STIVIN ọ rẹriẹ ovao ku ezae nọ e geva gaga. Ezae udhosa gbe ikpegbọvo yena a jọ usu ahwo nọ a mai wo ogaga evaọ orẹwho na, keme ae họ iguẹdhọ okọto Sanhẹdrin, okọto nọ o mai kpehru evaọ Izrẹl. Ozerẹ Okpehru na Kayafas họ ọnọ o se rai kokohọ, ọye ọvona ọ jọ ohwo nọ o wuzou okọto na okenọ a rehọ Jesu guẹdhọ je bruoziẹ uwhu kpei. (Mat. 26:57, 59; Iruẹru 6:8-12) Nọ a be rehọ isisẹri erue ze unọjọ utọjọ re a se isẹi kpe Stivin na, a te muẹrohọ oware jọ nọ u gbunu gaga, ovao riẹ o “wọhọ ovao ukọ-odhiwu.”​—Iruẹru 6:13-15.

Ẹvẹ udu o sae rọ jọ Stivin awọ evaọ etoke ukpokpoma yena nọ o rẹ sae wha ozọ họ ohwo oma na? Taure a te ti si rie kpobọ Sanhẹdrin, Stivin ọ romakẹ usiuwoma ota gaga, yọ ẹzi Ọghẹnẹ o je fiobọhọ kẹe. (Iruẹru 6:3-7) Nọ a jẹ rehọ iẹe guẹdhọ, ẹzi ọvo yena ọ jariẹ oma, ọ jẹ sasa iẹe oma jẹ kareghẹhọ iẹe eware nọ o wuhrẹ no. (Jọn 14:16, ẹme-obotọ) Nọ Stivin o bi gu ẹkẹ-unu riẹ wọhọ epanọ a kere fihọ Iruẹru Ikọ uzou avọ ihrẹ na, ẹzi ọfuafo o lẹliẹ e riẹ kareghẹhọ eria nọ i bu te udhe evaọ Ikereakere Hibru na. (Jọn 14:26) Ẹrọwọ Stivin ọ tẹ jẹ ga viere nọ ọ ruẹ Jesu evaọ eruẹaruẹ nọ o dikihẹ obọze Ọghẹnẹ.​—Iruẹru 7:54-56, 59, 60.

Ẹdẹjọ ma te rẹriẹ ovao ku iguegue gbe ukpokpoma. (Jọn 15:20) Ma tẹ be rehọ Ẹme Ọghẹnẹ kuọ oma jẹ be romakẹ usiuwoma ota ziezi, yọ ma be kẹ ẹzi Jihova uvẹ re o jọ oma mai ruiruo. Ma ti je wo ẹgba nọ ma re ro dikihẹ ga ababọ udubro evaọ oke ọwọsuọ.​—1 Pita 4:12-14.