1. Mambo ka atweba bonse o tukebela lutekenesho?

ATWEBA bonse tukeba lutekenesho. Atweba bamo kampe bijikila, kulefulwa ne makatazho byaikalatu nobe bo bwikalo bwetu. Kampe tubena kumanama na misongo iyako na mambo a kukoma, bikola nangwa kufwisha muntu ye twatemwa. Kabiji atweba bamo babena kwitumanyika bingi ku bantu bakanama. Kabiji bukapondo nabo bwauba ne woo. Kya kine, twashiinwa kuba’mba “bimye byakatazha” byo tubena kwimwena bibena kumwesha’mba tubena kwikala “mu moba a kupelako,” kabiji ntanda ipya ijitu pepi. (2 Timo. 3:1) Pano bino, kampe twapembelela milaye ya Yehoba pa myaka yavula, kabiji makatazho nao abena kuvujilakotu. Onkao mambo, kwepi ko twakonsha kutaana lutekenesho?

2, 3. (a) Ñanyi bintu byo twayukako pe Habakuka? (b) Mambo ka o tusakwisambila pa bishinka biji mu buku wa Habakuka?

² Pa kuba’mba tukumbule buno bwipuzho, twayai twisambe byambo biji mu buku wa Habakuka. Nangwa kya kuba Binembelo kechi byaambapo byavula pa bwikalo ne mwingilo waingijile Habakuka ne, bino uno buku watelwa pa jizhina janji muji byambo bya lutekenesho. Jizhina ja Habakuka kampe jilumbulula’mba “Kukumbata.”  Kyamweka jino jizhina jalumbulwilenga Yehoba byo atekenesha bantu banji nangwa bapopweshi banji byo bamuketekela na muchima yense. Habakuka wisambile ne Lesa ne kumwipwizha mepuzho. Yehoba wakumbwile mepuzho aipwizhe uno ngauzhi kabiji wamutangijile na mupashi kunemba mwisambo ye bajinga nanji pa kuba’mba ne atweba tufunjileko.—Ha. 2:2.

³ Kechi twayuka byavula pe Habakuka ne. Binembelo byaambatu pa mwisambo ye esambile ne Yehoba. Buku wanji ke lubaji lwa “bintu byonse byanembelwe kala” kabiji bebinembele mu Mambo a Lesa, Baibolo, “kuba’mba mu kuchinchika kwetu ne mu lutekenesho lwa mu Binembelo twikale na luketekelo.” (Loma 15:4) Buku wa Habakuka wakonsha kwitukwasha byepi atweba pa muntu pa muntu? Witukwasha kuyuka kuketekela mwi Yehoba byo kulumbulula. Kabiji bungauzhi bwa kwa Habakuka bwitukwasha kuyuka’mba nangwatu tubena kupita mu makatazho nangwa lumanamo, twakonsha kwikala na mutende wa mu milanguluko. Onkao mambo, twayai twisambe pa bishinka biji mu buku wa Habakuka.

4. Mambo ka Habakuka o aikejile na bijikila?

⁴ Tangai Habakuka 1:2, 3. Habakuka waikeleko kimye bintu kyo byakatezhe bingi. Na mambo a kuba’mba waikalanga na bantu bajinga na byubilo byatama bingi kabiji batemenwe bukapondo, kyamukolanga bingi ku muchima. Kyamweka Habakuka wiipwizhenga’mba: ‘Buno bubi bukapwa ñanyi kimye? Mambo ka Yehoba o abujila kupwisha buno bubi bukiji?’ Habakuka wamwenenga bena Isalela saka boba bakwabo nshiji ne kwibamanyika. Wakankelwe bya kuba. Onkao mambo, wasashijile Yehoba kuba’mba amukwashe. Kampe Habakuka watatwile kulanguluka’mba Yehoba kechi wateleko muchima ne. Kyamwekelenga nobe Lesa kechi ukapwisha luno lukatazho bukiji ne. Nanchi ne anweba byo byo mulanguluka nyi?

5. Buku wa Habakuka witufunjisha ñanyi kintu kyanema? (Monai kipikichala kitanshi.)

⁵ Nanchi Habakuka waipwizhenga ano mepuzho na mambo a kuba’mba walekele kuketekela mwi Yehoba nyi? Abya walekele kuketekela mu milaye ya Lesa nyi? Ine, kwalepeshatu. Kishinka kya kuba’mba wabuujile Yehoba makatazho ne bijikila byo ajinga nabyo, kimwesha kuba’mba kechi walekele kumuketekela ne. Kyamukatezhe mu milanguluko na mambo a kuba’mba kechi wayukile kimye Lesa kyo anengezhezhe kupwishishamo ano makatazho nangwa ene mambo Yehoba o aswishishe bintu byatama kutwajijila kubiwa ne. Yehoba byo atangijile Habakuka kunemba bijikila byo ajinga nabyo, kitufunjisha kuba’mba kechi twafwainwa kuchina kumubuula bijikila byo tuji nabyo ne. Witutundaika kuba’mba tulombenga kwi aye ne kumubuula byonse biji ku muchima wetu. (Sala. 50:15; 62:8) Byambo bya Maana 3:5 bitutundaika atweba bonse pa muntu pa muntu amba: “Ketekela mwi Yehoba na muchima wobe yense, kabiji kange uketekele mu milangwe yobe ne.” Kyamweka Habakuka wibiyukile bino byambo kabiji wibilamine mu muchima wanji.

6. Mambo ka kulomba o kwanemena?

⁶ Habakuka wafwenyenye kwipi ne Yehoba, mambo wajinga mulunda nanji ye aketekejile kabiji Shanji. Kabiji kechi wateletu muchima pa makatazho anji ne kukeba kwiapwisha aye mwine ne. Bino wabuujile Lesa bijikila byonse byo ajinga nabyo. Ne atweba byo byo twafwainwa kubanga. Yehoba umvwa milombelo kabiji witutundaika kuba’mba tumuketekele ne kumubuula bijikila byetu. (Sala. 65:2) Inge ketube bino, tukemwena Yehoba byo akakumbula milombelo yetu ne byo aketutekenesha ne kwitutangijila. (Sala. 73:23, 24) Uketukwasha kuyuka byo amona bintu byo tupitamo nangwa kya kuba tubena kupita mu meseko akatazha. Milombelo yetu ya  kufuma panshi ya muchima imwesha kuba’mba twaketekela mwi Lesa.

7. Yehoba waubile byepi byo aumvwine byajilakene Habakuka?

⁷ Tangai Habakuka 1:5-7. Byo alombele ne kusha makatazho ne bijikila byanji byonse mu maboko a Yehoba, Habakuka kampe walangulukilenga pe Yehoba byo akobapo. Na mambo a kuba’mba ke Shetu wa butemwe, Yehoba kechi wamunene Habakuka pa kwijizhanya ne. Lesa wayukile’mba ngauzhi wanji wamanaminenga kabiji wakebelenga bukwasho. Onkao mambo, Yehoba wabuujile Habakuka bintu byo afuukwilepo kuba Bayudea babujile bukishinka. Kabiji wamubuujile’mba kechi ukabanda kwingijilapo ne. Kyamweka Habakuka ye muntu mutanshi Yehoba ye abuujile’mba lonaiko lwa babi lwajingatu pepi.

8. Mambo ka Habakuka o abujijile kutondwa na mukumbu wa Yehoba?

⁸ Yehoba walumbulwijile Habakuka amba katatakatu obepo kimo. Lonaiko lwa kyo kya kisaka kibi lwajingatu pepi. Yehoba byo aingijishe byambo bya kuba’mba “mu moba enu,” walumbulwilenga kuba’mba luzhachisho lukafika mu moba ajingako uno ngauzhi nangwa mu kimye kya bena Isalela bajingako pa kyokya kimye. Byakumbwile Yehoba kechi byo byaketekejilenga Habakuka ne. Nanchi mukumbu wa Yehoba walengejile uno ngauzhi kuleka kwijizhanya nyi? Byaambile Yehoba byalumbulwilenga’mba lumanamo lwa bena Yuda bonse lukakilamo. Bena Kalodeya (bena Babilona) bajinga bantu bashinchile bingi ne kukanama kukila bantu banji bena Yuda bayukile mizhilo ya Yehoba. Mambo ka Yehoba o afuukwijilepo kwingijisha kino kisaka kyashinchile kuya na kumanyika bantu banji? Inge wajinga anweba, inge mwaubile byepi pa kumvwa bino byambo?

9. Ñanyi mepuzho akwabo Habakuka o akonsheshe kwiipuzha mwine?

⁹ Tangai Habakuka 1:12-14, 17. Habakuka wayukile’mba Yehoba ukengijisha bena Babilona kuzhachisha ne kumanyika babi bajingako mu moba nji, bino kyamukatezhe kuswa. Nangwa byonkabyo, wipelwile ne kubuula Yehoba amba ukatwajijila kumuketekela. Kabiji waambile’mba Lesa ukatwajijila kwikala “Jibwe” janji. (Mpitu. 32:4; Isa. 26:4) Habakuka watwajijile kuketekela kuba’mba Lesa uji na butemwe ne lusa. Onkao mambo, kechi wachiine kwipuzha Yehoba mepuzho akwabo ne. Kampe wiipwizhenga mepuzho nabiji a kuba’mba: Mambo ka Yehoba o aswishisha bintu kutaminangakotu mu Yuda? Mambo ka o abujila kwingijilapo bukiji bukiji? Mambo ka wa Bulume Bonse o aswishisha bantu banji kutwajijila na kumanama? Mambo ka Lesa o ‘azhindaminapotu’ bubi saka bwavula? Na mambo a kuba’mba Yehoba “Wazhila,” meso anji “kechi akonsha kutalapotu pa bubi ne.”

10. Ñanyi bintu byakonsha kwitulengela kutendeka kulanguluka byonka byalangulukilenga Habakuka?

¹⁰ Bimye bimo twakonsha kulanguluka byonka byalangulukilenga Habakuka. Tumvwa byambo bya Yehoba. Twamuketekela na muchima yense, kabiji tutanga Mambo anji etulengela kwikala na luketekelo. Kabiji tumvwa milaye yanji kimye kyo tuteleka ku mikambizho ipana jibumba janji. Pano bino, twakonsha kwiipuzha’mba, ‘Makatazho etu akapwa ñanyi kimye?’ Twakonsha kufunjilako byavula ku kintu kikwabo kyaubile Habakuka.

11. Habakuka wafuukwilepo kuba byepi byo aumvwine byamubuujile Yehoba?

¹¹ Tangai Habakuka 2:1. Kwisamba ne Yehoba kwalengejile Habakuka kukepeshako bijikila. Wafuukwilepo kutwajijila kupembelela Yehoba. Kabiji wabwezhezhepo jikwabo  kumwesha byo aketekejile mwi Yehoba kimye kyo aambile’mba: “Mpembelelanga juba ja bya malwa saka natekanya.” (Ha. 3:16) Ne bakalume ba Lesa bakwabo nabo bamwesheshe muchima wa kupembelela Yehoba saka batekanya, betutundaika ne atweba kutwajijila kupembelela Yehoba saka twatekanya.—Mika 7:7; Yako. 5:7, 8.

12. Ñanyi bintu bimo byo tufunjilako kwi Habakuka?

¹² Byafuukwilepo Habakuka bitufunjishapo ka? Kitanshi, nangwatu tupite mu makatazho a mutundu ka, kechi twafwainwa kuleka kulomba kwi Yehoba ne. Kya bubiji, twafwainwa kumvwinanga bitubuula Yehoba kupichila mu Mambo anji ne jibumba janji. Kya busatu, twafwainwa kupembelelanga Yehoba saka twatekanya ne kuketekela kuba’mba uketupokolola ku makatazho o tubena kupitamo pa kimye kyanji kyafwainwa. Inge twatwajijila kwisamba ne Yehoba ne kumvwina byo etubuula saka twatekanya, ne atweba tukakepeshako bijikila ne kutwajijila kuchinchika byonka byaubile Habakuka. Luketekelo lwetu luketukwasha kwikala batekanya, kabiji kutekanya nako kuketulengela kutwajijila kwikala na lusekelo nangwa kya kuba tubena kupita mu makatazho. Luketekelo lwitulengela kushiinwa’mba Shetu wa mwiulu ukapwisha makatazho.—Loma 12:12.

13. Ñanyi byambo bya lutundaiko byo tutaana pa Habakuka 2:3?

¹³ Tangai Habakuka 2:3. Kwa kubula nangwa kuzhinaukatu ne, Yehoba waumvwine bingi bulongo pa kintu kyafuukwilepo Habakuka kuba. Wa Bulume Bonse wayukile makatazho apichilengamo Habakuka. Onkao mambo, Lesa watekeneshe ngauzhi wanji ne kumubuula’mba ukakumbula mepuzho anji onse. Wamubuujile kuba’mba kechi ukabanda kukumbula mepuzho anji ne. Kyajingatu nobe Lesa ubena kwambila Habakuka amba: “Tekanyatu ne kunketekela. Mukumbu wami ukeya nangwa kya kuba kibena kumweka nobe wabanda.” Yehoba wavulwilemo ngauzhi wanji amba watongwele kimye kyo akafikizhizhamo milaye yanji. Wakwashishe Habakuka kupembelela kimye kyo akoba kyaswa muchima wanji. Uno ngauzhi washiinwe kuba’mba ino milaye ikafika.

14. Twafwainwa kutwajijila kuba ka mu bimye bya makatazho?

¹⁴ Kupembelela Yehoba ne kumvwina byo etubuula kuketulengela kwikala na mutende wa mu milanguluko nangwa kya kuba tubena kupita mu makatazho ne buyanji. Yesu witutundaikile kuba’mba twafwainwa kuketekela mwi Yehoba mwine wayuka kulama kimye, kechi kuta muchima pa kukeba “kuyuka kimye” Lesa kyo abula kwitubuula ne. (Byu. 1:7) Onkao mambo, twayai tutwajijile kwikala bepelula ne kupembelela saka tuji na lwitabilo ne butekanye, ne kwingijisha kimye kyashalako kwingijila Yehoba papelela bulume bwetu.—Mako 13:35-37; Nga. 6:9.

15, 16. (a) Ñanyi milaye yawama yo tutaana mu buku wa Habakuka? (b) Ino milaye itufunjishapo ka?

¹⁵ Yehoba walaya bantu bamuketekela’mba: “Mololoke ukekala na bumi na mambo a bukishinka bwanji,” ne kuba’mba “pa ntanda pakakumbana maana a kuyuka lukumo lwa Yehoba.” (Ha. 2:4, 14) Kya kine, Lesa walaya kufweta bonse bamupembelela saka batekenya.

¹⁶ Byambo biji pa Habakuka 2:4 byakonsha kumvwanyika nobe kechi byanema ne. Pano bino, mutumwa Paulo wamwene uno mulaye amba wanema bingi kya kuba waingijishe kino kyepelo bimye bisatu. (Loma 1:17; Nga. 3:11; Hebe. 10:38) Muntu waoloka nangwa kya kuba apite mu makatazho avula byepi, utwajijila kwikala wa kishinka ne kuketekela kuba’mba milaye ya Lesa ikafika. Yehoba witutundaika kuta muchima pa luketekelo lwetu lwa bintu biji kulutwe.

17. Ñanyi bintu byawama bitulaya Yehoba byo tutaana mu buku wa Habakuka?

 ¹⁷ Atweba bonse tubena kwikala mu ano moba a kupelako, tufunda bintu byanema bingi mu buku wa Habakuka. Yehoba walaya kuba’mba muntu yense waoloka uji na lwitabilo kabiji wamuketekela ukamupa bumi bwa myaka ne myaka. Twayai tutwajijile kukosesha lwitabilo lwetu ne kuketekela Lesa nangwa kya kuba tubena kupita mu makatazho apusana pusana. Byambo Yehoba byo abuujile Habakuka bitutundaika kuba’mba Lesa uketukwasha ne kwitupokolola. Ubena kwitutundaika’mba tumuketekele ne kwikala batekanya byo tubena kupembelela kimye Bufumu bwanji kyo bukatendeka kulama ntanda. Pa kyokya kimye, pa ntanda pakekalangatu bapopweshi ba Lesa ba lusekelo kabiji bakooka muchima.—Mat. 5:5; Hebe. 10:36-39.

18. Byambo bya Yehoba byakwashishe byepi Habakuka?

¹⁸ Tangai Habakuka 3:16-19. Byambo bya Yehoba byatundaikile bingi Habakuka. Watendekele kulanguluka-languluka pa bintu Yehoba byo aubijile bantu banji ba kala. Kuba bino kwamulengejile kutwajijila kuketekela mwi Lesa. Wayukile’mba Yehoba kechi ukabanda kupwisha makatazho ne. Kino kyamutekeneshe bingi nangwa kya kuba wayukile’mba ukatwajijila kumanama pa kimye kicheche. Habakuka walekele kuzhinauka, kabiji waikele na lusekelo ne kuketekela kuba’mba Yehoba ukamupulusha. Kabiji waambile byambo bimwesha’mba wajinga bingi na luketekelo. Bashayuka bamo balanguluka’mba byambo biji mu kyepelo 18 bilumbulula’mba “Nkakilaukanga na lusekelo mwi Nkambo; Nkazhokolokanga na lusekelo mwi Lesa.” Abino byambo bitutundaika bingi atweba bonse. Yehoba witulaya bintu byawama bingi kulutwe, kabiji witutundaika kuba’mba katatakatu afikizhe kyaswa muchima wanji.

19. Twafwainwa kuba byepi pa kuba’mba Yehoba etutekeneshe byonka byo atekeneshe Habakuka?

¹⁹ Buku wa Habakuka witufunjisha kuba’mba twafwainwa kuketekela mwi Yehoba. (Ha. 2:4) Twakonsha kutwajijila kwikala na luno luketekelo inge ketukoseshe bulunda bwetu ne Yehoba kupichila mu (1) kulomba na mukoyo ne kubuula Yehoba bijikila byonse byo tuji nabyo; (2) kuteshako muchima ku byambo bya Yehoba ne byo etutangijila kupichila mu jibumba janji; ne (3) kwikala ba kishinka ne kupembelela Yehoba saka twatekanya. Abino byo byaubile ne Habakuka. Nangwa kya kuba byambo bitanshi byo anembele mu buku wanji byajinga bya bulanda, bino byambo byapelako bimwesha kuba’mba waikele na luketekelo ne lusekelo. Twayai tulondelenga byonka byo aubile pa kuba’mba ne atweba Yehoba etutekeneshenga. Yehoba ye yenkatu wakonsha kwitutekenesha mu ino ntanda yakatazha.