SITIVINI wazanzilwe kwi umba lya yonsi alwani. Vino aonsi kwene yayo 71 yaombelanga umu cilye ca Sanihedilini nupya yali aakapingula, yakweti sana maka. Simapepo Mukulu Kayafa aliwe wayakonganike nupya u watungululanga umu cilye pa myezi inono iyapisilepo nu kupingula ukukoma Yesu. (Mate. 26:57, 59; Mili. 6:8-12) Lino yaletanga ya kamboni yaufi apusanepusane, yaweni cintu cimwi icayazungwisye pali Sitivini, usyu wakwe walolekanga “kwati uwa mungeli.”—Mili. 6:13-15.

Uzye Sitivini watwalilile uli ukukana uvwa intete nanti cakuti ivyacitikanga vyali ivya kutiinya? Lino yatatala yamutwala umu cilye ca Sanihedilini, Sitivini waombesyanga umu mulimo wa kusimikila ala umupasi wakwe Leza uwakwatisya maka ukumwazwa. (Mili. 6:3-7) Lino yapitulukanga umu mulandu wakwe, umupasi uliumwi kwene wali pali aliwe, ala ukumuteekezya nu kumwazwa ukwiusya ivyeo ivicindame. (Yoa. 14:16) Lino Sitivini walolekiile umu cilye ala watasipa, wakwe vino calembwa muli Milimo icipande 7, umupasi wamwazwile ukwiusya amalyasi amu Malembelo ya Ciyebulai 20 nanti ukucilapo. (Yoa. 14:26) Nomba utailo wakwe Sitivini wakomiileko lino waweni Yesu umu cilolwa wataimilila ukwi kasa lilunji lyakwe Leza.—Mili. 7:54-56, 59, 60.

Naswe wanda umwi yangatutiinya nu kutuzunya. (Yoa. 15:20) Ndi tukuisambilizya Baibo nu kuombesya umu mulimo wa kusimikila, tukaleka kuti umupasi wakwe Yeova waomba muli sweswe. Naswe tulakwata amaka lino yakutukaanya nu kutwalilila ukuya nu mutende.—1 Pet. 4:12-14.