SETEFWANO vamutwalile kuzango yakusopela kuli vaka-kuyula vaze vapwile namatoto. Hakuwana nge ava vaka-kuyula 71 vazachilenga muzango yayinene yaSunendeline muIsalele, ngocho vatu vavamwenenga kupwa vavalemu chikuma. Halwola kanelu, ava vaka-kuyula valikungulwilile kuli Kapilishitu Wakulitulaho Kayafwase, uze asopele chihande chaYesu omu vamukwachile mangana vamujihe. (Mateu 26:57, 59; Vili. 6:8-12) Omu vatwalileho lika kuhana unjiho wamakuli, ava vaka-kuyula vamwene chuma chakukomwesa hali Setefwano, kumeso enyi “kwapwile nge kumeso akangelo.”—Vili. 6:13-15.

Vyuma muka vyakafwile Setefwano ahole kulu nakuunda muchima halwola kana? Shimbu kanda Setefwano vamutwale kuzango yaSunendeline, shipilitu yaKalunga yamukafwilenga ahase kuzata mulimo wakwambulula natwima. (Vili. 6:3-7) Omu apwile mucheseko kana, shipilitu yoyimwe yamuvendejekelenga nakumwanukisa. (Yowa. 14:16; kwinyikila chamwishi) Mukanda waVilinga kapetulu 7 wamba ngwawo omu Setefwano asolwele kumika chenyi, shipilitu yajila yamwanukishile mijimbu 20 chipwe kuhambakanyisaho yamuVisoneka VyachiHepeleu. (Yowa. 14:26) Chuma chikwavo chazamishile lufwelelo lwenyi shina chakumwenesa chize chasolwele Yesu nemana kulivoko lyaKalunga lyachilyo.—Vili. 7:54-56, 59, 60.

Tachikizenu ngwenu likumbi limwe nayetu vanahase kukatufumbukila nakutuyanjisa. (Yowa. 15:20) Shikaho kachi nge natutanganga Mazu aKalunga nakuyanga muwande lwola lwosena, kaha natulingisa shipilitu yaYehova yizate hali etu. Nachitukafwa nawa tupwenga vakumika nge vali nakutuyanjisa nakutwalaho lika kupwa vakuunda.—Petu. 1, 4:12-14.