ESTEVÃO staba dianti di un grupu di ómis xeiu di raiba. Es éra 71 juís ki ta fazeba párti di Sinédriu, kel Tribunal Más Altu di judeus. Na kel grupu la, staba kes ómi ki tinha más autoridadi entri judeus. Éra Kaifás, saserdóti prinsipal ki djuntaba kel grupu. Éra el tanbê ki orienta kel tribunal ki da Jizus senténsa di mórti. (Mat. 26:57, 59; Atos 6:8-12 ) Timenti kes tistimunha falsu staba ta pâpia kóntra Estevão, kes juís di Sinédriu odja un kuza diferenti na Estevão: se róstu fika ‘sima róstu di un anju.’ — Atos 6:13-15.

Modi ki Estevão konsigi fika kalmu na kel situason difísil? Antis di es leba-l pa tribunal, Estevão staba okupadu na trabadju di kongregason i el tinha spritu santu di Deus. (Atos 6:3-7 ) Timenti el staba ta julgadu, kel mésmu spritu santu konsola-l. Tanbê el djuda-l lenbra di kuzas ki dja el studaba antis. (João 14:16, nóta di rodapé) Na kel diskursu ki el faze pa el difende, ki sta na Atos kapítlu 7, spritu santu djuda-l lenbra más di 20 párti di Skrituras ebraiku. (João 14:26 ) Má se fé fika más fórti inda, kantu el odja Jizus sakédu na ladu direita di Deus. — Atos 7:54-56, 59, 60.

Talvês un dia nu pode amiasadu ô pirsigidu. (João 15:20 ) Spritu santu di Jeová tanbê pode djuda-nu. Má pa el djuda-nu, nu ten ki lé Bíblia tudu dia i sta sénpri na pregason. Kel-li ta da-nu forsa pa nu aguenta i ta djuda-nu ten pas. — 1 Ped. 4:12-14.