1. Na cava eda vinakata kina meda vakacegui?

NA CAVA eda vinakata kina meda vakacegui? De dua eda dau lomaleqa, rarawa, se nuiqawaqawa ena veisiga. Se da rarawataka tiko na bula vaqase, na tauvimate, se takali e dua na wekada voleka. Eso vei keda eda vakalolomataki. Sa qai levu tiko ga na itovo voravora. Eda vakadinata nida sa bula tu ena “iotioti ni veisiga” e ‘levu kina na ka dredre,’ sa voleka tale ga na vuravura vou. (2 Tim. 3:1) De dua sa dede noda waraka voli na vosa ni yalayala i Jiova, sa qai levu tiko ga na veika dredre. Eda na vakacegui gona vakacava?

2, 3. (a) Na cava eda kila me baleti Apakuki? (b) Cava eda dikeva kina na nona ivola?

² Meda vakacegui, meda dikeva mada na ivola i Apakuki. E sega ni tukuni vakamatailalai ena iVolatabu na nona bula o Apakuki kei na ka e cakava, ia e vakayaloqaqataki keda na nona ivola. De dua na ibalebale ni yacana na “Veimoko Vakaukaua.” Qo e rawa ni vakaibalebaletaka na nona dau veivakacegui o Jiova, se na nodra dau nuitaki koya na nona  tamata. E vosa vei Jiova o Apakuki, e taroga e levu na taro me kila na kena isau. E taroga sara ga o Apakuki na ka eda dau lomatarotarotaka. Sa rauta me uqeti koya o Jiova me vola na taro qori ena nona ivola.—Apak. 2:2.

³ Sega tale ni dua na ka e tukuna na iVolatabu me baleti Apakuki, na nodrau veitalanoataka ga kei Jiova na ka e rarawataka. E okati na nona ivola ena “ka kece e volai e liu” qai maroroi ena Vosa ni Kalou “me noda na inuinui e rawati mai na noda vosota kei na noda vakacegui mai na veika e volai ena iVolatabu.” (Roma 15:4) Ena yaga vakacava vei keda na ivola i Apakuki? Eda na kila kina na ibalebale ni noda nuitaki Jiova. E vakadeitaka tale ga ni rawa nida vakacegui se mani vakacava na levu ni veika dredre kei na rarawa. Meda dikeva mada na ivola i Apakuki.

4. Na cava e vakararawataki Apakuki?

⁴ Wilika Apakuki 1:2, 3. E bula o Apakuki ena gauna dredre duadua. E vakararawataki koya na nodra itovo ca na tamata, ra qai voravora. De dua ena veinanuyaka: Ena oti ena gauna cava na ivakarau ca? Cava sa rui berabera kina o Jiova me yavala? E raica tu ga e veisiga o Apakuki na veika tawadodonu kei na nodra dau veivakasaurarataki na kainona. E yalolailai sara ga. Cava e qai cakava? E masuti Jiova me cakava kina e dua na ka. De dua ena veinanuyaka o Apakuki ni sa sega ni kauaitaki ira nona tamata o Jiova, e berabera tale ga ni yavala ena vukudra. Vakacava, o dau vakila tale ga qori?

5. Na cava eda vulica ena ivola i Apakuki? (Raica na imatai ni iyaloyalo.)

⁵ Vakacava e nuitaki Jiova tiko ga o Apakuki qai vakabauta na nona vosa ni yalayala? Io! E sega vakadua ni soro, e tukuna kece vei Jiova na nona leqa kei na nona nuiqawaqawa, e sega ni nuitaki ira na tamata. Ia e lomaleqa ga ni sega ni matata vua na vuna e sa rui berabera kina o Jiova me vakaotia na nona rarawa. Na cava e via vakavulica vei keda o Jiova ni uqeti Apakuki me vola na ka e nuiqawaqawataka? Meda kua vakadua ni rere ni tukuna vua na noda leqa kei na noda nuiqawaqawa. E uqeti keda meda sova yani vua na lomada ena masu. (Same 50:15; 62:8) E kaya tale ga na Vosa Vakaibalebale 3:5 meda “nuitaki Jiova ena [lomada] taucoko” meda kua ni “vakararavi ena [noda] yalomatua.” Qori sara ga na ka e cakava o Apakuki.

6. Na cava e bibi kina na masu?

⁶ E vakaliuliu o Apakuki me toro volekati Jiova na nona iTokani nuitaki, e Tamana tale ga. E sega ni lomaleqataka tiko ga o Apakuki na kena ituvaki, se me walia ga vakataki koya. E masulaka vei Jiova na ka kece e leqataka. Eda vuli dina ena nona ivakaraitaki. E uqeti keda na Daurogo masu o Jiova meda nuitaki koya nida tukuna kece vua na noda lomaleqa. (Same 65:2) Nida cakava qori, ena sauma o Jiova na noda masu. Ena vakacegui keda na nona veidusimaki kei na nona veitokoni. (Same 73:23, 24) Se mani ituvaki cava e vakararawataki keda, ena vukei keda o Jiova meda kila na nona rai. Nida masu mai vu ni lomada, eda vakaraitaka vei Jiova noda nuitaki koya.

7. Na cava e cakava o Jiova ni tukuna vua o Apakuki na nona lomaleqa?

⁷ Wilika Apakuki 1:5-7. E tukuna kece vei Jiova o Apakuki na nona lomaleqa kei na nuiqawaqawa, ia de dua ena veinanuyaka se cava ena cakava kina o Jiova. Ni Tama dauveikauaitaki, e dauveinanumi tale ga o Jiova, e sega ni cudruvi Apakuki ni kila vinaka tu na nona ivakarau ni rai. E kila ni vinakata sara ga o Apakuki me vakacegui ena nona rarawa. Sa qai tukuna vua na ka ena vakarau cakava vei ira na Jiu tawayalodina. De dua e tukuna sara ga e liu o Jiova vei Apakuki ni sa vakarau vakaotia na ivakarau ca.

8. Na cava e sega ni namaka kina o Apakuki na isau ni nona masu?

⁸ E vakaraitaka o Jiova vei Apakuki ni sa vakarau totogitaki ira na tamata ca, era voravora. Ni tukuna o Jiova ni na vakayacora ena “nomuni gauna,” e vakadeitaka ni na tauca nona lewa ena gauna i Apakuki se o ira na Isireli ena gauna ya. E sega ni namaka o Apakuki na isau ni nona masu, ni vakadomobula na nodra itovo na kai Papiloni, era voravora ra qai veivakalolomataki. E ca sara nodra itovo vei ira na Isireli era kila na ivakatagedegede i Jiova. Na cava e vakayagataka kina o Jiova na matanitu lotu butobuto qo me totogitaki ira nona tamata? Ena levu ga kina na rarawa e Juta. * Ke o biuti iko ena ituvaki kei Apakuki, cava o na cakava?

9. Na cava e rairai lomatarotarotaka o Apakuki?

⁹ Wilika Apakuki 1:12-14, 17. Sa kila o Apakuki ni na vakayagataka o Jiova na matanitu o Papiloni me totogitaki ira na daucaka ca, ia se veilecayaki tiko ga. E yalomalumalumu qai vakadeitaka me nuitaki Jiova. E kaya vua ni nona “Uluvatu.” (Vkru. 32:4; Aisea 26:4) E nuidei o Apakuki ni o Jiova e Kalou dauloloma, e yalovinaka. E doudou kina me taroga tale: Na cava e vakatara kina na Kalou me torosobu tiko ga na ituvaki e Juta? Na cava e sega ni yavala totolo kina? E Kalou Kaukaua Duadua, ia na cava e vakatara kina na veika rarawa? Ena “galu” tiko ga ni yaco tiko na veika ca? O Jiova e Kalou “Yalosavasava,” sa rui ‘savasava na matana me raica na ka ca.’

10. E rawa vakacava ni tautauvata noda rai kei Apakuki?

¹⁰ Eso na gauna, ena rawa ni tautauvata noda rai kei Apakuki. Eda rogoca na ka e tukuna o Jiova. Eda nuitaki koya vakatabakidua nida wilika qai vulica na nona Vosa, e dei kina na noda inuinui. Eda kila tale ga na nona vosa ni yalayala nida rogoca na veidusimaki ni nona isoqosoqo. Ia de dua eda se vaqaqa tiko ga, ‘Ena oti ninaica na noda rarawa?’ Meda raica mada na ka e qai cakava o Apakuki.

11. Na cava e vakadeitaka o Apakuki?

¹¹ Wilika Apakuki 2:1. E vakacegui Apakuki sara ga nodrau veitalanoa kei Jiova. E vakadeitaka me waraki koya tiko ga. Vakavica nona kaya ena nuidei me “waraka ena vakanomodi na siga ni rarawa.” (Apak. 3:16) Era waraki Jiova  tale ga nikua o ira na qaravi koya ena yalodina. Qori ena uqeti keda meda kua vakadua ni soro ni waraki Jiova.—Maika 7:7; Jeme. 5:7, 8.

12. Na cava eda vulica vei Apakuki?

¹² Na cava eda vulica ena nona nuidei o Apakuki? Kena imatai, meda kua vakadua ni cegu ni masuti Jiova nida vakatovolei. Kena ikarua, meda rogoca na ka e tukuna o Jiova ena nona Vosa kei na nona isoqosoqo. Kena ikatolu, meda vosovoso ni waraki Jiova, nuitaka vakatabakidua ni na vakacegui keda ena gauna veiganiti. Me vakataki Apakuki, eda na lomavakacegu nida talaucaka na lomada vei Jiova ena masu, vakarorogo vua qai waraki koya. Qori ena vukei keda meda vosota. Se vakacava na levu ni noda rarawa, na noda inuinui ena uqeti keda meda vosota qai marau tiko ga. Ena vakanuideitaki keda na noda inuinui ni na yavala na Tamada vakalomalagi o Jiova.—Roma 12:12.

13. E veivakacegui vakacava na Apakuki 2:3?

¹³ Wilika Apakuki 2:3. E vakamarautaki Jiova dina ni waraki koya o Apakuki. E kila vinaka tu na Kalou Kaukaua Duadua na nona rarawa. E vakacegui koya o Jiova qai vakadeitaka vua ni na sauma na nona taro. Sa voleka ni oti na nona nuiqawaqawa. Vaka ga me tukuna tiko vua o Jiova: “Mo vosota, nuitaki au. Keu berabera mada ga, au na sauma nomu masu!” E tukuna o Jiova vei Apakuki ni sa lokuca tu na gauna me vakayacora kina nona vosa ni yalayala. E uqeti koya gona me wawa tiko ga, me kua tale ga ni yalolailai.

14. Na cava meda cakava nida rarawa?

¹⁴ Se vakacava na levu ni veika dredre kei na rarawa, eda na nuidei, da vakacegui tale ga nida waraki Jiova qai vakarorogo vua. E uqeti keda o Jisu meda nuitaki Jiova na Kalou ni Gauna, meda kua ga ni kauai ena “gauna kei na siga” sa lokuca tu. (Caka. 1:7) Meda kua gona ni soro, ia meda waraki Jiova tiko ga ena yalomalumalumu, vakabauta, kei na vosovoso. Meda vakayagataka vinaka na gauna sa vo meda qaravi Jiova kina ena noda vinaka taucoko.—Mari. 13:35-37; Kala. 6:9.

15, 16. (a) Na cava e yalataki ena ivola i Apakuki? (b) Cava eda vulica kina?

¹⁵ Na cava e yalataka o Jiova vei ira na yalododonu era nuitaki koya? “Na yalododonu ena bula ena nona yalodina,” ena ‘roboti vuravura tale ga na kena kilai na lagilagi i Jiova.’ (Apak. 2:4, 14) E yalataka o Jiova nira na vakabulai o ira na vosota kei ira na nuitaki koya.

¹⁶ Nida wilika na veika e yalataki ena Apakuki 2:4, eda na rairai nanuma ni sega soti ni bibi. Ia e vola vakatolu na yapositolo o Paula ena nona ivola ni vakadinata na bibi ni ka e yalataka o Jiova! (Roma 1:17; Kala. 3:11; Iper. 10:38) Ke dredre vakacava na ituvaki, eda nuidei nida na raica na vosa ni yalayala i Jiova ke da yalodina tiko ga, qai vakabauti koya. E vinakata o Jiova meda raica dei na noda inuinui se bera mai.

17. Na cava e vakadeitaka vei keda na ivola i Apakuki?

¹⁷ E yaga vei keda kece na bula ena iotioti ni veisiga qo na ivola i Apakuki. E yalataka o Jiova ni na bula tawamudu na yalododonu ena nona vakabauta  kei na nona nuitaki koya. Se mani dredre vakacava na ituvaki, meda vaqaqacotaka tiko ga noda vakabauta kei na noda nuitaki koya. E vakadeitaka o Jiova ena gusu i Apakuki ni na tokoni keda, ena vakabulai keda tale ga. E vakamasuti keda meda nuitaki koya, meda waraka tale ga na gauna sa lokuca tu me liutaki vuravura kina na nona Matanitu. Qori na gauna era na tawana kina na vuravura na tamata mamarau kei ira na yalomalua.—Maciu 5:5; Iper. 10:36-39.

18. E uqeti Apakuki vakacava na vosa i Jiova?

¹⁸ Wilika Apakuki 3:16-19. E uqeti Apakuki sara ga na ka e tukuna vua o Jiova. Ni dau vakananuma o Apakuki na veika vakatubuqoroqoro e cakava vei ira nona tamata ena gauna sa oti, sa qai dei ga nona vakabauta. E vakadeitaka ni sa voleka ni yavala o Jiova! E kila ni na rarawa tiko, ia e vakacegui koya na nona vosa. Sa oti na nona vakatitiqa, e marau ni nuitaki Jiova vakatabakidua me vakabulai koya. Na ka e cavuta o Apakuki ena tikina e 18, e rairai dua vei ira na ivakaraitaki vinaka duadua ni nona nuitaki Jiova e dua. Qo na ka era kaya eso na dauvakadidike me ibalebale ni tikinivolatabu qori: “Au na ladelade ena marau vua noqu Turaga; au cocowiriwiri niu marautaka na Kalou.” E veivakadeitaki dina! E tukuna vei keda o Jiova na ka e yalataka, e vakadeitaka tale ga ni ogaoga tiko ena gauna qo me vakayacora na nona yalayala.

19. Eda na vakacegui vakacava me vakataki Apakuki?

¹⁹ Na cava eda vulica ena ivola i Apakuki? Meda nuitaki Jiova. (Apak. 2:4) Eda na nuitaki Jiova tiko ga ke da vaqaqacotaka noda veiwekani kei koya. Qori ena noda (1) sega ni cegu ena masu nida tukuna vei Jiova na noda leqa kei na nuiqawaqawa; (2) meda muria na ka e tukuna o Jiova ena nona Vosa kei na veidusimaki ni nona isoqosoqo; (3) meda yalodina qai waraki Jiova tiko ga. Qori na ka e cakava o Apakuki. E vola ena itekitekivu ni nona ivola na nona rarawa, ia ni sa lai cava, dua na ka nona marau kei na nuidei. Meda vakatotomuria mada ga nona ivakaraitaki me rawa nida vakila tale ga na yalololoma i Jiova! Qori ena vakacegui keda ena vuravura ca qo.