1-3. a) ¿Ndáaña xíniñúʼu keʼéyó xíʼin ña̱ nda̱a̱ ña̱ va̱xi nu̱ú Biblia? Ka̱ʼa̱n xa̱ʼa iin ejemplo (koto na̱ʼná ña̱ va̱xi chí xa̱ʼa). b) ¿Ndáa pregunta ndakuiinyó nu̱ú artículo yóʼo?

TIEMPO vitin ku̱a̱ʼání na̱ yiví sándándikóna ña̱ʼa ña̱ sátána. Sava ñuu loʼova ña̱ʼa ña̱ sátána sándándikóna, soo nu̱ú Internet ku̱a̱ʼáka ña̱ʼa sándándikóna. Sana sándándikóna ña̱yóʼo xa̱ʼa ña̱ va̱ása níkutóonaña. Ña̱kán násamana ña̱yóʼo, á kúni̱na ná sandándikóna xu̱ʼúnna.

² Miíyó sava yichi̱ sándándikóyó ña̱ʼa ña̱ sátáyó, soo va̱ása kúni̱yó keʼéyó ña̱yóʼo xíʼin ña̱ sákuaʼayó nu̱ú Biblia. Tá xa̱a̱ sa̱táyó ña̱yóʼo va̱ása kúni̱yó xi̱kóyóña á sandákooyóña (1 Tim. 2:4; kaʼvi Proverbios 23:23). * Táki̱ʼva sa̱kuaʼayó nu̱ú inka artículo, ña̱ va̱ʼa sa̱kuaʼayó ña̱ nda̱a̱, xi̱niñúʼuyó ku̱a̱ʼá tiempoyó. Savana sa̱ndákoona ña̱ kaʼvina iin carrera nu̱ú kiʼinkana ku̱a̱ʼá xu̱ʼún, á inkana va̱ása káʼa̱nka na̱ veʼena á na̱ migona xíʼinna chi sa̱kuaʼana ña̱ nda̱a̱ xa̱ʼa Ndióxi̱. Inkana  na̱samana ña̱ ndákanixi̱nína á ña̱ xi̱keʼéna ta va̱ása kéʼékana costumbre ña̱ va̱ása kútóo Ndióxi̱. Nda̱a̱ ndáaka ña̱ ke̱ʼéyó ña̱ va̱ʼa sa̱kuaʼayó ña̱ nda̱a̱, bendición ña̱ ndákiʼinyó va̱ása kítáʼanña xíʼin ña̱ sa̱ndákooyó.

³ Ña̱ va̱ʼa kunda̱a̱-iniyó ña̱ ndáyáʼviní ña̱ nda̱a̱ ña̱ káʼa̱n xa̱ʼa reino Ndióxi̱, ta̱ Jesús ni̱ka̱ʼa̱nra xa̱ʼa iin ta̱a ta̱ ku̱a̱ʼa̱n nándukú perla. Tá nda̱ni̱ʼíra perla ña̱ va̱ʼaní, kama “ni̱xi̱kó ndiʼira ña̱ʼara ña̱ kúúmiíra” ta sa̱tára perla yóʼo (Mat. 13:45, 46). Saátu ña̱ sákuaʼayó xa̱ʼa reino Ndióxi̱ xíʼin inkaka ña̱ sákuaʼayó nu̱ú Biblia, ndáyáʼviníña nu̱úyó ta xa̱ʼa ña̱yóʼo chíka̱a̱níyó ndée ña̱ va̱ʼa ndakiʼinyó ña̱yóʼo. Tá ndáyáʼví ña̱yóʼo nu̱úyó va̱ása sandákooyóña. Soo sava na̱ ndásakáʼnu Ndióxi̱ sándákoona ña̱ nda̱a̱. Ni iin yichi̱ ná kǒo keʼéyó ña̱yóʼo. Va̱ʼaka ná kundiku̱n ni̱ʼiyó ña̱ nda̱a̱ (kaʼvi 3 Juan 2-4). * Ña̱yóʼo kúni̱ kachiña ña̱ xíniñúʼu kundayáʼviña nu̱úyó ta keʼéyó táki̱ʼva káʼa̱nña. Nu̱ú artículo yóʼo ndakuiinyó u̱ni̱ pregunta: ¿Nda̱chun sándákoo savana ña̱ nda̱a̱ ta nda̱saa kéʼéna ña̱yóʼo? ¿Ndáaña chindeétáʼan xíʼinyó ña̱ va̱ása keʼéyó ña̱yóʼo? ¿Ndáaña chindeé miíyó ña̱ kundiku̱n ni̱ʼiyó yichi̱ ña̱ nda̱a̱?

4. Tá siglo nu̱ú, ¿nda̱chun sa̱ndákoo savana ña̱ nda̱a̱?

⁴ Tá siglo nu̱ú, savana ka̱ndíxana ña̱ sa̱kuaʼana xa̱ʼa ta̱ Jesús tá xa̱ʼa, soo tándi̱ʼi sa̱ndákoonaña. Iin yichi̱ ke̱ʼé ta̱ Jesús iin milagro ta ta̱xira ña̱ xi̱xi ku̱a̱ʼání na̱ yiví na̱ xi̱ndiku̱nñaʼá. So̱ndíʼi, ni̱xa̱ʼa̱nna xíʼinra nda̱a̱ inka xiyo nu̱ú tá mar ña̱ Galilea. Soo kán nda̱kanda̱-inina xíʼin ña̱ ni̱ka̱ʼa̱n ta̱ Jesús xíʼinna: “Tá ná kǒo kaxíndó ku̱ñu se̱ʼe ta̱ ta̱a, tá ná kǒo koʼondó ni̱i̱ra va̱ása kivi kutakundó”. Nu̱úka ña̱ ka̱ʼa̱nna xíʼinra ná ka̱ʼa̱nra ndáaña kúni̱ kachi tu̱ʼun yóʼo, ka̱china: “Ña̱ káʼa̱nra yóʼo va̱ása va̱ʼaña; ¿ndáana kuniso̱ʼoña?”. Xa̱ʼa ña̱yóʼo, “ku̱a̱ʼání na̱ discípulora nda̱kiʼinna ku̱a̱ʼa̱nna, ta va̱ása níxi̱kakana xíʼinra” (Juan 6:53-66).

5, 6. a) ¿Nda̱chun sándákoo savana ña̱ nda̱a̱ tiempo vitin? b) ¿Ndáaña kéʼé inkana tasaá kúxíkana nu̱ú ña̱ nda̱a̱?

⁵ Tiempo vitin ku̱a̱ʼánína sándákoona ña̱ nda̱a̱. Savana kǒo kándíxana ña̱ káʼa̱n na̱ ñuu Ndióxi̱ xa̱ʼa iin ña̱ va̱xi nu̱ú Biblia á xa̱ʼa ña̱ kéʼé á ña̱ káʼa̱n inka na̱ hermano na̱ xíni̱na. Inkana sáa̱na xa̱ʼa ña̱ ta̱xina iin consejo ña̱ va̱xi nu̱ú Biblia ndaʼa̱na á xa̱ʼa ña̱ va̱ása kítáʼanna xíʼin inka na̱ hermano. Inkatuna kándíxana ña̱ káʼa̱n na̱ apóstata á na̱ yiví na̱ va̱ása kúni̱ ña̱ sakuaʼayó xa̱ʼa Ndióxi̱. Nda̱a̱ ndáaka xa̱ʼa kéʼéna ña̱yóʼo, kúxíkana nu̱ú Jehová ta saátu nu̱ú congregación (Heb. 3:12-14). Va̱ʼaka níkeʼéna táki̱ʼva ke̱ʼé ta̱ apóstol Pedro chi ta̱yóʼo ka̱ndíxaníra ta̱ Jesús. Tá ni̱nda̱ka̱tu̱ʼun ta̱ Jesús na̱ apóstol á kúni̱na ku̱ʼu̱nna, ta̱ Pedro ni̱ka̱ʼa̱nra: “Táta, ¿ndáana ku̱ʼu̱nndi̱ sa̱tá? Tu̱ʼun ña̱ káʼún kúú ña̱ taxi kutakundi̱” (Juan 6:67-69).

⁶ Inkana loʼo tá loʼo sándákoona ña̱ nda̱a̱, ta ni va̱ása kíʼinna kuenta. Biblia káʼa̱nña ña̱ íyona táki̱ʼva íyo iin barco tú ku̱a̱ʼa̱n kúxíka loʼo tá loʼo ma̱ʼñú ti̱kui̱í  (Heb. 2:1). Sana va̱ása níndakanixi̱nína ña̱ sandákoona ña̱ nda̱a̱, soo ndi̱ʼi̱-xa̱ʼa ña̱ kándíxana Jehová. ¿Ndáaña kivi keʼéyó ña̱ va̱ása kundoʼoyó ña̱yóʼo?

7. ¿Ndáaña chindeétáʼan xíʼinyó ña̱ va̱ása sandákooyó ña̱ nda̱a̱?

⁷ Ña̱ va̱ʼa kakayó yichi̱ ña̱ nda̱a̱, xíniñúʼu kandíxayó ta kuniso̱ʼoyó ndiʼi ña̱ sánáʼa̱ Jehová miíyó. Xíniñúʼu kundayáʼviní ña̱ nda̱a̱ nu̱úyó ta keʼéyó ña̱ káʼa̱n Biblia xíʼinyó. Iin yichi̱, ta̱ rey David ni̱ka̱ʼa̱nra xíʼin Jehová: “Kundiku̱i̱n yichi̱ún ña̱ nda̱a̱” (Sal. 86:11). Ná keʼéyó táki̱ʼva ke̱ʼé ta̱ David ña̱ kundiku̱nyó ña̱ nda̱a̱. Chi tá xíka-iniyó, sana nda̱a̱ kixaʼá ndakanixi̱níyó xa̱ʼa ña̱ʼa ña̱ sa̱ndákooyó ña̱ va̱ʼa kundiku̱nyó ña̱ nda̱a̱, ta sana kixaʼá kuni̱yó ndikóyó keʼéyó ña̱kán. Xa̱a̱ xíniyó ña̱ su̱ví sava kuití ña̱ káʼa̱n Ndióxi̱ kúú ña̱ kandíxayó, chi xíniñúʼu kandíxayó ndiʼi ña̱ káʼa̱nra (Juan 16:13). Nu̱ú artículo ña̱ xa̱a̱ ka̱ʼviyó, ni̱ka̱ʼa̱nyó xa̱ʼa u̱ʼu̱n ña̱ʼa ña̱ sa̱ndákooyó tasaá va̱ʼa sa̱kuaʼayó ña̱ nda̱a̱. Ná kotoyó ndáaña kivi keʼéyó ña̱ va̱ása nda̱ndikóyó keʼéyó ña̱ xi̱keʼéyó xi̱naʼá (Mat. 6:19).

8. ¿Nda̱saa kivi kuxíkayó nu̱ú ña̱ nda̱a̱ ta va̱ása kiʼinyó kuenta? Ka̱ʼa̱n xa̱ʼa iin ejemplo.

⁸ Tiempo. Ña̱ va̱ása kuxíkayó nu̱ú ña̱ nda̱a̱, xíniñúʼu kiʼinníyó kuenta xíʼin tiempoyó. Tá va̱ása kíʼinyó kuenta, kivi kuniñúʼuyó ku̱a̱ʼá hora ña̱ keeyó kusi̱í-iniyó, ña̱ kuniñúʼuyó Internet á ña̱ kotoyó tele. Su̱ví ña̱ va̱ása va̱ʼa kúú ña̱yóʼo, soo kivi kindaaña tiempoyó ña̱ kivi kuniñúʼuyó ña̱ kaʼviyó á ña̱ keʼéyó inka chiñu ti̱xin ñuu Ndióxi̱. Ná kotoyó ndáaña ndo̱ʼo iin ñá hermana ñá naní Emma. * Tá loʼoñá, xi̱kutóoníñá kosoñá kuáyi̱. Tá xi̱xiyó tiempo nu̱úñá xi̱keʼéñá ña̱yóʼo. Soo va̱ása va̱ʼa xi̱kuniñá chi ku̱a̱ʼá tiempo xi̱xiniñúʼuñá ña̱ xi̱keʼéñá ña̱yóʼo, ña̱kán na̱samañá sava ña̱ʼa ña̱ xi̱keʼéñá. Saátu ña̱ chi̱ndeétáʼanní xíʼinñá kúú historia ñá hermana Cory Wells. * Tiempo vitin, ku̱a̱ʼáka tiempo xíniñúʼuñá ña̱ kéʼéñá chiñu Ndióxi̱ ta saátu ña̱ kítáʼanñá xíʼin na̱ veʼeñá xíʼin na̱ migoñá. Yatinka íyoñá nu̱ú Jehová ta va̱ʼaní kúniñá chi xíni̱ñá ña̱ va̱ʼaní xíniñúʼuñá tiempoñá.

9. ¿Nda̱saa xíniñúʼu kiʼinyó kuenta xíʼin ña̱ʼa ña̱ kúúmiíyó?

⁹ Ña̱ʼa ña̱ kúúmiíyó. Tá kúni̱yó kundiku̱nyó ña̱ nda̱a̱, xíniñúʼu ndakani va̱ʼa xi̱níyó xa̱ʼa ña̱ʼa ña̱ kúúmiíyó. Tá sa̱kuaʼayó ña̱ nda̱a̱ xa̱ʼa Jehová, va̱ása níndi̱ʼi̱ka-iniyó xa̱ʼa ña̱ kúni̱yó chi xa̱ʼa chiñu Ndióxi̱va ndíʼi̱-iniyó. Sa̱ndákooyó sava ña̱ xi̱keʼéyó ña̱ va̱ʼa sakuaʼayó ña̱ nda̱a̱. Soo tá yáʼa tiempo sana xítoyó ña̱ kúúmií inkana iin celular á tableta ña̱ va̱ʼaníka, á sana íyoka xu̱ʼúnna ta ndákanixi̱níyó ña̱ kivitu keʼé miíyó ña̱yóʼo. Tá va̱ása kúsi̱íka-iniyó xíʼin ña̱ʼa ña̱ kúúmiíyó ta kúni̱yó koo ku̱a̱ʼáka ña̱ʼayó, kivi sandákooyó chiñu Ndióxi̱ ta kixaʼáyó kachíñukayó ña̱ va̱ʼa kooka ña̱ʼa nu̱úyó. Ña̱yóʼo sándákaʼánña miíyó xa̱ʼa ta̱ Demas. Ta̱yóʼo xi̱kuni̱níra ña̱ íyo ñuyǐví yóʼo ta xa̱ʼa ña̱yóʼo sa̱ndákoora chiñu ña̱ xi̱keʼéra xíʼin ta̱ apóstol Pablo (2 Tim. 4:10). Ni Biblia va̱ása káʼa̱nñá á xi̱kuʼvi̱-ini ta̱ Demas xi̱xinira ña̱ ku̱i̱ká nu̱úka ña̱ kachíñura  nu̱ú Ndióxi̱, á ña̱ va̱ása níxiinkara kachíñura xíʼin ta̱ Pablo. Soo ña̱ sánáʼa̱ ña̱yóʼo miíyó kúú ña̱ va̱ása xíniñúʼu ndikó tukuyó kuʼvi̱-iniyó kuniyó ña̱ ku̱i̱ká ña̱ íyo ñuyǐví yóʼo, chi kivi sakúxíkaña miíyó nu̱ú Jehová.

10. Tá kǒo kúni̱yó sandákooyó ña̱ nda̱a̱, ¿ndáaña va̱ása keʼéyó?

¹⁰ Ña̱ kítáʼanyó xíʼin na̱ migoyó ta saátu xíʼin na̱ veʼeyó. Tá kǒo kúni̱yó sandákooyó ña̱ nda̱a̱, va̱ása xíniñúʼu keʼéyó ña̱ káʼa̱n inkana. Tá sa̱kuaʼayó ña̱ nda̱a̱, na̱ veʼeyó á na̱ migoyó sana sa̱ndákoona ña̱ ka̱ʼa̱nna xíʼinyó. Savana i̱xato̱ʼóvana ña̱ kándíxayó soo sana inkana va̱ása níkutóona ña̱yóʼo (1 Ped. 4:4). Miíyó va̱ása sándákooyó ña̱ káʼa̱nyó xíʼinna ta saátu ña̱ kéʼéyó ña̱ va̱ʼa xíʼinna. Soo xíniñúʼu kiʼinyó kuenta xíʼin ña̱yóʼo chi sana kivi ya̱ʼandosóyó ña̱ káʼa̱n Jehová ta kuniso̱ʼoyó ña̱ káʼa̱n na̱yóʼo. Tá kándíxayó ña̱ káʼa̱n 1 Corintios 15:33, kúnda̱a̱-iniyó ña̱ xíniñúʼu kutáʼanyó xíʼin nda̱saa na̱ kúʼvi̱-ini xíni Jehová.

11. ¿Ndáaña chindeétáʼan xíʼinyó ña̱ kǒo ndakanixi̱níyó xa̱ʼa ña̱ kini ta ni kǒo keʼéyóña?

¹¹ Ña̱ ndákanixi̱níyó xa̱ʼa ña̱ kini, xíʼin ña̱ kéʼéyó ña̱ va̱ása va̱ʼa. Na̱ ndíku̱n ña̱ nda̱a̱ va̱ása kéʼéna ña̱ kini (Is. 35:8; kaʼvi 1 Pedro 1:14-16). * Tá sa̱kuaʼayó ña̱ káʼa̱n Biblia xa̱ʼa ña̱ xíniñúʼu keʼéyó, na̱samayó ña̱yóʼo. Savana sa̱ndákoona keʼéna ña̱ kini ña̱ xi̱keʼéna. Soo miíyó va̱ása kúni̱yó tuku ndandikóyó keʼéyó ña̱ kini ña̱ xi̱keʼéyó xi̱naʼá. ¿Ndáaña chindeétáʼan xíʼinyó? Ná ndakanixi̱níyó xa̱ʼa ña̱ cha̱ʼvi Jehová xa̱ʼayó ña̱ va̱ʼa ndií kooyó: ta̱xira se̱ʼera ta̱ Jesús ña̱ ni̱xi̱ʼi̱ra xa̱ʼayó (1 Ped. 1:18, 19). Tá kǒo nándósóyó xa̱ʼa ña̱ ke̱ʼé ta̱ Jesús xa̱ʼayó, ndiíní kooyó nu̱ú Jehová.

12, 13. a) ¿Nda̱chun xíniñúʼu kotoyó costumbre nda̱a̱ táki̱ʼva xíni Jehová ña̱yóʼo? b) ¿Ndáa inkaka ña̱ sakuaʼayó?

¹² Costumbre ña̱ va̱ása kútóo Ndióxi̱. Sana na̱ veʼeyó, na̱ káʼvi xíʼinyó á na̱ káchíñu xíʼinyó káʼa̱nna xíʼinyó ná keʼéyó sava vikó ña̱ va̱ása kútóo Ndióxi̱. ¿Ndáaña chindeétáʼan xíʼinyó ña̱ va̱ása kundiku̱nyó costumbre yóʼo? Ña̱ ndakanixi̱níyó nda̱chun va̱ása kútóo Jehová ña̱yóʼo. Saátu xíniñúʼu kaʼviyó ndáaña káʼa̱n sava revista á libro ña̱ tává na̱ ñuu Ndióxi̱ xa̱ʼa vikó yóʼo. Tá ndákaʼányó ña̱ káʼa̱n Biblia xa̱ʼa vikó yóʼo, chíka̱a̱ka-iniyó ña̱ kundiku̱nyó yichi̱ ña̱ kúni̱ Jehová (Efes. 5:10). Tá kándíxayó Jehová xíʼin ña̱ káʼa̱n tu̱ʼunra, va̱ása yi̱ʼvíyó xa̱ʼa ña̱ ka̱ʼa̱n inkana xa̱ʼayó (Prov. 29:25).

¹³ Kúni̱yó kundiku̱nyó ña̱ nda̱a̱ ndiʼi tiempo. ¿Ndáaña kivi keʼéyó ña̱ kuni̱kayó kundiku̱nyó ña̱ nda̱a̱ ña̱ sa̱kuaʼayó xa̱ʼa Ndióxi̱? Ná kotoyó u̱ni̱ ña̱ʼa ña̱ kivi keʼéyó.

14. a) ¿Nda̱saa chíndeétáʼanña xíʼinyó ña̱ káʼviyó Biblia ta va̱ása sandákooyó ña̱ nda̱a̱? b) ¿Nda̱chun ndáyáʼviní ña̱ ndíchi, ña̱ kúnda̱a̱-iniyó, ta saátu consejo?

¹⁴ Siʼna xíniñúʼu taváyó tiempo ña̱ va̱ʼa kaʼviyó tu̱ʼun Ndióxi̱ ta ndakanixi̱níyó xa̱ʼaña. Tá ku̱a̱ʼáka tiempo ná kaʼviyó ña̱yóʼo, kuʼvi̱ka-iniyó kuniyóña ta va̱ása kuni̱yó sandákooyóña. Soo su̱ví nda̱saa  xíniñúʼu kuxini̱yó ña̱ káʼa̱n tu̱ʼun Ndióxi̱ chi xíniñúʼu keʼéyóña. Proverbios 23:23 káchiña ña̱ xíniñúʼu satáyó ña̱ nda̱a̱, soo saátu xíniñúʼu ndakiʼinyó ‘ña̱ ndíchi, consejo ta saátu ña̱ kúnda̱a̱-iniyóʼ. Ña̱ satáyó ña̱ ndíchi kúni̱ kachiña ña̱ keʼéyó ña̱ sákuaʼayó. Tá kúnda̱a̱-iniyó xíʼin ña̱ nda̱a̱, iin chítáʼanyóña xíʼin ña̱ sákuaʼayó ta saátu xíʼin ña̱ xa̱a̱ xíni̱yó. Saátu sava yichi̱ ña̱ nda̱a̱ táxiña consejo ndaʼa̱yó ta náʼa̱ña nu̱úyó tá kéʼéyó iin ña̱ va̱ása va̱ʼa ta nda̱saa xíniñúʼu nasa̱mayó. Ndiʼi tiempo xíniñúʼu kundiku̱nyó consejo ña̱ táxi Biblia ndaʼa̱yó chi ndáyáʼviníka ña̱yóʼo nu̱úka ña̱ ku̱i̱ká (Prov. 8:10).

15. ¿Nda̱saa chíndeétáʼan cinturón ña̱ kúúmií ña̱ nda̱a̱ xíʼinyó?

¹⁵ Ña̱ u̱vi̱ ña̱ xíniñúʼu keʼéyó kúú ña̱ chika̱a̱yó ndée ña̱ kundiku̱nyó ña̱ káʼa̱n Biblia xíʼinyó ndiʼi ki̱vi̱. Ná kuniñúʼuyó cinturón ña̱ kúúmií ña̱ nda̱a̱ (Efes. 6:14). Tá tiempo xi̱naʼá na̱ soldado xi̱xiniñúʼuna cinturón ña̱ va̱ʼa chindeétáʼanña xíʼin tokóna. Soo xi̱xiniñúʼu kútu va̱ʼa chika̱a̱na cinturón tokóna. Saátu ña̱ nda̱a̱ ña̱ sákuaʼayó nu̱ú Biblia íyoña táki̱ʼva íyo iin cinturón chi ndáaña miíyó. Tá kútu va̱ʼa ná chika̱a̱yóña tokóyó, chindeétáʼanña xíʼinyó ña̱ va̱ása kandíxayó tu̱ʼun vatá, ta saátu va̱ʼa ndaka̱xinyó ña̱ keʼéyó. Tá ná kixi iin tu̱ndóʼo nu̱úyó chindeétáʼanña xíʼinyó ña̱ keʼéyó ña̱ va̱ʼa. Iin ta̱ soldado va̱ása ndakanixi̱níra ña̱ ku̱ʼu̱nra nu̱ú ku̱a̱chi tá va̱ása kúúmiíra cinturón. Saátu xíniñúʼu keʼé miíyó, ná chika̱a̱yó ndée ña̱ kuniñúʼuyó cinturón ña̱ kúúmií ña̱ nda̱a̱. Va̱ʼaka ná keʼéyó chiñu ña̱ xáʼnda Ndióxi̱ nu̱úyó. Saátu cinturón yóʼo xi̱chindeétáʼanña xíʼin na̱ soldado ña̱ va̱ʼa kuniʼina espadana. Xa̱ʼa ña̱yóʼo vitin ka̱ʼa̱nyó xa̱ʼa inkaka ña̱ chíndeétáʼan xíʼinyó ña̱ va̱ʼa kundiku̱nkayó ña̱ nda̱a̱.

16. Tá sánáʼa̱yó inkana xa̱ʼa Ndióxi̱, ¿nda̱saa kivi chindeéña miíyó ña̱ kundiku̱nyó ña̱ nda̱a̱?

¹⁶ Ña̱ u̱ni̱ xíniñúʼu keʼéyó kúú ña̱ kee ni̱ʼiyó sanáʼa̱yó inkana xa̱ʼa Biblia. Nda̱a̱ táki̱ʼva kéʼé iin ta̱ soldado, va̱ʼaní xíniñúʼura espadara, saátu miíyó ná kuniñúʼu va̱ʼayó tu̱ʼun Ndióxi̱ (Efes. 6:17). Ndiʼiyó kivi chika̱a̱yó ndée ña̱ va̱ʼa sanáʼa̱yó xa̱ʼa Ndióxi̱ ta saátu ña̱ va̱ʼa kuniñúʼuyó tu̱ʼunra (2 Tim. 2:15). Tá xíniñúʼuyó Biblia ña̱ sánáʼa̱yó na̱ yiví ña̱ va̱ʼa satána ña̱ nda̱a̱ ta va̱ása kandíxana ña̱ vatá íyo ñuyǐví yóʼo, saá kúú ña̱ va̱ása nandosóyó xa̱ʼa ña̱ nda̱a̱, ta xa̱a̱ña nda̱a̱ níma̱yó. Ña̱yóʼo ndasandeéña ña̱ kundiku̱nkayó ña̱ nda̱a̱.

17. ¿Nda̱chun ndáyáʼviní ña̱ nda̱a̱ nu̱ú miíún?

¹⁷ Ña̱ nda̱a̱ ña̱ va̱xi nu̱ú Biblia táki̱ʼva íyo iin regalo ña̱ táxi Jehová ndaʼa̱yó saá íyoña. Tixaʼvi ña̱yóʼo kúúmiíyó iin ña̱ ndáyáʼviní: ña̱ kítáʼan va̱ʼayó xíʼinra. Ndiʼi ña̱ xa̱a̱ sa̱kuaʼayó xa̱ʼara loʼova kúú ña̱yóʼo, chi káʼa̱nra xíʼinyó ña̱ kivika sakuaʼayó ña̱ nda̱a̱ xa̱ʼara ndiʼi tiempo. Ña̱kán xíniñúʼu kundayáʼviní ña̱ nda̱a̱ nu̱úyó. Va̱ása sandákooyó ña̱ satáyó ña̱ nda̱a̱, ta va̱ása xi̱kóyóña. Táki̱ʼva ni̱ka̱ʼa̱n ta̱ David, sáxi̱nuyó ña̱ ni̱ka̱ʼa̱nyó xíʼin Jehová, ña̱ kundiku̱nkayó ña̱ nda̱a̱ (Sal. 86:11).