STEFANO u langutane ni ntlawa wa vavanuna lava nga ni tihanyi. Leswi va nga swirho swa huvo leyi tlakukeke ya le Israyele, ku nga Sanedri, vaavanyisi volavo va 71, i van’wana va vavanuna lava nga ni vulawuri lebyikulu etikweni. Va hlengeletiwe hi Muprista Lonkulu Kayafasi, loyi a rhangele huvo eka tin’hweti ti nga ri tingani leti hundzeke loko Yesu a gweviwa rifu. (Mat. 26:​57, 59; Mint. 6:​8-⁠12) Loko vanhu lava a va n’wi hehla hi mavunwa va ri karhi va nghena ha un’we un’we, va vone nchumu wo hlamarisa eka Stefano, xikandza xakwe a xi “fana ni xikandza xa ntsumi.”​—⁠Mint. 6:​13-⁠15.

Xana Stefano a ta swi kotisa ku yini ku va la rhuleke eka xiyimo xo tano lexi chavisaka? Loko Stefano a nga si kokakokiwa a yisiwa emahlweni ka Sanedri, a a tinyiketele hi ku helela eka ntirho wakwe lowu a pfuniwa hi moya wa Xikwembu. (Mint. 6:​3-⁠7) Loko a ri karhi a tengisiwa, moya wa Xikwembu a wu ri karhi wu tirha eka yena tanihi muchaveleri tlhelo mutsundzuxi. (Yoh. 14:​16) Loko Stefano a ri karhi a tihlamulela hi xivindzi, hilaha swi tsariweke hakona eka Mintirho ndzima 7, moya lowo kwetsima wu n’wi tsundzuxe tindzimana ta kwalomu ka 20 leti nga eMatsalweni ya Xiheveru. (Yoh. 14:​26) Ripfumelo ra Stefano ri ye ri tiya swinene loko a vona Yesu a yime evokweni ra xinene ra Xikwembu exivonweni.​—⁠Mint. 7:​54-56, 59, 60.

Siku rin’wana, na hina hi nga ha tikuma hi langutane ni ku xungetiwa ni ku xanisiwa. (Yoh. 15:​20) Loko hi tiwundla hi Rito ra Xikwembu nkarhi na nkarhi ni ku hisekela ntirho wo chumayela, hi ta va hi ri karhi hi pfumelela moya wa Yehovha wu tirha eka hina. Hi ta tlhela hi kuma matimba yo lwisana ni nkaneto ni ku va ni ku rhula ka miehleketo.​—⁠1 Pet. 4:​12-⁠14.