STEFANO aang’ethanĩire na arũme a kĩama gĩa Sanhedrini, arĩa maarĩ na ũũru mũingĩ mũno. Arũme acio 71 a igooti rĩu inene biũ thĩinĩ wa Isiraeli, maarĩ amwe a andũ arĩa maarĩ igweta mũno rũrĩrĩ-inĩ rũu. Maagomanĩtio hamwe nĩ Kaiafa Mũthĩnjĩri-Ngai Mũnene, ũrĩa mĩeri mĩnini mbere ĩyo warũgamĩrĩire igooti hĩndĩ ĩrĩa Jesu aatuĩrĩirũo kũũragwo. (Mat. 26:57, 59; Atũm. 6:8-12) Na rĩrĩa maarehaga aira a maheeni ũmwe thutha wa ũrĩa ũngĩ, nĩ moonire ũthiũ wa Stefano ũtariĩ “ta wa mũraika,” ũndũ ũrĩa wamagegirie.—Atũm. 6:13-15.

Stefano aahotire atĩa gũikara ahooreire na arĩ na thayũ ihinda-inĩ ta rĩu rĩa kũmakania? Atanatwarũo kĩa hinya mbere ya Sanhedrini, Stefano aakoretwo arikĩrĩte biũ wĩra-inĩ wa kũhunjia agĩtongorio nĩ roho wa Ngai. (Atũm. 6:3-7) Na hĩndĩ ĩyo aaciirithagio, roho o ũcio noguo warutaga wĩra thĩinĩ wake, ũkĩmũũmĩrĩria na ũkĩmũririkania maũndũ. (Joh. 14:16, kohoro ka magũrũ-inĩ.) O ta ũrĩa honanĩtio thĩinĩ wa Atũmwo 7, hĩndĩ ĩyo Stefano eetetagĩra arĩ na ũcamba, roho mũtheru nĩ wamũteithirie kũririkana icunjĩ 20 kana makĩria kuuma Maandĩko-inĩ ma Kĩhibirania. (Joh. 14:26) Ningĩ wĩtĩkio wa Stefano nĩ wekĩrirũo hinya makĩria rĩrĩa oonirio kĩoneki kĩa Jesu arũgamĩte guoko-inĩ kwa ũrĩo kwa Ngai.—Atũm. 7:54-56, 59, 60.

O na ithuĩ hĩndĩ ĩmwe no twĩkore tũkĩĩhĩtĩrũo na tũkĩnyarirũo. (Joh. 15:20) Angĩkorũo nĩ tũrĩthomaga Kiugo kĩa Ngai tũtegũtĩrĩria na tũgakorũo na kĩyo ũtungata-inĩ, nĩ tũrĩheaga roho wa Jehova mweke wa kũruta wĩra thĩinĩ witũ. O na ithuĩ nĩ tũrĩgĩaga na hinya wa gwĩtiiria ũkararia tũtekũũrũo nĩ thayũ witũ wa meciria.—1 Pet. 4:12-14