STEFANUS okwa li a taalelwa kongundu yaalumentu ya lya moonyandi. Aalumentu mboka oya li iilyo yompangu onenenene muIsraeli, hayi ithanwa oshigongi shaatokoli. Aatokoli mboka oya li 71 noya li yamwe yomwaamboka ye na oonkondo lela moshigwana. Oya gongalekwa komuyambimukuluntu, Kajafas, ngoka a li a kwata ko ompangu oomwedhi oonshona dha tetekele, manga Jesus inaa tokolelwa eso. (Mat. 26:57, 59; Iil. 6:8-12) Sho ya tameke okweeta mo aalumentu aaniifundja, oya ndhindhilike oshinima tashi kumitha kombinga yaStefanus. Oshipala she osha li tashi monika sha “fa oshipala shomuyengeli.” — Iil. 6:13-15.

Stefanus okwa vulu ngiini okukala a gundjila monkalo ndjoka ondhigu? Manga inaaye mu kookololela komeho yaatokoli, Stefanus okwa kala i itula mo lela miilonga yokuuvitha, kohi yewiliko lyombepo yaKalunga. (Iil. 6:3-7) Sho ta pangulwa, ombepo oyo tuu ndjoka oya li pamwe naye, tayi mu hekeleke noku mu kwathela a dhimbulukwe omanyolo. (Joh. 14:16) Sho Stefanus a tameke okwiipopila, ngaashi sha popiwa mIilonga ontopolwa 7, ombepo ondjapuki oye mu kwathele a dhimbulukwe Omanyolo gOshihebeli 20 lwaampono nenge ge vulithe po. (Joh. 14:26) Eitaalo lyaStefanus olya li lya kolekwa ishewe, sho a mono emoniko lyaJesus a thikama kolulyo lwaKalunga. — Iil. 7:54-56, 59, 60.

Natse otashi vulika esiku limwe tu ki iyadhe twa taalelwa komahepeko nokomapataneko. (Joh. 15:20) Ngele otwa kala hatu lesha Oohapu dhaKalunga nokuuvitha nuulaadhi, kungawo otatu etha ombepo yaJehova yi tu kwathele. Otatu ka kala wo twa nkondopalekwa tu vule okukondjitha omapataneko notu kale tu na ombili yokomwenyo. — 1 Pet. 4:12-14.