ESTEBAN nemiya imixpan sekimej tlakamej akin melak xkuakualtin. Nemiya imixpan 71 judíos akin teuan katkaj itech Sanedrín, kampa kinyolkuitiayaj judíos. Yejon tlakamej melak uejueyixtoyaj ipan ueyi kalpan. Ueyi teopixki Caifás okinsentlalijka. Yopanoka seki metstin, teopixki Caifás yejua akin okiyenkaka yejon tlanechikojli ijkuak okitlajtlakolmakakej Jesús niman ijkon makimiktikan (Mat. 26:57, 59; Hech. 6:8-12). Miyekej okintlatitlanilijkaj niman ijkon makijtokan tlen xmelauak itech Esteban. Sakin, omojkatlachixkej ijkuak okitakej ika ixayak Esteban onokauj ken “ixayak se iluikaktekitketl” (Hech. 6:13-15).

¿Kenon Esteban okipix yolchikaualistli ijkuak nemiya imixpan yejon tlakamej? Achto ika kuikaskiaj ipan Sanedrín, Esteban chikauak tekichiujtoya ipan tlanechikojli pampa iespíritu santo toTajtsin kipaleuijtoya (Hech. 6:3-7). Ipan yejon tlen aman kixnamiktoya, iespíritu santo toTajtsin noijki kipaleuijtoya. Kema, espíritu santo okiyolseui niman okichiuj makilnamiki miyek tlemach (Juan 14:16). Ijkuak Esteban imiuan tlajtotoya ika yolchikaualistli, ken nesi ipan Hechos tlaxelojli ueyi 7, iespíritu santo toTajtsin okichiuj makilnamiki ipantsin 20 tlaxeloltin tlen nesij ipan Tlajkuiloltin ika Hebreo (Juan 14:26). San ika, itlaneltokil Esteban melak ochikauj ipampa yejon tlatlachialistli kampa okitak ika Jesús “ijkatikatka iyekmakopa Dios” (Hech. 7:54-56, 59, 60).

Kanaj noijki ajsis se tonajli ijkuak tikixnamikiskej tlatlatalistin niman uelis techtlaueltokaskej (Juan 15:20). San ika, tla mojmostla tomachtiaj iTlajtol toTajtsin niman chikauak tiktekichiuiliaj Jehová, kuakon, iespíritu santo Jehová techpaleuis. Tejuamej noijki uelis tikpiyaskej chikaualistli niman ijkon titlaxikoskej ijkuak techtlaueltokaskej niman noijki uelis tinemiskej ika toyojlo (1 Ped. 4:12-14).