1-3. (1) Wa samaan ko pinengneng ita to soˈlinay kimad no Fangcalay Cudad? Patinakoen. (Nengnengen ko satapangan coka.) (2) Oniya lalakaw wa milengo to maanan?

ˈALOMANAY tamdaw miˈaca to dafong ikor, marariday patikolen ko miˈacaan a dafong. Roma kitakit ikor no miˈaca ko tamdaw to dafong, ano semoˈot i, siwaay ko patikolay to dafong, ano itiniay i wangcan miˈaca, ano semoˈot i, 30 ko patikolay. Harateng no miˈacaay cowa ka tatodong to miharatengan, iraay ko dangoc, anca cowa ka maolah, mansa patikolen ko miˈacaan a dafong.

² Ikor no miˈaca kita to dafong, latekay misaaliay to papatikolen ko payci, kawra ikor no ‘miˈaca’ kita to soˈlinay kimad no Fangcalay Cudad, aka ‘paˈacaen’ anca ‘falahen’. (ˈOsien ko Taneng 23:23; 1 Timoti 2:4) Itini ˈayaway lalakaw malengoay ita, palaken ko toki minanam to soˈlinay kimad, ngaˈ malifok ko soˈlinay kimad. Malengoayho, pakayni sapiˈacaaw to soˈlinay kimad, wa misawad kita to ˈakawangay ko lifon a katayalan alatek, alatek mamalingat ko kalalaˈed ato tao, hanaca misalofay kita to harateng ato waywayan, anca mihawad to misafelitay to Fangcalay Cudad a nanaman ato demak. Kawra palalinien to malifokay a sapalemed, o misadakan ita a sapiˈaca, cowato ka samaan.

 ³ O piharateng ita to soˈlinay kimad no Fangcalay Cudad, mahecaday to masowalay ni Yis i sapatinako a misasingdiay. Misaka dademakan ni Yis koniya sapatinako, a mitadtad to pisalimla no roma tamdaw to soˈlinay kimad no Hongti Kitakit no Kawas. Sapikilimaw ko misasingdiay to kalimlaan a odoˈ, ikor mahelaayto. Oniya odoˈ tada pasangarayto, kawra sapiˈacaaw cingra, tangsol “pacakay to maamaan ningra a maemin.” (Matay 13:45, 46) O mahelaay ita a soˈlinay kimad mahecaday a pasangar ˈacaen, ano o soˈlinay kimad no Hongti Kitakit, anca o kalimlaan a sifanaˈ no Fangcalay Cudad, wa makahi kita tangsol a mihadak to sapiˈaca, a sapilifokaw to soˈlinay kimad. Misaareteng kita to soˈlinay kimad, cowa ko ‘papaˈaca’ ciraan. Ka adayayan i, o roma midokoay to Kawas a tamdaw, cowa to pisaareteng to soˈlinay kimad, ‘paˈacaay’ to soˈlinay kimad, cowa ka ciharateng kita mahaen cangraanan! Ano mikifalocoˈ kita a maolah to soˈlinay kimad, cowa ko ‘papaˈaca’ to soˈlinay kimad, wa mitengil to limoˈot no Fangcalay Cudad, ‘midoedo to soˈlinay kimad a midemak.’ (ˈOsien ko 3 Yohani 3, 4.) ‘Midoedo to soˈlinay kimad a midemak,’ micapiday to waywayan, paro kalimlaan i nokaˈorip ko soˈlinay kimad, mahecad ko waywayan to soˈlinay kimad. Dotoc wa milengo kita to tolo salicay: O roma tamdaw hano ‘paˈaca’ to soˈlinay kimad? Samaan ko demak ita ho eca ka midemak to hatiniay, ka adayayan a raraw hani? Wa samaan kita misaˈosi to falocoˈ ‘midoedo to soˈlinay kimad a midemak hani?’

4. Itiniay i saka cecay hahekalan, o roma tamdaw hano ‘paˈaca’ to soˈlinay kimad hani?

⁴ Itini i saka cecay hahekalan, o roma tamdaw na micadaay to milasilan ni Yis a kimad, kawra ikorto cowa pidoedo to soˈlinay kimad a midemak. Tinakoen, ikor no midemak ci Yis to kafahkaˈan a pafecol to ˈalomanay tamdaw i, mitooray cangra ci Yisan tayra i lawac no Kalili a riyar. Itira somowalay ci Yis to kafahkaˈan a sowal: “O caciˈorip to midaˈocay ko komaenay to heci ato remes ako.” Cowa ka kahi cangra micada to sowal ni Yis, cowa pisaali ci Yisan a mitadtad, sanay ko sowal nangra: “O pakinaliay a sowal konini. Cima ko papakahadidi a mitengil saw?” Telocto, “ˈaloman ko miliyasay ci Yisan a mitooray. Caayto pikapot ci Yisan a talacowacowa.”—Yohani 6:53-66.

5, 6. (1) Anini, o roma tamdaw hano cowa ka midoedo to soˈlinay kimad a midemak hani? (2) O roma tamdaw samaanay palidlid sanay a miliyas to soˈlinay kimad?

⁵ Ka adayayan i, anini o roma tamdaw cowato pidoedo to soˈlinay kimad a midemak. O roma miliyasay to soˈlinay kimad a tamdaw, samanen pasangaray cangra micada to pisalof no likakawa a mitadtad to sinael. O roma tamdaw cowa ka olah to sasowalen ato waywayan no kangodoan a salikaka, o roma tamdaw cowa ka kahi micada to limoˈot no Fangcalay Cudad, anca cowa kala ngaˈay to salikaka. O roma tamdaw mirienangay to kapot no misafelitay to kimad a tamdaw. Telocto, misaˈosiay cangra ‘miliyas’ ci Yihofaan ato kasakopang. (Hipray 3:12-14) Soˈlinay o papahecad cangra to tarokos ci Pitiroan pakasoˈlin ci Yisan, tanektek mitafo to pihakelongan. Licayan ni Yis ko tarokos wa mahecad to roma tamdaw a miliyas cingraanan hokira, tangsolay pacaˈof ci Pitiro: “Tapangaw, i cimaanan kami a palawina saw? Deng kiso a cecay ko pasowalay to sakaciˈorip to midaˈocay.”​—Yohani 6:67-69.

⁶ O roma tamdaw cowa ka fanaˈto palidlid sanay miliyas to soˈlinay kimad, mahecad to tamina manaˈonay maˈalol nai lawac no ˈalo, mitadtad ko Fangcalay Cudad to hatiniay kafalic, hato ‘mapawpaway a maˈalol’ sanay. (Hipray 2:1) O hatiniay tamdaw cowa ka hecad o misaˈosiay mihawad to soˈlinay kimad a  tamdaw, samanen cowa ko padetengay cangra miliyas to soˈlinay kimad. Kawra, kamayan mipalak cangra to kalalaˈed no niyah aci Yihofa, mangalef malahdaway ko kalawidang ci Yihofaan. Wa samaan kita miliyas to hatiniay ka adayayan a teloc hani?

7. Samaan ko demak ita ngaˈ eca ka paˈaca to soˈlinay kimad?

⁷ Ano sapidoedoaw kita to soˈlinay kimad a midemak, wa micada ato midofdof to kihcod a limoˈot ni Yihofa. Wa paisalakaten ita miharateng ko soˈlinay kimad, midofdofho to safalod no Fangcalay Cudad a maˈorip. Sanay ko satolon ni Tafiti ci Yihofaan: ‘Wa midoedo kako to soˈlinay kimad Iso a midemak.’ (ˈOlic 86:11) Pahecaden ita ci Tafiti tanektek ko falocoˈ, misaˈicel a midoedo to soˈlinay kimad no Kawas a midemak. Ano caka pisaˈosi ko falocoˈ ita mihaen to demak, wa misatapang milomal to o maan ko mihadakan no niyah a sapiˈaca, alatek sapialaaw to namifalahan a dafong. Cowa ko kalitosa aca ko cacadaen ita a soˈlinay kimad, o kihcod ko cacadaen, mafanaˈto dadoedoen no niyah ko ‘kihcod a soˈlinay kimad.’ (Yohani 16:13) Fafekangay lalakaw milengoay sapiˈacaaw kita to soˈlinay kimad wa misadak to lima a sapiˈaca, dotocto wa milengo kita samaan ko demak, ho eca ka patikolen ko soˈlinay kimad, mifalic to nami falahanto a demak.—Matay 6:19.

8. O cecay a Krisciyang cowa pisongilaˈ misaka dademak to toki, wa miliyas to soˈlinay kimad alatek? Sadaken ko tinakoan.

⁸ O Toki. Songilaˈen ita misaka dademak ko toki, hoeca piliyas to soˈlinay kimad. Latekay, caka pisinanot kita adihayay ko mapalakay a toki i lawla, kaolahan, misangwang, minengneng to tilifi. Soˈlin cowa ko mararaway koniya demak, kawra maˈafasay ko sapicekiw ato sapidemakaw to noˈadingoan demak a toki. Haratengen ko milifetan no fafahiyan salikaka ci Yama. * Kaemangho maolahay ci Yama to efa, ira ko toki ningra mikalicay to efa. Ikor, mahapinangay ningra cowa ka ngaˈay adihay ko mapalakay a toki mikalic to efa. Misalofan ningra ko harateng, cowato ko halama ko misaaretengan ningra. Ci Yama mikitini milifetan no fafahiyan salikaka ci Keri Wies milifokay to adihayay sapakalalok, ci Keri na mipapiyawingay to malalifetay. * Nohatini, adihayayto ko toki ni Yama dademak to noˈadingoan, masaloay to kalacafayan a toki micawmaˈ to midokoay to Kawas a salawina. Matongalay ko kangaˈay no kalalaˈed no niyah aci Yihofa sanay cingra, masaloay ko falocoˈ. Mahemek a misongilaˈ misaka dademak to toki.

9. Micangacang to hafay hano mamikayhid to tamdaw misilikor to noˈadingoan a demak?

⁹ O Hafay. Ano sapadotocaw midofdof to soˈlinay kimad a midemak kita i, wa matatodong ko pinengneng to hafay ngaˈ. Minanam to soˈlinay kimad, wa ngaˈay padama kitaanan mihapinang to o kalimlaan no kaˈorip cowa ko hafay, o midokoay ci Yihofaan. Saka dademakaw kita to soˈlinay kimad, wa makahi a kinafalah to nodafongan a sakangaˈay. Kawra mataˈlif ko toki, ano maˈaraw ita ko tao, miˈaca to faelohay soci anca faelohay dafong, wa saan kita miharateng alatek, adihayay soˈlin ko kinafalah no niyah, cangoˈoten to sakaˈorip no niyah, sapilifokaw to adihayay a dafong, telocto silikor hanto ko noˈadingoan a demak. Wa maharateng ita ci Timas, “maolah tono hekalan a demak,” mansa miliyas to katayalan, ecato kalacafay ci Pawloan a dademak. (2 Timoti 4:10) O kaolah ni Timas to hafay mataˈlifay ko noˈadingoan a demak, alatek cowato ka ciharateng kinafalah  to sakangaˈay a kalacafay ci Pawloan. Ano na maolahay kita tono dafongan, sasinanoten aka papiˈafasen ko pakadafongay a harateng to maolahay to soˈlinay kimad a falocoˈ no mita.

10. O maanan a saroero ko sasaˈicelen ita miconged ho eca ka mapadik hani?

¹⁰ O kalalaˈed to salawina ato widang. Sapadotocaw kita midoedo to soˈlinay kimad a midemak, oha mamisaˈicel eca ka padik no saroero. Misatapang kita midoedo to soˈlinay kimad a maˈorip i, mafalicayto ko kalalaˈed ita to cowa pihakelong a salawina. O roma salawina cowa pisafelit to pihakelongan ita, o roma tada mapiliˈay. (1 Pitiro 4:4) Ano samaanto, wa misaˈicel kita mitafo to ngaˈayay kalalaˈed to paro no lomaˈ, misangaˈay cangraanan, kawra, pakayni sapisangaˈayaw to paro no lomaˈ cowa ko mamisawad kita to pihakelongan. Wa misaˈicel kita malakangaˈay cangraanan, kawra oha mamisinanot to sapatalipaˈelal no saka 1 Korinto 15:33, edeng o maolahay ci Yihofaan a tamdaw ko hawidang.

11. Sasamaan kita miliyas to mararaway a harateng ato waywayan hani?

¹¹ O mararaway harateng ato waywayan. O polong midoedoay to soˈlinay kimad midemak a tamdaw kalimlaan ko makoracay. (Isaya 35:8; ˈosien ko 1 Pitiro 1:14-16.) Ikor no minanam kita to soˈlinay kimad, sapitooraw to palinian no Fangcalay Cudad, misalofay to harateng ato waywayan no niyah, o roma tamdaw masongilaˈay ko pifalic to niyah. O kafalic no mita o taˈangayay anca mimingay, aka pisawad to makoracay a kaˈorip, patikor to misafelitay to palinian no Kawas ano kaˈorip. Sasamaan kita ngaˈ eca ka pidemak to malafoay a demak hani? Songilaˈen miharateng ko mihadakan ni Yihofa ˈakawangay a sapiˈaca, pakayni sapikoracaw Ningra kitaanan, patafangay to kalimlaan a ˈilang no wawa ci Yis Kristo. (1 Pitiro 1:18, 19) Ano makalimay kita malo makoracay a tamdaw nengnengen ni Yihofa, wa micerid miharateng to kalimlaan ko sapatefoc ni Yis.

12, 13. (1) Sasinanoten ko pinengneng ni Yihofa toniya misalisinay a demak, hano masaka limlaan hani? (2) Dotoc wa milengo to maanan hani?

¹² Misafelitay to Fangcalay Cudad a nanaman ato demak. Paro no lomaˈ, cafay matayal, cafay micudad, wa mitahidang kitaanan mirienang to misalisinay a demak alatek. Misiˈayaw kita to hatiniay saroero i, samaan ngaˈ eca ka kalacafay cangraanan midofdof to mararaway a nanaman, anca misalisin to misafelitay to palinian no Kawas a lisin hani? Sasinanoten ko pinengneng ni Yihofa toniya nanaman ato lisin. Ngaˈayay lomalen ita ko milengoay toniya lisin i mitepangan a cudad. Micerid kita patalipaˈelal to niyah, o lalangian eca ka pirienang toniya lisin, mihaen wa ngaˈay pasoˈlin to midoedoay ko niyah to ‘kahemekan no Tatapangan’ a pakayraan a midemak. (Ifiso 5:10) Mitiˈer kita ci Yihofaan ato kimad Ningra, ecato ‘makokiˈ to tamdaw’.—Taneng 29:25.

¹³ Mitokelay kita padadotoc midofdof to soˈlinay kimad a midemak tahadaˈoc. Samaan kita paˈicel to saˈosi no falocoˈ a midofdof to soˈlinay kimad a midemak hani? Laeno wa milengo to tolo a pakayraan.

14. (1) Padadotoc micekiw to Fangcalay Cudad hano papadama kitaanan misaˈosi eca ka paˈaca to soˈlinay kimad? (2) Hano miˈaca kita to ‘taneng, sapirikec, saka cipinang’ hani?

¹⁴ Saka cecay, padadotocen ita micekiw a tangongol ko pidotim to soˈlinay kimad no Kawas. Miˈaca to soˈlinay kimad micapiday to micerid a milimasmas to toki, micekiw to Fangcalay Cudad. Mihaen kita wa matongamatongal ko kaolah to soˈlinay kimad, wa misaˈosi cato paˈacaen ko soˈlinay kimad. Cowa ko pilengo aca no Taneng 23:23 to miˈaca  to soˈlinay kimad, pasowalayho to mamiˈaca kita to ‘taneng, sapirikec, saka cipinang.’ Cowa ko sifanaˈ aca, misaka dademakho to soˈlinay kimad ngaˈ ngaˈay. Ano iraay ko cipinangay a ˈicel ita, mamahapinang ita to kalaliting no faelohay mananamay a soˈlinay kimad ato ˈayaway mananamay a soˈlinay kimad. O taneng wa padama kitaanan midofdof to mananamay a soˈlinay kimad a midemak. Cowa ka hatini aca, minanam kita to soˈlinay kimad wa mahapinangto iraayho ko maanan a sasalofen no niyah, mamahemek kita micada to nai Fangcalay Cudad a sarikec, samanen o epoc no sarikec mikikakaay to linkim.—Taneng 8:10.

15. Soˈlinay kimad a safaked misamaan midipot kitaanan?

¹⁵ Saka tosa, seteken ita ko falocoˈ to romiˈamiˈad midoedo to soˈlinay kimad a midemak. Patinakoan no Fangcalay Cudad to safaked no sofitay ko soˈlinay kimad. (Ifiso 6:14) Itini lintad no Fangcalay Cudad, o safaked no sofitay ngaˈayay midipot to tatelecan ato tireng. Kawra, kedecen ko safaked ngaˈ ira ko sadipot, ano mahokaˈ cowa ko papadama to tatelecan. Samaan ko demak ita, ngaˈay ko soˈlinay kimad mahecad o safaked a midipot kitaanan hani? Kelecen a mitafo to soˈlinay kimad, mihaen o mamadipot no soˈlinay kimad kita, eca ka fiyor no mararaway a harateng, wa ngaˈayho padama kitaanan matatodong ko pisaˈosi. Ano misiˈayaw to sakayhid ato pasangaray i, papadama ko soˈlinay kimad kitaanan misaˈosi ko falocoˈ midemak to matatodongay demak. Itiyaho a sofitay ano caka cisafaked cowa ka pilood, cowa ko ngangaˈay kita mihelong to soˈlinay kimad a safaked, anca mahokaˈ ko safaked, oha mamisaˈicel kita “mikelec” to safaked no soˈlinay kimad, midoedo to soˈlinay kimad a maˈorip. Roma i, wa pakafiten no sofitay ko fonos i safaked. Dotoc wa milengo to roma pakayraan midoedo to soˈlinay kimad a midemak milingatay to funus.

16. Misamaanay pasifanaˈ to tamdaw to soˈlinay kimad, wa padama kitaanan misetek to falocoˈ a midoedo to soˈlinay kimad a midemak hani?

¹⁶ Saka tolo, saˈicelen ita a pasifanaˈ ko tamdaw to soˈlinay kimad. Mihaen ko demak wa ngaˈay mikelec mimetmet to funus no fangcalay saocor, oya ‘kimad no Kawas’. (Ifiso 6:17) Kita o cecacecay tamdaw wa ngaˈay pacakaten ko sapasifanaˈ a inaneng, ‘matatodong ko pisaka dademak to soˈlinay kimad.’ (2 Timoti 2:15) Saka dademaken ita ko Fangcalay Cudad padama to tamdaw miˈaca to soˈlinay kimad ato mifalah to mararaway a sasowalen, mihaen o palomaay to kimad no Kawas i falocoˈ nangra, wa padama kitaanan misaˈosi to falocoˈ midoedo to soˈlinay kimad a midemak.

17. Pakayni tisowanan hano kalimlaan ko soˈlinay kimad hani?

¹⁷ O soˈlinay kimad, o kalimlaan a sapatelong ni Yihofa kitaanan, oniya sapatelong malifokay ita ko tada ciepocay a dafong, o tangongolay kalawidang to kakarayan a Wama. Pasifanaˈay ko Wama to soˈlinay kimad kitaanan, mikiˈokay Cingra to tatahadaˈoc pasifanaˈ kitaanan, mihaenay haw i, adihayayho ko mamananam ita. Mansa, sakaretengen ita ko soˈlinay kimad, mahecad to kalimlaan a ˈodo. Dotocen ita ‘miˈaca ko soˈlinay kimad’, aka a paˈacaen, ano mihaen kita, wa mahecad ci Tafitian midofdof to sakiˈok no niyah ci Yihofaan: ‘Wa midoedo kako to soˈlinay kimad Iso a midemak.’—ˈOlic 86:11.