喺生活上全心信賴耶和華！
“你要全心信賴耶和華，唔好依靠自己嘅聰明。”——箴言3:5
1． 點解我哋所有人都需要得到安慰？
我哋所有人都需要得到安慰。我哋嘅生活可能充滿苦惱、失望同悲傷。原因可能係年紀越來越大、患上疾病或者有親友去世，又可能係因為受到其他人唔好嘅對待，或者周圍嘅人變得越來越暴力。呢個“難以應付嘅非常時期”所發生嘅一切，都充分證明我哋正生活喺“最後嘅日子”。（提摩太後書3:1）每過一日，我哋就更接近新世界。不過，我哋等待耶和華實現佢嘅應許可能已經等咗好耐，而我哋面對嘅困難變得越來越多。噉我哋喺邊度可以得到安慰呢？
2,3． （甲）關於哈巴谷，我哋知道乜嘢？（乙）點解我哋要討論哈巴谷書？
2 分析哈巴谷書嘅經文可以幫助我哋揾出答案。雖然經文並冇詳細介紹哈巴谷嘅生平，不過以佢嘅名命名嘅呢卷書可以使我哋受到鼓勵。哈巴谷嘅意思可能係“熱烈嘅擁抱”，可以指耶和華俾人安慰嘅擁抱，或者指崇拜耶和華嘅人信心十足噉依附佢。哈巴谷向上帝提出一啲疑問，想了解佢對呢啲問題嘅睇法。耶和華回答咗呢啲問題，亦都啟示哈巴谷將對話記錄落嚟，因為佢知道我哋可以從中得益。（哈巴谷書2:2）
3 我哋從聖經睇出，哈巴谷先知充滿愁苦。同佢有關嘅事，我哋只能够通過佢同耶和華之間嘅親密對話嚟獲知。哈巴谷書作為“從前寫落嚟嘅［所有］話”嘅一部分保存喺上帝嘅話語聖經入面，“等我哋靠住忍耐，靠住聖經所帶嚟嘅安慰，可以懷有希望”。（羅馬書15:4）我哋自己可以點樣從哈巴谷書得益？呢本書可以幫助我哋睇出，信賴耶和華係乜嘢意思。另外，哈巴谷嘅預言使我哋確信，無論面對點樣嘅痛苦同難題，我哋依然可以保持内心平靜。而家，等我哋詳細討論吓哈巴谷書嘅内容。
呼求耶和華
4． 點解哈巴谷感到焦慮不安？
4 請讀哈巴谷書1:2,3。哈巴谷生活喺一段非常艱難嘅時期。佢因為身邊嗰啲邪惡、暴力嘅人而感到悲痛萬分。哈巴谷睇到自己嘅同胞行事不公，又互相惡待，佢心入面諗：“惡人惡事幾時先至終止？點解耶和華咁耐都唔採取行動？”佢覺得好無助。所以，喺呢段黑暗時期，佢請求耶和華伸出援手。哈巴谷可能開始覺得耶和華唔關心佢嘅子民，認為佢遲遲都唔採取行動。你能唔能够理解佢嘅感受呢？
5． 我哋從哈巴谷書可以學到乜嘢重要嘅事？（請睇吓課文開頭嘅圖片）
5 哈巴谷係咪對耶和華失去信心呢？佢係咪唔再相信耶和華嘅應許會實現？完全唔係！佢將自己嘅難題同憂慮都交俾耶和華而唔係人，呢個表明佢並冇因為絶望而放棄。佢感到不安，顯然係因為佢唔理解上帝點解仲未採取行動，亦都唔明白點解耶和華容許佢處於咁痛苦嘅境地。哈巴谷喺聖靈啟示下寫低咗佢嘅憂慮，耶和華通過呢啲記載教導我哋一件重要嘅事：我哋可以放心將自己嘅憂慮同疑問話俾耶和華知。佢的確仁慈噉邀請我哋通過禱告向佢敞開心扉。（詩篇50:15；62:8）箴言3:5鼓勵我哋要“全心信賴耶和華，唔好依靠自己嘅聰明”。睇嚟哈巴谷知道呢啲經文並且謹記在心。
6． 點解禱告好重要？
6 哈巴谷主動親近耶和華，將佢視為值得信賴嘅朋友同父親。哈巴谷並冇只係為自己嘅情況憂愁，亦都冇依靠自己嘅聰明，而係通過禱告向耶和華講出自己嘅感受同憂慮，為我哋立下好榜樣。另外，耶和華係聽禱告嘅主，佢邀請我哋通過禱告將自己嘅憂慮話俾佢知，藉此表明我哋信賴佢。（詩篇65:2）我哋噉樣做，就可以睇到耶和華點樣回應我哋嘅禱告。佢會通過仁慈嘅指引俾我哋温暖嘅擁抱，使我哋得到安慰。（詩篇73:23,24）無論我哋遭受乜嘢患難，佢都會幫助我哋了解佢嘅諗法。所以，向耶和華衷心禱告就係表明我哋信賴佢嘅其中一個最好嘅方法。
聽從耶和華
7． 知道哈巴谷嘅憂慮之後，耶和華點樣作出回應？
7 請讀哈巴谷書1:5-7。哈巴谷將自己擔心同憂慮嘅事交託俾耶和華之後，可能好想知道耶和華會點樣作出回應。耶和華係仁愛嘅天父，佢好理解哈巴谷嘅感受，佢知道哈巴谷正喺悲痛絶望中向佢尋求幫助。所以，耶和華並冇責備哈巴谷，而係話俾哈巴谷知，佢好快會對不忠嘅猶太人採取乜嘢行動。哈巴谷可能係第一個從耶和華嗰度得知當時嘅暴力時代即將會終結嘅人。
8． 點解耶和華嘅回答令哈巴谷感到困惑？
8 耶和華向哈巴谷表明，佢已經準備好採取行動。佢會用迦勒底人，即係巴比倫人，嚟懲罰又暴力又邪惡嘅猶大國。耶和華提到呢件事會“喺你哋嘅日子”發生。呢個表明，判決會喺哈巴谷以及同時代嘅以色列人仍然在生嘅嗰段時期執行。耶和華嘅回答根本唔係哈巴谷所期待嘅。巴比倫人比嗰啲起碼知道耶和華標準嘅以色列人更加冷血殘暴。點解耶和華用呢個殘忍嘅異教國家嚟懲罰自己嘅子民呢？噉樣只會令猶大國嘅人遭受更多痛苦。 * 如果你係哈巴谷，你對上帝嘅回答會有乜嘢感覺？
9． 哈巴谷可能問過乜嘢其他問題？
9 請讀哈巴谷書1:12-14,17。哈巴谷知道耶和華會通過巴比倫嚟審判同懲罰周圍嘅惡人，但佢仲係覺得好困惑。不過，佢繼續謙卑噉將耶和華視為自己嘅“磐石”。（申命記32:4；以賽亞書26:4）哈巴谷保持耐心，繼續信賴耶和華呢位既仁慈又有愛心嘅上帝，所以佢可以放心向耶和華提出更多問題。可能佢仲想知道：點解上帝容許猶大嘅情況變得越來越差；點解佢冇馬上行動；點解全能者容許更多令人痛苦嘅事發生；點解惡人當道嘅時候佢“緘默不語”。不過可以確信嘅係，耶和華係“聖者”，佢“眼目純潔，唔能够容忍惡事”。
10． 點解有時我哋可能會有哈巴谷一樣嘅感受？
10 有時，我哋可能會有哈巴谷一樣嘅感受。我哋聽從耶和華，滿懷信心噉閲讀同學習聖經並藉此强化我哋嘅希望，亦都通過佢嘅組織提供嘅指引知道佢嘅應許。不過我哋可能仲係會諗：“我哋嘅痛苦幾時先至到盡頭呢？”我哋從哈巴谷之後所做嘅事可以學到乜嘢？
等候耶和華
11． 聽咗耶和華嘅話之後，哈巴谷決心點樣做？
11 請讀哈巴谷書2:1。哈巴谷同耶和華交談之後，内心就平靜落嚟。於是，佢決心等待耶和華採取行動。呢個唔係一個即時作出嘅反應，因為佢後來話自己會“靜心等候苦難嘅日子”，再次表明咗佢嘅決心。（哈巴谷書3:16）上帝嘅其他忠僕都表現出同樣嘅耐心同信心。佢哋嘅榜樣鼓勵我哋繼續等待耶和華採取行動。（彌迦書7:7；雅各書5:7,8）
12． 我哋從哈巴谷身上學到乜嘢？
12 我哋從哈巴谷嘅決心學到乜嘢？第一，無論我哋遭遇乜嘢患難，都必須繼續向耶和華禱告；第二，我哋要聽從耶和華通過佢嘅話語同組織對我哋講嘅話；第三，我哋應該耐心等候耶和華，深信佢會喺適當嘅時候將我哋從痛苦中解救出嚟。如果繼續同耶和華保持親密嘅溝通，耐心等候佢嘅指示，我哋就會好似哈巴谷噉内心平靜，忍受得住。我哋嘅希望會强化我哋嘅耐心，而我哋嘅耐心可以幫助我哋喺一切逆境之下保持喜樂。所以，我哋所懷嘅希望幫助我哋堅信天父耶和華會採取行動。（羅馬書12:12）
13． 哈巴谷書2:3作出乜嘢仁慈嘅保證？
13 請讀哈巴谷書2:3。哈巴谷決心等候肯定使耶和華好高興。全能嘅上帝完全了解哈巴谷嘅艱難處境，所以佢仁愛、温和噉向哈巴谷保證，佢會對哈巴谷提出嘅問題作出回應，使哈巴谷得到安慰。哈巴谷嘅所有憂慮好快就會得到舒解。上帝作出保證，就好似係同哈巴谷講：“就算睇嚟我好遲先回應你，亦都請你保持耐心，繼續信賴我，我一定會回應你嘅禱告。”耶和華提醒哈巴谷，佢已經為實現自己嘅承諾定好時間，所以佢鼓勵哈巴谷繼續等待。最終，先知並冇失望。
點解我哋決心盡己所能事奉耶和華？（請睇第14段）
14． 我哋遇到困難嗰時應該決心點樣做？
14 我哋耐心等候耶和華，細心留意佢對我哋所講嘅，就可以滿懷信心，喺任何艱難嘅情況下都能够保持内心平靜。耶穌鼓勵我哋唔好將注意力集中喺上帝仲未透露嘅“時候時期”，而係要信賴偉大、守時嘅上帝耶和華。（使徒行傳1:7）所以，願我哋永不放棄，懷住信心，謙卑噉繼續等候，善用時間盡己所能事奉耶和華。（馬可福音13:35-37；加拉太書6:9）
耶和華將生命同光明嘅前途賜俾信賴佢嘅人
15,16． （甲）我哋喺哈巴谷書可以睇到乜嘢有力嘅應許？（乙）我哋從呢啲應許學到乜嘢？
15 耶和華對信賴佢嘅忠僕講：“義人就憑忠信活落去。認識耶和華榮耀嘅知識必遍滿大地”。（哈巴谷書2:4,14）冇錯，嗰啲保持耐心、信賴上帝嘅人最終會得到生命作為獎賞。
16 可能有啲人覺得，哈巴谷書2:4所記載嘅應許只係一個普通嘅陳述。不過，使徒保羅睇出耶和華嘅呢個保證好重要，所以佢三次引用呢節經文！（羅馬書1:17；加拉太書3:11；希伯來書10:38）一個義人無論遇到乜嘢困難，只要對耶和華保持忠貞同信心，就可以睇見佢嘅應許實現。耶和華希望我哋唔好過度關心目前嘅難題，而係專注於未來嘅希望。
17． 哈巴谷書向我哋提出乜嘢保證？
17 所有生活喺最後日子嘅人都可以從哈巴谷書學到重要嘅道理。耶和華承諾，所有信賴佢嘅義人都可以得到永生。所以，願我哋面對任何痛苦同憂慮嘅時候，都繼續强化自己嘅信心，信賴上帝。耶和華通過哈巴谷向我哋保證，佢會支持同拯救我哋。佢仁慈噉提醒我哋要信賴佢，而且要耐心等候佢所指定嘅時間。到時，喺上帝嘅王國統治下，崇拜上帝嘅人會遍滿地球，得享和平、快樂嘅生活。（馬太福音5:5；希伯來書10:36-39）
喜樂噉信賴耶和華
18． 耶和華所講嘅話對哈巴谷産生咗乜嘢影響？
18 請讀哈巴谷書3:16-19。耶和華所講嘅話對哈巴谷産生咗深遠嘅影響。哈巴谷沉思耶和華過去為佢子民所做嘅令人敬畏嘅事，進一步强化咗自己對耶和華嘅信心。雖然苦況可能仲會持續一段時間，但哈巴谷因為知道耶和華好快就會採取行動而得到安慰。哈巴谷嘅内心唔再有疑問，佢深信耶和華一定會施行拯救。佢喺18節講出咗一句令人難忘嘅話。有啲學者認為呢節經文嘅字面意思係：“我會因主而歡喜跳躍；我會因上帝而開心跳舞。”冇錯，哈巴谷嘅經歷的確帶俾我哋所有人好大嘅安慰！耶和華唔單止對我哋作出美好嘅承諾，仲幫助我哋確信佢正迅速實現自己嘅旨意。
19． 我哋點樣做，就可以同哈巴谷一樣得到上帝嘅安慰？
19 我哋從哈巴谷書學到重要嘅一點係，要信賴耶和華。（哈巴谷書2:4）想繼續信賴耶和華，我哋就要强化自己同耶和華嘅關係。所以，我哋必須努力做到以下三點：（1）堅持不懈噉禱告，將自己所有嘅憂慮都交俾耶和華；（2）認真聽從耶和華話語嘅吩咐同埋耶和華通過佢組織提供嘅指引；（3）忠心並耐心噉等候耶和華。哈巴谷就係噉樣做嘅。雖然哈巴谷起初内心充滿痛苦，但係佢同耶和華交談之後大受鼓勵，非常喜樂！喺呢個黑暗嘅世界當中，我哋仲可以喺邊度得到咁大嘅安慰呢？願我哋效法哈巴谷嘅榜樣，同佢一樣從天父耶和華温暖嘅擁抱得到安慰！
