1-3. (a) Kunnasi tam imammatan i kinakurug ta Biblia? Iyilustra. (Innan i letratu ira ta gafu na artikulo.) (b) Anni ira nga pakkiavu i ikonsidera tam taw nga artikulo?

SANGAWE, gagangay ngana laman nga maggatang i totolay tapus itolida yatun. Ta karuan nga nasion, maggi siam porsiento na ganna-gannug nga nagatang ta pallakuan ay itoli na giminatang. Maturu gapa tu 30 porsiento nga nagatang online i metoli. Puede nga nammuan na giminatang nga akkan tu yatun i ekspektadda, defektibo, onu ariadda kayà. Yayya nga naddesision ira nga itali i ginatadda onu kiddawadda nga metoli i pinappagada.

² Kattam kayà nga kuan yatun ta kinakurug ta Biblia. Oras tu ‘ginatattam’ ngana yatun, kebalinanna nagigiammu tam ngana i kinakurug, kattam vuluvuga kayà nga itoli onu “ilaku” yatun. (Bibbigan i Proverbio 23:23; 1 Tim. 2:4) Gitta na nagigiammu tam ta nappasa nga artikulo, nala tam i kinakurug gukaban na pangusa ta tiempo tam tapenu magigiammu yatun. Fuera paga tatun, tapenu magatang i kinakurug, awayyana nga pinanawattam i trabahu nga dakal i suelduna, nanguli i relasiottam ta tanakuan anna i appana-panono anna kondukta tam, onu binattattam i kostumbre anna annangngua nga ari mamagayayya ta Dios. Ngem, i presio  nga nipaga tam ay baddi laman kumpara ta bendision ira nga nalawà tam.

³ Nu meyannung ta kinakurug ta Biblia, parehu nakuan i mataga-tageno tam ta lalaki nga kinagi ni Jesus ta ilustrasion. Tapenu mepasingan i kinabalor na kinakurug na Pappatulan na Dios turi ira ta nakaleg tatun, inusa ni Jesus i ilustrasion na negosiante nga nakaleg tu perlas. Kakuruganna, yatun nga perlas ay kuruga mangina yatutta insigida nga “en-na nilaku” ngamin i kukuana tapenu magatang yatun. (Mat. 13:45, 46) Turi ta ollu tam nga nammuan i kinakurug meyannung ta Pappatulan na Dios anna i karuan paga nga nabalor nga tuddu na Biblia, sigga-parattam gapa nga massakrifisio tapenu mala yatun. Adde ta tagibalorattam i kinakurug, kattam “vuluvuga ilaku yatun.” Ngem kaddaraddam, nakattaman na karuan nga totolay na Dios i balor na kinakurug nga nalada​—anna nilakuda paga lagu. Ari nakuan nga mesimmu nittam yatun! Tapenu mepasingattam nga talaga tagibalorattam i kinakurug anna ariattam vuluvuga ilaku yatun, tuttulattam nakuan i tabarang na Biblia nga ‘mattolay segun ta kurug.’ (Bibbigan i 3 Juan 2-4.) Tapenu mattolay segun ta kinakurug, mawag nga prayoridad tam yatun anna mattoletam segun tatun. Ikonsidera tam danaw nga pakkiavu: Ngatta anna kunnasi nga “ilaku” na tanakuan i kinakurug? Kunnasi tam malillitan i kunnatun nga kaddaraddam nga kamali? Kunnasi tam nga mas determinadu nga ‘mattolay segun ta kurug’?

4. Ta ollu-siglo, ngatta ‘nelaku’ na karuan i kinakurug?

⁴ Ta ollu-siglo, gininna na karuan i tuttuddu ni Jesus ngem nagimmang ira nga mattolay segun ta kurug. Angngariganna, kabalin nga pinakan ni Jesus gukaban na milagro i magaru, zinaddanadda yayya adde ta abbag na Danum na Galilea. Egga kinagi ni Jesus tatun nga nangaddag nira: “Nu ari kamu nga kuman ta pattag na Ana na Tolay anna uminum ta daga na, awan tu inango nikamu.” Imbes nga ipayesplikada yatun kani Jesus, nesiddukal ira ta kinagina anna kudda: “Kuruga mariga yaw nga tuddu. Sinni i umanugu taw?” Bilang resulta, “aru i nappapanaw ta disipulo na ira anna ari ira ngana vuluvuga nga nevulu sa.”​—Juan 6:53-66.

5, 6. (a) Ta maddaggun, ngatta minarayyu ta kinakurug i karuan? (b) Kunnasi nga sisinu nga panawan na tadday i kinakurug?

⁵ Kaddaraddam, egga gapa i karuan ta maddaggun nga minarayyu ta kinakurug. Nesiddukal i karuan megafu ta nanguli nga pakalippawa ta tuddu na Biblia onu gafu ta nakagi onu nakua na tadday nga prominente nga brother. Nassinti gapa i karuan ta nebase-Biblia nga tabarang nira, onu nibattadda i kinakurug megafu ta serioso nga ari pakkarantindian ta tadday nga kapangngurug. Egga gapa danuri pumanig ta apostata ira onu ta mangokkontra ta kinakurug. Megafu tatun, sadya nga ‘nilikuran’ [‘inarayyuan,’ NW] na karuan si Jehova anna i kongregasion. (Heb. 3:12-14) Anni mabba i kastana nu pinattalupaddiadda nakuan i pangurug anna komfiansada kani Jesus, gitta ni apostol Pedro! Tagga ta niyavu ni Jesus ta apostolesna nu manaw gapa ira, insigida simibbag si Pedro: “Afu, sinni gafu paga i tanakuan nga angayam-mi? Sikaw laman i dian na uvovug nga mangiyawa ta inango nga adde ta ngangangay.”​—Juan 6:67-69.

⁶ Ari gapa natageno na karuan nga sisinuda nga pinanawan i kinakurug. I tolay nga sisinu nga pinanawanna i kinakurug ay gittana barangay nga sisinu nga neyanug paarayyu ta pipi na bannag. Tukuyan na Biblia yatun nga sisinu nga panguli bilang ‘keyawawan’ [‘keyanug,’ NW]. (Heb. 2:1) Ari tu kagitta na tolay nga sadya nga minarayyu ta kinakurug, i tadday nga neyanug ay ari  tu sadya nga kuanna yatun. Ngem, pinakkafi na kunnatun nga tolay i relasionna kani Jehova anna pinappeligrona nga mawawan yatun. Kunnasi tam melilli ta kunnatun nga kaddaraddam nga resulta?

7. Anni i makoffun nittam tapenu ariattam vuluvuga melaku i kinakurug?

⁷ Tapenu mattolay segun ta kinakurug, mawag nga akseptattam i ngamin nga uvovug ni Jehova. Iprayoridad tam nakuan i kinakurug ta pattoletam anna mattolay segun ta prinsipio ira na Biblia. Ta pakimallo ni Patul David kani Jehova, kunna: “I kakurug mu i tuttulak-ku.” (Sal. 86:11) Determinadu si David. Kunnatun ittam gapa nakuan nga kadeterminadu nga mattolay segun ta kinakurug na Dios. Ta nu ari, baka kakengattam i nipaga tam para ta kinakurug anna awayyana nga matenta ittam nga pegafuanan nga kiddawan nga metoli i karuan ta nipaga tam. Ngem kattam puede pilian nu anni i kayà tam alawatan onu nu anni i pammanakitattam nga kinakurug ta Biblia. Ta kakuruganna gammabba, sittam ngamin ay mawag tu lumakag ta “ngamin nga kinakurug.” (Juan 16:13, NW) Nonopattam uli i lima nga gannug nga nepaga tam para ta kinakurug. Nu kuattam yatun, mas determinadu ittam nga ari mappatenta nga kiddawan uli i pinappaga tam.​—Mat. 6:19.

8. Kunnasi nga meyarayyu ta kinakurug i tadday nga Cristiano nu ari masirib i pangiyusana ta tiempona? Mangistoria tu ekspiriensa.

⁸ Tiempo. Tapenu kattam meyarayyu ta kinakurug, masirib nakuan i pangusa tam ta tiempo tam. Nu kattam magimmugug, awayyana nga aru ngana i mofu tam tu tiempo ta dibersion, hilig tam ira, pabbrowse ta Internet, onu paggiraw tu telebision. Maski paga ari nga marake danatun, i tiempo nga usattam tatun i manga ta tiempo nga usu-usattam dati ta personal nga paggigiammu anna tanakuan paga nga espiritual nga aktibidad. Ikonsidera i nesimmu ta sister nga mangngagan tu Emma. * Namegafu ta kabbinna, kakayàna ngana i kabayu ira. Kada egga i tiansana, mattakay yayya ta kabayu. Ngem nakonsensia yayya ta karu na tiempo nga iyayawana ta hiligna yayya nga nadisidina nga manguloli. Napagaram gapa yayya ta ekspiriensa ni Cory Wells, tadday nga sister nga dati nga kasali ta exhibition ta rodeo. * Usan ngana ni Emma i tiempona sangawe ta passerbi kani Jehova, anna aru ngana i tiempona ta familia anna kokkofunna nga masserbi kani Jehova. Natagenona nga mas maddukko ngana yayya kani Jehova anna magayayya mammuan nga masirib i pangiyusana ta tiempona.

9. Kunnasi nga mawawan i fokus tam ta espiritual ira nga addetan megafu ta pagaleg ta material nga ganna-gannug?

⁹ Material nga ganna-gannug. Nu kayà tam nga ari magimmang nga mattolay segun ta kinakurug, mawag tam ilugar i material nga ganna-gannug. Tagga ta nagigiammu tam i kinakurug, segunda ngana laman i material ira nga gannug ta espiritual ira nga addetattam. Magayayya ittam nga isakrifisio i material tapenu mattolay segun ta kinakurug. Ngem ta pappasa na tiempo, masingattam i tanakuan nga magatadda i pinakabagu ira nga elektroniko nga gadyet onu mappagustu ira ta material ira nga ganna-gannug. Baka matageno tam nga gittana egga i kurang nittam. Ari ittam ngana kontentu ta egga nittam yatutta mas maffokus ittam ngana ta pangà tu mas aru nga material anne ta passerbi kani Jehova. Iperaddam nittam natun si Dimas. Megafu ta ayana ta “neravvunan nga pattolay,” nagimmang yayya nga  nasserbi anna pinanawanna si apostol Pablo. (2 Tim. 4:10) Awayyana nga mas ayatan ni Dimas i material ira nga gannug anne ta passerbina ta Dios. Onu arianna ngana kayà i massakrifisio nga masserbi kavulu si Pablo. Anni i leksion para nittam? Awayyana nga kakayà tam dati i material ira nga gannug. Nu kattam magimmugug, baka manoli yatun nga pangaya tam ta material anna takkabban ngana natun i aya tam ta kinakurug.

10. Tapenu tulu-tuloy nga mattolay segun ta kinakurug, anni nakuan nga pamipilit i ibita tam?

¹⁰ Relasion ta tanakuan. Tapenu tulu-tuloy nga mattolay segun ta kinakurug, mawag nga kattam mappaffu ta pamipilit na tanakuan. Turi ta nigafu tam mattolay segun ta kinakurug, nanguli ngana i relasiottam ta ari-Saksi nga kokkofun anna kafamilia tam. Egga danuri mangirespeto ta kurugattam; karuan gapa ay kinontrada ittam. (1 Ped. 4:4) Maski paga karagatattam nga mapeggan tu makasta nga relasion ta kafamilia anna tratuan ira nga masippo, magimmugug tam nakuan nga ari mekompromiso i kinakurug tapenu laman mapagustuan ira. Tulu-tuloy lagapa nakuan nga makasta i pakilallattam ta kafamilia tam ira. Ngem, itabarang na 1 Corinto 15:33, mapeggan ittam nakuan tu madukko nga pakikofun turi laman ta mangaya kani Jehova.

11. Kunnasi tam malillitan i ari makadios nga appana-panono anna kondukta?

¹¹ Ari-makadios nga appana-panono anna kondukta. Danuri mattolay segun ta kinakurug ay mawag nga mabbalin tu masanto. (Isa. 35:8; bibbigan i 1 Pedro 1:14-16.) Turi ta ollu nga nammuattam i kinakurug, sittam ngamin ay nanguli tapenu matuttul i matunung ira nga estandarte na Biblia. Dakal nga panguli i kingngua na karuan. Maski anni paga tatun, ariattam nakuan vuluvuga itali i marenu, anna masanto nga kondisiottam ta imoral nga kinaritta naw nga mundo. Kunnasi tam malillitan nga mataga ta imoral nga kondukta? Daddamman i dakal nga balor nga nipaga ni Jehova tapenu mabbalin ittam tu masanto​—i ari kapaga-pagan nga daga na Anana, si Jesu-Cristo. (1 Ped. 1:18, 19) Tapenu mapattalupaddiattam i marenu nga sinaddag ta arubang ni Jehova, mawag nga agga-nono tam i ngina na tavvu nga nisakrifisio ni Jesus.

12, 13. (a) Ngatta importante nga kanayun nga manawag nittam nu ngatta manaki ni Jehova i karuan nga selebrasion? (b) Anni i tumunug nga ikonsidera tam?

¹² Kostumbre anna annangngua nga ari mamagayayya ta Dios. Awayyana nga imbitan ittam na kafamilia, katrabahu anna kaeskuela tam ta selebrasion ira. Kunnasi tam labanan i pamipilitda nga makipartisipa ta kostumbre anna selebrasion ira nga ari makedayaw kani Jehova? Makua tam yatun nu kanayun nga manawag ta nono tam nu ngatta manaki ni Jehova danatun nga annangngua. Makoffun i parrepaso tam ta pakanawag na publikasiottam ira ta naggafuan na popular ira nga selebrasion. Nu iperaddam tam ta baggi tam i rason maggafu ta Biblia nu ngatta kattam makisali tatun ira nga selebrasion, makumbinsi ittam nga kukukuattam i “makapagayaya ta Yafu.” (Efe. 5:10) Protektan ittam na pattalo kani Jehova anna ta kinakurug na Uvovugna kontra ta “pamippig ta arubang na totolay.”​—Prov. 29:25.

¹³ Tulu-tuloy nga proseso i pattolay segun ta kinakurug, i dalan nga kayà tam tuttulan adde noka. Kunnasi ittam nga mas determinadu nga mattolay segun ta kinakurug? Ikonsidera tam i tallu nga gannug.

14. (a) Kunnasi ittam nga mas determinadu nga ari vuluvuga nga ilaku i kinakurug nu tulu-tuloy tam nga gatangan i kinakurug? (b) Ngatta importante i sirib, disiplina, anna pakalippawa?

¹⁴ Ollu, itulu-tuloy nga gigiammuan i nabalor ira nga kinakurug ta Uvovug na Dios  anna monag nga pannonopan danatun. Wan, gatangan i kinakurug gukaban na pangiyawa tu tiempo tapenu kuman tu nabalor nga kinakurug ira na Biblia. Nu kunnatun, maponag mu i appresasion ta kinakurug anna mas determinadu ka nga ari vuluvuga nga ilaku yatun. Fuera paga ta paggatang ta kinakurug, kagian na Proverbio 23:23 nga mawag gapa tu gatangattam i “sirib anna i disiplina anna i pakalippawa.” Ari makalanno i pakannammu laman. Mawag nga iyaplika tam i kinakurug ta pattoletam. Nu egga i pakalippawa tam, mapakkivu tam i gannug ira nga magigiammu tam ta dati ngana ira nga ammu tam. Nu egga i sirib tam, magguyu ittam segun ta pakannammu tam. Nu mittan, disiplinan ittam na kinakurug, nga ipasinganna nu anni i mawag tam ulian. Kanayun nakuan nga magginna ittam ta kunnatun nga giya. Mas dakal i balor natun anne ta pira.​—Prov. 8:10.

15. Kunnasi ittam protektan na sinturon na kinakurug?

¹⁵ Mekadua, determinadu tam nakuan nga mattolay mekunnay ta kinakurug kadaggaw. Isinturon i kinakurug ta awànu. (Efe. 6:14) Ta tiempo na Biblia, suportan anna protektan na sinturon i suddalu ta pakillaban. Ngem tapenu masserbi tu proteksion i sinturonna, mawag nga meggo yatun. Baddi laman tu suporta i iyawana nu lolloy yatun. Kunnasi ittam protektan na espiritual nga sinturottam? Nu meggo nga negalu yatun nittam nga kunna sinturon, protektan ittam na kinakurug ta killu nga parrason anna makoffun yatun tapenu makapaddesision ittam tu masirib. Nu matenta onu mapurueban ittam, pasikannan ittam na kinakurug ta Biblia tapenu determinadu nga kuan nu anni i fustu. Gitta na suddalu nga siguraduanna nga nakasinturon yayya nu umay makillaban, siguraduattam gapa nga iyaplika i kinakurug ta Biblia ta kada aspeto na pattoletam. Tadday paga nga keyusan na sinturon na suddalu ay makasta yatun nga pangitukuan tu espada. Innattam nu kunnasi tam gapa nga makua yatun.

16. Kunnasi nga mas determinadu ittam nga mattolay segun ta kinakurug megafu ta pangibillay ta kinakurug ta tanakuan?

¹⁶ Mekatallu, ituddu i kinakurug na Biblia ta tanakuan adde ta mawayyam. Nu kunnatun, agga-tammi mu tu mapia i espiritual nga espadam, i “uvovug na Dios.” (Efe. 6:17) Sittam ngamin ay posible nga mapakasta tam i abilidad tam bilang mestru, ‘ta hustu nga pangituddu tam meyannung ta uvovug na kakurug.’ (2 Tim. 2:15) Durante nga usattam i Biblia tapenu uffunan i tanakuan nga gatangan i kinakurug anna ibita i kinaladdug, mepatalatto i uvovug na Dios ta ginnonopan anna giffutuattam. Nu kunna, mas determinadu ittam nga mattolay segun ta kinakurug.

17. Ngatta nabalor nikaw i kinakurug?

¹⁷ I kinakurug ay nabalor nga regalu maggafu kani Jehova. Gukaban naw nga regalu, napeggan ittam tu pinakamangina nga pakkukua, i meggo nga relasiottam ta nelangitan nga Yama tam. Nu anni i nitudduna nittam adde sangawe ay gafu pagalaman! Nipromesa na Dios nga mannanayun nga tudduanna ittam. Yari tu, tagibalorattam nakuan nga gittana mangina nga perlas i kinakurug. Tulu-tuloy nga “gatangammu i kinakurug anna kammu vuluvuga ilaku yatun.” Gitta ni David, metuppal mu yaw nga promesa kani Jehova: “I kakurug mu i tuttulak-ku.”​—Sal. 86:11.