STEFANUS wa hungamenwe i ovarumendu vongaro ombi. Otja vemwe vouṋepo wondjuwo yombanguriro yokombanda mo Israel, Otjira tjOvajuda, ovapangure 71 mbo va ri ovarumendu ovanamasa tjinene motjihuro ho. Omupristeri Omunene Kajafas, ngwaa honaparerepo ondjuwo yombanguriro omieze omiṱiṱi komurungu ya indu Jesus tja pangurwa okukaṱa, we ve woronganisa pamwe. (Mat. 26:57, 59; Oviung. 6:8-12) Indu tja ve eta ovahongonone wovizeze pekepeke ku Stefanus, owo va muna otjiṋa otjihimise. Omurungu wa Stefanus aau “munika otja omurungu womuengeli.”​—Oviung. 6:13-15.

Hapo pe ya vi Stefanus ma raise ongaro ombore nandarire kutja wa ri kehi yongaro ondirise ndjo? Ngunda e hi ya twarewa komurungu wOtjira tjOvajuda, Stefanus wa ri norupa okuura motjiungura tje tjokuvatera mombongo nomasa wombepo ondjapuke. (Oviung. 6:3-7) Indu tjaa pangurwa, ombepo tjingeyo ya ri kombanda ye, okumuhuhumiṋa nokumuzemburukisa oviṋa. (Joh. 14:16) Otja Stefanus tja rwisa nouvanḓe, otja tji pe raisiwa mOviungura ekondwa 7, ombepo ondjapuke ya tjita kutja ma zemburuke otupa twOmatjangwa wOtjiheberi 20 poo kombanda ya nao. (Joh. 14:26) Posi yokutja ongamburiro ya Stefanus ya harera ko omasa indu tja muna otjirimunikise tja Jesus tja kurama kokunene kwa Ndjambi.​—Oviung. 7:54-56, 59, 60.

Eṱe wina mape ya atu munu omapirukiro nondatumisire. (Joh. 15:20) Indu tji matu lese Ombeibela eyuva arihe nokukara norupa motjiungura tjokuzuvarisa tjinene, tu yandjera ombepo ya Jehova okuungura mweṱe. Wina matu kara nohange momuinyo ngunda a matu rwisa omapirukiro.​—1 Petr. 4:12-14.