1. Why nao iumi evriwan needim comfort?

IUMI evriwan needim comfort. Maet from iumi savve wari, feel nogud, and safa. Maet iumi start for olo, sik, or samwan wea iumi lovem hem dae. Samfala long iumi kasem hard taem bikos olketa narawan treatim iumi nogud. And tu, pipol wea stap raonem iumi olketa barava raf tumas. Taem iumi lukim “evri samting hem hard tumas,” diswan showimaot klia iumi stap “long olketa last day” and each day wea go pas hem olsem niu world hem kakam klosap. (2 Tim. 3:1) Bat, maet iumi weit longtaem finis for lukim olketa promis bilong Jehovah for kamap tru, and maet iumi feisim staka hard taem. So wea nao iumi savve kasem comfort?

2, 3. (a) Wanem nao samfala samting wea Bible storyim abaotem Habakkuk? (b) Why nao hem gud for story raonem buk bilong Habakkuk?

² For kasem ansa for datfala kwestin, bae iumi storyim buk bilong Habakkuk. Bible no talem staka samting abaotem laef bilong Habakkuk and wanem hem duim. Bat datfala buk wea garem nem bilong hem savve barava encouragem iumi. Maet nem bilong hem minim for “Hagem Samwan.” Maet diswan minim wei wea Jehovah savve comfortim iumi, olsem wei wea hem putim arm bilong  hem raonem iumi. Or hem savve minim wei wea iumi hol strong long Jehovah. Taem Habakkuk story witim God, hem askem samfala kwestin. Hem olsem Habakkuk askem olketa kwestin hia for iumi tu, bikos Jehovah muvim Habakkuk for raetem story bilong tufala.—Habakuk 2:2.

³ Disfala story midolwan Jehovah and datfala profet wea wari tumas, hem nomoa only taem wea Bible storyim samting abaotem laef bilong Habakkuk. Buk bilong Habakkuk hem part long “evri samting wea olketa raetem bifor” and hem stap insaed Bible for “givim iumi hope bikos olketa Holy Raeting hia helpem iumi for no givap and comfortim iumi.” (Rome 15:4) Hao nao disfala buk savve helpem each wan long iumi? Hem helpem iumi for luksavve hao for trustim Jehovah. And tu, olketa profesi bilong Habakkuk helpem iumi for barava sure iumi savve garem peace long mind nomata iumi kasem eni hard taem. So, hem gud for iumi story raonem samfala samting abaotem buk bilong Habakkuk.

4. Why nao Habakkuk barava wari tumas?

⁴ Readim Habakuk 1:2, 3. Habakkuk stap long taem wea laef barava hard tumas. Hem feel sorre tumas bikos wei bilong pipol barava nogud and raf tumas. Maet Habakkuk ting olsem: ‘Wanem taem nao bae olketa stop for duim olketa nogud samting? Why nao Jehovah no kwiktaem duim samting?’ Habakkuk lukim olketa Israelite evritaem duim samting wea no stret and olketa spoelem olketa narawan. Hem feel olsem hem barava no wei nao. Taem hem lukim olketa nogud samting hia, hem prea for Jehovah duim samting. Maet Habakkuk start for tingse Jehovah no lovem pipol bilong hem or Hem no kwiktaem for duim samting. Waswe, enitaem iu tu feel olsem?

5. Wanem important leson nao iumi lanem from buk bilong Habakkuk? (Lukim piksa long start bilong study.)

⁵ Waswe, Habakkuk stop for trustim Jehovah nao? Waswe, hem no garem faith long olketa promis bilong God? Nomoa! Wei wea hem talemaot olketa problem and wari bilong hem long Jehovah showimaot hem no givap. Luk olsem samting wea mekem hem barava wari hem bikos hem no minim why Jehovah no kwiktaem duim samting and why Jehovah letem hem for kasem olketa nogud samting. Wei wea Jehovah muvim Habakkuk for raetem tingting bilong hem teachim iumi important leson: Hem nao for iumi no hol bak for talemaot tingting and wari bilong iumi long Jehovah. Tru nao, hem invaetem iumi for talemaot evri wari wea iumi garem taem iumi prea. (Sams 50:15; 62:8) Provebs 3:5 encouragem iumi olsem: “Trastem [Jehovah] long ful haat blong yu. Yu no dipen nomoa long save blong yu seleva.” Luk olsem Habakkuk savve long olketa toktok hia and followim long laef bilong hem.

6. Why nao hem important for prea?

⁶ Habakkuk duim samting for showimaot hem trustim Jehovah, wea hem Fren and Dadi bilong hem. Habakkuk no just wari abaotem samting wea kasem hem and trae for stretem datwan seleva. Bat, hem prea abaotem feeling and wari wea hem garem. Diswan hem nambawan example for iumi. Jehovah, man wea herem prea, hem laekem iumi for showimaot iumi trustim hem taem iumi prea and talemaot wari bilong iumi long hem. (Sams 65:2) Taem iumi duim olsem, iumi bae lukim Jehovah ansarem prea bilong iumi. Hem comfortim and teachim iumi wanem for duim. (Sams 73:23, 24) Jehovah bae helpem iumi for savve long tingting bilong hem, nomata olketa nogud samting kasem iumi. Wanfala best wei for showimaot iumi barava trustim God, hem nao taem iumi prea from heart bilong iumi.

7. Wanem nao Jehovah duim taem Habakkuk talemaot olketa wari bilong hem?

⁷ Readim Habakuk 1:5-7. Bihaen Habakkuk talem tingting and wari bilong hem long Jehovah, maet hem ting, wanem nao Jehovah bae duim? From Jehovah garem love and hem Dadi wea garem wei for luksavve, hem no tok strong long Habakkuk. Hem luksavve why Habakkuk tok olsem bikos Habakkuk kasem bigfala pain and sorre. Jehovah talem Habakkuk wanem nao bae happen long olketa Jew wea no faithful. Luk olsem Habakkuk nao first wan wea Jehovah talem hao klosap nao bae hem panisim pipol long datfala taem.

8. Why nao Habakkuk no expectim ansa wea Jehovah talem?

⁸ Jehovah talem Habakkuk hao hem redi for duim samting. Panis wea datfala raf and nogud pipol bae kasem hem klosap tumas. Long Habakkuk 1:5 Jehovah talem disfala toktok, “long taem bilong iufala.” * Diswan showimaot hao datfala judgment bae kamap long taem wea Habakkuk laef yet, or long taem bilong olketa Israelite wea stap long semtaem olsem hem. Samting wea Jehovah talem hem minim evriwan long Judah bae barava safa. Habakkuk no expectim for herem datwan. Wei bilong olketa long Babylon nogud and raf tumas winim olketa Israelite, wea savve long olketa standard bilong Jehovah. Why nao Jehovah ting for iusim disfala raf nation, wea no worshipim hem for panisim pipol bilong hem? Wanem nao bae iu duim sapos iu nao Habakkuk?

9. Olketa wanem kwestin nao maet Habakkuk askem?

⁹ Readim Habakuk 1:12-14, 17. Habakkuk minim why Jehovah bae iusim olketa long Babylon for judgem and panisim olketa nogud pipol wea stap raonem hem, bat hem still konfius. Nomata olsem, hem hambol and gohed trustim Jehovah olsem “strongfala Rok” for haed long hem. (Diutronomi 32:4; Aesaea 26:4) Habakkuk disaed for gohed patient and trustim hao God hem showimaot love and kaen. From datwan, hem no hol bak for askem samfala kwestin moa long Jehovah. Why nao bae God letem samting wea happen long Judah for kamap moa worse? Why nao hem no kwiktaem duim samting? Why nao Olmaeti letem olketa nogud samting for gohed? Why nao God stap kwaet nomata nogud fasin kamap big tumas? From Jehovah hem holy tumas, hard for hem lukluk nomoa taem olketa rabis samting gohed.

10. Why nao maet samfala taem iumi feel olsem Habakkuk?

¹⁰ Samfala taem, maet iumi tu feel olsem Habakkuk. Iumi lisin long Jehovah. Iumi barava trustim hem, iumi readim and studyim Bible, and datwan mekem iumi garem hope. Iumi lane abaotem olketa promis bilong hem thru long olketa teaching wea iumi kasem from organization bilong hem. Bat maet iumi still ting olsem, ‘Wanem taem nao wei wea iumi safa bae finis?’ Wanem nao iumi savve lanem from samting wea Habakkuk duim bihaen?

11. Wanem nao Habakkuk disaed strong for duim?

¹¹ Readim Habakuk 2:1. Wei wea Habakkuk story long Jehovah mekem hem garem peace long mind. Datwan mekem hem for disaed strong for weitim Jehovah for duim samting. Habakkuk talem moa samting wea hem disaedem taem hem sei: “Bae mi gohed fo stap kuaet, an weit nomoa fo datfala taem.” (Habakuk 3:16) Olketa nara faithful pipol bilong God tu patient and  gohed weitim Jehovah for duim samting. Example bilong olketa encouragem iumi bikos hem showimaot iumi tu savve duim sem samting.—Maeka 7:7; Jas. 5:7, 8.

12. Wanem nao samfala samting wea iumi lanem from Habakkuk?

¹² Wanem nao iumi savve lanem from disison bilong Habakkuk? First samting, iumi mas no stop for prea long Jehovah nomata iumi kasem hard taem. Mek-tu, iumi need for lisin long wanem Jehovah talem insaed Bible and thru long organization bilong hem. Mek-thri, iumi shud patient for weitim Jehovah and barava trustim hao long taem wea hem markem, hem bae finisim wei wea iumi safa. Olsem Habakkuk, sapos iumi gohed for storyim evri samting long Jehovah, lisin long wanem hem talem, and weitim hem for duim samting, iumi bae garem peace long mind and datwan bae helpem iumi for no givap. Hope wea iumi garem bae strongim iumi for patient, and datwan bae helpem iumi for hapi nomata iumi feisim staka hard samting. Datfala hope helpem iumi for trustim hao Dadi bilong iumi long heven bae duim samting.—Rome 12:12.

13. Hao nao Jehovah encouragem Habakkuk?

¹³ Readim Habakuk 2:3. Jehovah hapi long Habakkuk from hem mekem disison for weitim hem. Olmaeti God luksavve hem barava safa. So Jehovah comfortim and helpem hem for savve hem bae duim samting for ansarem olketa kwestin bilong hem. Hem olsem God sei long Habakkuk, “Iu patient, trustim mi. Bae iu kasem ansa for olketa kwestin bilong iu nomata luk olsem hem bae longtaem lelebet!” Jehovah remindim Habakkuk hem markem finis barava taem for olketa promis bilong hem for kamap tru. Hem encouragem Habakkuk for weitim taem wea olketa plan bilong hem bae kamap. Bikos gogo, datwan bae happen.

14. Wanem nao iumi shud disaed strong for duim taem iumi kasem hard taem?

¹⁴ Wei wea iumi patient for weitim Jehovah and iumi lisin long evri samting hem talem, hem showimaot iumi trustim hem and iumi bae garem peace long mind nomata eni hard taem kasem iumi. Jesus encouragem iumi for trustim Jehovah wea hem nao nambawan man for followim taem, and for no warim tumas olketa “taem” wea God no talemaot yet. (Acts 1:7) Dastawe, iumi shud no givap bat gohed for hambol, garem faith, patient, and iusim gud taem wea iumi garem for duim best bilong iumi for Jehovah.—Mark 13:35-37; Gal. 6:9.

15, 16. (a) Olketa wanem promis nao stap long buk bilong Habakkuk? (b) Wanem nao iumi lanem from olketa promis hia?

¹⁵ Jehovah promis hao olketa wea raeteous bae gohed for laef bikos olketa garem faith and disfala earth bae fulap witim savve abaotem glory bilong Jehovah. (Habakuk 2:4, 14) Tru nao, olketa wea patient and trustim Jehovah bae kasem laef olowe.

¹⁶ Tingim promis wea stap long Habakuk 2:4. Toktok long datfala verse hem barava important, dastawe aposol Paul talem thrifala taem long olketa leta bilong hem! (Rome 1:17; Gal. 3:11; Heb. 10:38) Iumi savve sure hao nomata iumi safa from eni hard taem, iumi bae lukim taem wea olketa promis bilong Jehovah kamap tru sapos iumi gohed faithful and trustim hem. Jehovah laekem for iumi evritaem tingim hope bilong iumi for future.

17. Wanem encouragement nao iumi kasem from buk bilong Habakkuk?

¹⁷ Iumi evriwan wea stap long olketa last day distaem savve lanem wanfala important leson from buk bilong Habakkuk. Jehovah promis for givim laef olowe long eni raeteous  man wea garem faith and trustim Hem. So iumi laek for strongim faith and trust bilong iumi long God, nomata iumi wari or kasem eni problem. Samting wea Jehovah talem thru long Habakkuk encouragem iumi for luksavve hao Hem bae sapotim and sevem iumi. Jehovah laekem iumi for trustim hem and patient for weitim taem wea hem markem for Kingdom bilong hem rulim disfala earth. Long datfala taem, earth bae fulap witim pipol wea hapi and hambol for worshipim Jehovah.—Matt. 5:5; Heb. 10:36-39.

18. Hao nao toktok bilong Jehovah affectim Habakkuk?

¹⁸ Readim Habakuk 3:16-19. Samting wea Jehovah talem hem barava affectim Habakkuk. Hem ting raonem olketa samting wea Jehovah duim bifor for pipol bilong hem. Datwan strongim wei wea hem trustim Jehovah. Hem savve Jehovah bae klosap for duim samting! Datwan barava comfortim datfala profet, nomata hem savve bae hem safa for lelebet taem yet. Habakkuk garem daot firstaem, bat gogo, tingting bilong hem change and hem barava trustim Jehovah for sevem hem. Samting wea hem talem long verse 18 hem wanfala nambawan toktok wea showimaot klia hem barava trustim Jehovah. Samfala savveman sei datfala toktok hem minim: “Bae mi jamp from mi hapi long Lord, bae mi spin raon from mi hapi tumas long God.” Datwan hem important leson for iumi! Jehovah no givim iumi nomoa olketa nambawan promis for future, bat hem showimaot hao hem gohed duim samting distaem for mekem olketa promis bilong hem kamap tru.

19. Hao nao iumi savve kasem comfort olsem Habakkuk?

¹⁹ Iumi lanem important leson from buk bilong Habakkuk abaotem wei for trustim Jehovah. (Habakuk 2:4) Iumi savve garem kaen trust olsem sapos iumi strongim wei wea iumi fren witim Jehovah. For duim datwan, iumi mas (1) gohed for prea and no givap for talemaot tingting and wari bilong iumi long Jehovah, (2) barava followim toktok bilong Jehovah and eni direction wea iumi kasem thru long organization bilong hem, and (3) faithful and patient for weitim Jehovah for duim samting. Hem nao samting wea Habakkuk duim. Nomata hem barava wari taem hem start for story witim Jehovah, bat gogo hem barava hapi and kasem comfort. Sapos iumi followim example bilong Habakkuk, iumi tu bae kasem comfort from Dadi bilong iumi long heven, Jehovah, wea barava lovem iumi. Tru nao, buk bilong Habakkuk hem givim iumi best comfort insaed disfala nogud world.