STEFANO wakakumana na ŵanalume ŵankhaza. Ŵeruzgi 71 aŵa ŵakaŵa ŵanthu ŵankhongono chomene chifukwa chakuti ŵakaŵa ŵa mu khoti likuru chomene mu Israyeli la Sanihedirini. Ŵakachemeka na Wasembe Mukuru Kayafa, uyo myezi yichoko waka kumasinda wakadangilira apo Yesu wakakomekanga. (Mat. 26:57, 59; Mil. 6:8-12) Apo ŵakachemanga ŵakaboni ŵatesi ŵakupambanapambana, ŵakawona chinthu chinyake chakuziziswa chakukhwaskana na Stefano. Ŵakawona kuti chisko chake chikawonekanga “nga ntchisko cha mungelo.”—Mil. 6:13-15.

Chifukwa wuli Stefano wakatenthema yayi nangauli wakakumana na ŵanthu ŵankhaza? Pambere wandatorekere panthazi pa Sanihedirini, Stefano wakatangwanikanga na uteŵeti wake ndipo nkhongono ya mzimu utuŵa yikamovwiranga. (Mil. 6:3-7) Pa nyengo ya chiyezgo ichi, mzimu uwu ndiwo ukamovwiranga, pakumusanguluska na kumukumbuska fundo izo wakasambira. (Yoh. 14:16; mazgu ghamusi) Apo Stefano wakayowoyanga mwachikanga fundo zakujivikilira, izo zili pa Milimo chipaturo 7, mzimu utuŵa ukamukumbuska fundo 20 panji kujumphirapo za mu Malemba gha Chihebere. (Yoh. 14:26) Kweni chipulikano cha Stefano chikakhozgekaso chomene apo wakawona mboniwoni yakulongora Yesu wimilira ku woko lamalyero la Chiuta.—Mil. 7:54-56, 59, 60.

Nase zuŵa linyake ŵanthu ŵangazakatiwofya panji kutitambuzga. (Yoh. 15:20) Para nyengo zose tikusambira Mazgu gha Chiuta kweniso kunjira mu uteŵeti, tikuzomerezga mzimu wa Yehova kuti ugwirenge ntchito mwa ise. Kweniso tisangenge nkhongono kuti tileke kuthera para ŵanthu ŵakutisuska, uku tikulutilira kuŵa na mtende wa mu mtima.—1 Pet. 4:12-14.