1. Morwasinke twa hepera ehengagwido?

NATUVENYE twa hepa ehengagwido, morwa kuna kuligwanekera noyinka nomaudigu meparu. Ose nampo kuna kulididimikira maudigu ngwendi ukurupe ndi mauvera ndi kuzumbanesa vahali vetu monomfa. Ano vamwe vetu kutuhepeka. Yosili, natuvenye twa yi pura asi “yiruwo yoyidigu” eyi kugava umbangi asi ose kuna kuparuka ‘pomazuva gopouhura’ ntani asi uzuni woupe kuna kuhedera pepi. (2 Tim. 3:1) Nampili ngoso, ose nampo kwa ndindira siruwo sosire yipo matumbwidiro gaJehova ga sike mo ntani nampo maudigu getu kuna kuligwederera. Nye kupi natu vhura kugwana ehengagwido?

2, 3. (a) Yisinke twa diva kuhamena Habakuku? (b) Morwasinke natu konakonena buke zaHabakuku?

² Mokugwana elimbururo, tu konakoneni buke zaHabakuku. Nampili ngomu Matjangwa ga dira kuuyunga ko yoyinzi kuhamena eparu lyaHabakuku, mobuke zendi kwa kara mo mbudi zehengagwido. Edina lyendi kutanta asi “Kuhengagwida.” Eyi kuvhura kutamba kehengagwido eli a gava Jehova  kovakareli vendi. Habakuku kwa uyungire naKarunga nokupura mapuro. Jehova kwa mu pulisilire a tjange kuhamena nzogera ozo yipo nose tu gwanene mo mauwa.—Hab. 2:2.

³ Bibeli kapi za uyunga ko yoyinzi kuhamena eparu lyaHabakuku, nye azo kwa tumbura tupu nzogera ezi ga kere nazo naJehova. Buke zendi kuna kara ruha royininke “eyi va tjangera” moNonkango daKarunga, yipo “tu kare nehuguvaro eli ali tundu medidimiko nehengagwido.” (Rom. 15:4) Mauwa musinke natu gwanena mo mobuke zaHabakuku? Azo kutuvatera tu dive asi yisinke ayi tanta kuhuguvara mwaJehova. Uporofete waHabakuku kutupa hena ehuguvaro asi kuvhura tu kare nombili zomomutjima, yi kare asi maudigu musinke tuna kupita. Ngesi tu konakoneni momunene buke zaHabakuku.

4. Morwasinke ga guvilire unene Habakuku?

⁴ Resa Habakuku 1:2, 3. Habakuku kwa parukire posiruwo soudigu. Age kwa guvire unene morwa age kwa kere mokatji kovantu wovadona ntani wonyanya. Yipo ga lipulire asi: ‘Ezuvake ngau haga po udinikarunga ou? Morwasinke Jehova ana kudira kurugana ko yuma usimbu?’ Habakuku nga mono udona welike ou ngava rugana vantu womuhoko gwendi. Age kwa lizuvhire asi kwato eyi na vhura kurugana ko. Makura yipo ga kanderere kwaJehova a rugane ko yuma. Habakuku nampo ga tamekere kugazara asi Jehova kapi ana kara hena nosinka kovantu vendi. Kwendi ayo kwa monekere ngwendi asi Karunga kapi ta rugana ko yuma usimbu. Nove wa lizuvha rumwe ngoso ndi?

5. Sirongwa musinke somulyo atu gwana mobuke zaHabakuku? (Tara efano pepenuno 13.)

⁵ Ngoso Habakuku kwa ya hagekere kuhuguvara mwaJehova ndi? Kapi hena ga twikilire kuhuguvara momatumbwidiro gaKarunga ndi? Hawe. Pokutumbura maudigu gendi ayo kwa likidire asi simpe ga huguvarere mwaJehova. Age kwa kere nosinka morwa kapi ga kwete egano konda zeyi Jehova ga dilire kurugana ko yuma usimbu neyi ga mu sigilire a pite moudigu wina. Jehova kwa gendesere Habakuku a tjange yinka yendi yipo nose tu lirongere ko sirongwa somulyo esi asi: Kapisi tu kare nowoma mokutantera Jehova yinka yetu nomaudigu getu. Age kuna tu harere tu mu tantere maudigu getu nagenye. (Epis. 50:15; 62:8) Yisewe 3:5 kutukorangeda asi: “Huguvara HOMPA nomutjima goge nagunye. Wa ha hama konondunge danyamoge.” Kuvhura yi kare asi Habakuku ga divire nonkango odo ntani ga di sikisire mo.

6. Morwasinke ya karera nomulyo tu kanderere?

⁶ Habakuku kwa huguvarere mwaJehova ntani ga rugene ko yuma a mu hedere pepi. Age kapi tupu ga demenene koudigu wendi nokuhetekera ko kuukohonona po nyamwendi. Nye, age kwa geve yinka yendi kwaJehova. Esi sihonena sosiwa kwetu. Jehova ogu a zuvhu makanderero getu kuna tu harere tu mu tantere yinka yetu. (Epis. 65:2) Nsene tu yi rugana, ngatu mona omu Jehova nga limburura makanderero getu. (Epis. 73:23, 24) Age nga tu vatera tu dive magazaro gendi, yi kare asi momaudigu musinke tuna kupita. Kukanderera kwaJehova kuna kara nkedi zimwe atu likida asi twa mu huguvara.

7. Yisinke ga rugene ko Jehova apa Habakuku ga mu tanterere yinka yendi?

⁷ Resa Habakuku 1:5-7. Konyima zokupwagesa yinka yendi, Habakuku nampo ga lipulire eyi na rugana ko Jehova. Jehova kapi ga handukilire Habakuku, nye ga mu kwete egano. Karunga ga divire asi Habakuku kuna kuhepa makura yipo ga mu tanterere eyi nga ka rugana muhoko goVajuda ogu ngagu dili kulimburukwa. Nampo Habakuku yige gokuhova va tanterere asi Vajuda kwa kere pepi nokukava futisa.

8. Ngapi elimbururo lyaJehova lya kundamene Habakuku?

⁸ Jehova kwa tanterere Habakuku asi ta ka rugana ko yuma. Efutiso lyomuhoko gwina gomudona kwa kere pepi. Jehova kwa uyungire asi nga rugana ko yuma momazuva gaHabakuku mokufutisa muhoko ogo. Eyi ga limbwilire Jehova kapisi yiyo ga ndindilire Habakuku. Nonkango edi ga mu tanterere Jehova kwa likidire asi udigu ngau ligwederera moJuda. Vababironi kwa kere nyanya unene kupitakana Vajuda ava va divire nompango daJehova. Age nampo kwa lipulire asi: Morwasinke Jehova na ruganesera muhoko gomudona gu futise vantu vendi? Ngano nyove wa kere moukaro waHabakuku, yisinke ngano wa rugene?

9. Mapuro musinke hena ga lipulire Habakuku?

⁹ Resa Habakuku 1:12-14, 17. Habakuku ga yi kwete egano asi Jehova nga ruganesa Vababironi mokufutisa vantu wovadona, nye simpe ga kere nosinka. Nampili ngoso, age kwa uyungire asi Jehova ‘mugameni gwendi.’ (Deut. 32:4; Jes. 26:4) Age kwa twikilire kukara nehuguvaro asi Karunga ga kara nonkenda neharo. Eyi kwa mu ninkisire a dire kukara nowoma mokupura hena Jehova. Age kwa pulire mapuro ngwendi gaaga: Morwasinke Jehova ana kupulisilira yininke yi twikire kudonapa moJuda? Morwasinke ana kudira kurugana ko yuma usimbu? Morwasinke Munankondo nadinye ana kusigilira vantu vendi va hepe unene? Morwasinke ana ‘mwenene teete’ nokupulisira udinikarunga nakunye? Age ‘Mupongoki’ ano ‘meho gendi kwa pongoka unene mokutara koudona.’

10. Morwasinke atu lizuvhire poyiruwo yimwe ngwendi Habakuku?

¹⁰ Poyiruwo yimwe, nose kuvhura tu lizuvhe ngwendi Habakuku. Poyiruwo yangoso, ya wapa tu purakene kwaJehova nokuhuguvara mwendi pokulironga Nonkango dendi edi adi nkondopeke epuro lyetu. Ose kuzuvha matumbwidiro gendi apa azi tu rongo mbunga zendi. Nye kuvhura simpe tu lipure asi: ‘Ezuvake ngaga haga maudigu getu?’ Kuvhura tu lirongere ko kweyi ga rugene Habakuku kutunda pena.

11. Yisinke ga rugene Habakuku konyima zonzogera zawo naJehova?

¹¹ Resa Habakuku 2:1. Nzogera ezi ga kere nazo Habakuku naJehova kwa mu vaterere a kare nombili zomomutjima. Azo kwa mu ninkisire a twikire kundindira mwaJehova yipo a rugane ko yuma. Habakuku ga uyungire hena asi nga ‘ndindira pore zendi siruwo si wize apa nga futisa’ Karunga vantu vena wovadona. (Hab. 3:16) Vakareli vaJehova vamwe nawo kwa ndindilire mwaJehova a rugane ko yuma. Yihonena yawo kutukorangeda tu rugane yokulifana.—Mika 7:7; Jak. 5:7, 8.

12. Yisinke natu lirongera ko kwaHabakuku?

 ¹² Yisinke natu lirongera ko kwaHabakuku? Sokuhova, twa hepa kutwikira kukanderera kwaJehova yi kare asi maudigu musinke tuna kupita. Sauvali, twa hepa kupurakena kweyi atu tantere Jehova kupitira mombunga zendi nomoNonkango dendi. Sautatu, twa hepa kutwikira kundindira mwaJehova nokuhuguvara asi nga kohonona po maudigu getu kuliza nosiruwo sendi. Nsene tu honena Habakuku, ngatu kara nombili zomomutjima ezi ngazi tu vatera tu lididimike. Ehuguvaro lyetu ngali tu vatera tu lididimike, ano eyi ngayi tu vatera tu hafe momaudigu nagenye. Ehuguvaro kutuvatera tu ndindire mwaJehova nga rugane ko yuma.—Rom. 12:12.

13. Ehuguvaro musinke lya kara mwaHabakuku 2:3?

¹³ Resa Habakuku 2:3. Ayo kwa hafesere Jehova kweyi Habakuku ga ndindilire mwendi a rugane ko yuma. Munankondo nadinye ga divire ukaro ou ga pitire Habakuku, yipo nye ga mu hengagwidire pokumutantera asi ta ka rugana ko yuma koyinka eyi ga kere nayo. Ayo kwa fene ngwendi Jehova kuna kutantera Habakuku asi: “Lididimika tupu nokuhuguvara mwange. Ngo gwana tupu elimbururo nampili yi moneke asi kuna kuliranga.” Jehova kwa diworokesere Habakuku asi ga tura po siruwo sokusikisa mo matumbwidiro gendi. Age kwa korangedere Habakuku a ndindire mwendi yipo a sikise mo matumbwidiro gendi. Eyi kwa vaterere Habakuku a huguvare mwendi.

14. Yisinke natu tokomena kurugana nsene momaudigu?

¹⁴ Nsene tu ndindira mwaJehova nokupurakena nawa kweyi a tu tantere ngayi tu vatera tu mu huguvare ntani ngatu kara nombili zomomutjima yi kare asi momaudigu musinke tuna kupita. Jesus kwa tente asi kapisi hepero tu demenene ‘koyiruwo noyinema’ eyi ga dira simpe kutuhorwera Karunga. (Yirug. 1:7) Yipo nye, ngano tu twikireni kundindira nelinunupiko nepuro ntani nedidimiko pokuruganesa nawa siruwo setu tu ruganene Jehova paapa twa hulira.—Mar. 13:35-37; Gar. 6:9.

15, 16. (a) Matumbwidiro musinke atu gwana mobuke zaHabakuku? (b) Yisinke natu lirongera ko komatumbwidiro ogo?

¹⁵ Jehova kwa tumbwidira asi: ‘Vahungami ngava paruka, yeeyi awo kwa limburukwa,’ ntani “evhu ngali zura unongo nefumano lyaHOMPA.” (Hab. 2:4, 14) Yosili, ava vana kutwikira kuhuguvara mwaKarunga ngava ka gwana mwenyo gwanarunye.

¹⁶ Etumbwidiro eli lya kara mwaHabakuku 2:4 kuvhura li moneke ngwendi kwato mulyo. Nye mupositoli Paurusa kwa mwene etumbwidiro olyo asi mulyo yipo ga li temwinine yikando yitatu monombilive edi ga tjenge. (Rom. 1:17; Gar. 3:11; Heb. 10:38) Yi kare asi maudigu musinke vana kuligwanekera nago vahungami, awo ngava ka mona omu matumbwidiro gaKarunga gana kusika mo. Jehova kuna tu harere tu demenene kweyi yokomeho.

17. Yisinke ga tu tumbwidira Jehova mwaHabakuku?

¹⁷ Buke zaHabakuku kuturonga sirongwa somulyo natuvenye ose tuna kuparuka pomazuva aga gopouhura. Jehova kwa tumbwidira asi nkenye ogu a tura epuro mwendi nokumuhuguvara nga  ka paruka. Tu twikireni kunkondopeka epuro lyetu nokuhuguvara mwaKarunga yi kare asi maudigu musinke tuna kupita. Kupitira mwaHabakuku, Jehova kwa tumbwidira asi nga tu vatera nokutupopera. Age kuna tu harere tu mu huguvare nokundindira siruwo esi ga tura po, apa Uhompa wendi ngau ka pangera evhu nalinye. Posiruwo oso, evhu ngali ka zura vantu woruhafo nombili.—Mat. 5:5; Heb. 10:36-39.

18. Ngapi omu nonkango daJehova da vaterere Habakuku meparu?

¹⁸ Resa Habakuku 3:16-19. Nonkango daJehova kwa vaterere Habakuku meparu. Age kwa gazadarere ko omu Jehova ga poperere vantu vendi nare. Eyi kwa mu ninkisire a huguvare unene mwaJehova. Age ga divire asi Jehova ta ka rugana ko yuma usimbu. Yininke nayinye oyo kwa mu hengagwidire nampili ngomu ga divire asi udigu wendi kuvhura u twikire ure wongandi. Habakuku kapi ga ya kere hena nosinka, nye age kwa kere nehuguvaro asi, Jehova nga mu popera. Nonkango edi ga uyungire Habakuku movelise 18 kuna kara nonkango dimwe edi adi tu pe ehuguvaro. Valirongi vamwe kwa yi pura asi velise ozo kutanta hena asi: “Morwa ehafo mwaHompa ame ngani vatauka nokudana.” Ee nonkango musi kouwa! Jehova kapi tupu ga tu tumbwidira yininke yoyiwa, nye age hena kuna kurugana ko yuma ngesi yipo matumbwidiro gendi ga ka sike mo.

19. Ngapi natu gwana ehengagwido ngwendi Habakuku?

¹⁹ Sihorokwa saHabakuku kuturonga asi ya kara nomulyo tu huguvare mwaJehova. (Hab. 2:4) Nsene tuna hara kutwikira kuhuguvara mwaJehova, twa hepa kunkondopeka elikwatakano lyetu nendi (1) pokutwikira kukanderera yipo tu mu tantere maudigu getu, (2) pokupurakena koNonkango daJehova ntani komavyukiso aga atu gwana kombunga zendi ntani (3) pokutwikira kundindira mwaJehova nehuguvaro. Oyo yiyo ga rugene Habakuku. Nampili ngomu ga kere noruguwo apa ga tamekere nzogera zendi naJehova, konyima ga ya hefe. Nsene tu honena Habakuku, nose ngatu gwana ehengagwido kwaJehova. Kwato hena oku natu vhura kugwana ehengagwido mouzuni ou woudona.