1-3. (a) Uno muchano wamuMbimbiliya twatela kuumona ngachilihi? Hanenu chakutalilaho. (Talenu mivwimbimbi yakulivanga.) (b) Vihula muka natushimutwila muchihande chino?

MAKUMBI ano, vatu vavavulu vali natato yakukindulwisanga vyuma kuze vavilanjile hanyima yakuvizachisa. Vaka-kuhehwojola vanawane nge mumafuchi amwe vatu vavavulu veji kukindulwisanga vyuma kana pamo mwomwo yakuhona kuvizanga chipwe nge vili naukalu umwe. Shikaho veji kuvikindulwisanga mangana vavahane vyeka chipwe vavakindulwishile jimbongo javo.

² Numba tuhu tunahase kushinganyeka ngwetu vatukindulwishile jimbongo javyuma vimwe twalanjile, oloze katwatela kukindulwisa chipwe ‘kulandulula’ “chinyingi chakwoloka” chamuMbimbiliya chize ‘tunalandeko.’ (Tangenu Vishimo 23:23; Chimo. 1, 2:4) Ngana muze twashimutwilanga muchihande chinafumuho, tuvosena twalisuwile kulinga vyuma vimwe numba tulinangule muchano. Chakutalilaho, twazachishile kanawa lwola lwetu, etu vamwe pamo twalisuwile kuseza milimo yayinene yakukaye, nakulitwamina kulikata namasepa navausoko vaze kavapwa Vinjihoko, nakwalumunako vishinganyeka navilinga vyetu nakuhona kwazana muvisemwa navilika vize vyalimbalaka naVisoneka. Chipwe ngocho, vyuma tunanganyala mwomwo yakulinangula muchano vinapu vyavivulu chikuma kuhambakana vize twalisuwile kulinga hakusaka tulinangulewo.

 ³ Kachi nge tuli nakufwila kutachikiza muchano wamuMbimbiliya, kaha tuvosena twatela kwivwa ngana muze evwile uze lunga ahanjikile Yesu muchifwanyisa chenyi. Hakusaka kukafwa vatu vatachikize ovyo chapwila chachilemu kutondatonda muchano waWangana waKalunga, Yesu ahanjikile vyamuka-kusekasana uze ayile nakutonda jipela jamwenemwene, kaha himwawanako yimwe. Hakuwana nge pela kana yapwile yandando yayinene, echi chamulingishile ‘alanjise’ vyuma vyenyi vyosena apwile navyo mangana ayilande. (Mateu 13:45, 46) Chochimwe nayetu, muchano waWangana waKalunga uze tunawane namuchano weka uze tunalinangula muMazu aKalunga, unapu wandando yayinene mwomwo watulingishile tulisuule kulinga vyuma vimwe numba tuuwane. Nge natutwalaho lika kumona muchano kupwa waulemu, kaha ‘katweshi kuulandululako.’ Chaluvinda vangamba jaKalunga vamwe kaveshi nakumona cheka muchano kupwa waulemuko, ngocho vamwe vanaulandulula. Shikaho, katwatela kwechelela chuma kana chisoloke nakuli yetuko. Hakusaka tusolole ngwetu twamona muchano kupwa waulemu, twatela kukavangiza mazu amuMbimbiliya akwamba ngwavo, “[twalenuho] kutambuka lika mumuchano.” (Tangenu WaYowano 3, 2-4.) Kutambuka mumuchano chalumbununa kuumona kupwa waulemu mukuyoya chetu nakupwa navilinga vyamwaza. Tushimutwilenu jino havihula vino vitatu: Vatu vamwe veji ‘kulandululanga’ ngachilihi muchano, kaha mwomwo ika? Vyuma muka navitukafwa tulihende kukulinga chuma kana? Vyuma muka navitukafwa tutwaleho “kutambuka lika mumuchano”?

4. Mwomwo ika vatu vamwe mulikulukaji lyamyaka lyakulivanga ‘valandulwilile’ muchano?

⁴ Mulikulukaji lyamyaka lyakulivanga, vatu vamwe vaze vetavililenga vyuma anangwilenga Yesu valitwaminyinyine kutambuka lika mumuchano. Chakutalilaho, omu Yesu alingile nalisa lyehi liyongomena lyalinene mujila yakukomwesa, lize liyongomena lyamukavangijile musali yakalungalwiji waNgalileya. Omu vapwile kuze Yesu ahanjikile vyuma vize vyavakomwesele. Ambile ngwenyi: “Kuvanga mulyenga nyama yaMwanamutu nakunwa manyinga enyi, mokomoko muli enu kuyoya chauchimo.” Muchishishisa chakuhulisa Yesu mangana avalumbunwine mazu kana, lize lizavu lyahukanyine namazu ahanjikile. Vambile ngwavo: “Mazu kana amakalu, iyaze mwahasa kuwevwilila?” Echi chalingishile “vavavulu vakindulukile kuvyuma vasezele kunyima, . . . kaha kavatambukilenga cheka nenyiko.”—Yowa. 6:53-66.

5, 6. (a) Mwomwo ika vatu vamwe vanasezela muchano makumbi ano? (b) Uno mutu nahase ngachilihi kuputuka kuseza muchano chikoki chikoki?

⁵ Makumbi ano, vatu vamwe vanalitwamina kutambuka lika mumuchano. Vamwe vanalitwamina mwomwo yakwalumuka chaulumbunwiso umwe wamuVisoneka chipwe pamo mwomwo yavyuma vimwe ahanjikile chipwe alingile ndumbwetu uze vatachikiza chikuma. Veka nawa mwomwo yajila vavahuhumwinyinemo havyuma valingile, chipwe mwomwo yakuhona kulivwasana navandumbwavo muchikungulwilo. Kaha nawa veka vanalitwamina mwomwo yakulikata navaka-kulikanga kuli Kalunga navatu veka vaze veji kuhanjikanga vyuma vyamakuli havyuma twafwelela. Ngocho vyuma kana vili nakulingisa vatu vamwe ‘vasosoloke’ kuli Yehova nakuli vandumbwavo muchikungulwilo. (Hepe. 3:12-14) Vatu kana vasakiwa kupwa nalufwelelo ngana luze apwile nalwo kaposetolo Petulu. Chakutalilaho, omu Yesu ahulishile vaposetolo jenyi numba nge navakiko vasakile kumuseza, hahaze vene Petulu amukumbulwile ngwenyi: “Ove Mwata, natuya kuli iyaze? Ove uli namazu akuyoya chahaya myaka yosena.”—Yowa. 6:67-69.

⁶ Vatu vamwe vanasezenga muchano chikoki chikoki, pamo chakuzeneka navavene  kutachikiza. Mutu nge naputuka kuseza muchano chikoki chikoki tunahase kumufwanyisa kuwato uze unaputuka kuhungumuka kufuma kungenge yakalwiji. Mbimbiliya yamba ngwayo twatela kuzangama kuchina “natuhungumuka.” (Hepe. 2:1) Mutu uze eji kusezanga muchano eji kulinganga ngocho chakusakula kumuchima wenyi oloze uze eji kuhungumukanga eji kulinganga ngocho chakuzeneka kutachikiza. Chipwe ngocho, mutu uze eji kuhungumukanga eji kuhakanga usoko wenyi naYehova muponde, kaha mukuhita chalwola usoko wenyi naYehova unahase kufwa. Natuhasa ngachilihi kulihenda kuponde kana?

7. Chuma muka nachitukafwa tuhone kulandulula muchano?

⁷ Hakusaka tutwaleho lika kutambuka mumuchano, twatela kwononoka vyuma vyosena vize eji kutulwezanga Yehova. Twatela kumonanga muchano kupwa waulemu nakukavangizanga jindongi jamuMbimbiliya. Omu Mwangana Ndavichi alombele kuli Yehova, ambile ngwenyi: “Nangutambuka mumuchano wove.” (Samu 86:11) Chikupu vene, Ndavichi afwililile kutambuka mumuchano. Shikaho nayetu twatela kutwalaho lika kutambuka mumuchano waKalunga. Kachi nge katweshi kulinga ngochoko, kaha tunahase kushinganyeka havyuma vize twalisuwile kulinga hakusaka kulinangula muchano, pamo nakuputuka kushinganyeka kukinduluka cheka kuvyuma kana. Oloze kachatela kupwa ngochoko, twatela kulinjilila kumuchano. Twatachikiza ngwetu katwatwama nangolo jakusakula muchano wamuMbimbiliya twatela kwitavilako, oloze tuvosena twatela kutambuka “mumuchano.” (Yowa. 16:13) Tuhunananenu jino havyuma vitanu vize twalisuwile kulinga mwomwo yakusaka kutachikiza muchano. Kulinga chuma kana nachitukafwa tuhone kutanguka nakuputuka jino kushinganyeka havyuma vize twalisuwile kulinga kunyima.—Mateu 6:19.

8. Uno kuhona kuzachisa kanawa lwola chinahase kulingisa ngachilihi muka-Kulishitu ahungumuke nakuseza muchano? Hanenu chakutalilaho.

⁸ Kuzachisa lwola. Hakusaka tuhone kuhungumuka nakuseza muchano, twatela kuzachisanga kanawa lwola lwetu. Kachi nge katwazangamineko, kaha tunahase kwenyekelanga lwola lwaluvulu kukulihizumuna, nakuya hainternet nakutalanga televijini. Numba tuhu vyuma kana kavyapwa vyavipiko oloze nge natundupukilamo chikuma kaha chinahase kutulingisa tuhone kupwanga nalwola lwakulinga chilongesa chauka, navyuma vyeka vyakushipilitu. Tuchitalenu chakutalilaho chandumbwetu Mulemba. * Putu vene kuunyike wenyi ou ndumbwetu azangilenga kuhema natuvalu. Kaha kakavulu nge nawaneko lwola ayilenga nakutambukila hakavalu. Mukuhita chalwola, aputukile kuliveya halwola lwosena luze enyekelenga hakuya nakutambukila hatuvalu. Ngocho alumwine jino vishinganyeka vyenyi nakusakula kanawa lwola lwakulihizumuna. Kaha nawa mujimbu waCory Wells, uze alitwaminyinyine kwazana mukuhema kana wamukolezezele chikuma. * Oholyapwa jino Mulemba eji kuzachisanga chikuma lwola lwenyi hakuzata milimo yakushipilitu hamwe kaha navandumbwenyi natanga yenyi namasepa jenyi. Kutachikiza ngwenyi ali nakuzachisa kanawa lwola lwenyi, chinamukafwe apandame chikuma kuli Yehova nakupwa wakuunda.

9. Uno kufwila chikuma vikumba chinahase kulingisa ngachilihi vamwe vazelendende vyuma vyakushipilitu?

⁹ Kuseza vikumba. Hakusaka tutwaleho lika kutambuka mumuchano, katwatela kulilunjikila vikumbako. Omu twalinangwile muchano, twamwenenga vyuma vyakushipilitu kupwa vyavilemu chikuma kuhambakana vikumba. Twalisuwile kulinga vyuma kana mangana tutwaleho lika kutambuka mumuchano. Mukuhita chalwola tunahase pamo kuputuka kumona vakwetu  vali nakulanda makina amakumbi ano chipwe pamo vali navikumba vyeka vize katweshi navyoko. Echi chinahase kutulingisa tulivwe nge tunasalila. Kuhona kusuuluka navyuma tuli navyo, chinahase kutulingisa tuputuke kuzelendenda vyuma vyakushipilitu nakufwila jino kupwa navikumba. Omu mukiko chapwile nakuli Ndemase. Kuzanga chikuma “katwamino kamyaka yino” chamulingishile alitwamine kuzata milimo yakushipilitu nakaposetolo Paulu. (Chimo. 2, 4:10) Jino mwomwo ika Ndemase asezelele Paulu? Alingile ngocho pamo mwomwo yakuzanga chikuma vikumba kuhambakana vyuma vyakushipilitu chipwe pamo kasakile cheka kulisuula mangana azate naPauluko. Shikaho katwatela kufwila cheka kulilunjikila vikumba nakutulingisa jino tuhone kuzanga muchanoko.

10. Ukalu muka twatela kuhonesa hakusaka tutwaleho lika kutambuka mumuchano?

¹⁰ Kuseza masepa navausoko. Hakusaka tutwaleho lika kutambuka mumuchano, katwatela kwechelelanga vakwetu vatushinyinyikeko. Chakutalilaho, omu twalinangwile muchano, twalitwaminyinyine kulikata namasepa navausoko vaze kavapwa Vinjihoko. Vamwe pamo vasuulukile navyuma twasakwile kulinga oloze vamwe chiku. (Petu. 1, 4:4) Numba tuhu twazanga chikuma vaka-tanga yetu nakufwila nawa kuvazakama chikuma, oloze katwatela kuseza muchano mwomwo yakusaka kuvasuulwisako. Ngana muze wahanjika mukanda Wavaka-Kolinde 1, 15:33, twatela kaha kutunga usepa wakukola navatu vaze vazanga Yehova.

11. Natuhasa ngachilihi kulihenda kuvishinganyeka nakuvilinga vyavipi?

¹¹ Kuseza vishinganyeka navilinga vyavipi. Vosena vaze veji kutambukanga mumuchano vatela kupwa vajila. (Isa. 35:8; tangenu WaPetulu 1, 1:14-16.) Omu twaputukile kulinangula muchano, tuvosena twalumwineko vyuma vimwe mukuyoya chetu mangana tukavangize jindongi jamuMbimbiliya. Vamwe valumwineko vyuma vyavivulu veka chiku. Chipwe ngocho, katwatela kuseza vilinga vyetu vitoma nakundupukila muvilinga vyavipiko. Vyuma muka navitukafwa tuhone kupwa mucheseko chakulinga vyuma vyavipi? Twatela kushinganyekanga handando yayinene yize afwetele Yehova mangana tupwenga tuvajila kuhichila muli Mwanenyi Yesu Kulishitu. (Petu. 1, 1:18, 19) Hakusaka tupwenga tuvatoma kumeso aYehova, twatela kumonanga ndando yakusokola yaYesu kupwa yayilemu chikuma.

12, 13. (a) Mwomwo ika twatela kumona makumbi akunoka nganomu awamona Yehova? (b) Vyuma muka natushimutwila?

¹² Kuseza visemwa navilika vize vyalimbalaka naVisoneka. Vausoko wetu, navakwetu vaka-milimo navakwetu vaka-shikola vanahase kutushinyinyika mangana twazane muvilika vyakulisezaseza. Vyuma muka navitukafwa tuhone kwazana muvisemwa namuvilika vyamakumbi akunoka vize ahunga Yehova? Kumona vyuma nganomu avimona Yehova nachitukafwa chikuma. Kaha nawa kuhitulukanga mumijimbu yamumikanda yetu yize yahanjika okwo kwafuma vilika vyamakumbi akunoka nachitukafwa chikuma. Nge natushinganyekanga haVisoneka vize vyatuhuhumuna tuhonenga kwazana muvilika kana, kaha natusolola chikupu ngwetu tuli nakutambuka mujila yize “etavila Mwata.” (Efwe. 5:10) Kufwelela Yehova naMazu enyi navitukinga tuhone “kwivwa vatu woma.”—Vishi. 29:25.

¹³ Tuvosena twatela kutwalaho lika kutambuka mumuchano mukuyoya chetu chosena. Vyuma muka navitukafwa tutwaleho lika kutambuka mumuchano? Tushimutwilenu hajijila jitatu.

14. (a) Uno kutwalaho kulinangula Mbimbiliya nachitukafwa ngachilihi tuhone kuseza muchano? (b) Mwomwo ika mangana, nakunanguka, nakunangakana vyapwila vyavilemu?

¹⁴ Chatete, twalenuho lika kulinangula  nakushinganyeka haMazu aKalunga. Nge namunonekanga lwola lwakulinangula Mazu aKalunga hakumbi hakumbi, kaha namumona vyuma muli nakulinangula kupwa vyavilemu nakuhona kuseza muchano. Chisoneka chaVishimo 23:23 chamba ngwacho, twatela nawa kulanda “mangana, nakunanguka, nakunangakana.” Muchishishisa chakupwa kaha nachinyingi chamuMbimbiliya, twatela nawa kuzachisa vyuma kana mukuyoya chetu. Nge natupwa namangana, kaha natukavangiza vyuma vyosena mwatulweza Yehova. Mangana anahase kutukafwa tulinge vyuma vize twatachikiza kanawa. Shimbu jimwe muchano weji kutuzangamisanga nakutukafwa tumone oho twatela kuzachila. Chikupu vene, twatela kumonanga kuzangamisa kana kupwa chachilemu mwomwo nachitunganyalisa kuhambakana palata.—Vishi. 8:10.

15. Uno muhya wamuchano unahase kutukinga ngachilihi?

¹⁵ Chamuchivali, twalenuho lika kuzachisa muchano munalinangula mukuyoya chenu. Mwatela nawa kuvwala muhya wamuchano mujimbunda jenu. (Efwe. 6:14) Kushikulu, maswalale vavwalilenga muhya uze wakingilenga jimbunda javo navilyo vyeka vyakumujimba. Shikaho vatelelele kulikasawo chikuma numba uhase kuvakinga. Uno muhya wetu wakushipilitu unahase kutukinga ngachilihi? Kachi nge natuukasa chikuma ngana mwamuhya wamumbunda, kaha nautukafwa tuhone kushinganyeka mwakuhenga nakutulingisa jino tusakule kanawa vyakulinga. Kachi nge tuli mucheseko, muchano wamuMbimbiliya nautukafwa tufwile kulinga vyuma vyakwoloka. Liswalale kaya kujita chakuhona kulikasa muhya wenyiko, shikaho nayetu katwatela kumbwembwelesa chipwe kuzula muhya wetu wamuchanoko. Oloze twatela kulikasawo chikuma mujimbunda jetu hakukavangiza vyuma tuli nakulinangula. Muhya avwalilenga liswalale wamukafwilenga chikuma mwomwo hakiko ahakilenga poko yenyi. Shikaho tushimutwilenu jino hachuma chikwavo nachitukafwa tutwaleho lika kutambuka mumuchano.

16. Uno kulwezako vakwetu muchano wamuMbimbiliya nachitukafwa ngachilihi tutwaleho lika kutambuka mumuchano?

¹⁶ Chamuchitatu, twalenuho lika kulwezako vakwenu muchano wamuMbimbiliya munalinangula. Kulinga ngocho nachimikafwa muzachise kanawa “mazu aKalunga” aze apwa poko yakushipilitu. (Efwe. 6:17) Tuvosena twatela kuhotola uhashi wetu wakunangula, mangana “[tunangulenga] mazu amuchano mujila yakwoloka.” (Chimo. 2, 2:15) Nge natuzachisanga chikuma Mbimbiliya hakunangula vakwetu, kaha natuzanga chikuma muchano nakuumona kupwa waulemu. Kulinga ngocho nachitukafwa tutwaleho lika kutambuka mumuchano.

17. Mwomwo ika mwamwena muchano kupwa waulemu?

¹⁷ Chikupu vene, muchano wapwa hichuma chachilemu chize atuhana Yehova. Muchano kana watukafwa tupandame chikuma kuli Setu wamwilu. Numba tuhu vyuma natunangula Yehova vinasoloka kupwa vyavilemu, oloze awa anapu kaha himaputukilo. Kalunga atufwelelesa ngwenyi mwatwalaho lika kutunangula muchano haya myaka yosena. Shikaho twatela kumona muchano ngana mwapela yamwenemwene. Tutwalenuho lika ‘kulanda muchano, kanda natuulandululako.’ Nge natulinga ngocho, kaha natupwa ngana mwaNdavichi uze afwelelesele Yehova ngwenyi: “Nangutambuka mumuchano wove.”—Samu 86:11.