ISXIFAANOOSI kaajjadu manni beebba assiˈrinosi. Israeelete giddo aliidi yoo mine ikkinohu Sanihediriini shongoti 71 miilla lowo silxaane noonsa mannaati. Insa shiimu agani albaanni Yesuusa shini woyite hatte shongo massaginohu Kakkalaanote Roorrichi Qeyaafa widoonni gamba yitino. (Mat. 26:57, 59; Soq. 6:8-12) Insa batinye kaphu naqaashe abbitu gedensaanni mitto dhagge ikkanno coye wodanchitino; “mannu baalu Isxifaanoosi seekke laˈˈanno woyite albisi sokkaasinete gede xawanni” no.—Soq. 6:13-15.

Isxifaanoosi buutote qarri giddo heeˈre togo wodanaaˈma dandiinohu hiittoonniiti? Isxifaanoosi Sanihediriini shongo shiqara albaanni Maganu ayyaani massagannasi soqqanshosi diinaggaawe soqqamanni keeshshino. (Soq. 6:3-7) Isira kuni fonqolu iillisi yannarano, hakku ayyaani ledosi no; kuni ayyaani shesho afiˈrannonna qaaganno gede kaaˈlinosi. (Yoh. 14:16) Soqqamaasinete Looso 7te aana xawinsoonni garinni Isxifaanoosi waajjikkinni gargarooshshe shiqishiˈri woyite qullaawu ayyaani Ibiraawootu Afiite Qullaawa Borronni 20 saˈanno hedo qaaganno gede kaaˈlinosi. (Yoh. 14:26) Ikkollana Isxifaanoosi Yesuusi Maganu qiniiteenni uurre heeˈreenna ajuujatenni lai yannarano ammanasi kaajjitino.—Soq. 7:54-56, 59, 60.

Ninkerano buutote fonqolinna dartu iillankera dandaanno. (Yoh. 15:20) Maganu Qaale ganyine sagaˈlankenna diinaggaawe soqqamanke Yihowa ayyaani massagannonke gede assitanno. Qoleno giddiidi keerinke baikkinni kaajjine uurra dandiineemmo.—1 Phe. 4:12-14.