STEFANO o vha o sedzana na tshigwada tsha vhanna vho halifhaho vhukuma. Khoro ya Sanhedrini yo vha i yone khoro khulwanesa kha ḽa Isiraele nahone vhahaṱuli vha 71 vho vha vhe vhaṅwe vhane vha vha na maanḓa kha lushaka. Vho vha vho kuvhanganywa nga Tshifhe Muhulu Kayafa we miṅwedzini i si gathi yo fhiraho a gwevhela Yesu lufu. (Mat. 26:57, 59; Mish. 6:8-12) Musi vha tshi khou mu pomoka mazwifhi, vho ṱhogomela zwiṅwe zwithu zwi mangadzaho nga ha Stefano—tshifhaṱuwo tshawe tsho vha “tshi tshi nga tsha muruṅwa.”—Mish. 6:13-15.

Stefano o dzula hani o dzika naho e kha honoho vhuimo vhu konḓaho? Musi a sa athu u kokodzelwa khoroni ya Sanhedrini, o vha o ḓiimisela kha mushumo wawe wa u huwelela a tshi thuswa nga muya wa Mudzimu. (Mish. 6:3-7) Musi e tsengoni, wonoyo muya wo vha u tshi khou mu khuthadza na u ita uri a humbule. (Yoh. 14:16) Nḓila ya tshivhindi ye Stefano a ḓiimelela ngayo yo ṅwalwa kha bugu ya Mishumo ndima ya 7 nahone muya mukhethwa wo ita uri a humbule maṅwalo a ṱoḓaho u vha 20 kana u fhira a bvaho kha Maṅwalo a Luheberu. (Yoh. 14:26) Fhedzi lutendo lwa Stefano lwo tou ṋaṋa u khwaṱha musi a tshi vhona Yesu kha bono o ima kha tshanḓa tsha u ḽa tsha Mudzimu.—Mish. 7:54-56, 59, 60.

Ri nga ḓiwana nga ḽiṅwe ḓuvha ri tshi khou shushedzwa na u tovholwa. (Yoh. 15:20) Musi ri tshi vhala Ipfi ḽa Mudzimu ḓuvha ḽiṅwe na ḽiṅwe na u fhisetshela vhuḓinḓa, ri vha ri tshi khou tendela muya mukhethwa wa Yehova uri u shume kha riṋe. Ri ḓo dovha ra vha na maanḓa a u kona u konḓelela u tovholwa ngeno ri tshi khou vha na mulalo.—1 Pet. 4:12-14.