1. Bilong wanem yumi olgeta i nidim tok bilong mekim gut bel bilong yumi?

YUMI olgeta i nidim gutpela tok bilong mekim gut bel bilong yumi. Ating yumi bel hevi, tingting planti, na yumi sik. Ol dispela samting i save painim yumi long olgeta de. Ating yumi wari na tingting planti bikos yumi kamap lapun, yumi sik, o wanpela yumi laikim tru i dai. Sampela bilong yumi i karim hevi long han bilong ol birua. Pasin bilong pait na bagarapim man i kamap bikpela tru long olgeta hap. Yumi stap long “taim nogut” we i “givim hatwok long ol man,” na dispela em sain bilong “las de,” na yumi wok long i go klostu tru long nupela taim. (2 Tim. 3:1) Ating yumi wet longpela taim long lukim truim bilong ol tok promis bilong Jehova, na ol hevi bilong yumi i wok long i go bikpela moa. Olsem na yumi inap painim we ol gutpela tok bilong mekim gut bel bilong yumi?

2, 3. (a) Yumi kisim wanem save long Habakuk? (b) Bilong wanem yumi bai skelim Buk Habakuk?

² Yumi ken skelim Buk Habakuk. Rait Holi i no kolim olgeta samting long laip na wok bilong Habakuk, tasol buk em i raitim inap strongim yumi. Ating mining bilong nem Habakuk em “Holimpas Strong.” Dispela inap makim pasin bilong Jehova long holimpas strong, o mekim gut bel bilong ol manmeri bilong em.  Na tu, dispela inap makim pasin bilong ol long pas gut wantaim God. Habakuk i toktok wantaim God na givim ol askim—em ol askim yumi tu inap tingting long en. Olsem na holi spirit i kirapim em long raitim stori bilong dispela toktok.—Hab. 2:2.

³ Wanpela stori tasol long Rait Holi we i givim sampela save long yumi long profet Habakuk em stori bilong toktok i kamap namel long em na God. Buk Habakuk em hap bilong “olgeta tok ol i bin raitim long bipo” na i stap long Baibel. “Dispela tok i helpim yumi long sanap strong na i mekim isi bel bilong yumi long rot bilong Rait Holi. Na dispela i strongim yumi long wetim gutpela samting.” (Rom 15:4) Olsem wanem Buk Habakuk inap helpim yumi olgeta wan wan? Em inap helpim yumi long luksave long risen na yumi mas trastim Jehova. Maski yumi karim hevi, tok profet bilong Habakuk i helpim yumi long save olsem yumi inap stap bel isi. Yumi ken skelim gut moa ol tok i stap long Buk Habakuk.

4. Bilong wanem Habakuk i bel hevi?

⁴ Ritim Habakuk 1:2, 3. Habakuk i stap long haptaim nogut bilong planti hevi. Em i bel hevi tru bikos em i stap namel long ol manmeri i mekim ol pasin nogut na pait na bagarapim narapela narapela. Wanem taim bai God i bagarapim ol dispela manmeri nogut? Bilong wanem Jehova i no hariap long bagarapim ol? Habakuk i lukim olsem ol manmeri long ples bilong em i wok long mekim hatpela pasin na daunim ol narapela. Habakuk i pilim olsem i no gat man i stap bilong helpim em. Olsem na em i askim Jehova long pinisim ol man nogut. Ating Habakuk i pilim olsem Jehova i no inap hariap long pinisim ol manmeri nogut. Olsem wanem? Yu pilim wankain olsem dispela wokman bilong God?

5. Buk Habakuk inap givim wanem skul long yumi? (Lukim piksa long kirap bilong stadi.)

⁵ Yu ting Habakuk i lusim pasin bilong trastim Jehova? Yu ting em i no bilip moa long ol tok promis bilong God? Nogat tru! Em i no kamapim bel hevi na wari bilong em long ol man, nogat. Em i tokim Jehova long ol dispela samting, na dispela i soim olsem em i no larim bel hevi i daunim em. Em i bel hevi bikos em i no kliagut long risen na God i no hariap long pinisim ol pasin nogut. Jehova i stiaim Habakuk long stori long bel hevi na wari bilong en, na dispela i skulim yumi long wanpela bikpela samting: Yumi no ken pret long autim ol tingting na wari bilong yumi long God. Em i tokim yumi long toktok wantaim em long rot bilong beten. (Sng. 50:15; 62:8) Na tu, Provep 3:5 i kirapim yumi long “trastim Jehova long bel olgeta bilong [yumi],” na yumi “no ken bilip long save bilong [yumi] yet.” Habakuk i save long ol dispela tok, na em i tingim tingim long bel.

6. Bilong wanem beten em i bikpela samting?

⁶ Habakuk yet i mekim ol samting bilong i go klostu long Jehova, em gutpela Papa na Pren bilong em. Habakuk i no karim hevi long strong bilong em yet, o ting olsem save bilong em yet bai helpim em, nogat. Em i beten na kamapim bel hevi na wari bilong em long Jehova, na long dispela rot em i stap gutpela eksampel yumi ken bihainim. Jehova em Man Bilong Harim beten, na em i tokim yumi long beten na kamapim bel hevi na wari bilong yumi. (Sng. 65:2) Dispela bai opim rot long yumi inap lukim helpim bilong Jehova—i olsem em i holimpasim yumi long rot bilong ol gutpela tok em i givim bilong stiaim yumi. (Sng. 73:23, 24) Maski wanem wanem hevi i painim yumi, em bai helpim yumi long luksave long tingting bilong em long ol hevi i painim yumi. Taim yumi beten na autim ol tingting na wari i stap insait tru long bel bilong yumi, dispela i soim olsem yumi trastim tru God.

7. Jehova i mekim wanem taim Habakuk i autim bel hevi na wari bilong em?

⁷ Ritim Habakuk 1:5-7. Habakuk i autim olgeta tingting na wari bilong em long Jehova, na ating em i tingting planti long Jehova bai mekim wanem. I gat as tru na Habakuk i komplein, tasol Jehova em Papa i gat pasin sori na em i save pilim tingting bilong yumi ol man, olsem na em i no krosim Habakuk. God i save olsem Habakuk i bel hevi tru na wari. Lain Juda i lusim stretpela pasin na bihainim pasin nogut, olsem na Jehova i tokim Habakuk long ol samting bai kamap bihain. Ating Habakuk em fes man long Jehova i toksave long em olsem pinis bilong ol pasin nogut i klostu tru.

8. Bilong wanem Habakuk i tingting planti long bekim bilong Jehova?

⁸ Jehova i soim Habakuk olsem em i redi long mekim wanpela samting. Taim i kamap klostu pinis long em bai pinisim ol manmeri nogut na ol manmeri husat i wok long pait na bagarapim ol narapela. Jehova i tokim Habakuk: “Wanpela samting bai i kamap long taim bilong yupela.” Dispela i makim haptaim we profet Habakuk i stap laip yet o haptaim bilong lain jeneresen bilong em. Tok bilong Jehova i mekim Habakuk i tingting planti. Yu ting em i kisim bekim long beten bilong em? Tok bilong Jehova i makim olsem bikpela hevi tru bai painim olgeta manmeri bilong lain Juda. * Lain Kaldia (em lain Babilon) i no gat pasin sori na pasin marimari. Pasin bilong ol i nogut moa winim pasin bilong ol manmeri bilong Juda, em ol i save long ol lo bilong Jehova. Bilong wanem Jehova i laik yusim lain haiden long bagarapim lain Juda, em ol manmeri bilong em yet? Yu bai mekim wanem sapos yu harim God i mekim dispela tok?

9. Ating Habakuk i kamapim wanem ol askim?

⁹ Ritim Habakuk 1:12-14, 17. Habakuk i luksave olsem Jehova bai yusim ol Babilon long kotim na bagarapim ol manmeri i mekim ol pasin nogut, tasol em i tingting planti yet. Maski i olsem, Habakuk i tok em bai tingim yet Jehova olsem “Bikpela Ston” bilong lukautim em. (Lo 32:4; Ais. 26:4) Habakuk i bilip yet olsem God bai soim pasin laikim na pasin helpim long em. Olsem na em i no surik long kamapim gen sampela askim long Jehova. Olsem: Wai na God i larim bikpela hevi tru i painim lain Juda? Wai na em i no kirap kwik long pinisim ol hevi? Wai na God i Gat Olgeta Strong i larim pen na hevi i stap yet? Wai na em i “no mekim wanpela samting” taim pasin nogut i kamap bikpela moa? Em i “God Holi”; “ai bilong [em] i klin tumas long lukim samting nogut.”

10. Olsem wanem yumi inap pilim wankain olsem Habakuk?

¹⁰ Sampela taim yumi inap pilim wankain olsem Habakuk. Yumi putim yau long tok bilong Jehova. Yumi trastim em, olsem na yumi ritim na stadi long Baibel, na dispela i helpim yumi long bilip na wet long gutpela samting bai kamap. Long rot bilong oganaisesen bilong em, yumi kisim save long ol tok promis bilong em. Tasol yumi inap tingting planti olsem, ‘Wanem taim bai pen na hevi i pinis?’ Yumi inap kisim wanem skul long samting em Habakuk i mekim?

11. Bihain long Habakuk i toktok wantaim Jehova, Habakuk i tingting strong long mekim wanem?

¹¹ Ritim Habakuk 2:1. Habakuk i toktok wantaim Jehova na dispela i mekim em i stap bel isi. Olsem na em i bilip yet na wet long Jehova i helpim em. Em i tokaut gen long bilip bilong em taim em i tok: “Mi stap isi na wetim taim bilong bagarap bai kamap.” (Hab. 3:16) Ol narapela wokman bilong God i bihainim wankain pasin bilong stap isi na  trastim Jehova, na dispela i strongim yumi tu long bilip yet long Jehova long helpim yumi.—Mai. 7:7; Jems 5:7, 8.

12. Yumi inap kisim wanem skul long pasin bilong Habakuk?

¹² Yumi inap kisim wanem skul long pasin bilong Habakuk? Namba 1: Maski wanem ol hevi i painim yumi, yumi no ken tru lusim pasin bilong beten long Jehova. Namba 2: Yumi mas harim tok Jehova i givim long yumi long rot bilong Baibel na oganaisesen bilong em. Namba 3: Yumi mas bilip na wet long Jehova, na bilip tru olsem em bai pinisim pen na hevi bilong yumi long taim em yet i makim. Olsem Habakuk, sapos yumi autim olgeta tingting na wari bilong yumi long Jehova, na stap isi na putim yau long em, yumi bai stap bel isi na yumi bai inap long sanap strong yet na karim hevi. Sapos yumi gat pasin bilong bilip na wet, dispela bai strongim yumi na yumi no inap les kwik, na yumi bai stap amamas yet maski kain kain hevi i painim yumi. Yumi bai bilip tru olsem Papa bilong yumi long heven bai helpim yumi.—Rom 12:12.

13. Wanem gutpela tok i stap long Habakuk 2:3?

¹³ Ritim Habakuk 2:3. Yumi ken bilip tru olsem Jehova i amamas long pasin bilong Habakuk long wet. God i Gat Olgeta Strong i save long olgeta hevi i painim Habakuk. Olsem na em i mekim gut bel bilong Habakuk—God i mekim ol gutpela tok bilong strongim Habakuk long bilip olsem em bai kisim bekim bilong ol askim bilong em. I no longtaim na God bai mekim ol samting bilong pinisim ol wari bilong Habakuk. I olsem God i tokim Habakuk: “No ken les kwik, trastim mi. Maski em i no kamap kwik, em bai kamap!” Jehova i helpim Habakuk long luksave olsem em i save makim taim stret bilong inapim ol tok promis bilong em. God i givim skultok long Habakuk i mas wet long lukim Em i kamapim ol samting em i tingting pinis long kamapim. Dispela profet bai amamas long lukim truim bilong ol samting God i tok long mekim.

14. Taim hevi i painim yumi, yumi mas tingting strong long mekim wanem?

¹⁴ Taim yumi bilip yet long Jehova na putim gut yau long ol tok bilong em, dispela bai strongim yumi na helpim yumi long i stap bel isi maski wanem ol hevi i painim yumi. Jisas i tok yumi inap trastim Jehova olsem Man Bilong Makim Taim, na yumi no ken tingting tumas long “ol taim na ol de” em God i no tokaut yet long en. (Apo. 1:7) Yumi no ken givap. Mobeta yumi daunim yumi yet, bilip, na no ken les kwik long wet. Yumi mas yusim gut taim bilong yumi—givim bel olgeta long mekim wok bilong Jehova.—Mak 13:35-37; Gal. 6:9.

15, 16. (a) Wanem ol bikpela tok promis i stap long Buk Habakuk? (b) Ol dispela tok promis i givim wanem skul long yumi?

¹⁵ Jehova i tingim ol stretpela man husat i trastim em, na em i tok promis olsem: “Stretpela man bai i stap laip long rot bilong bihainim tok,” na “olgeta manmeri bilong graun bai save long glori bilong Jehova.” (Hab. 2:4, 14) Tru tumas, ol lain husat i daunim ol yet na trastim God, ol bai kisim laip.

¹⁶ Pastaim yumi inap tingim tok promis bilong Jehova long Habakuk 2:4 olsem wanpela tok nating. Tasol aposel Pol i tingim dispela tok promis olsem bikpela samting tru, olsem na 3-pela taim em i kolim gen tok bilong dispela ves! (Rom 1:17; Gal. 3:11; Hib. 10:38) Maski wanem ol hevi i painim stretpela man, sapos em i bilip na trastim God, em bai lukim God i kamapim ol samting em i tingting pinis long kamapim. Jehova i tokim yumi long lukluk i go long ol samting bai kamap bihain.

17. Buk Habakuk i mekim wanem tok promis bilong mekim isi bel bilong yumi?

 ¹⁷ Buk Habakuk i givim bikpela skul long yumi olgeta husat i stap nau long dispela haptaim bilong las de. Jehova i tok promis long givim laip long man i bihainim stretpela pasin na i bilip long Em. Maski wanem ol hevi i painim yumi, yumi mas wok yet long strongim bilip na trastim God. Long rot bilong Habakuk, Jehova i tok promis olsem em bai sambai long yumi na kisim bek yumi. Em i laik bai yumi trastim em na wetim taim em i makim bilong Kingdom Bilong God bai bosim graun olgeta, na ol manmeri bilong em bai stap amamas na bel isi.—Mat. 5:5; Hib. 10:36-39.

18. Olsem wanem tok bilong Jehova i senisim tingting bilong Habakuk?

¹⁸ Ritim Habakuk 3:16-19. Tok bilong Jehova i senisim tru tingting bilong Habakuk. Em i tingim tingim ol strongpela wok Jehova i mekim long pastaim bilong helpim ol manmeri bilong em, na dispela i strongim gen pasin bilong em long trastim God. Habakuk i save olsem klostu nau Jehova bai truim tok bilong em! Dispela i mekim gut bel bilong em, maski em i save olsem em bai karim pen na hevi inap sampela haptaim. Habakuk i no holim tupela tingting moa, nogat. Em i amamas na bilip olsem Jehova i gat strong bilong helpim em. Em i mekim tok i narakain tru na i soim olsem em i bilip tru long God. Sampela saveman i ting mining bilong ves 18 em olsem, “Mi bai amamas long Bikpela na kalap; mi bai amamas long God na danis.” Dispela tok inap strongim tru bilip bilong yumi! Jehova i tok promis long ol gutpela samting bai kamap, na em i strongim yumi long bilip olsem kwiktaim em bai mekim ol samting em i tingting pinis long mekim.

19. Olsem wanem yumi inap kisim bel isi wankain olsem Habakuk?

¹⁹ Habakuk i kamapim klia wanpela bikpela samting: Yumi mas trastim Jehova. (Hab. 2:4) Yumi inap kisim pasin bilong trastim Jehova sapos yumi strongim pasin pren bilong yumi wantaim em long rot bilong (1) beten oltaim na autim olgeta tingting na wari bilong yumi; (2) putim gut yau long Tok Bilong Jehova na olgeta tok yumi kisim long oganaisesen bilong em; na (3) bilip yet long Jehova na no ken les kwik. Habakuk i bin mekim olsem. Taim em i kirap long raitim buk bilong em, ol tok em i raitim i soim olsem em i bel hevi, tasol ol laspela tok em i raitim i soim olsem em i bilip tru na amamas. Yumi tu i ken bihainim gutpela eksampel bilong Habakuk bambai yumi inap pilim gutpela pasin laikim bilong Jehova, em Papa bilong yumi! Ol tok i stap long Buk Habakuk inap mekim isi bel bilong yumi maski yumi karim planti pen na hevi long nau.