1-3. a) Ida luba warihini inarüni le tídanbei Bíbülia? Ru humá aban hénpulu (ariha humoun iyawaü to lídanboun lagumeseha arütíkulu). b) Kaba burí álügüdahani wóunaba lidan arütíkulu le?

UGUÑE weyu, arihúati kamani lan hagiribudagüdüni gürigia katei burí le hagañeihabei. Ariñagati ariñahani, lidan lan fiu ageiraü, giribudagüda hamuti lan gürigia nefu lídangiñe kada san le hagañeihabei. Ánheinti lidan Internet, gayaraati lásügürün katei burí le agiribudawagüdübei tidoun somu bísinisi, lóugiñe darandi lídangiñe kada san. Másiñati adüga hamani gürigia katei le ladüga magundan hamá lau le hagañeihabei, daritiña somu mégeiti luagu o mínsiñe lan houn. Ábati hasansiruni luagu amu katei o hamuriahan lun lagiribudagüdüniwa haseinsun houn.

² Lau sun gayara lan wagiribudagüdüni umegeguni le wagañeihabei, mabusenruntiwa wagiribudagüdüni inarüni le furendei wamaalibei tídangiñe Bíbülia o waluguruni (1 Tim. 2:4; aliiha huméi Ariñawagúni 23:23). Kei aubei warihei lidan arütíkulu le lubaragiñebei le, mosu meha wayusurun saragu lídangiñe wadaani lun wibihini inarüni. Añahein gürigia, dan le hasubudiruni inarüni, másiñati mosu lan meha hígirun aban wadagimanu le ñein lubéi hagañeira saragu seinsu o hagagibudagun luma asansiruni lidan hamadagua hama haduheñu luma hama hamadagu. Añahein amu, mosu meha hasansiruni ligaburi hasaminarun luma hóuserun;  añahein giñe amu mosu meha hígiruni échuni luma fedu le múaranti luma le tarufudahabei Bíbülia. Lau sun lira, murusunrügüñein le wígirubei lumoun abiniruni burí le wibihubei.

³ Lun larufuduni Hesusu lebegi inarüni lánina Larúeihan Bungiu houn ha adarirubalin, abahüdaguati luagu aban alugurahati le éibugañahabei áluaha pérüla fínuti. Dan le ladarirunbei aban le wéiriti lebegi, furesegueina, “aba laluguruni sun le lúmabei” lun lagañeihani (Mat. 13:45, 46). Ítarameme, wéiriti lebegi inarüni lánina Larúeihan Bungiu woun luma burí sun líbiri arufudahani tídangiñeti Bíbülia darí lun aba lan wadügüni sun sákürifisiu le mégeiwabei furesegueina lun wibihini. Anhein gebegi lubéi inarüni woun, malugurun wabéi. Íbini ítara, híruti mebegihali lan inarüni houn fiu lubúeingu Bungiu darí lun haluguruni. Maweiyasun wamá adügei lira! Lubaragiñe lira, falá waméi adundehani tídangiñeti Bíbülia lun wasigirun abagarida “úaragua luma inarüni” (aliiha huméi 3 Huan 2-4). Lunti wawinwandun úaragua luma inarüni, mosu ligíaba lan furumiñe lidan wabagari óusera wagíame úaragua luma le tarufudahabei Bíbülia. Lidan arütíkulu le, wóunabubei álügüdahani burí le: Ka adügübei lun haluguruni fiu inarüni, ani ka uagu hadügei? Kaba íderaguawa luéi wadügüni charati le? Ka lunbei wadügüni lúntima busén wamá wasigirun abagarida “úaragua luma inarüni”?

4. Ka uagu halugurei fiu lani Hesusu disipulugu inarüni lidan furumiñeti sígulu?

⁴ Lidan furumiñeti sígulu, añahein meha fiu gürigia ha ánharubaña lun larufudahan Hesusu furumiñe ani lárigiñe, aba hígiruni. Kéiburi, lárigiñe léigagüdün Hesusu saragu gürigia lau aban milaguru, aba hánhiñuraguni gürigia hagía barana Galiléa lidoun le aban oubaü lun houdin lárigi Hesusu. Ñein lariñaga Hesusu aban katei le adügübei lun hasandiragun houngua wuriba: “Anhaün [...] meigin lídangiñe núgubu, au le Liráü Wügüri, matun humeime nita, mabagaribadün”. Lubaragiñe hamuga hálügüdüni Hesusu ka lan lílabei le lariñagubei, aba hariñagun: “Hénrenguti arufudahani le, kaba san ánhara lun?”. Ábati hadisedun saragu hádangiñe lani Hesusu disipulugu luéi, “aba méibugunhaña lan luma” (Huan 6:53-66).

5, 6. a) Ka uagu hanúadira híbiri gürigia lun hígiruni inarüni uguñe weyu? b) Ida liña hadisedun fiu gürigia murusun murusun luéi inarüni?

⁵ Híruti añahein lan fiu gürigia lidan wadaani ha ígira hamaalibei inarüni. Añahein hádangiñe, aba hachugeragun ladüga lafuranguagüdǘn somu fánreinti tídangiñe Bíbülia o luagu le ladügübei o lariñagubei somu íbiri le subudiwabei. Añahein amu, aba hasandiragun houngua wuriba ladüga hibihin somu ererehóuni tídangiñeti Bíbülia o luagu gaturobulin hamá luma aban íbiri. Ani añahein amu, aba houdin luéigiñe hóubadina ha agarabaagubaña lun Bungiu o hamoun gürigia ha máhabaña lun wafiñen. Ladüga burí katei le, aba hanúadirun “hadisedun” luéi Heowá luma luéi damuriguaü (Ebü. 3:12-14). Buídutimabei hamuga lun yebe hakipuruni hafiñen luagu Hesusu, ítara kei ladügüni apostolu Féduru. Dan le lálügüdünbaliña Hesusu apostolugu anhein busén habéi houdin luéi, aba lóunabun Féduru furesegueina: “Kábagia umoun woudin? Dimurei burí le bariñagubei, lánina ibagari magumuchaditi” (Huan 6:67-69).

⁶ Añahein giñe amu, ígira hamaali inarüni murusun murusun, másiñati ibidiñegubeiti lan houn. Góubaguagüda tumutiña Bíbülia tuma aban ugunei to adiseduboun o adireiruboun murusun murusun luéi laru beya (Ebü. 2:1). Mabusenruntiña yebe hígiruni inarüni, gama lumoun, ígiratiña lun eferidireina hamani hamadagua luma Heowá  darí heferidiruni sunsuinagubei. Kaba wadüga lun masuseredun lan ligiaméme woun?

7. Kaba íderaguawa lun mígirun wamani inarüni?

⁷ Lun wabagaridun úaragua luma inarüni, lunti wánharun lun sun le larufudahabei Heowá woun, gaganbadi wagíame lun. Mosu inarüniba lan furumiñe lidan wabagari, ígira wagíame lun ladundehaniwa adundehani le tídanbei Bíbülia. Lidan aban furíei, ariñagati urúei Dawidi lun Heowá: “Néibuguba lidan binarün” (Sal. 86:11, TNM). Ítara kei Dawidi, lunti giñe wasigirun abagarida úaragua luma inarüni le lúmagiñeti Bungiu. Anhein madügün wamá, gayaraabei wagumeserun asaminara luagu le wígirubei lun wibihini inarüni o lun wayumahan lunya wibihin lídangiñe le wígirubei. Gama lumoun, madüga waméi lira. Subudi wamuti siñá lan wanúadirun kaba lan arufudahani wafalara luma kaba lan mafala wamá lugundun lunti wabagaridun úaragua luma “sun inarüni” (Huan 16:13). Lidan arütíkulu le lubaragiñebei le, ayanuhatiwa luagu seingü katei le másiñati ígira wamuti lan lun wafurendeiruni inarüni luma lun wawinwanduni le wafurendeirubei. Ariha waméi le lunbei wadügüni lun magiribudun wamá lun burí katei ligía (Mat. 6:19).

8. Ida luba hamuga wadisedun luéi inarüni ibidiñega woun? Ru humá aban hénpulu.

⁸ Dan. Lun madisedun wamá luéi inarüni, lunti wayusuruni wadaani buidu. Ánhawa móunigiragun woungua, gayaraabei wagumeserun etenira saragu lun isebáhari, lun katei le hínsiñetimabei woun, lun wayusurun Internet o lun waríagun bigibigitu. Lau sun mariban lan katei le, gayaraati lagidaruni wadaani, dan le wayusurubei lun waturiahan wábuguarügü o le wayusurubei lun wetenirun lun amu katei le lánina weseriwidun lun Bungiu. Ariha waméi le asuseredubei tun aban íbiri gíritu Emma. * Lúmagiñe tiñüraü, hínsiñeti meha tun tawarihan gabayu. Adüga tumuti meha sagü gayara lan. Lau sun lira, aba tagumeserun asandiragua tungua wuriba luagu tetenirun lun katei le saragu, ábati tadügün fiu asansiruni. Íderagua lumutu giñe le asuseredubei tun Cory Wells, to meha adügüboun saragu katei hanarimeguti lidan hagalufehóun gabayu lidan burí fulasu le ñein lubéi ladügǘwa katei le. * Guentó, teteniruñatima Emma lun teseriwidun lun Heowá luma ásügüra dan hama tumadagu luma hama tiduheñu ha Gefentiña. Yarafatimahali tasandiragun tungua lun Heowá ani darangilati tasandiragun tungua lugundun subudi tumuti tayusuruñein lan tidaani buidu.

9. Ka uagu gayara lubéi ladügün wáfaagun wibihin umegeguni lun masudinin hali lan woun weseriwidun lun Bungiu?

⁹ Umegeguni. Anhein busén wabéi wasigirun abagarida úaragua luma inarüni, lunti warihini umegeguni keisi lubudubu. Dan le wafurendeirubalin inarüni, aba wíchuguni katei lánina Bungiu furumiñe lidan wabagari lubaragiñe umegeguni. Gúndaatiwa meha lau wadügüni sákürifisiu le lun gayara lan wabagaridun úaragua luma inarüni. Lau sun lira, lau lásügürün dan, másiñati ariha wamá agañeiha hamá amu bigibigitu tótima iseritimaboun, konputadora, gágamuru o katei líbeina lira o gani hamá amu katei le líchugubei ibagari ani gúndaatiña lau. Gayaraati wasandiragun woungua magundan lan wabagari ladüga mawinwandun wamá kei hagía. Anhein magundanhadiwa lubéi láurügü le wámabei, gayaraabei masudinin hali lanme weseriwidun woun lugundun ladügüba lun wáfaagun wibihin lanwoun le wámabei. Haritaguagüda lumutiwa katei le luagu le asuseredubei lun Démasi. Adügati línsiñehabu  luagu “katei le lánina ubóu le” lun lígiruni leseriwidun úara luma apostolu Pábulu (2 Tim. 4:10). Mariñaguntu Bíbülia anhein ígira lubalin Démasi leseriwidun úara luma Pábulu ladüga línsiñe umegeguni lun sügǘ luéi leseriwidun lun Bungiu o anhein mabusenrunhali lubéi meha ladügün sákürifisiu lun leseriwidun úara luma Pábulu. Furendeitiwa lídangiñe sügǘ le, moun lumuti lanya línsiñedun umegeguni woun lugundun gayaraati ladügün le lun weferidiruni wínsiñehabu luagu inarüni.

10. Lun wasigirun abagarida úaragua luma inarüni, ka un moun lumuti lubéi wígiraguagüdün woungua?

¹⁰ Wamadagua hama waduheñu luma hama wamadagu. Lun wasigirun abagarida úaragua luma inarüni, moun lumuti wígiragun woungua lun hadügüdarun amu wawagu. Dan le wafurendeirubalin inarüni, aba lasansirun wamadagua hama waduheñu luma hama wamadagu ha mámabaña Gefentiña. Inebeti meha wafiñen houn fiu hádangiñe, ánheinti ha híbiri, máhatiña lun (1 Fe. 4:4). Lau sun áfaagua wamá lun buidu lan wanaagun woungua hama waduheñu luma lun wóuseruniña buidu, mosu duari wamá luéi wadügün somu katei le mínsiñeti lun Bungiu lúnrügü hagundaarun wau. Lun wafalaruni eweridihani le lídanbei 1 Korintuna 15:33, gamadaguabadiwa hámarügü ha hínsiñehabubaña lun Heowá.

11. Kaba íderaguawa lun wadisedun luéi luriban saminaü luma luéi luriban igaburi?

¹¹ Luriban saminaü luma luriban igaburi. Sun ha abagaridubaña úaragua luma inarüni, lunti sandu hamá (Isa. 35:8; aliiha huméi 1 Féduru 1:14-16). Dan le wafurendeirubalin inarüni, sun wagía mosu meha wadügün asansiruni. Añahein fiu, mosu meha hadügün saragu asansiruni. Meberesenga le meha lunbei wadügüni, moun lumuti wígiruni laruman wabagari luagu iwiyei le ubouagubei. Kábati íderaguawa? Wararamagun asaminara luagu lueirin lebegi asalbaruni le lafayeirubei Heowá lun sandu wamá: lita Hesukrístu, le Liráü (1 Fe. 1:18, 19). Lun sanduméme wamá ligibugiñe Heowá, lunti wakipuruni lebegi sákürifisiu le ladügübei Hesusu tidan wanigi luma lidan wasaminan súnwandan.

12, 13. a) Ka uagu súdini lubéi lun warihini kei larihini Heowá échuni luma burí fedu le múaranti luma le tarufudahabei Bíbülia? b) Kaba wakutiha guentó?

¹² Échuni luma fedu le múaranti luma le tarufudahabei Bíbülia. Gayaraati hagunbirahaniwa waduheñu, wapanaagu leskuelarugu o lidan wadagimanu lun wefeduhan somu burí fedu hama. Kaba íderaguawa lun méiguadun wamá lidoun échuni luma fedu le iyereegubei lun Heowá? Lau gabaroun wamani ka lan uagu iyereegu lubéi burí katei le lun. Líderagubadiwa giñe wakutihani le tariñagubei wani agumeiraguagüdüni luagu ida liña lan lagumeserun échuni luma fedu burí le. Dan le waritaguni le tariñagubei Bíbülia libügürü ka lan uagu moun lumuti lubéi lun gadan lániwa katei burí le, aba wachoururuni wabagariduña lan úaragua luma le “hínsiñebei lun Wabureme” (Efe. 5:10). Lóunigirubadiwa wafiñerun luagu Heowá luma tuagu Lererun luéi wanufudedagun luéi le lunbei hariñaguni amu (Ari. 29:25).

¹³ Agurabatiwa wakipuragun woungua abagarida úaragua luma inarüni lun súnwandan. Ka gayaraabei líderaguniwa lúntima busén wamá wasigirun abagarida úaragua luma inarüni? Ariha wamá ǘrüwa katei.

14. a) Ida luba líderaguniwa wasigirun aturiahoun Bíbülia lúntima mabusenrun wamá wígiruni inarüni? b) Ka uagu súdini lubéi lichú aau, arufudahani luma gunfurandaü?

¹⁴ Furumiñe, sigí wamá asagara dan súnwandan lun waturiahani inarüni le tídanbei  Lererun Bungiu ani ráramagua wamá asaminara luagu. Ladügüba le lúntima hínsiñe lan inarüni woun luma lun mabusenrun wamá wígiruni. Lau sun lira, mabuidunrügüti lúnrügü wibihin subudi. Lunti giñe wadügün somu katei. Ariñagati Ariñawagúni 23:23 amu lan luéi wagañeihani inarüni, lunti lan giñe wagañeihani “lichú aau, arufudahani luma gunfurandaü”. Ínchaha lumutiwa lichú aau lun wabagaridun úaragua luma le wafurendeirubei. Dan le wibihin gunfurandaü, ariha wamuti le gani lubéi le wafurendeirubei luma le wasubudirubei. Ani anihein dan, arufudahati inarüni woun lugundun arufuda lumuti woun asansiruni le lunbei wadügüni lidan wabagari. Lunti wánharun furesegueina lun adundehani le lugundun arufudahatu Bíbülia gebegitima lan katei le sügǘ luéi pülata (Ari. 8:10).

15. Ida liña lóunigiruniwa “lubelitin inarüni”?

¹⁵ Libiaman, winwan wamá úaragua luma inarüni sagü weyu. Barǘ waméi inarüni keisi aban béliti le güragubei buidu luagu waranaagua (Efe. 6:14). Lidan meha tidaani Bíbülia, dáütiña meha súdaragu aban béliti le óunigirubaliña. Mosu meha hagürüni buidu lun lóunigiruniña. Ítara liña inarüni le tídanbei Bíbülia kei béliti ligía. Ánhawa agüürei buidu, lóunigirubadiwa luéi arufudahani mama inarüniti ani líderagubadiwa lun wanúadirun katei buiti. Ani danme le wagagibudagun luma somu óuchawaguni o lénrengunga, líderagubadiwa lúntima busén wamá wadügüni le buídubei. Mídinbei hamuga aba súdara awuribuha madáürungalei lubelitin. Ítarameme, moun lumuti lun madaürün wamani lubelitin inarüni buidu ni lun wagidaruni. Lubaragiñe lira, daü waméi buidu lau wawinwandun úaragua luma. Ídehati meha lubelitin súdara lun lanügünu lefeinte. Warihaali le gani lubéi katei le luma ábanya katei le lunbei líderaguniwa lúntima wabusenrun wasigirun abagarida úaragua luma inarüni.

16. Ka uagu adüga lubéi warufudahani inarüni tídangiñeti Bíbülia houn amu lúntima busén wamá wasigirun abagarida úaragua luma inarüni?

¹⁶ Lǘrüwan, áfaagua wamá lau sun wayara lun warufudahani inarüni le tídanbei Bíbülia houn amu. Ítara kei mosu lan meha lárügüdünu súdara lefeinte buidu, lunti giñe wárügüdün tuagu “Lererun Bungiu” dan warufudahan (Efe. 6:17). Sun wagía, gayaraati wáfagun lun buídutima lan warufudahan luma lun warufudahani “uganu lánina inarüni kei lubudubu” (2 Tim. 2:15). Ánhawa ayusuroun Bíbülia lun wíderaguniña amu lun hagañeihani inarüni luma lun mánharun hamá lun iyeeni le larufudahabei ubóu le, lerederutimaba arufudahani le lúmagiñeti Bungiu lidan wasaminan luma tidan wanigi. Ladügüba lira lúntima busén wamá wasigirun abagarida úaragua luma inarüni.

17. Ka uagu gebegi lubéi inarüni hun?

¹⁷ Aban idewesei gebegiti inarüni, le lúmagiñeti Wáguchi le siélubei. Seremei lun idewesei le, gama wamuti katei létima gebegibei woun: wamadagua luma Heowá. Murusunrügüñein sun le arufudaha laalibei Heowá woun lugundun füramaseti gayaraabei lan wasigirun agañeihei inarüni lun súnwandan. Ligíati, ariha waméi inarüni kei aban pérüla le wéiriti lebegi. Sigí wamá agañeihei ani mayéihasun wamá alugurei. Ani ítara kei meha Dawidi, wagunfuliruba lau füramasei le: “Néibuguba lidan binarün” (Sal. 86:11, TNM).