1. Baalunkura shesho hasiissannonkehu mayiraati?

NINKE baalunkura shesho hasiissannonke. Heeshshonke giddo yaaddo, hexxo mudhineemmo gede assannorinna qarru woˈminoha ikkara dandaanno. Geedhimma, dhibbu woy shiirotenni kainohunni baasa dadillinoommoha ikkara dandaanno. Qoleno mitoota mannu baasa giwannonsaha ikkara dandaanno. Yannankera finqille baasa lexxitanni no. Ee, tini yanna ‘qarrissannotenna goofimarcho’ ikkitinota dihuluullammeemmo; hattono hashshe soodi kiiro haaro alamewa gamba yinanni heeˈnoommo. (2 Xim. 3:1) Ikkollana Yihowa eino qaali woˈmannota laˈˈate lowo yanna agadhine keeshshinoommoha, hattono qarru batiˈranni noonkeha ikkara dandaanno. Ikkina shesho afiˈra dandiineemmohu mamiinniiti?

2, 3. (a) Imbaaqoomi daafira anfoommori maati? (b) Imbaaqoomi maxaafa xiinxallineemmohu mayiraati?

² Hanni tenne xaˈmora dawaro afiˈrate Imbaaqoomi maxaafa xiinxallino. Qullaawu Maxaafi Imbaaqoomi heeshsho daafira tittire kulannokkiha ikkirono, suˈmisinni borreessinoonni maxaafi jawaantete buicho ikkannoho. Imbaaqoomi yaa “Rimmi Asse  Hanqafa” yitanno tiro afiˈrinoha ikkara dandaanno. Tini Yihowa magansidhannosire hanqafe sheshifachishannota woy qaaqqu annasi cuˈmiˈrannohu gede soqqamaanosi Iso seekkite cuˈmidhanno gara leellishshanno. Imbaaqoomi Magano mite xaˈmuwa xaˈmino. Imbaaqoomi kuri xaˈmuwa xaˈminohu ninke riqiweeti yaa dandiinanni; korkaatuno Yihowa Imbaaqoomi ledo hasaawino hasaawi ninkerano kaaˈlannonketa afino daafira, qullaawu ayyaaninni borreessinanni gede assino.—Imb. 2:2.

³ Qullaawu Maxaafi giddo noohu kuni yaadino masaalaanchinna Yihowa hasaabbino hasaawi Imbaaqoomi daafira kulannonke. “Qullaawa Maxaaffa widoonni afiˈneemmo cincanna jawaante hexxo” uyitannonke gede, Imbaaqoomi maxaafi “umo assine” borreessinoonnihu Maganu Qaali wido ikkino. (Rom. 15:4) Mitti mittinke Imbaaqoomi maxaafinni horo afiˈra dandiineemmohu hiittoonniiti? Kuni Maxaafi Yihowa addaxxate yaa mayyaatero huwanteemmo gede kaaˈlannonke. Qoleno Imbaaqoomi maxaafi qarrunna shetto iillitunkerono, giddiidi harshammo afiˈra dandiineemmota buuxisannonke. Hanni Imbaaqoomi maxaafa seekkine xiinxallino.

4. Imbaaqoomi lowo geeshsha yaadinohu mayiraati?

⁴ Imbaaqoomi 1:2, 3 nabbawi. Imbaaqoomi heeˈrinohu qarrunna shetto batidhino yannaraati. Hakkawaro bushunna finqilu manni batiˈrino daafira isi lowo geeshsha yaadino. Imbaaqoomi togo yee xaˈmino: ‘Tini bunshe baˈannohu mamooteeti ikka? Yihowa bunshe xaa geeshsha huninokkihu mayiraati?’ Imbaaqoomi umisi gaˈre ikkinohu Israeelete manni mimmito beebba assiˈrannanna miicanna laˈino. Tennera isi hexxo mudhino. Konni daafira isi tenne quuxxote yannara Yihowa konne coye biddi assanno gede huucciˈrino. Imbaaqoomi Yihowa mannisira heda agurino yee heda hanafinoha ikkara dandaanno. Atino hatto yite hedde egennootto?

5. Imbaaqoomi maxaafinni hiikkonne kaajja roso ronseemmo? (Hanafote noo misile lai.)

⁵ Ikkina Imbaaqoomi Yihowa addaxxanna Isi eino qaale wonshannota ammana agurinoni? Diagurino! Isi qarrasinna yaaddosi mannaho ikkikkinni Yihowara kuˈlasi Iso addaxxa agurinokkita leellishanno. Imbaaqoomi dadillinohu, Maganu hakko qarra hunanno yannanna qarru iillannosi gede fajjinohu mayiraatiro buuxa hoogino daafiraati. Yihowa Imbaaqoomi yaachishinosire qullaawu ayyaaninni borreessanno gede assasi, ninkeno yaachishinonkerenna huluullinonkere Yihowara kuˈla waajja hasiissannonkekkita buuxissannonke. Yihowa qarranke baala huuccattotenni isira hasaaphinammora koyisinonke. (Far. 50:15; 62:8) Lawishsha 3:5 togo yite jawaachishshannonke: “Woˈmu wodanikkinni Kaaliiqa addaxxi ikkinnina, umikki egennora irkidhooti.” Imbaaqoomi konne qaale afikki digatino; qoleno heeshshosi giddo harunsino.

6. Huuccatto assiˈra hasiissannote yineemmohu mayiraati?

⁶ Imbaaqoomi Annasinna ammanamino Jaalasi ikkinoha Yihowa addaxxino, hattono isiwa shiqino. Imbaaqoomi qarrisi daafira quwa sae diyaadino; qoleno iillinosi fonqolo umisinni tirate diwoˈnaalino. Hatteentenni macciishshantannosi huluullonna yaaddo Yihowara kuˈlino; tini ninkera dancha lawishsha ikkitannonke. Huuccatto macciishshanno Magani Yihowa, qarranke huuccattotenni isira hasaaphine Iso addaxxineemmota leellinshammora koyisinonke. (Far. 65:2, 3) Togo assinummoro Yihowa huuccattonkera dawaro qolanno gara laˈneemmo. Isi sheshonna biddishsha  oye jawaachishannonke woyite rimmi asse hanqafanni noonketi leeltannonke. (Far. 73:23, 24) Baxi qarri iillinkerono hedosi anfeemmo gede kaaˈlannonke. Giddonkenni assiˈneemmo huuccatto Magano addaxxineemmota leellishshanno.

7. Imbaaqoomi yaaddosi daafira huucciˈrita Yihowa dawaro qolinosihu hiittoonniiti?

⁷ Imbaaqoomi 1:5-7 nabbawi. Imbaaqoomi yaaddosinna qarrasi Yihowa aana tuqqi gedensaanni, Yihowa ma garinni qolannosiro hedikki digatino. Baxillaanchunna wodanchanno Anni Yihowa Imbaaqoomi suwashshu wodaninni kae xaˈmino xaˈmora dihanqinosi. Yihowa Imbaaqoomi qarraminotanna kaaˈlote huucciˈranni noota afino daafira, ammanaminokkihu Yihudu manni aana muli yanna giddo mayi ikkannoro kulinosi. Yihowa hakkonne finqila manna hunanno yanna gambissinota kulinosihu umi manchi Imbaaqoomi ikkikki digatino.

8. Yihowa Imbaaqoomira qolino dawaro hibbo ikkitinosihu mayiraati?

⁸ Yihowa Imbaaqoomira bunshe hunate qixxaawe noota leellishinosi. Hatti bushanna finqila ilama qorichishamase digattanno. Yihowa “yannaˈnera” yaasi, yoo abbannohu Imbaaqoomi woy hakka waro noo Israeele yannara ikkinota leellishano. Yihowa Imbaaqoomira dawaro qolinohu isi hedinokki garinniiti. Ikkina tini raaresiˈra dawaro ikkitanno? Yihowa Yihudu mannira qarru batiˈrannonsata kulinosi. Baabiloonete manni kaajjaddahonna mararro noonsakkireeti. Insa Yihowa biddishsha afinohu Isiraeelete manninni roore finqilaasinete. Yihowa dagasi qorichishate mararro noonsakkirenna Magano magansidhannokki daga horoonsiˈrinohu mayiraati? Ati Imbaaqoomi ikkoottoro mayi macciishshamannohe?

9. Imbaaqoomi isonooto hiikkuri xaˈmuwa xaˈminoha ikkara dandaanno?

⁹ Imbaaqoomi 1:12-14, 17 nabbawi. Imbaaqoomi, Yihowa hakka waro nooha bushare assanno manna qorichishate Baabiloonete daga horoonsiˈrannota afinoha ikkirono, isira xaano coyi gurchaawinosi. Ikkollana isi umosi heeshshi assannoha ikkino daafira Yihowa addaxxa agura hoogate murciˈrino. Isinni Imbaaqoomi Magano ‘Golosi’ assiˈrannota coyiˈrino. (Mar. 32:4; Isa. 26:4) Imbaaqoomi Maganu baxillaanchonna shaqqado ikkinota addaxxino daafira, xaano Yihowa xaˈmo xaˈma diwaajjino. Isi togo yee xaˈminoha ikkara dandaanno: ‘Yihowa Yihudu manni roore qarramanno gede fajjinohu mayiraati? Isi konne qarra rahe huninokkihu mayiraati? Woˈmanka dandaannohu “sammi” yiinohunna baalankawa bunshe heedhanno gede fajjinohu mayiraati? Isi ‘qullaawaho;’ hattono illesi “lowo geeshsha keeraancho ikkitinohura busha coye dilaˈanno.”’

10. Mito woyite Imbaaqoomi gede ikke macciishshamankera dandaannohu hiittoonniiti?

¹⁰ Mito woyite ninkerano Imbaaqoomi gede ikke macciishshamankera dandaanno. Yihowa macciishshineemmo. Iso addaxxineemmo; qoleno hexxonke kaajjishiˈrate Qaalesi nabbambeemmo, hattono xiinxallineemmo. Dirijjitesi uyitannonke biddishshi widoonni isi eino qaali daafira lowore ronseemmo. Ikkollana, ‘Qarrammanni heeˈneemmohu mamooti geeshshaati?’ yine hendeemmoha ikkara dandaanno. Imbaaqoomi aane assinorinni maa rosa dandiineemmo?

11. Imbaaqoomi Yihowa macciishshihu gedensaanni ma assate murciˈrino?

¹¹ Imbaaqoomi 2:1 nabbawi. Imbaaqoomi Yihowa ledo hasaawasi giddiidi harshammo afiˈranno gede assitinosi. Konnira isi  Yihowa kalaqamino qarra biddi assa geeshsha cince agadhate murciˈrino. Ikkollana Isi cincinohu shiima yanna geeshsha calla diˈˈikkino; Imbaaqoomi gedensoonni “cince agadheemmo” yee coyiˈrasi, aye geeshshi yannano ikkituro cincate murciˈrinota leellishshanno. (Imb. 3:16) Wole ammanantinoti Maganu soqqamaasineno isinte gede cincite agadhitino; insa lawishshi hexxo mudhinummokki Yihowa cincine agadhineemmo gede jawaachishshannonke.—Mik. 7:7; Yai. 5:7, 8.

12. Imbaaqoomi assinorinni maa ronseemmo?

¹² Imbaaqoomi lawishshinni maa ronseemmo? Umihunni, baxi qarri iillinkerono Yihowa huucciˈra agura dihasiissannonke. Layinkihunni, Yihowa Qaalisinna dirijjitesi widoonni kulannonkere macciishsha hasiissannonke. Sayikkihunni, Yihowa yannasira fooliishshiishannonketa addaxxine iso cincine agadha hasiissannonke. Imbaaqoominte gede Yihowawa shiqanke agura hoongummoronna Iso macciishshineemmoha ikkiro, giddiidi harshammo afiˈneemmo; tini qolte kaajjine heeˈrate kaaˈlitannonke. Hexxonke cincine heeˈratenna baxi qarri iillinkerono hagiirraamma ikkate kaaˈlitannonke. Iimi Anninke baalanka coye biddi assannota dihuluullameemmo.—Rom. 12:12.

13. Yihowa Imbaaqoomi jawaachishinosihu hiittoonniiti?

¹³ Imbaaqoomi 2:3 nabbawi. Yihowa Imbaaqoomi Iso cince agadhino daafira hagiidhinoti dihuluullissannote. Woˈmanka Dandaanno Magani Imbaaqoomira iillinosi qarra seekke afino. Konni daafira Maganu, Imbaaqoomi suwashshu wodaninni xaˈmino xaˈmora dawaro qolannosita baxillunninna shaqqillunni kule sheshifachishinosi. Imbaaqoomi qarrisi baalunkunni fooliishshiˈranno yanna muleeti. Maganu Imbaaqoomira togo yiinosihu gedeeti: “Cincite ane addaxxi. Keeshshoommoha lawiherono dawaro qoleemmohe!” Yihowa dinyino yannara eino qaale wonshannota qaagiissinosi. Isi hedosi wonsha geeshsha agaranno gede Imbaaqoomi amaalinosi. Qoleno Imbaaqoomi Yihowa addaxxasinni diˈˈirraawino.

14. Qarru iillannonke woyite maa assate murciˈra hasiissannonke?

¹⁴ Ninkeno Yihowa coye biddi assa geeshsha cincine agadhanna kulannonkere macciishsha, Iso addaxxineemmonna baxi qarri iillinkerono giddiidi harshammo afiˈneemmo gede kaaˈlitannonke. Yesuusi, Yihowa coyiˈrinore yannasira wonshannota addaxxineemmo gedenna Maganu kulinonkekki ‘yannanna diri’ aana illachinsheemmokki gede jawaachishinonke. (Soq. 1:7) Konni daafira, hexxo mudhinummokkinni umonke heeshshi assine, ammanatenninna cincatenni, gattino yanna dandaaminke deerrinni Yihowara soqqamate horoonsiˈno.—Maq. 13:35-37; Gal. 6:9.

15, 16. (a) Imbaaqoomi maxaafinni mayi hexxo afiˈra dandiineemmo? (b) Tini hexxo maa rosiissannonke?

¹⁵ Yihowa Iso addaxxitannori keeraano mannira togo yee qaale eino: “Keeraanchu kayinni ammanatenni heeshsho afiˈranno” hattono “Kaaliiqi ayirrinye afano baatto woˈmitanno.” (Imb. 2:4, 14) Ee, cincatenni Magano addaxxitannori heeshshote baraarsha afidhanno.

¹⁶ Imbaaqoomi 2:4te noo hexxo hanni hedi. Tini hexxo lowo geeshsha hasiissannota ikkitino daafira soqqamaanchu Phaawuloosi sokkasi giddo sase hige qummi assino! (Rom. 1:17; Gal. 3:11; Ibi. 10:38) Keeraanchu manchira qarru iillisirono, ammanatenninna Magano addaxxe heeˈratenni Isi eino qaale wonshannota laˈˈanno. Yihowa hexxonke aana illachinshammora hasiˈranno.

17. Yihowa iso addaxxinummoro ma assannonketa buuxisinonke?

 ¹⁷ Tenne goofimarchu yannara heeˈnoommori Imbaaqoomi maxaafinni dancha roso ronseemmo. Yihowa iso addaxxitannorira keeraanote hegere heeshsho aansara qaale eino. Konni daafira, ninke baalunku baxi qarrino ikko yaachishanno coyi iillinkerono ammananke kaajjishiˈranna Magano addaxxa agurroonke. Imbaaqoomi maxaafi widoonni Yihowa ninkeno kaaˈlankeranna gatisankera qaale eino. Yihowa addaxxineemmosinna Mangistesi uulla gashshitanno yanna cincatenni agadhineemmo gede jawaachishinonke. Hatte yannara, uullate aana salaame baxannohunna hagiirraamu Yihowa magansiˈranno manni woˈmanno.—Mat. 5:5; Ibi. 10:36-39.

18. Yihowa qaali Imbaaqoomi hedosi biddi assiˈranno gede kaaˈlinosihu hiittoonniiti?

¹⁸ Imbaaqoomi 3:16-19 nabbawi. Yihowa qaali Imbaaqoomi hedosi biddi assiˈranno gede assinosi. Imbaaqoomi Yihowa alba mannisira assinoha dhagge ikkanno coye hiincino. Isi albinni roore Yihowa addaxxino. Isi Yihowa muli yanna giddo qarra hoolannota afino! Yihowa qarrasi bayichonko haare hoolinokkiha ikkirono, tenne afasi sheshifachishshinosi. Imbaaqoomi huluullama agure Yihowata gatisate wolqa woˈmunni woˈma addaxxino. Isinni Imbaaqoomi kiiro 18te aana coyiˈrinori isi Yihowa lowo geeshsha addaxxannota leellishshanno. Mite fullahaano 18^ki kiiro noo gedeenni tirriro, “Hagiirrunni Mootichaho kubbeemmo; tashshi yaannae Maganoho sirbeemmo” yaate yite heddanno. Kiiro 16-19 geeshsha noo hedo lowo geeshsha sheshifachishshannote! Yihowa dhagge ikkitanno hexxo uyinonkeha calla ikkikkinni, eino qaale wonshannota buuxisinonke.

19. Imbaaqoomi gede shesho afiˈra dandiineemmohu hiittoonniiti?

¹⁹ Yihowa addaxxate daafira Imbaaqoomi maxaafinni lowore ronseemmo. (Imb. 2:4) Ninkeno Yihowa addaxxatenna isi ledo noonke jaalooma kaajjishiˈrate, (1) yaaddonkenna huluullinonkere agurrummokkinni huuccattotenni Yihowara kuˈla; (2) Yihowa Qaalisinna dirijjitesi widoonni aannonke biddishsha illachinshe harunsa; (3) ammanamatenninna cincatenni Yihowa agadha hasiissannonke. Imbaaqoomino hatto assino. Isi Yihowa ledo hasaawa hanafi woyite lowo geeshsha yaadinoha ikkirono, goofimarchoho kayinni jawaatino, hattono hagiirraamo ikkino. Imbaaqoomi lawishsha harunsineemmoha ikkiro, iimi Anninke Yihowa hanqafe sheshifachishannonke! Tenne busha alamera heeˈne kawiinni saˈino shesho mamiinni afiˈra dandiineemmo?