Chros Eena Jehoava ahn Liv!
“Chros eena Jehoava wid aala yu haat, ahn noh pen pahn yu oan andastandin.”—PROV. 3:5.
1. Wai aala wi need komfert?
AALA wi need komfert. Maybi tingz noh di werk owt di way wi waahn, ahn wi laif ful op a woriz ahn schres. Maybi wi di sofa bikaaz a siknis, oal ayj, er bikaaz sohnbadi eena wi famili er wan a wi frenz ded. Sohntaim peepl chreet wi bad. Pahn tap a dat, peepl rong wi di geh moa ahn moa vailent. Wee kanvins dat dehnya “terabl taimz” da proof dat wi di liv eena di “laas dayz” an dat eech day weh paas bring wi kloasa tu di nyoo werl. (2 Tim. 3:1) Bot, maybi wi di wayt fahn lang taim fi si aala Jehoava pramis dehn kohn chroo, ahn wi prablem dehn jos di geh wos. Soh wehpaat wi ku fain komfert?
2, 3. (a) Weh wi noa bowt Habakok? (b) Wai wi wahn kansida di buk a Habakkuk?
2 Fi fain di ansa, mek wi kansida di buk a Habakkuk. Di Skripchaz noh gi wi wahn lata deetaylz bowt Habakok laif ahn di tingz weh hihn mi du, bot wi ku geh lata inkorijment fahn di buk weh hihn mi rait. Fi hihn naym praabli meenz “Wahn Waam, Tait Hog.” Dis ku rifaa tu how Jehoava gi wi komfert, laik if ih di gi wi wahn waam hog. Er, ih ku rifaa tu di way fi hihn peepl hoal aan tait tu ahn. Habakok mi aks Gaad sohn seeryos kweschan. Jehoava mi mek Habakok rait dong da kanvasayshan soh dat wee ku benifit fan it.—Hab. 2:2.
3 Dis kanvasayshan bitween Habakok ahn Jehoava da aal weh di Baibl tel wi bowt di prafit. Habakok mi schres rait owt bikaaz a weh mi-di hapm rong ahn, an ih mi poar owt ih haat tu Jehoava. Fi hihn buk da paat a “weh mi rait dong eena di Skripcha fahn way bak fi . . . inkorij wi, soh dat wi ku luk faawod wid payshens tu weh wahn kohn.” (Roam. 15:4) How wee ku benifit fahn di buk a Habakkuk? Ih ku help wi fi si weh ih reeli meenz fi chros eena Jehoava. Pahn tap a dat, ih help wi fi si dat wi ku ga wahn kaam haat noh mata weh prablemz wi di goh chroo. Mek wi kip dat eena wi main az wi tek wahn kloasa luk pahn di buk a Habakkuk.
PRAY TU JEHOAVA
4. Wai Habakok mi soh schres owt?
4 Reed Habakkuk 1:2, 3. * Habakok mi liv joorin sohn reel haad taimz. Aala di peepl rong ahn mi wikid ahn vailent, ahn dat mi mek ahn veri sad. Evriway hihn mi luk, ih mi si injostis ahn di peepl dehn mi kruwil tuwaadz wan anada. Habakok praabli mi wanda: ‘Wen aala dis wikidnis wahn stap? Wai Jehoava di tek soh lang fi deel wid it?ʼ Hihn mi feel helples, soh ih mi bayg Jehoava fi step een ahn du sohnting bowt it. Maybi ih mi eevn staat tu feel laik Jehoava neva kay bowt weh mi-di hapm. Tu hihn, ih mi luk laik Gaad mi-di tek tu lang fi deel wid dehn. Yoo eva feel da way deh?
5. Weh impoatant lesn wi ku fain eena di buk a Habakkuk? (Koment pahn di picha da di biginin a dis aatikl.)
5 Yu tink Habakok mi stap chros eena Jehoava an aal weh hihn pramis? Non ataal! Wi noa dat hihn neva giv op bikaaz ih mi pray tu Jehoava bowt ih prablemz an ih mi chros dat Hihn mi wahn help ahn. Habakok mi-di wori bikaaz ih neva andastan wai Gaad mi-di wayt soh lang fi tek akshan, er wai Jehoava mi alow hihn fi sofa chroo dehn haad taimz. Bot wi laan sohnting fahn di fak dat Jehoava mi mek Habakok rait dong weh hihn mi-di wori bowt. Jehoava waahn wi noa dat wi noh fi frayd fi tel ahn bowt wi woriz er eniting els weh deh pahn wi main. Akchwali, hihn invait wi fi poar owt wi haat tu ahn eena wi pryaaz. (Ps. 50:15; 62:8) Di skripcha da Proverbs 3:5 tel wi tu dat wi fi “chros eena Jehoava wid aala [wi] haat” ahn wi noh fi “pen pahn [wi] oan andastandin.” Habakok praabli mi noa dehn werdz an ih mi aplai dehn eena ih laif.
6. Wai pryaa soh impoatant?
6 Habakok mi tek di fos step fi jraa kloas tu Jehoava, ih Fren an Faada. Habakok neva jos sidong deh di fret oava ih sichuwayshan ahn chrai deel wid it aal bai ihself. Insteda dat, ih mi pray bowt how ih mi feel ahn weh ih mi-di wori bowt. Dat da wahn gud egzampl fi mek wee fala. Ahn Jehoava, di Wan weh hyaa wi pryaaz, invait wi fi shoa dat wi chros ahn. Wi shoa da chros wen wi pray bowt eniting weh deh pahn wi main. (Ps. 65:2) Wen wi du dat, wi wahn si how Jehoava ansa wi pryaaz. Wi wahn feel laik Jehoava di gi wi wahn waam hog az ih gi wi di komfert ahn gaidans weh wi need. (Ps. 73:23, 24) Hihn wahn help wi fi noa how hihn tink noh mata weh chroblz ahn chraiyalz wi di goh chroo. Wen wi pray fahn wi haat, wi shoa Jehoava humoch wi chros ahn.
LISN TU JEHOAVA
7. How Jehoava mi rispan wen Habakok mi tel ahn weh ih mi-di wori bowt?
7 Reed Habakkuk 1:5-7. * Afta Habakok mi lef ih woriz eena Jehoava han, ih mosi mi wanda how Jehoava wuda rispan tu ahn. Jehoava, laik wahn lovin Pa, mi andastan how Habakok mi-di feel, soh ih neva karek ahn far it. Ih mi noa dat Habakok mi-di sofa an ih mi-di bayg fi help. Jehoava mi eksplayn tu Habakok dat soon hihn mi wahn ponish di Jooz bikaaz dehn neva faytful. Az a mata a fak, ih ku bee dat Habakok da-mi di fos persn hoo Jehoava mi tel dat veri soon ih mi wahn ponish di Jooz.
8. Wai Jehoava ansa mi lef Habakok kanfyooz?
8 Jehoava mi shoa Habakok dat Hihn mi redi fi tek akshan. Di jojment fi da vailent ahn wikid jenarayshan mi wahn soon kohn. Jehoava mi wahn yooz di Kaldeeyanz, er Babiloanyanz, fi ponish dehn. Wen Jehoava mi seh “eena fi unu dayz,” ih mi meen dat di jojment mi wahn kohn joorin Habakok laiftaim er joorin di laiftaim a di Izrelait dehn weh mi liv rong di sayhn taim laik hihn. Jehoava ansa da neva weh Habakok mi ekspek. Di Babiloanyan dehn mi kruwil. Dehn mi moa vailent dan di Izrelait dehn, hoo at lees mi noa Jehoava standadz. Soh wai Jehoava wuda mi yooz dis kruwil, paygan nayshan fi dischrai ih oan peepl? Dat wuda mek di peepl da Jooda sofa moa. How yu wuda mi feel if da yoo mi geh wahn ansa laik dat?
9. Weh ada kweschanz Habakok mi aks?
9 Reed Habakkuk 1:12-14, * 17. * Habakok mi andastan dat Jehoava mi wahn yooz Babilan fi joj ahn ponish di wikid peepl weh mi deh rong ahn, bot ih mi stil kanfyooz. Stil, ih mi hombl an ih mi kantinyu fi chros eena Jehoava. Ih mi kantinyu kaal Jehoava fi hihn “Rak.” (Deut. 32:4; Isa. 26:4) Habakok mi kantinyu fi bee payshent ahn chros eena Jehoava lov ahn kainis. Bikaaz a dat, hihn neva frayd fi aks Gaad moa kweschanz, laik: Wai Gaad mi wahn alow tingz fi geh eevn wos fi Jooda? Wai hihn noh mi wahn tek akshan rait away? Wai di Almaiti mi wahn talarayt eevn moa wikidnis? Wai hihn noh mi wahn “seh notn” wen wikidnis tek oava? Aftaraal, hihn da di “Hoali Wan,” ahn fi hihn “aiy dehn tu pyoar fi luk pahn eniting weh eevl.”
10. Wai wee mait feel di sayhn way laik Habakok sohntaim?
10 Sohntaim, wi mait feel di sayhn way laik Habakok. Wee lisn tu Jehoava. Wid ful chros, wi reed ahn stodi fi hihn Werd, an dis gi wi hoap. Wee hyaa bowt aala ih pramis dehn wen wi lisn tu weh fi hihn aaganaizayshan teech wi. Bot stilyet wi mait wanda: ‘How lang wi wahn haftu sofa laik dis?ʼ Wi ku laan fahn weh Habakok mi du neks.
WAYT PAHN JEHOAVA
11. Weh Habakok mi mek op ih main fi du afta ih mi lisn tu Jehoava?
11 Reed Habakkuk 2:1. * Di kanvasayshan weh Habakok mi ga wid Jehoava mi giv ahn wahn kaam haat. Soh hihn mi mek op ih main fi kantinyu chros Jehoava ahn wayt fi wen hihn tek akshan. Habakok neva mek da disizhan rait soh bays jos pahn how ih mi feel. Wi noa dat bikaaz laytaraan ih mi seh agen dat ih wuda ‘kwaiyet-wan wayt fi di day a Jehoava raat.ʼ (Hab. 3:16) Ada faytful servants a Jehoava mi shoa da sayhn kaina payshens ahn chros. Fi dehn gud egzampl inkorij wee fi noh giv op ahn fi wayt pahn Jehoava.—Mic. 7:7; Jay. 5:7, 8.
12. Wat da sohn lesn weh wi laan fahn Habakok?
12 Weh Habakok disizhan teech wi? Fos, wi mos neva stap pray tu Jehoava, noh mata weh chraiyalz wi di goh chroo. Sekant, wi haftu lisn tu weh Jehoava tel wi chroo ih Werd an ih aaganaizayshan. Terd, wi shuda bee payshent ahn wayt pahn Jehoava, ahn chros dat hihn wahn chooz di karek taim fi solv wi prablemz an eez wi sofarin. If wee fala Habakok egzampl ahn kantinyu fi taak tu Jehoava fahn wi haat ahn bee payshent wail wi lisn tu ahn, hihn wahn gi wi wahn kaam haat. Dat wahn help wi fi noh giv op. Di hoap weh wi ga fi di fyoocha wahn help wi fi bee eevn moa payshent, ahn dat wahn help wi fi bee hapi eevn wen wi di sofa. Da hoap gi wi kanfidens dat wi hevnli Faada wahn step een fi tek kayr a wi.—Roam. 12:12.
13. How Jehoava mi komfert Habakok?
13 Reed Habakkuk 2:3. * Fi shoar, Jehoava mi hapi wid Habakok disizhan fi wayt. Hihn mi wel ahn noa weh Habakok mi-di sofa chroo. Soh, owta lov, Gaad mi eksplayn tu ahn dat ih wuda soon ansa aala ih kweschan dehn. In ada werdz, Gaad mi tel Habakok: “Bee payshent ahn chros mi. Ah wahn ansa yu pryaaz, eevn if ih luk tu yoo laik Ah di tek tu lang!” Jehoava mi rimain ahn dat hihn mi don set di taim fi fulfil aala fi hihn pramis dehn. Ih mi inkorij Habakok fi kantinyu wayt. Eena di en, di prafit mi wahn bee satisfai wid di ansa weh ih get.
Wai wi mek op wi main fi du di bes wi kud eena Jehoava servis? (Paragraaf 14)
14. Weh wee shuda mek op wi main fi du wen wi di goh chroo chroblz ahn chraiyalz?
14 Wee haftu bee payshent ahn wayt pahn Jehoava tu. Wi haftu lisn gud tu weh hihn tel wi soh dat wi ku ga kanfidens ahn wahn kaam haat, noh mata weh chraiyalz wi di sofa chroo. Jeezas mi inkorij wi noh fi foakos pahn “di taim ahn di day” weh Jehoava set. (Aks 1:7) Soh mek wi noh stap wayt pahn Jehoava. Bee hombl, payshent, ahn ga fayt eena aal weh Jehoava pramis wi. Mek wi yooz di taim weh wi ga fi du az moch az wi kud eena Jehoava servis.—Maak 13:35-37; Gal. 6:9.
IF WI CHROS JEHOAVA, IH WAHN GI WI LAIF AHN WAHN WANDAFUL FYOOCHA
15, 16. (a) Wat da sohn powaful pramis weh wi ku fain eena di buk a Habakkuk? (b) Weh dehn pramis teech wi?
15 Jehoava pramis: “Di raichos wan wahn liv bai fayt,” ahn “di ert wahn geh ful op wid di nalij a di gloari a Jehoava.” (Hab. 2:4, 14) Yes, Jehoava pramis evalastin laif tu enibadi weh wayt wid payshens bikaaz dehn chros eena ahn.
16 Tink bowt di pramis weh wi reed eena Habakkuk 2:4. Da pramis soh impoatant dat di apasl Paal mi koat it chree taimz! (Roam. 1:17; Gal. 3:11; Heeb. 10:38) Wateva chraiyalz ahn chribyulayshan wi di deel wid, wi wahn si aala Jehoava pramis dehn kohn chroo if wi stay faytful ahn laayal tu hihn. Jehoava waahn mek wi foakos pahn wi hoap fi di fyoocha.
17. If wi chros eena Jehoava, weh hihn pramis ih wahn du fi wi?
17 Di buk a Habakkuk teech wi wahn powaful lesn weh wahn help wi eena dehnya laas dayz. Jehoava pramis laif tu eni raichos persn weh chros eena ahn. Mek wi kantinyu fi schrentn wi fayt ahn chros eena Gaad, noh mata weh wi di goh chroo. Fahn weh Jehoava mi tel Habakok, wi noa dat Hihn wahn sopoat wi ahn sayv wi. Hihn aks wi eena wahn kain way fi chros ahn, ahn fi bee payshent wail wi wayt fi di taim weh hihn set fi mek ih Kingdom rool di ert. Eena da taim, ih wahn ful di hoal ert wid hapi ahn peesful peepl.—Mach. 5:5; Heeb. 10:36-39.
CHROS EENA JEHOAVA AHN BEE HAPI
18. How Jehoava werdz mi afek Habakok?
18 Reed Habakkuk 3:18,19. * Weh Jehoava mi tel Habakok mi reeli meen wahn lat tu ahn. Hihn mi meditayt pahn aala di wandaful tingz weh Jehoava mi du fi ih peepl eena di paas. Dat mi mek ih chros eena Jehoava eevn moa. Hihn mi shoar dat Jehoava mi wahn soon tek akshan! Dat mi komfert Habakok, eevn doa ih mi noa dat ih oan sofarin kuda mi kantinyu fi wahn lee wail langa. Hihn neva ga nohmoh dowt. Raada, hihn mi ga kompleet chros dat Jehoava wuda sayv ahn. Az a mata a fak, weh hihn mi seh eena vers 18 reeli shoa jos humoch hihn mi chros Jehoava. Som peepl bileev dat weh hihn mi seh akchwali meenz: “Ah wahn jomp fi jai eena di Laad; Ah wahn daans bikaaz Ah soh hapi fi serv Gaad.” Weh wi reed eena dehn vers da wahn reeli powaful pramis fi wee! Jehoava noh jos pramis wi wahn wandaful fyoocha, bot ih aalso pramis wi dat eevn now hihn di werk fi fulfil dehn pramis.
19. How wee ku geh di sayhn komfert laik weh Habakok mi get?
19 Di mayn lesn weh wi laan fahn di buk a Habakkuk da fi chros eena Jehoava. (Hab. 2:4) Wi ku kip di chros eena Jehoava if wi schrentn wi rilayshanship wid ahn. Fi du dat wi haftu (1) kip di pray tu Jehoava fahn wi haat, ahn tel ahn aala wi woriz ahn kansaan; (2) lisn gud tu weh Jehoava tel wi chroo fi hihn Werd an ih aaganaizayshan; ahn (3) stay faytful ahn bee payshent wail wi wayt pahn Jehoava. Dat da weh Habakok mi du. Eevn doa hihn mi wel schres owt wen ih mi staat taak tu Jehoava, bai di en a ih kanvasayshan ih mi feel inkorij an hapi. If wee fala Habakok egzampl, wi wahn geh komfert fahn di waam, tait hog weh wi hevnli Faada wahn gi wi! Wi kuda neva fain beta komfert dan dat eniway eena dis wikid werl.
^ par. 4 Habakkuk 1:2, 3: “Oa Jehoava, how lang Ah haftu krai owt fi help, bot yu noh lisn? How lang Ah haftu aks fi help sayka aala di vailens rong mi, bot yu noh du notn? Wai yu lef mi ya di wach how peepl di du loan badnis? Wai yu talarayt injostis? Wai dischrokshan ahn vailens di hapm fronta mi? Wai soh moch kwaarilin deh, ahn wai peepl kyaahn gree?”
^ par. 7 Habakkuk 1:5-7: “Luk monks di nayshan dehn ahn pay atenshan! Oapm unu aiy waid ahn stayr bikaaz unu soh sopraiz; bikaaz sohnting wahn hapm eena fi unu dayz weh unu wudn bileev eevn if dehn tel unu. Bikaaz Ah di rayz op di Kaldeeyan dehn. Dehn da wahn nayshan weh vailent ahn dehn noh ga no mersi. Dehn goh aal oava di ert fi tek oava di plays dehn weh ada peepl liv. Dehn fraitnin ahn evribadi frayd fi dehn. Dehn noh ansa tu nobadi ahn dehn mek dehn oan laa.”
^ par. 9 Habakkuk 1:12-14: “Oa Jehoava, yoo noh ga no biginin. Oa mai Gaad, mi Hoali Wan, yoo wahn neva ded. Oa Jehoava, da yoo set dehn op fi joj; mi Rak, da yoo di yooz dehn fi ponish peepl. Fi yoo aiy dehn tu pyoar fi luk pahn eniting weh eevl, ahn yu kyaahn talarayt wikidnis. Soh wai yu di talarayt peepl weh yu kyaahn chros, ahn yu noh seh notn wen wahn wikid man dischrai sohnbadi weh moa raichos dan ihself? Wai yu mek man bee laik fish eena di see, laik animal weh noh ga no roola?”
^ par. 9 Habakkuk 1:17: “Hihn wahn kip di emti owt ih fishin net? Ih wahn kantinyu fi slaata nayshanz widowt kompashan?”
^ par. 11 Habakkuk 2:1: “Ah wahn kip di stan op da mi gyaad poas, an Ah wahn stay rait deh pahn di lukowt towa. Ah wahn kip di luk owt fi si wat hihn wahn tel mi fi seh ahn wat Ah wahn seh wen ih karek mi.”
^ par. 13 Habakkuk 2:3: “Bikaaz di vizhan wahn kohn chroo da di taim weh Ai don set, an di taim di kohn kwik-wan, an ih noh wahn tel no lai. Eevn if ih wuda tek lang, kip di luk owt far it! Bikaaz fi shoar ih wahn kohn chroo. Ih noh wahn bee layt!”
^ par. 18 Habakkuk 3:18,19: “Bot az fi mee, Ai wahn rijais wid Jehoava; Ah wahn bee hapi wid di Gaad a mai salvayshan. Di Sovrin Laad Jehoava da mai schrent; hihn wahn mek mi fut bee laik di fut a di dyaa an ih wahn mek Ah waak eena di hai plays dehn.”
