SITEFANESA kwa kere mokatji kovagara wovadona. Ngovahameni mo womosigongi somasimbi, vagara owo wovapanguli 71 kwa divikwire unene moIsraeli. Mupristeli gomunene Kayifasa ogu ga kere mupanguli posiruwo esi Jesus va mu tokwerere nomfa, yige ga va zigidire. (Mat. 26:57, 59; Yirug. 6:8-12) Ngomu va zigidire nombangi doyimpempa, konyima tava dimburura yuma eyi yava tetukisire, sipara saSitefanesa kwa fene “ngwendi somuengeli.”—Yirug. 6:13-15.

Ngapi omu Sitefanesa ga vhulire kulitura ngomu ga pitire moudigu wina? Komeho va mu rete posigongi somasimbi, mpepo zokupongoka kwa vaterere Sitefanesa a liture mo unene mosirugana sokuudisa. (Yirug. 6:3-7) Apa ga kere moudigu wina, mpepo ozo kwa mu hengagwidire nokumuvatera a diworoke eyi ga lirongere. (Joh. 14:16) Ngomu Sitefanesa ga geve umbangi ou va tjanga moYirugana egaununo 7, mpepo zokupongoka kwa mu vaterere a diworoke Matjangwa 20 ndi kupita opo goRuhebeli. (Joh. 14:26) Nye epuro lyaSitefanesa kwa peme unene apa ga mwene Jesus age ana sikama korulyo rwaKarunga memoneko.—Yirug. 7:54-56, 59, 60.

Ezuva limwe nose kuvhura ngatu ligwanekere nomahepeko ntani makwamakwamo. (Joh. 15:20) Nye nsene tu resa Nonkango daKarunga nkenye ezuva nokulitura mo unene mokuzuvhisa, mpepo zokupongoka ngazi tu vatera. Ngatu gwana hena nonkondo dokulididimikira mahepeko nokutwikira kukara nombili zomomutjima.—1 Pet. 4:12-14.