LAJ Esteban wank chiru 71 li winq li xikʼ nekeʼilok re. Ebʼ li winq aʼin nimebʼ xwankil ut ebʼ laj raqol aatin li nekeʼtaqlank saʼ xbʼeenebʼ laj Judiiy ut nekeʼtzʼaqonk saʼ li nimla raqlebʼaal aatin. Laj Caifas, li xyuwaʼil aj tij, kibʼoqok rehebʼ saʼ li hoonal aʼin. Wiibʼ oxibʼ po anaqwan, li xyuwaʼil aj tij aʼin, aʼan li kixjolomi li raqok aatin saʼ xbʼeen li Jesus ut kixkʼe chi kamk (Mat. 26:57, 59; Hech. 6:8-12). Saʼ reqaj ribʼ nekeʼnumeʼk li testiiw chi xqʼabʼankil laj Esteban. Abʼanan, naq ebʼ li winq li nekeʼtaqlank saʼ xbʼeen laj Judiiy nekeʼxkaʼya laj Esteban, nekeʼsachk xchʼool naq li rilobʼaal chanchan rilobʼal jun li anjel (Hech. 6:13-15).

Kʼaʼut tuqtu xchʼool laj Esteban usta xuwajel li yook xkʼulbʼal? Naq toj maajiʼ nekeʼchalk xchapbʼal re xkʼebʼal chaq chiruhebʼ li winq li nekeʼtaqlank saʼ xbʼeenebʼ laj Judiiy, laj Esteban kaw xchʼool chi kʼanjelak chirix li chʼuut rikʼin xwankil li xsantil musiqʼej li Yos (Hech. 6:3-7). Naq yook chi raqmank aatin saʼ xbʼeen, li santil musiqʼej aʼin kikʼojobʼank re xchʼool ut kixjultika chiru li tixye (Juan 14:16). Joʼkan bʼiʼ, naq kixkol ribʼ chiruhebʼ laj raqol aatin, li santil musiqʼej kixjultika chiru 20 tana xraqal li Santil Hu li kitzʼiibʼamank chaq saʼ Hebreo ut aʼin natawmank saʼ Hechos 7 (Juan 14:26). Abʼan, qʼaxal kikawuuk wiʼ chik li xpaabʼal laj Esteban naq kiril jun li moy u bʼarwiʼ li Jesus xaqxo saʼ xnim uqʼ li Yos (Hech. 7:54-56, 59, 60).

Maare saʼ jun kutan laaʼo ajwiʼ wanqo saʼ jun li nimla rahilal bʼarwiʼ teʼxyeechiʼi qakamsinkil malaj qarahobʼtesinkil (Juan 15:20). Wi kʼaynaqo xkawresinkil li qapaabʼal rikʼin li Raatin li Yos ut kaw qachʼool chi xbʼaanunkil li xkʼanjel li Yos, tqakanabʼ naq li xsantil musiqʼej li Jehobʼa tixbʼeresi li qayuʼam. Ut tqataw ajwiʼ qametzʼew re xkuybʼal li rahobʼtesiik ut tuqtuuq li qachʼool (1 Ped. 4:12-14).