STEPHEN da mundia bhi odalo ikpea ne bun sẹbhi 71 ne ha khọ ẹkẹ ọle. Ene ikpea nan, ele mhọn obọ bhi ibhohiẹn bhi kotu nọn kokhun nẹ bhi otọ Izrẹl. Ele yẹ deba ẹbho ne ribhi ihe nọn kokhun nẹ bhi otọ Izrẹl. Ele ojohẹn natiọle Caiaphas ka sikoko rẹ bhu iJesu ohiẹn uki eso ne gbera. Ẹghenin, ele da bhu iJesu ohiẹn ghe a dẹ gbe ọle a. (Matt. 26:57, 59; Acts 6:8-12) Ọne ẹghe nan nian, ele da wo ne ẹbho mundia nin ele dọ ha sosali ohoghe gbe Stephen. Ọrẹyiriọ, ọ da wo han ele ilo ghe ofẹn bha ha mun iStephen, udu nọnsọle bha mun lueghe. Bhi ọsi ẹmhọanta, ẹlo ọle da sẹyẹ wo mhẹn an bhi uhọnmhọn bọsi ẹhi.—Acts 6:13-15.

Be rẹkpa iStephen nin ofẹn bha da ha mun ọlẹn ẹghe nin ene ekhẹn Sanhedrin rẹ ha nọọn ọlẹn ọta? Ọkuẹsẹ ele dọ mun iStephen, iwẹnna oga nin ẹlinmhin nọn khiale re ahu nanlẹn rẹ ha lu ọle wo ha lu. (Acts 6:3-7) Ọne ẹlinmhin nọn khiale nan sẹyẹ wo ha nanlẹn. Ọ da ha ko Stephen udu re yẹ rẹkpa ọle yere emhin nin ọle lẹnlẹn. (John 14:16, ftn.) Bhi ọta nin Stephen ta nan gbẹn ọbhi Acts uhọnmhọnlẹn 7, ẹlinmhin nọn khiale da rẹkpa ọle yere eje bun gbera ijanlẹn 20 bhi obọ iBaibo na re urolo iHebrew gbẹn. (John 14:26) Urẹọbhọ nọnsi Stephen da yẹ wo mun zeze ẹghe nin ọle rẹ daghe iJesu mundia bhi obera nọnsi Osẹnobulua bhi imianlo.—Acts 7:54-56, 59, 60.

Ẹlẹnan nian, mhan sabọ rẹ miẹn edọnmhẹn la ekpokpo bhi egbe. (John 15:20) Ahamiẹn mhan tie iBaibo ẹghe rebhe yẹ manman zegbere lu iwẹnna oga, ẹlinmhin nọn khiale nọnsi Jehova ki ha ne mhan. Mhan ki yẹ miẹn ahu rẹ re eghọnghọn ziẹngbe ekpokpo. Ọkhọle nọnsẹmhan ki lọre.—1 Pet. 4:12-14.