ESTEBAN ijkatok ininixpa tlakamej katli kikualankaitaj, eliyayaj 71 tetlajtolsenkauanij tlen itstoyaj ipan nopa ueyi tlasentilistli, tlen kiiljuiyayaj Sanedrín, tlen kinyakanayaya judíos. Eliyayaj se keskij tlakamej katli kipixtoyaj miak tlanauatili ipan nopa altepetl. Kinsentilijtoya nopa sacerdote Caifás, yaya katli tlayakanki kema kitlajtolsenkajkej Jesús kampa moijtok kinamikiyaya mikis, amo kipixtoya miak metstli ika panotoya nopa tlamantli (Mat. 26:57, 59; Hech. 6:8-12). Miakej kiistlakauiyayaj. Uajka, katli mosentilijtoyaj mosentlachilijkej pampa Esteban ixayak “nesiyaya keja ixayak se iluikaejketl” (Hech. 6:13-15).

¿Kenke Esteban amo majmauiyaya kema itstoya kampa Sanedrín? Kema ayamo kichiualtiyayaj ma yaui kampa nopa Sanedrín, Esteban mosentlalijtoya tlatekipanos ipan tlanechikoli ika itlapaleuil toTeotsij itonal (Hech. 6:3-7). Kema kitlajtolsenkauayayaj, toTeotsij itonal kiyolchikajki uan kipaleuik ma kiilnamiki se keski tlamantli (Juan 14:16). Ipan capítulo 7 tlen Hechos kiijtoua kema Esteban momanauiyaya uan nopaya nesi kenijkatsa toTeotsij itonal kipaleuik ma kiilnamiki se veinte tlapoualistli tlen eltok ipan Escrituras Hebreas (Juan 14:26). Kema Esteban kiitak “Jesús ijkatoya ika inejmatl toTeko” kipaleuik nojua kuali ma tlaneltoka (Hech. 7:54-56, 59, 60).

Se tonali uelis nojkia kinekisej techchiuilisej tlen amo kuali uan techtlatsakuiltisej (Juan 15:20). Tlaj timomajtokej timomachtiaj toTeotsij iTlajtol uan timosentlalijtokej titlajtolmoyauasej, tijkauasej toTeotsij itonal ma techyakana ipan tonemilis. Nojkia tikijiyouisej kema techtlatsakuiltisej uan amo timajmauisej (1 Ped. 4:12-14).