STƐFANO aki la ntondo ka olui w’apami wa kɔlɔ. Oko wakiwɔ ase tominadi ta laadiko ta l’Isariyɛlɛ, toshushi 71 tɔsɔ waki l’atei w’apami waki la lowandji l’efula lo wodja. Kayifasi laki ɔlɔmbɛdi a laadiko, ɔnɛ lakalɔmbɔla tominadi tɔsɔ ngɔndɔ mɔtshi la ntondo etena kakawafundɛ Yeso nyɔi, akaatshumanya. (Mat. 26:57, 59; Ets. 6:8-12) Etena kakataka anto wotshikitanyi awui wa kashi dia mbofunda, vɔ wakɛnyi dui dimɔtshi dia diambo le Stɛfano, “elungi kande kaki oko ka ondjelo.”​—Ets. 6:13-15.

Ngande wakakoke Stɛfano ntshikala ki l’etena ka ngasɔ? Ntondo ka vɔ mbɔtɔla la ntondo k’ase tominadi ta laadiko, Stɛfano akayashaka tshɛ l’olimu w’esambishelo l’ɛlɔmbwɛlɔ ka nyuma ka Nzambi. (Ets. 6:3-7) Etena kakinde lo kilombo, nyuma kakɔ kɛsɔ kakakambe olimu le nde oko osambi ndo ombohodi. (Jni. 14:16, nɔtɛ) Etena kakatɛkɛtaka Stɛfano, awui wakayofundama lo Etsha tshapita 7, nyuma k’ekila kakawohola avɛsa 20 w’oma l’Afundelo wa lo Hɛbɛru kana ndekana. (Jni. 14:26) Koko mbetawɔ ka Stɛfano kakaleke nkeketala etena kakandɛnyi lo ɛnɛlɔ Yeso emadi lo lonya l’omi la Nzambi.​—Ets. 7:54-56, 59, 60.

Ondo lushi lɔmɔtshi anto koka taanɛ kana tɔhɛnyahɛnya. (Jni. 15:20) Naka sho ndjaleshaka mbala la mbala oma l’Ɔtɛkɛta wa Nzambi ndo sambishaka mbala la mbala, kete tayosha nyuma ka Jehowa diaaso dia nkamba olimu le so. Laadiko dia laasɔ, tayokondja wolo wa nshika ntanga la ntondo k’ɔlɔshamelo ndo tayotetemala monga la wɔladi wa l’etei k’otema.​—1 Pe. 4:12-14.