1. Mwafwa bika tubaboshe tukashaka kutuzembeleka?

TUBABOSHE tukashaka kutuzembeleka, mwafwa simbu imo byuma kubyesi kutwendela mwamubwa, co tukakala mu bishoti. Hamo tukazeye mwafwa ya kubinja, kukulubala nambe kutsisa munu itwazema. Indi hamo bakwetu bali na kutuyandesa. Co lalo hamo tuli na kuyoya mukati ka banu ba lwozi. Simbu ituli na kuyoya inapu yaikalu mwafwa tuli mu “matangwa a kukotoka.” Co ha litangwa na litwangwa tuli na kushwenya ku kukotoka kwa futisi ya kano kaye. (2 Tima 3:1) Nameme ngoco, hamo tukalizibi ngwetu tunabandamena simbu yailaha kumona Yehova ashulisilila bikulaheso byendi, co bukalu bwetu buli na kulibwezelela. Bika byasa kutuzembeleka?

2, 3. (a) Bika bituzibuka ha ñanda ya Hambakuke? (b) Mwafwa bika tusimutwiya mukanda wa Hambakuke?

² Tusimutwiyeni ha mukanda wa Hambakuke mangana tuwane cikumbululo. Nameme Bisoneka kubyamwesele biñanda byoshe bya mu kuyoya kwa Hambakuke, oloni mukanda wasonekele utuzembeleka. Lizina lyendi hamo lilumbununa kubumbatela.  Kubumbatela kubanendeka aha kumwesa mwakatuzembelekelamo Yehova. Akatuzembeleka ngwe munu uje natubumbatela. Oku kubumbateya kwasa kulumbununa lalo kukulaela manene Njambi. Hambakuke wasimutwiyiye na Njambi na kumwihula bihula. Yehova wakumbulwile bihula bya kapolofweto Hambakuke, na kumuhwiminina asoneke byuma bibasimutwiyiye mwafwa wazibukile ngwendi netu bitukwasa.—Hamba 2:2.

³ Biñanda byasimutwiyiye Yehova na kapolofweto kendi Hambakuke, bikebyo lika biñanda bibasoneka mu Mbimbiliya bya kukundama kuli Hambakuke. Ñanda ya Hambakuke inapu imo ya biñanda “bibasonekele” mu Mbimbiliya bije bibanyungililile mwamubwa mangana byase kututakamesa na kutukwasa tukale na lilabelelo. (Loma 15:4) Bukwasi muka butwasa kuwana mu mukanda wa Hambakuke? Utukwasa tuzibuke bikulumbununa kukulaela Yehova. Co lalo ou mukanda utukwasa kuzibuka ngwetu twasa kusimpa nameme tuliwana na bukalu. Tucisimutwiyeni ha mukanda wa Hambakuke mu kushula.

4. Bika byazeyesele Hambakuke?

⁴ Tandeni Hambakuke 1:2, 3. Hambakuke wayoyele mu simbu yaikalu manene. Wazeyele mwafwa wakele na kuyoya na banu bababi na bikenya. Obu bubi bwatwaleleleho simbu ya kupwa hali? Mwafwa bika Yehova wecelelele obu bubi ha simbu yailaha? Hambakuke wamwene Baisalele bayandesa bakwabo. Wazeyele manene. Ngeci, walombele bukwasi kuli Yehova. Hamo Hambakuke washangumukile kusinganyeka ngwendi Yehova kesi na kwaka mbunge banu bendi. Wamwene ngwe Yehova ali na kukotokela kunyongesa banu bababi. Neni mukalizibi ngoco simbu imo ndi?

5. Byuma muka bya seo bitulilongesa mu mukanda wa Hambakuke? (Kengeni cikupulo ha liputa 13.)

⁵ Hambakuke wecelele kukulaela Yehova ndi? Wecelele kukulahela byuma byamukulaesele Njambi ndi? Embwe. Hambakuke mwalekele Yehova bukalu bwendi bwoshe, wamwesele ngwendi wakulaelele Yehova keti banu. Nameme ngoco, Hambakuke wazibile kubabala ku mbunge mwafwa kazibukile byuma byalingisile Yehova ecelele banu kutwalelelaho kuyanda. Yehova wamwene ngwendi eyi ñanda netu yasa kutulongesako bimo, mukemwo wahwiminine Hambakuke aisoneke. Ngeci, tunapande kumuleka bisinganyeka byetu byoshe. Yehova ashaka ngwendi tumuleke bukalu bwetu bwoshe. (Myaso 50:15; 62:8) Mukanda wa Visimo 3:5 utushongangeya ngwawo, ‘tukulaele Yehova na mbunge yetu yoshe. Kesi tujendamene ku mana etu babenya.’ Hambakuke hamo wazibukile awa majwi, co waapangesele.

6. Mwafwa bika kulombela kwapwa kwa seo?

⁶ Hambakuke walikutile busamba na Yehova, co wamukulaelele ha kupwa kabusamba kendi na Ishe. Hambakuke kalikulaelele ikeye babenya nameme kulishoshomwena manene ha bukalu bwendi. Oloni watwakelele mwanja waubwa omwo walombelele kuli Yehova na kumuleka bukalu bwendi bwoshe. Yehova ha kupwa muka-kukumbulula malombelo, washaka ngwendi tumwese ngwetu twamukulaela ha kumuleka bukalu bwetu bwoshe omwo tulombela. (Myaso 65:2) Nga tulinga ngoco, tulimwena Yehova mwakakumbulwilamo malombelo etu na kutuzembeleka. (Myaso 73:23, 24) Atukwasa tuzibuke bisinganyeka byendi mu bukalu bwoshe bwoshe. Malombelo akutunda kwisi ya bimbunge  byetu akamwesa mwamubwa mutwakulaelela Njambi.

7. Yehova walingile bati omwo Hambakuke wamulekele bisinganyeka byendi?

⁷ Tandeni Hambakuke 1:5-7. Hambakuke mwamanesele kulombela kuli Yehova, kazibukile byuma byalinga Yehova. Ha kupwa Tate yetu wa ngozi, Yehova katenukilile Hambakuke mwendekele mwalizibililemo. Njambi wazibukile ngwendi Hambakuke wendekele aje majwi mwafwa byuma byakele na kulingiwa byamubabalesele ku mbunge. Yehova walekele Hambakuke byuma bikalingiwa ku Bayunda ba kujeneka kulongwa. Hamo Hambakuke ikeye wapwile wa kulibanga kuzibuka ngwendi simbu ya Yehova ya kunyongesa Bayunda yakele muyehi.

8. Mwafwa bika cikumbululo ca Yehova cakomokesele Hambakuke?

⁸ Yehova walekele Hambakuke ngwendi wakele muyehi na kulingako bimo. Wapangesele baka-Mbambilone mu kunyanyamesa Bayunda bakujeneka kulongwa. Omwo Yehova wendekele ngwendi mu matangwa eni, walumbunwine ngwendi akanyanyamesa Bayunda ha simbu yayoyele kapolofweto Hambakuke na bakwabo Baisalele. Cikumbululo cakomokesele Hambakuke. Eci cikumbululo keti cikeco cashakele kuziba Hambakuke. Byuma byamulekele Yehova byasholokele ngwe bibwezelela lika ku bukalu mu Yunda. * Bambambilone bapwile ba kukenyuka kutubakana Baisalele mwafwa bakebo balishashele ngwabo bakele na kulombela Yehova. Mwafwa bika Yehova washakele kunyongesa banu bendi kupangesa banu baje kubakele na kumulemesa? Ngwe yeni ngwe mwalizile bati?

9. Hambakuke hamo wehwile bihula muka?

⁹ Tandeni Hambakuke 1:12-14, 17. Nameme Hambakuke wazibukile ngwendi Yehova apangesa Bambambilone mu kunyanyamesa baka-bubi bayoyele nabo, oloni anga wakele mu bitanga. Oloni Hambakuke watumbwile Yehova ngwendi limanya lyendi. (Kwitu 32:4; Isaya 26:4) Hambakuke watwaleleleho kukulaela Njambi uje wakala na cizemo na ngozi. Ngeci, wasele kwihula Yehova lalo ngwendi: Mwafwa bika Njambi necelela bubi mu Yunda? Bika kabumanesela bwasi? Bika bilingisa Muka-nzili yoshe ecelele tuyando? Bika “nolokela kuluu” oku ali na kumona bubi? Ikeye lika wapwa “wa kujela,” co ‘mesho endi apwa a kujela kukenga ha bubi.’

10. Bika byasa kutulingisa tulizibe ngwe mwalizibile Hambakuke?

¹⁰ Simbu imo, tunasa kuliziba mwalizibilililemo Hambakuke. Ngeci tunapande kutolilila kuli Yehova. Tunapande lalo kumukulaela na tukatanda na kulilongesa Lijwi lyendi. Kulinga ngoco, kukakanyamesa lilabelelo lyetu. Tukatanda bikulaeso byendi mu mabulu aili na kutwana munga yendi. Oloni tunasa kulihula ngwetu: ‘Tuyando twetu tukahwa tangwa lika?’ Byuma byalingile Hambakuke bitulongesa bika?

11. Bika byalingile Hambakuke hanima ya kutolila kuli Yehova?

¹¹ Tandeni Hambakuke 2:1. Hambakuke washubulukile munima ya kusimutwiya na Yehova. Wabandamenene na kukulaela ngwendi Yehova alingako bimo. Hambakuke watwaleleho kwendeka ngwendi: “Njikasimpa na kubandamena simbu  ngeci yete.” (Hamba 3:16) Bangamba ba Njambi baje basimpile, banatwakela mwanja wa kutwalelelaho kukulaela Yehova.—Mika 7:7; Yako 5:7, 8.

12. Bika bitulilongesa kuli Hambakuke?

¹² Bika bitulilongesa kuli Hambakuke? Ca kulibanga, tunapande kutwalelelaho kulombela kuli Yehova mutuliwana na byeseko byoshe byoshe. Ca mu cibali, tunapande kutolilila ku byuma byatuleka Yehova kwitila mu Lijwi lyendi na munga yendi. Ca mu citatu, tunapande kubandamena kuli Yehova na kukulahela ngwetu atukwasa ha simbu yoshe yoshe. Nga simbu yoshe tuleka Yehova bukalu bwetu na kukulahela na kubandamena kuli ikeye ngwe mwalingile Hambakuke, co tupwa ba kushubuluka na kutwalelelaho kulikolesa. Kukala na lilabelelo kutukwasa tubandamene kuli Njambi na kutukwasa tupwe ba kubwahelela nameme tuli mu bukalu. Lilabelelo litukwasa tukulahele ngwetu Yehova asa kutukwasa.—Loma 12:12.

13. Majwi ali ku Hambakuke 2:3 atutakamesa bati?

¹³ Tandeni Hambakuke 2:3. Byuma byalingile Hambakuke byazibisile Yehova kubwaha. Njambi wazibukile bukalu bwaliwanene nabwo Hambakuke. Ngeci wamuzembelekele mu cizemo mwamukulahesele ngwendi akakumbulula bihula byendi. Yehova keshwalele kukumbulula bihula Hambakuke. Kwafwile lika ngwe Njambi aleka Hambakuke ngwendi: “Simpa na kunjikulahela. Nameme cisholoka ngwe njili na kukotokela, njikukumbulula.” Yehova wamulekele lalo ngwendi simbu iketa yakashulisila bikulaheso byendi. Wakwasele Hambakuke ngwendi simbu yaco muiketa akashulisilila biyongola byendi. Ou kapolofweto kazeyele.

14. Byuma muka bitunapande kulinga ha simbu ya bukalu?

¹⁴ Netu tunapande kubandamena kuli Yehova na kutolilila ku byuma byatuleka. Co tumukulahela na kupwa ba kubwahelela nameme tuliwana na bukalu. Yesu watushongangeyeye ngwendi kutwapandele kwaka manene mbunge ku “bisimbu na myaka” bije katulekele Njambi. (Vili 1:7) Ngeci kutwapandele kuzeya, oloni tunapande kukala na likulahelo, kulikehesa na kupangesa simbu ituli nayo mu kupangela Yehova na nzili yetu yoshe.—Mako 13:35-37; Ngala 6:9.

15, 16. (a) Cikulaheso muka cituwana mu mukanda wa Hambakuke? (b) Ebi bikulaheso bitulongesa bika?

¹⁵ Yehova nakulahesa baka-busunga ngwendi: “baka-busunga bakayoya omwo bakononoka kuli Njambi,” co “kaye kakashula na mana a bumpau bwa Shukulu Kalunga.” (Hamba 2:4, 14) Baje bakulahela Yehova bakayoya myaka yoshe.

¹⁶ Tunasa kusinganyeka ngwetu majwi ali ku Hambakuke 2:4 kuakalishulisilila. Oloni kapositolo Paulu wakulahelele ngwendi awa majwi a Yehova ali aha ha besi, anapu a busunga mukemwo waelukilile kuendeka lutatu. (Loma 1:17; Ngala 3:11; Heve 10:38) Muka-busunga nameme aliwana na tuyando twoshe twoshe, likulahelo limukwasa atwaleleleho kukolesa na kukalimwena biyongola bya Njambi mubikalishulisilila. Yehova ashaka ngwendi twake manene mana ha lilabelelo lyetu.

17. Mukanda wa Hambakuke ututakamesa bati?

¹⁷ Mukanda wa Hambakuke utukwasa manene yetu tuli na kuyoya muno mu matangwa a kukotoka. Yehova nakulahesa ngwendi  munu woshe uje enda mu busunga na kukulahela, akawana mwonyo wa myaka yoshe. Tutwaleleniho kukulahela manene Njambi nameme mu simbu ya bishoti na tuyando. Mukanda wa Hambakuke wamwesa ngwawo Yehova asa kutukwasa na kutwamena. Washaka lika ngwendi tumukulahele, na kubandamena litangwa libukashangumuka Bumwene bwendi kuyula kaye koshe. Ha simbu ije mu kaye mwoshe mukashula banu ba kulikehesa na kubwahelela.—Mateo 5:5; Heve 10:36-39.

18. Hambakuke walingile bika mwazibile majwi a Yehova?

¹⁸ Tandeni Hambakuke 3:16-19. Majwi a Yehova akwatele manene Hambakuke ku mbunge. Wasinganyekesesele omwo Yehova wakwaselelemo banu bendi kusañulu. Likulahelo lyendi lyakanyamene. Nameme Hambakuke wayandeleko ha simbu ya kupwamo, oloni wakanyamene omwo wazibukile ngwendi kwasalele lika simbu yaindondo co Yehova anyongesa baka-bubi. Hambakuke wakulahelele ngwendi Yehova asa kumwobola. Wendekele mwajwi aje amwesele ngwawo likulahelo lyendi lyakanyamene mu vesi. Baka-kulilongesa bamo ngwabo walumbunwine ngwendi ‘Njikajombozoka na kujolela muli Mwene. Njikalyalanga ha kubwahelela byanalingi Njambi. Eci cinapu cilongesa cakama manene kuli yetu. Yehova nakulahesa kukatulingila byuma byabibwa kulutwe, co lalo natuleka ngwendi kuli byuma byali na kulinga mangana ashulisilile biyongola byendi.

19. Bika bitunapande kulinga mangana Njambi atuzembeleke ngwe mwazembelekelelemo Hambakuke?

¹⁹ Mukanda wa Hambakuke watushongangeya manene kukulahela Yehova. (Hamba 2:4) Likulahelo lyetu likanyama nga tukanyamesa busamba bwetu na Yehova. Busamba bwetu nendi bukanyama nga (1) tumuleka bukalu na bishoti byetu byoshe mu malombelo; (2) kulilongesa Mbimbiliya na kukabangeya binangulo bitutanda mu mabulu a mu munga yendi; na (3) kupwa ba kulongwa omwo tubandamena kukalimwena Yehova mwakashulisilila biyongola byendi. Bikebyo byalingile Hambakuke. Nameme majwi a maputukilo mu libulu lyendi apwile a busiwa, oloni ku mamaneselelo wabwahelele, co likulahelo lyendi lyakanyamene. Tutembwinineni Hambakuke mangana netu tulimwene mwakatuzembelekelamo tate yetu Yehova. Awa majwi atuzembeleka manene yetu tuli na kuyoya muno mu kaye kakabi.