SEFANU yange tile sha ishigh ki ior mba vihin tu kpen kpen. Ior mban lu mbaajiriv 71 mba ken Mkohol u Mbaajiriv u Mbayuda; koti môm lu a tahav hemba koti ne ken Iserael ga. Shi ior mban lu ken atô u ior mba ve hemba lun a tahav ken tar la yô. Lu Pristi u Tamen Kayafa yila mkohol ne ye. Shi ka un kpa yange hemen ken ijir i i ôr Yesu i kure ér a kuma ku ken iwer i i kar kpuaa ken ijime la ye. (Mat. 26:57, 59; Aer. 6:8-12) Er ve lu van a mbashiada mba aiev, ve lu wan Sefanu akaa iyol kposo kposo la, ve gema ve nenge kwagh ugen u kpiligh ve iyol yô; ishigh ki Sefanu lu “er ka ishigh ki ortyom u Sha nahan.”—Aer. 6:13-15.

Er nan Sefanu yange gba ishima ikyôr shi icile tenger un ga ken imba mlu u cier iyol ne nahana? Cii ve i za kôr un i va a na hen Mkohol u Mbaajiriv ne yô, yange uve ityough eren tom u i tsua un er a er la, shi jijingi u Aôndo lu eren tom ken a na. (Aer. 6:3-7) Shighe u tile sha ishigh ki mbaajiriv la kpa jijingi ne lu eren tom ken a na her, lu un orsurunshima shi lu umbur un akaa. (Yoh. 14:16) Shighe u Sefanu mough u ôron kwagh sha akaa a i wa un iyol, er i nger ken Aerenakaa ityough 7 la, icighan jijingi yange umbur un avegher a Ruamabera u ken zwa Heberu la a kuman 20 shin hemban nahala. (Yoh. 14:26) Shi jighjigh u Sefanu yange seer taver zum u i tese un mpase u sha mnenge, a nenge Yesu tile ken uwegh ku yanegh ku Aôndo la.—Aer. 7:54-56, 59, 60.

Se kpa alaghga yange sev a hungwa a av se tagher a akaa a anger se shi a tôv se a ican. (Yoh. 15:20) Aluer se mba ôron Mkaanem ma Aôndo hanma shighe shi se mba eren tom u pasen kwagh kpoghuloo yô, se na jijingi u Yehova ian una lu eren tom ken a vese. Shi se zua a agee a tilen dông shighe u i lu tôvon se a ican yô, shi se lu bem bem kpaa.—1 Pet. 4:12-14.