoria Tetebano n aron ae koreaki ni Mwakuri mwakoro 7 ao te taamnei ae raoiroi e kauringnga tao 20 ke e raka riki kiibu man te Koroboki ae Tabu n te Taetae n Ebera. (Ioa. 14:26) Ma e a kakorakoraaki riki ana onimaki Tetebano ngke e anganaki te miitara ibukin Iesu ae tei i angaatain te Atua.—Mwa. 7:54-56, 59, 60.

Ti kona naba n aitara n te bong teuana ma kakamaakara ao bwainikirinara. (Ioa. 15:20) Ngkana ti katoatai ni kanuaira n Ana Taeka te Atua ao ni kakaonimaki n ara mwakuri ni minita, ti a kariaia iai taamnein Iehova bwa e na mwamwakuri i nanora. Ti na karekea naba te korakora ni kaaitarai aaro n totoko ao ni kateimatoa te rau i nanora.—1Bet. 4:12-14.