INMARAP si Esteban ed sakey ya grupo na mauges iran lalaki. Bilang membro na atagey a korte ed Israel, say Sanhedrin, saraman ya 71 ya ukom et kaibad saray sankamaimpluensyaan ya lalaki ed bansa. Tinipon ira na Atagey a Saserdote ya si Caifas, ya pigay bulan lan mangidadaulo ed korte antis nin nasentensiaan na patey si Jesus. (Mat. 26:57, 59; Gawa 6:8-12) Legan dan sansakey ya iyaarap iray palson testigo, walay naimano dan makapakelaw ed si Esteban​—say lupa to et “singa lupay anghel.”​—Gawa 6:13-15.

Panon ya akapansiansian kalmado si Esteban diad satan ya makapataktakot a situasyon? Antis nin inyarap ed Sanhedrin si Esteban, inusar to la so amin ya panaon tan biskeg to diad kimey a panaglingkor diad mabiskeg ya pakayari na espiritu na Dios. (Gawa 6:3-7) Satan ya espiritu met so walad sikato sanen sikatoy lilitisen, bilang managligliwa tan manangipanonot. (Juan 14:16, paimanod leksab) Legan ya makpel ya mangidedepensa si Esteban, ya akarekord ed Gawa kapitulo 7, impanonot ed sikato na masanton espiritu so manga 20 odino masulok nin teksto manlapud Hebreon Kasulatan. (Juan 14:26) Balet lalon binmiskeg so pananisia nen Esteban sanen panamegley na sakey ya pasingawey et anengneng toy Jesus ya akaalagey ed nikawanan na Dios.​—Gawa 7:54-56, 59, 60.

Ompan onsabi met so panaon ya onarap tayod panamagyaw tan panamasegsegang. (Juan 15:20) Diad regular ya pambasa tayo na Salita na Dios tan aktibon pibibiang tayod ministeryo, aabuloyan tayon niwala ed sikatayo so espiritu nen Jehova. Nawalaan tayo met na biskeg pian nasarag iray isusumpa legan tayon mansiasiansian kalmado.​—1 Ped. 4:12-14.