JA Esteban tey bʼa stiʼ sat jun nole winik kontraʼanume, ja 71 jwesik wa xtax ja bʼa tribunal mas chaʼan ja bʼa judíoʼiki. Kʼotele jujuntik ja winike mas jel ja yipe ja bʼa chonabʼi. Tsomubʼale yuja mero olomal Caifás, ja maʼ bʼajtan bʼej ajyi ja yajni ilxi ja jasa oj kʼulajukyi ja Jesús bʼa milji (Mat. 26:57, 59; Hech. 6:8-12). Jelni jitsan ja matik lom sleʼaweyi smuli. Anto, ja matik teye ja bʼa tribunal skʼelawe ja Esteban sok yilawe jun jasunuk jel chamyabʼjel: ja sniʼ sati jach «jastal sat jun ángel» (Hech. 6:13-15).

¿Jastal bʼobʼ ajyuk laman ja Esteban bʼa jun ekʼele jel xyaʼa xiwel? Bʼajtanto yuj oj ijuk och tarega ja bʼa Sanedrín, ja Esteban jani wajel skʼujol ja yaʼtel ja bʼa kongregasyon soka skoltanel ja yip ja Dyosi (Hech. 6:3-7). Yajni wan iljel jas oj kʼulajukyiʼi, ja ipal jaw aji kulan skʼujol sok aji lamxuk ja spensari (Juan 14:16). Yajni wan skoltajel sbʼaj ja bʼa tribunal, bʼa wa xtaʼatik tsʼijbʼunubʼal ja bʼa kapitulo 7 bʼa Hechos, aji julyi skʼujol yuja yip ja Dyosi 20 tekstoʼik ja bʼa juʼunik tsʼijbʼunubʼal bʼa hebreo (Juan 14:26). Pe ja skʼuʼajel ajyiyuj ja Esteban tsatsbʼi mas yajni jejiyi ja nakʼ satal bʼa ti tekʼan ekʼ ja Jesús bʼa stsʼeʼel ja Dyosi (Hech. 7:54-56, 59, 60).

Bʼobʼta oj eljul ja kʼakʼu ja keʼntik oj ixtalujokotik ma oj iljukotik kontra (Juan 15:20). Ta ja keʼntiki kʼajyelotik smakʼlajel jbʼajtik soka Yabʼal ja Dyosi sok wajel jkʼujoltik ja bʼa yaʼteltajeli, ojni katikan ja yip ja Jyoba a-stojotik. Cha ojni ajukitik ja ipal bʼa oj kuchkujtik ja yajni wala iljitik kontra sok oj ajyukujtik ja lamanil ja bʼa kojoltiki (1 Ped. 4:12-14).