NA FEAGAI Setefano ma se vaega o tagata tetee. O nei tamāloloa o le Faamasinoga Sili lea i Isaraelu e faia aʻe i faamasino e toʻa 71, ma e telē le malosiaga sa iai iā i latou. Sa faapotopoto i latou e le Ositaulaga Sili o Kaiafa, lea foʻi na taʻimua i le faamasinoga na faia i nai masina muamua atu, lea na faasalaina ai Iesu i le oti. (Mata. 26:57, 59; Galu. 6:8-12) A o latou aumaia molimau pepelo, e iai se mea mataʻina na latou mātauina iā Setefano, na toʻafilemu ona foliga e pei “o fofoga o se agelu.”​—Galu. 6:13-15.

Na faapefea ona maua e Setefano le toʻafilemu a o feagai ma lenā tulaga faigatā? A o leʻi aveina faamalosi o ia i le Faamasinoga Sili, sa maelega o ia i lana faiva lea sa taʻitaʻia e le agaga o le Atua. (Galu. 6:3-7) Ina ua faamasinoina o ia, sa fesoasoani foʻi le agaga lava lea e faamāfanafana o ia ma faamanatu mea iā te ia. (Ioa. 14:16) O loo faamauina i le Galuega mataupu e 7, a o tali atu ma le lototele Setefano, na faamanatu atu e le agaga paia iā te ia le pe ā ma le 20 mau mai i Tusitusiga Paia Eperu. (Ioa. 14:26) Peitaʻi, na atili ona faamalosia le faatuatua o Setefano ina ua ia vaaia i se faaaliga o loo tū Iesu i le itu taumatau o le Atua.​—Galu. 7:54-56, 59, 60.

Atonu e iai le aso o le a tatou feagai ai ma faamataʻuga ma sauāga. (Ioa. 15:20) Peitaʻi, o le a galue le agaga paia o Ieova iā i tatou pe a faitau e lē aunoa i le Afioga a le Atua, ma maelega i le faiva. O le a tatou maua foʻi le malosi e onosaia ai teteega, ma maua ai pea le filemu o le loto ma le mafaufau.​—1 Pete. 4:12-14.