MUNGA imo ya vanalume yalwithile Setefano. Ava vanalume 71 vapwile vamembala va nkuta yakama ya mu Isalele ya Sunandeline, cho vakele na moko ya kuthompa. Ava vanalume vakungulukilile kuli Kapilisitu Wakama Kayafase, uje wakwile ñanda ya Yesu. Kwetile lika vingonde vyavindondo kutunda hathsililile Yesu. (Mateo 26:57, 59; Vili 6:8-12) Muvakele na kunena vanalume vaje vamuvangeyeye, vakomokele manene muvamwene chihanga cha Setefano ‘chisholoka ngwe cha kangelo.’—Vili 6:13-15.

Vika vyakwathele Setefano athimpe muvamujujwithile? Thimbu kanda vamutwale kukamuthompetha ku nkuta ya Sunandeline, Setefano wakele manene mbunge ku chipangi cha kwambulula, cho sipilitu ya Njambi yamukwathele. (Vili 6:3-7) Setefano muvamuthompethele, ije vene sipilitu ya kujela yamuthzembelekele na kumwanukitha vyuma vimo. (Yowa 14:16) Setefano wathimpile na kwendeka majwi ali ku Vilinga kapetulu 7, sipilitu ya Njambi yamwanukithile viñanda vya kupwa 20 vya mu Vithoneka vya Chihevelu. (Yowa 14:26) Cho lalo likulahelo lya Setefano lyakanyamene manene mwamwene Yesu mu chimona, nemana ku livoko lya chilyo lya Njambi.—Vili 7:54-56, 59, 60.

Netu thimbu imo vanu vatha kutujujwitha nambe kutupaketha. (Yowa 15:20) Nga tutanda Lijwi lya Njambi thimbu yoshe na kupanga chipangi cha kwambulula na ndthzili, cho sipilitu ya Yehova itutwamenena. Cho lalo tukala na ndthzili ya kulikoletha mu mapaketho na kutwalelelaho kukala mu kwoloka.—1 Petu 4:12-14.