1. ¿Xiñee caquiiñenu tu quixhedxí ladxidoʼno yaʼ?

GUIRANU caquiiñenu tu quixhedxí ladxidoʼno, ¿xiñee yaʼ? Purtiʼ zándaca cadídinu lu xiixa desgracia, nuu ni naguu xizaa laanu o nuunu desanimadu. Zándaca cayacananu purtiʼ maʼ huaniisinu, purtiʼ huaranu, pur guti tuuxa binni ni nadxiinu o purtiʼ cayuni huantarnu ca cosa malu ni runi binni laanu. Ne ra zidiʼdiʼ dxi jmaruʼ si malu ziyaca binni guidxilayú. Nga runi, pur ca dxi nagana ni nabáninu riʼ, cada dxi tiidiʼ jma nuunu seguru maʼ nabáninu lu ca últimu dxi ne jma maʼ zeeda dxiña dxi chuʼnu lu guidxilayú cubi (2 Tim. 3:1). Neca zacá, zándaca maʼ stale iza de cabézanu gaca cumplir ca promesa stiʼ Jiobá ne cada dxi tiidiʼ jma stale guendanagana nápanu. Nga runi, ¿tu zanda quixhedxí ladxidoʼno yaʼ?

2, 3. a) ¿Xi nánnanu de Habacuc? b) ¿Xiñee chiguizíʼdinu de libru stiʼ Habacuc?

² Para guidxélanu respuesta stiʼ pregunta riʼ la? guni analizarnu libru stiʼ Habacuc. Caadxi si cosa ruzeeteʼ Biblia de modo bibani profeta riʼ. Zándaca ni riníʼ labe nga «quiidxi dxiichiʼ chupa binni». Zanda gacané ca diidxaʼ riʼ laanu guxuíʼlunu  chupa cosa. Primé, guidxi dxiichiʼ Jiobá laanu para quixhedxí ladxidoʼno, ne stobi nga riguidxi dxiichiʼ ca siervu stiʼ Jiobá laa né stale stipa purtiʼ nápacaʼ confianza laabe. Guizáʼ runi animar libru stiʼ Habacuc laanu. Luni riete guniʼné profeta riʼ Dios ne biʼniʼ laabe caadxi pregunta. Bicabi Jiobá ca pregunta ni biʼniʼ Habacuc laa ne gúdxibe laa gucaa ni lu Biblia purtiʼ nanna dxiichibe zacané ni laanu (Hab. 2:2).

³ Ni riete lu Biblia de profeta Habacuc nga guníʼnebe Jiobá órapeʼ nuube xizaa. Libru ni bicaabe naca ni parte de guiráʼ ni gucuá lu Stiidxaʼ Dios dxiqué, racané ni laanu gápanu ti «esperanza purtiʼ riguixhedxí Stiidxaʼ Dios ladxidoʼno ne racané ni laanu guni huantarnu» (Rom. 15:4, TNM). Nuu chupa modo racané ca diidxaʼ ni zeeda lu libru stiʼ Habacuc laanu. Primé, racané ni laanu gánnanu xiñee caquiiñeʼ gápanu confianza Jiobá. Guiropa, racané ni laanu gápanu ne cadi gunítinu paz ni nuu ndaaniʼ ladxidoʼno neca cadxaagalunu guendanagana o cayacananu. Pur cani bizéʼtenu riʼ, guni estudiarnu ni zeeda lu libru stiʼ Habacuc.

4. ¿Xiñee nuu Habacuc xizaa yaʼ?

⁴ (Biindaʼ Habacuc 1:2, 3). Nabé nagana ca dxi bibani Habacuc. Guyuube triste purtiʼ guizáʼ malu guca ca binni que. ¿Ñee ziuu dxi gusaana ca binni que de gúnicaʼ cosa malu la? ¿Xiñee qué huayuni Jiobá gastiʼ yaʼ? Biiyaʼ profeta riʼ guiráʼ injusticia biʼniʼ ca israelita ne laaca biiyabe modo ruquichinacaʼ binni, nga runi biʼniʼ sentirbe qué zanda gúnibe gastiʼ. Órapeʼ cadiʼdiʼ Habacuc lu guendanagana riʼ gunábabe Jiobá guni xiixa. Zándaca bizulú guníʼ íquebe qué rizaalaʼdxiʼ Jiobá ni cazaaca que ne candaa para guni xiixa. ¿Ñee huayuni sentirnu casi biʼniʼ sentir profeta stiʼ Dios riʼ la?

5. ¿Xi ti cosa guizáʼ risaca rusiidiʼ libru stiʼ Habacuc laanu yaʼ? (Biiyaʼ foto ni zeeda ra ruzulú tema riʼ).

⁵ ¿Ñee náparuʼ Habacuc confianza Jiobá ne guiráʼ ca promesa stiʼ la? Napa pue. ¿Xiñee nánnanu ni yaʼ? Purtiʼ qué ñebe ra nuu sti binni para gacané laabe, sínuque Jiobá nga gúdxibe guiráʼ ni riguu xizaa laabe ne nga rusihuinni qué ñaca desesperarbe. Neca guyuube xizaa purtiʼ caʼruʼ guiénebe xiñee qué huayuni Jiobá xiixa ne xiiñeʼ cudii lugar gacanabe. Ora gudxi Jiobá Habacuc gucaa guiráʼ ni riguu xizaa laa lu Biblia rusiidiʼ ni laanu ti cosa nabé risaca: cadi caquiiñeʼ guidxíbinu gábinu Dios guiráʼ ni riguu xizaa laanu ne ca duda ni nápanu. Ne cadi guiaandaʼ laanu, Dios peʼ cayabi laanu gábinu laa guiráʼ ni riguu xizaa laanu (Sal. 50:15; 62:8). Proverbios 3:5 rudii conseju riʼ laanu: «Gupa confianza Jiobá de guidubi ladxidoʼloʼ, ne cadi chinándaluʼ ni na xpiaaniluʼ». Ne zándaca runibiáʼ Habacuc ca diidxaʼ riʼ, nga runi gucané ni laa.

6. ¿Xiñee risaca guni orarnu?

⁶ Gupa Habacuc confianza Jiobá purtiʼ biiyabe laa casi Xhamígube ne Bixhózebe. Nga runi biyúbibe guidxíñabe laa. Lugar de ñúnibe ni ná si xpiaanibe ne ñuu xhaatabe xizaa la? gúdxibe Jiobá guiráʼ ni cayuni sentirbe ne guiráʼ ni naguu xizaa laabe. Guizáʼ galán ejemplu bisaanabe para laanu. Rucaadiaga Jiobá ca oración stinu, runi invitarbe laanu gápanu confianza laabe ne gábinu laabe guiráʼ ni riguu xizaa laanu (Sal. 65:2). Pa gúninu ni la? zuni sentirnu casi ora niguiidxibe laanu ora guicábibe ca oración stinu ne gábibe laanu xi gúninu (Sal. 73:23, 24). Zacané Jiobá laanu guiénenu ximodo ruuyabe ca guendanagana cadxaagalunu  intiica si ni cadídinu. Nga runi, pa cadi gusaana de guni orarnu Dios de guidubi ladxidoʼno la? zusihuínninu nápanu confianza laabe.

7. ¿Xi biʼniʼ Jiobá ora biʼyaʼ nabé nuu Habacuc xizaa?

⁷ (Biindaʼ Habacuc 1:5-7). Bisaana Habacuc guiráʼ ni riguu xizaa laa lu náʼ Jiobá. Peru zándaca gunabadiidxabe xi zándaca guicabi Jiobá laabe. Cumu naca Jiobá casi ti padre ni riene ne riuu lugar stiʼ ca xiiñiʼ la? qué ñuni castigarbe Habacuc pur ni guníʼ. Gúnnabe guníʼ Habacuc zacá purtiʼ guizáʼ cayacaná. Ca diidxaʼ ni gudxi Jiobá laabe zándaca guníʼ ni pur ni chiguizaaca ca israelita ni qué nuzuubaʼ diidxaʼ. Ne zándaca Habacuc nga primé binni ni gudxi Jiobá laa zanitilú ca binni malu de tiempu que.

8. ¿Xiñee guca nagana para Habacuc guiene ni bicabi Jiobá laa?

⁸ Bisiene Jiobá Habacuc maʼ nuu listu para guni xiixa, ngue runi maʼ cadi candaa zuni castigarbe ca binni malu que. Ora guníʼ Jiobá «ca dxi nabánitu», caniʼbe zedanebe juiciu stibe luguiáʼ ca binni ni nabani ca dxi stiʼ Habacuc. Peru ¿ñee ndiʼ nga respuesta ni cabeza Habacuc gudii Jiobá laa la? Coʼ. Ca diidxaʼ ni guníʼ Jiobá riʼ riníʼ ni jmaruʼ si zacaná guidubi guidxi Judá. ¿Xiñee yaʼ? Purtiʼ qué riá ca caldeu o babilonio binni ne jma qué iquiiñecaʼ que ca israelita, laa ndaacaʼ riniʼcaʼ runi adorarcaʼ Dios. ¿Xiñee zaquiiñeʼ Jiobá ti guidxi malu ni qué runi ni nabe para guni castigar xquidxi yaʼ? Pa ñunadiáganu respuesta ni bidii Jiobá Habacuc, ¿xi ñúninu yaʼ?

9. ¿Xi guiráʼ gunabadiidxaʼ Habacuc?

⁹ (Biindaʼ Habacuc 1:12-14, 17). Biene Habacuc zaquiiñeʼ Jiobá Babilonia para guni castigar ca binni malu nuu ndaaniʼ xquidxi, peru nuuruʼ cosa ni caʼruʼ guiénebe. Neca zaqué, gúcabe humilde ne gúdxibe Jiobá naca casi «ti Guié» para laabe (Deut. 32:4; Is. 26:4). Cumu nanna Habacuc naca Jiobá ti Dios ni nadxii ne nachaʼhuiʼ la? gúpabe paciencia ne qué nusaanabe de ñápabe confianza laa. Ndiʼ gucané laabe guiníʼnebe Jiobá ne guinabadiidxabe laa sti biaje: Pa laa nga ti Dios Santo ne guizáʼ nayá guielú para guyadxí cosa malu, ¿xiñee cudii lugar gacaná guidxi Judá ne xiñee qué huayuni xiixa para gacané guidxi riʼ? Pa laa nga ni jma napa poder, ¿xiñee cudii lugar chuʼ jma guendaquéiquiiñeʼ ne xiñee cadi caníʼ gastiʼ neca cayuuyaʼ cazaaca cosa malu?

10. Casi bizaaca Habacuc, ¿xi zándaca guizaacanu?

¹⁰ Zándaca nuu biaje runi sentirnu casi Habacuc. Rucaʼdiáganu ni gabi Jiobá laanu, rápanu confianza laa, ridúʼndanu ne runi estudiarnu Stiidxaʼ ne nga racané laanu gápanu esperanza. Rizíʼdinu de ca promesa stibe pur guiráʼ ni rudii organización stibe laanu. Peru neca zacá, zándaca guinabadiidxanu: «¿Padxí guiree ca yuubaʼ stinu yaʼ?». Guidúʼyanu ni biʼniʼ Habacuc ne xi zanda guizíʼdinu.

11. Despué de bicaadiaga Habacuc Jiobá, ¿xi gudixhe ique guni?

¹¹ (Biindaʼ Habacuc 2:1). Ora guniʼné Habacuc Jiobá gucané ni laabe gatadxí ladxidoʼbe. Ngue runi gúpabe confianza Jiobá ne gulézabe dede ora guni xiixa. Ne cadi málasi guníʼ íquebe zacá, purtiʼ despué bizeetebe zabézabe dede dxi guedandá dxi stiʼ Jiobá (Hab. 3:16). Ne xcaadxi xpinni Dios laaca gúpacaʼ paciencia ne confianza casi laabe. Ne ejemplu stiʼ  Habacuc rusiidiʼ ni laanu cadi guireʼnu gana ne cuézanu dede ora guni Jiobá xiixa pur laanu (Miq. 7:7; Sant. 5:7, 8).

12. ¿Xi rizíʼdinu de actitud ni gupa Habacuc?

¹² ¿Xi rizíʼdinu de actitud ni gupa Habacuc yaʼ? Primé, cadi naquiiñeʼ gusaana de guni orarnu Jiobá neca cadxaagalunu guendanagana. Guiropa, caquiiñeʼ gucaʼdiáganu laabe ora guidúʼndanu Stiidxabe ne ora gabi organización stibe laanu xi gúninu. Ne guionna, caquiiñeʼ cuézanu dede ora gúnibe xiixa, ne gápanu confianza zuni chaahuibe ca guendanagana stinu. Pa gúninu guiráʼ ndiʼ, cásica biʼniʼ Habacuc la? qué zunítinu paz ni nuu ndaaniʼ ladxidoʼno ni zacané laanu guni huantarnu. Esperanza ni nápanu Dios zacané laanu gápanu paciencia, ne laaca zacané ni laanu chuʼnu nayecheʼ neca gápanu guendanagana. Ne zacané esperanza riʼ laanu gápanu confianza maʼ cadi candaa zuni Jiobá, Bixhózenu ni nuu guibáʼ xiixa pur laanu (Rom. 12:12).

13. ¿Xi gudxi Jiobá Habacuc chiguni?

¹³ (Biindaʼ Habacuc 2:3). Guizáʼ guyuulaʼdxiʼ Jiobá ora biʼyaʼ guleza Habacuc dede ora bíʼnibe xiixa. Gunna dxiichiʼ Dios ni jma napa poder guiráʼ ca guendanagana cadíʼdibe, ngue runi gudixhedxí ladxidoʼbe ora gudxi laabe zacabi ca pregunta ni bíʼnibe laa. Ne maʼ cadi candaa, maʼ qué ziuu Habacuc xizaa. Casi ora ñabi Jiobá laabe: «Gupa paciencia ne gupa confianza naa. Neca ruluíʼ candaa, zacabeʼ lii». Bisietenalaʼdxiʼ Jiobá laabe maʼ gudixhe padxí gaca cumplir ca promesa stiʼ ne gúdxibe laa cueza purtiʼ dxandíʼ zuni guiráʼ ni maʼ guníʼ.

14. Ora tiidinu lu xiixa guendanagana, ¿xii nga ni jma naquiiñeʼ guicá íquenu gúninu?

¹⁴ Pa gucaʼdiáganu ni gabi Jiobá laanu, gápanu paciencia laa ne cuézanu dede ora gúnibe xiixa pur laanu la? zápanu confianza laabe ne qué zunítinu paz ni nuu ndaaniʼ ladxidoʼno neca guidxaagalunu guendanagana. Ne Jesús peʼ guníʼ cadi cuézanu ti dxi ni caʼruʼ guiníʼ Dios (Hech. 1:7). Gápanu confianza maʼ nanna dxiichiʼ Jiobá pora nga zuni xiixa pur laanu. Nga runi, cadi guireʼnu gana, cuézanu, gácanu humilde ne gápanu fe. Laga guedandá dxi ca, gúninu biaʼ gándatiʼ pur gúninu jma lu xhiiñaʼ Jiobá (Mar. 13:35-37; Gál. 6:9).

15, 16. a) ¿Gunáʼ nga ca promesa ni zeeda lu libru stiʼ Habacuc? b) ¿Xi rizíʼdinu de ca promesa riʼ?

¹⁵ Biʼniʼ prometer Dios zabani binni ni runi jneza purtiʼ ruzuubacaʼ diidxaʼ ne zunibiaʼcaʼ gloria stiʼ Jiobá (Hab. 2:4, 14). Ne zacá zaca ni, zudii Jiobá guendanabani ni qué zaluxe ca binni ni gapa paciencia ne cani gapa confianza laabe.

¹⁶ Ruluíʼ qué risaca promesa ni zeeda lu Habacuc 2:4, peru chonna biaje bizeeteʼ apóstol Pablo versículo riʼ purtiʼ guizáʼ risaca ni (Rom. 1:17; Gál. 3:11; Heb. 10:38). Pa gápanu fe ne confianza Dios la? zabáninu ne zadúʼyanu ora gaca cumplir ca promesa stibe, neca guidxaagalunu intiica guendanagana. Ne Jiobá peʼ cayabi laanu guicá íquenu lu esperanza ni chiguicaanu despué ne cadi lu ca guendanagana cadídinu yanna.

17. ¿Xi cayuni prometer Jiobá laanu pa gápanu confianza laabe yaʼ?

¹⁷ Laanu, cani nabáninu lu ca últimu dxi riʼ, rusiidiʼ libru stiʼ Habacuc laanu stale cosa risaca. Maʼ biʼniʼ prometer Jiobá zudii guendanabani cani gapa confianza laabe. Nga runi, neca gápanu guendanagana o chuʼ xiixa ni uguu xizaa laanu la? cadi gusaananu de guquídxinu fe stinu ne gápanu confianza Dios. Maʼ  biquiiñeʼ Jiobá Habacuc para gabi laanu qué zusaanabe laanu ne zulabe laanu. Ne stale guendanachaʼhuiʼ rinábabe laanu gápanu confianza laabe ne cuézanu né paciencia dede ora gueeda dxi ni maʼ gudíxhebe gueedanebe Reinu stibe lu Guidxilayú riʼ. Ne óraca, zaca guidxilayú riʼ ti lugar ra chuʼ puru si binni nachaʼhuiʼ ni runi adorar Dios (Mat. 5:5; Heb. 10:36-39).

18. ¿Ximodo gucané ca diidxaʼ stiʼ Jiobá Habacuc?

¹⁸ (Biindaʼ Habacuc 3:16-19). Guizáʼ gucané ca diidxaʼ gudxi Jiobá Habacuc. Guníʼ íquebe ximodo gucané Jiobá ca xpinni de dxiqué, ne nga gucané laabe gápabe jma confianza Dios. Neca nánnabe zacanarube la? nanna dxiichibe maʼ cadi candaa zacané Jiobá laabe. ¡Guizáʼ gudixhedxí ngue ladxidoʼbe! Neca gúpabe duda, gúpabe confianza napa Jiobá poder para gulá laabe. Guniʼbe tobi de ca diidxaʼ jma galán ni zanda guidxélanu lu Biblia. Caadxi binni ni nanna de lu Biblia ná zándaca ni caníʼ versículo 18 riʼ nga zachesa Habacuc ne zudii buelta tantu cayecheʼ pur Dios stiʼ. ¿Cadi dxandíʼ guizáʼ galán ni rusiidiʼ ejemplu stiʼ Habacuc laanu la? Cadi runi si Jiobá promesa, sínuque cayábibe laanu maʼ cayúnibe xiixa para guni cumplirbe cani.

19. ¿Xi caquiiñeʼ gúninu para gatadxí ladxidoʼno cásica gutadxí ladxidóʼ Habacuc?

¹⁹ Nuunu seguru guizáʼ risaca mensaje ni zeeda lu libru stiʼ Habacuc purtiʼ cayabi ni laanu gápanu confianza Jiobá (Hab. 2:4). ¿Xi zacané laanu cadi gunítinu confianza ni nápanu Jiobá yaʼ? Gaca amistad ni napanenu laabe jma naguidxi. Para ganda gaca ni la? caquiiñeʼ gúninu chonna cosa. Primé, cadi gusaana de guni orarnu laabe ne gábinu laabe guiráʼ ni riguu xizaa laanu. Guiropa, gucaʼdiáganu Stiidxabe ne gúninu guiráʼ ni gabi organización stibe laanu. Ne guionna, gápanu fe, ne cuézanu né paciencia dede ora gúnibe xiixa pur laanu. Ne ngapeʼ nga ni biʼniʼ Habacuc. Neca nuu yuubaʼ ndaaniʼ ladxidoʼbe ora bizulú bicaabe libru stibe la? ca últimu diidxaʼ ni bicaabe lu libru ca rusihuinni ni nuube nayecheʼ ne nápabe confianza Dios. Chinándanu ejemplu galán stiʼ Habacuc ne laaca zuni sentirnu casi ora niguiidxi Jiobá laanu. Pa gúninu ndiʼ la? zaguixhedxí Jiobá ladxidoʼno neca nabáninu ndaaniʼ ti guidxilayú ra dxaʼ guendaquéiquiiñeʼ.