ESTEBANEʼ tiʼ waʼalakbal tu táan junjaats j-kʼasaʼan máakoʼobeʼ, le 71 juezoʼob ku meyajoʼob ichil le Sanedrín, le nojoch tribunal judío kaʼachoʼ. Jujuntúul tiʼ le máaxoʼob maas yaʼab páajtalil yaan kaʼach tiʼob teʼ kaajoʼ. Letiʼobeʼ muʼuchʼoʼob tumen Caifás, le máax nuʼukt le juicio beetaʼab le kʼiin ka aʼalaʼab ka kíimsaʼak Jesusoʼ (Mat. 26:57, 59; Bax. 6:8-12). Ook jejeláas máaxoʼob tʼaan tu contra Esteban. Baʼaleʼ ka paktaʼab tumen le máaxoʼob táakaʼanoʼob ichil le Sanedrinoʼ, jaʼakʼ u yóoloʼob ka tu yiloʼob u táan u yicheʼ chíikaʼan tiʼ u táan u yich juntúul ángel (Bax. 6:13-15).

¿Baʼax áant Esteban utiaʼal maʼ u sajaktal tu táanoʼob? Táanil tiʼ u bisaʼal teʼ Sanedrinoʼ, jach u tsʼaamaj u yóol meyaj teʼ múuchʼulil yéetel u yáantaj u kiliʼich muukʼ Diosoʼ (Bax. 6:3-7). Le táan u juzgartaʼaloʼ, líiʼsaʼab u yóol tumen le kiliʼich muukʼoʼ yéetel áantaʼab u kʼaʼajs baʼaxoʼob u xokmaj (Juan 14:16). Le oʼolaleʼ le tiaʼan tu táan le tribunal, jeʼex u yaʼalik le capítulo 7 tiʼ Baʼaxoʼoboʼ, áantaʼab tumen le kiliʼich muukʼ u kʼaʼajs kex veinte baʼaxoʼob ku tsikbaltik le Kiliʼich Tsʼíiboʼob ich Hebreooʼ (Juan 14:26). Baʼaleʼ maas muʼukʼaʼanchaj u fe Esteban ka tu yilaj ichil junpʼéel náay tiʼ waʼalakbal Jesús tu x-noʼoj Dioseʼ (Bax. 7:54-56, 59, 60).

Maʼ xaaneʼ toʼoneʼ jeʼel k-chʼaʼpachtaʼal xaneʼ (Juan 15:20). Wa suuk k-xokik le Biblia yéetel k-tsʼáaik k-óol k-meyajt Diosoʼ, yaan u páajtal k-áantaʼal tumen u kiliʼich muukʼ Jéeoba. Tsʼoʼoleʼ yaan u páajtal u chúukpajal k-óol yéetel yaan u yantaltoʼon jeetsʼelil (1 Ped. 4:12-14).