1-3. (a) Elobmîs amab xa da mati nî tsâ? ǂKhō re. (Tsoatsoas ǃnâ hâ ai-īsiga mû re.) (b) Mâ dîde da nē ǁkhāǁkhāǃâs ǃnâ nî ǃhoaǃgao?

ǁAMA du go xū-e ǁamaxū ǃkhaib tawa sī mā-oas ge kaise a ǂansa ǀgauba. ǀNî ôaǃnâs ǃoagun ge khoena 9 persenti kōse ǁaman kō xūna sī ra mā-oa. Tsî internets ǃnâ-ū ra ǁamahe xūn hîna ra mā-oahen ge a 30 persent. Īǁkhā as ge ǁaman go xū-i ǁîn ra ǃâubasen khami ī tama hâsa tamas ka io î go ǃgâi mâsib ǃnâ hâ tama hâ isa. ǁNās ǀkhan ge ra mā-oa tamas ka io ǀnîhâ-e ra ǂgan.

² Nēsi da ga ǁama da go xū-e mā-oa tamas ka io mari-e ga ra ǂgan oa xawe da ge tātsēs tsîna “ǁama” da ge ‘amab di ǂansa’ mā-oa tamas ka io “ǁamaxū” hō tide. (Khomai re ǂKhoamîdi 23:23; 1Tim. 2:4) ǂOa go ro ǁkhāǁkhāǃâs ǃnâ da go ǁkhāǁkhāsen khami da ge amaba ge hō, ǁaeba ǁamaǂui tsî ôaǃnâs ǃnâ-ū. Amaba da ge ǁama o, o da ge ǀnîsi ǀgapi ǁkhāǁkhāsensa ge xū, ǀkharaǀkharana ǀhōsan hîna da ūhân ǃnâ ge dī tsî sida ǂâi ǀgaub tsî tanisen ǀgaub tsîna ge dawa tamas ka io Elobmîs ai ǃgaoǃgaosa tama hâ ǁnaetigu tsîna ge ǀû. Xawe matare da ge xū-i ge kaise ge ǂkhariro-i ǀkhaegu hîna da ge hōǃâgu xa.

 ³ Elobmîs tawa î ga ra hā o, o i ge sida tsâsiba Jesub ǂkhōs ǃnâ ge hâ i aob tsâsigu ǀkha a ǀgui. Elob Gaosib xa hâ amab matikōse ǁîn hîna ge ǁnâuna a ǀō-aisaba ǀgaus xab ge Jesuba ge mî ǁîn ǁamaxū-aob hîna ge ǃamde [îsa ǀuide] a ôab ǀkha a ǀguisa. Tsî ǁnā ǃams [îsa ǀuis] ge kai mari-e gere ǂgan tsîb ge ǁnās ǀkha “ūb hân hoana ge ǁamaxū” ǁîs ǃgao. (Mat. 13:45, 46) ǁNās ǀkhab ge amab hîna da ge Elob Gaosib xa a ǁnâun tsî Elobmîsa xu da ge ǁkhāǁkhāsen xūn hoana kaise sada a ǀō-aisaba tsî da ge māsenxase ǁguibade ge dī. Amaba da ga ra ǃgôaǃgâ o, o da ge tātsēs tsîna “ǁamaxū” tide. Xawen ge ǀnîn Eloba ra ǃoabana nē ǀō-aisa xū-e ge ǂoaǃnâ tsî nē ǀgaub ǃnâ ge ǁamaxū. As nēsa tā sida ǀkha ī re! Nē amaba da ra ǃgôaǃgâ ǃkhaisa da ge nî ǁgau tsî da tātsēs tsîna ǁamaxū tidesa tsî ‘amab ǃnâ nî ǃgû’ ǀgarasa. (Khomai re 3 Johaneb 2-4.) Amab ǃnâ ǃgûs ge ǁî-i ǀkha ǀguiǃnâxase ûis tsî tanisens tsîna ǃkhōǂgā hâ. Hā re îda sao ra dîde ǃhoaǃgao: Tae-i ǃaroma tsî matis tsîna da amaba a “ǁamaxū” ǁkhā? Tae-e da a dī ǁkhā î da tā ǁnā ǃnuis xa ǃkhōhe? Mati da a mîǁgui ǁkhā î da “amab ǃnâ ǃgû” ǀgara?

4. ǂGurokham ǁaeb Xristeǁîna tae-i ǃaroma amaba ge “ǁamaxū”?

⁴ ǂGurokham ǁaeb ǃnân ge ǁîn hîna ge Jesub ǁkhāǁkhāde a ǁnâuna ega amab ǃnâ ge ǃgû ǀû. Aiǁgause, kai ǃgubis khoen hîna ge Jesub xa a ǂûmāhen tsî ge ǁîba Galileab hurib nauǀkhāb kōse a saon xa ǂâi re. Tsîb ge Jesuba ge mî: “Khoen Ôab di ǁgansa du ga ǂû tama io, tsî ǁîb ǀaoba du ga ā tama io, o du kom sadu ǃnâ ûi-e ūhâ tamao.” Jesub mîdi tae-e ra ǂâibasens xa dîs ge ǁîna ge ǃnôa kai tsîn ge ge mî: “Ama ǁgonǁgonǂgaosa mî-i ge nē-e.” Tsî nēs di ǀamǂoas ge “ǂguin ǁîb ǁkhāǁkhāsaben dina oa, tsî ǃaruǀî ǁîb ǀkha ǃgû tama ge i.”—Johaneb 6:53-66.

5, 6. (a) ǀNîna tae-i ǃaroma amaba xu ge ūbēsen? (b) Tae-e a ǃaroma ǁkhā î-i khoe-e amaba xū?

⁵ Xawen ge ǂguin tsîna sida ǁaeb ǃnâ di ge hāba-e. ǀNîn ge ǀnî Elobmîs ǁkhāǁkhās ge dawahe ǀgaub tamas ka io ǀhaohâb ǃûi-ao-i ge dī xū-i xa ge ǃnôa kaihe. Tsî ǀnîn ge Elobmîsa xūn ge ǁnamahe ǀgaub xa ge tsûtsûhe tamas ka io ǃgâsa-i ǀkhan ge ǁnâusāgu ǃkhais ǃgao amaba ge xū. Tsî ǀnîn ge ǁnāǁgôahâ khoen ǀkha ra hâ ǀhao tsî ǀnîn hîna ama tama xūna sida ǂgoms xa ra ǃhoana. Tsîn ge ǀnîna ǁaeb ǀkha Jehovab tsî ǀhaohâb ǁanina xu ūbēsen tsî ēga sī ra ‘ǁnāǁgôa.’ (Heb. 3:12-14) Kaise î ge ga ǃgâi hâ ǁîn ga ǁîn ǂgomsa ǀgaisase ūhâ hâ o tsî apostel Petrub khami Jesub ǃnâ ǂgomǃgâsiba omkhâi hâ o. Jesub ge apostel ga a dî o, ī ǂgao gu rasa ob ge Petruba ǃeream tsî ge mî: “ǃKhūtse, tari-i ǃoa ge kha nî ǃgû? Sats kom mîdi ǀamo ûib dide ūhâo.”—Johaneb 6:67-69.

⁶ ǀNîn ge amaba xu ge ūbēsen tae-i go īsa ǁnâuǃā tama hâse. Khoe-i hîna amaba xū ra ūbēsen î ge ǂgaub hîna ǂause ǃāba xu ǂoab xa ra ǂhābēheb khami ī. Elobmîs ge nē ǀgauba ‘ǂhābēsens [ǁnāǁgôas]’ ǀkha ra ǀgopeǀnō. (Heb. 2:1) Nēs ge ǁî-i hîna ǂanapegase amaba xu ra ūbēsen-i ǀkha a ǀgui. Tsî nē  khoe-i ge ǁî-i ǀhōsagusis hîna ī Jehovab ǀkha ūhâsa ǁkhōǁkhōsa mâsib ǃnâ ra mâi tsî a ǂoaǃnâ ǁkhā. Nē ǀgauba xu da mati a ǂgōsen ǁkhā?

7. Tae-e nî hui da î da amaba tā ǁamaxū?

⁷ Amab ǃnâ da ga ra hâhâ ǂgao o, o da ge Jehovab ra mîn hoana nî ūǃoa tsî nî ǁnâuǀnam. Amaba da ge ǂgurose sada ûib ǃnâ nî mâi tsî Elobmîs tsoatsoadi ǃoagu nî ûi. ǀGores ǃnâb ge Gao-aob Daviba Jehovaba ge mîba: “Tita ge sa amab ǃnâ nîra ǃgû.” (Psa. 86:11) Davib ge ge mîǁgui. Sada tsîn ge nî mîǁgui Eloba ǃoaba ǀgarasa. Mîǁgui tama da ga ra io, o da ge sada tsîna a ǂâiǃgâ tsoatsoa ǁkhā tae-e da ge a dīsa î da amaba ǁama tsîs ge ǁnāsa a ǃaroma ǁkhā î da ǃâitsâhe tsî Eloba ǃoaba ǀû. ǁNās ǀkha da ge amaba nî ǃkhōǀgara. Mûǂan da ge nî amagu ǁaegu da a ǁhûi ǁoasa, amab ge amas ǀguisa ī. Nēn hoan ǂam-ai da ge “hoaraga amab” ǃnâ nî ǃgû. (Johaneb 16:13) Hā re î da koro xūna ǃhoaǃgao hîna da ge amaba a ǁama-ūna. Nēsa ôaǃnâs ǃnâ-ū da ge ǂâibasen-e mû tide sida ge amaba a ǁama-ū xūna ū-oasa.—Mat. 6:19.

8. ǀNî ǃgâsas aiǁgausa mā re.

⁸ ǁAeb. Amaba xu da ga ǂgaeǂhapuhe ǂgao tama ga ra io, o da ge sida ǁaeba ǃgâise nî sîsen-ū. ǂKhaikari tama da ga ra io, o da ge sida ǁaeba ǂanapegase ǁkhoaxa ǁaeba ūhâs, ǁnaetib ase da ra dī xūn, internetsa sîsen-ūs tsî ai-īsiǂhôaǂgares tsîna kōs ai a ǂkhôa ǁkhā. Nē xūn hîna da ǁnaetib ase ra dīn ge tsū tama hâ xawe da ga ǃnāsa ǁaeba ǁîn ai ga ra ǂkhôa o, o da ge Elobmîs khomais tsî ǀnî hâ gagasi ǁaxasigu tsîna a ǂhāpē ǁkhā. Hā re îda ǀnî Xristeǁî ǃgâsas hîna Emma di ǀon hâs xa ǃhoa. * ǁÎs ge ǂkhamsisa xu hā ǃgabis ǃnâ ǃgâiǃgâibasensa ūhâ. ǁÎs ge hōs gere ǃēs hoasa gere sîsen-ū hā ǃgabis ǃnâ. Xawes ge ǁaerob khaoǃgâ ge mûǂan ǁîs kaise nē hā ǃgabis ai kai ǁaeba ra ǂkhôasa. Tsîs ge ǁîsa ǀkharaǀkharana ge dī tsî hā ǃgabisa ǀnōsa ǁaeb ai gere dī. ǁÎs ge Cory Wells di ǀon hâ ǃgâsas hîna ge ǁîs tsîna ǂkhamsis ǃnâ ǀgapi hā ǃgabi-ao-is di aiǁgaus xa ge ǂkhâǃnâhe. * Emmas ge nēsi kaise ra ǂkhî ǃnāsa ǁaebas gagasi xūn ǀkha ra ǁaeǁaesen o tsîs ǁîs ǃgâsan tsî ǀhōsan tsîn ǀkha ra hâ ǀhao o. ǁÎs ge Jehovab ǀgūse ra tsâ, ǁîs ǁaebas gagasi xūn ai ra sîsen-ū amaga.

9. ǃKhū ǂgaosa mati ǀnîna ge ǂgaeǂhapu în gagasi xūna ǁnāǃgâ?

⁹ ǃKhūsis. Amab ǃnâ da ga ra ǃgû ǀgara ǂgao o, o da ge ǃkhūsisa ǀnōsa ǀgaub ǃnâ nî ūhâ. Amab xa da ge ǁkhāǁkhāsen o, o da ge ǃkhūsisa ǀgamǁîse ge mâi tsoatsoa tsî gagasi xūna ǂgurose. Kaise da ge ra ǂkhî ǃkhū ǂgaos di turaba xū tsî da amab ǃnâ ra ǃgû ǀgarasa. Xawe da ge ǀnîsi ǁaeba xu ǁaeb ǀkha ra mû nau khoen ra ǁama îsa elektronise xūn tsî matin ǁîn ǃkhūsisa xū ra ǀama ǀgaub tsîna. Tsîs ge nēsa a dī ǁkhā î da ǂâi ǁkhoaxa xū-e da ra ǂoaǃnâsa. Tsî î ge a ī ǁkhā î da gagasi xūna ǁnāǃgâ tsî ǃkhūsisa ǀhaoǀhaobasen tsoatsoa. Nē ǀgaub ge Demab di aiǁgaus xa ra ǂâi kai da. ǁÎb ge ‘nē ǃhūbaiba’ kaise ge ǀnam tsîb ge  nēs ǀkha apostel Paulub ǀkhab gere dī aoǁnâ sîsen-e ge ǁnāxū ǃnâ. (2Tim. 4:10) Tae-i ǃaromab ge Demaba Pauluba ǁnāxū ǃnâ? Elobmîs ge mî tama hâ ǁîb ge ǃkhūsisa gagasi xūn xa ǃnāsase ǀnam isa tamas ka iob ge Paulub ǀkha māsenxase a ǃoaba ǀûsa. ǁNās ǀkha da ge ǃkhū ǂgaos di turaba ûiûi kai ǂgao tama hâ tsî mā-am tide îb ǁnā ǃkhūsis di turaba amaba da ūba hâ ǀnamma ǃkhai kai.

10. Amab ǃnâ da ga ra ǃgû ǀgara ǂgao o, o da tae-i ǁgâiba nî mâǃoa?

¹⁰ ǀHōsagudi. Amab ǃnâ da ga ra ǃgû ǀgara ǂgao o, o da ge tā nau khoen di ǁgâib ǃnâ nî māǁnâsen. Amab ǃnâ da ga ra ǃgû tsoatsoa o, o î ge sida ǀhōsagude Jehovaba ǃoaba tama hâ khoen tsî omaris ǁanin tsîn ǀkha ǁnātikōse ǀgaisa tama hâ. ǀNîn ge nēsa ra ūǃoa xawen ge ǀnîna ra mâǃoa tsoatsoa. (1Pet. 4:4) Nēsi da ga ǃgâi ǀhōsagude omaris ǁanin ǀkha ga ra ūhâ tsî ǁîna khoexaǃnâ ǀgaub ǃnâ ga ra hâ-ū xawe da ge tā amaba nî ǁnāǃgâ ǁîna ǂkhîǂkhîs ǃaroma. Sida omaris ǁanin ǀkha da ge ǃgâi ǀhōsagusisa ǁkhā da as kōse nî ūhâ. 1 Korinteǁîn 15:33 ǃnâ hâ Elobmîs tsoatsoas ra ǁgau khami da ge ǁîn hîna Jehovaba a ǀnaman ǀkha ǀgui ǀgū ǀhōsagusisa nî ūhâ.

11. Mati da Elobmîs ai ǃgaoǃgaosa tama hâ dīxūna xu nî ǂgōsen?

¹¹ Eloxoresa ǂâi ǀgaub tsî tanisen ǀgaub. ǁÎn hîna amab ǃnâ ra ǃgûn ge nî ǃanu. (Jes. 35:8; khomai re 1 Petrub 1:14-16.) Amaba da ge ūǃoa o, o da ge hoada ǀkharaǀkharana ge dī îda Elobmîs ǁkharagu ǀkha ǀguiǃnâxase ûi. ǀNîn ge amase kai ǀkharaǀkharana ge dī. Mati ǀgui î ga ra ī xawe da ge tā sada ǃanu ǀgauba nē ǃhūbaib di ǀurixa ǀgaub ǀkha nî mādawa-am. Tae-e da a dī ǁkhā î da tā nē ǀurixa ǃhūbaib di ǀgaugu ǃnâ māǁnâsen? Jehovab ge a māda kai ǀkhaeb xa da ge nî ǂâiǃgâ, ǁnāb ge ǁîb di ǀgôab Jesub Xristub di ǀaoba. (1Pet. 1:18, 19) ǃAnuse da ga Jehovab aiǃgâ ga ra mûhe ǂgao o, o da ge Xoremarib a ǂoaǂamsa ǀgaub xa nî ǂâiǃgâ.

12, 13. (a) Jehovaba mati ǁnaetib ase ra tsēdīhe ǁaxasiba ra mû? (b) Tae-e da sao rase nî ǃhoaǃgao?

¹² Elobmîs ai ǃgaoǃgaosa tama hâ dī xūn tsî ǁnaetigu. Omaris ǁanin, sîsenǀhao-aon tsî skol ǀhōsan tsîn ge a ǂgaeǂhapu da ǁkhā î da ǁîn ǀkha tsēdī tsoatsoa. Mati da Jehovab mā-am tama hâ tsēde tsēdīsa xu nî ǂgōsen? Nēsa da ge Jehovab nē tsēdi xa ra ǂâi ǀgauba da ga ǂâis ǃnâ ga ra ūhâ o, o ǀgui nî dīhō. ǁGâisa ǂkhanin ǃnâ xoasa ǁkhāǁkhāǃâde kōǃgâs ge nî ǁgau nē tsēdi ge mâba xu a ǃhuisa. Nēn xa da ga gagasi ǂâi ǀgauba ga ra ūhâ o, o da ge nî mûǂan “mâ xū-i a ǃKhūba ǃgâibasa.” (Efe. 5:10) Jehovab tsî ǁîb Mîs tsîn ai ǂgomaiǂnûis ge nî hui da î da tā ‘khoena ǃao.’—ǂKhm. 29:25.

¹³ Amab ǃnâ ǃgûs ge ǀû tama hâ nēb ge ǀamosib kōse da ra ǃgû ǃnâ ǂgao daoba. Xawe mati da a mîǁgui ǁkhā î da amab ǃnâ ǃgû ǀgara? Hā re î da ǃnona ǀgauga ǃhoaǃgao.

14. (a) Amaba ǁama ǀgarasa mati nî hui da? (b) Tae-i ǃaromab gā-aisib, ǂgōǀgaus [ǁnamas] tsî ǁnâuǃāb tsîna a ǂhâǂhâsa?

¹⁴ ǂGurose aiǃgû re Elobmîsa ǂōrisase ôaǃnâ tsî ǂâiǃgâs tsîna. Îo, amase da ge amaba nî ǁama hoaǁae ǁaeba ǁamaǂui tsî Elobmîs amaba ôaǃnâs ǃnâ.  Nēs ge nî hui du î du ǃgôaǃgâsiba amaba ǁgau tsî mîǁgui ǁîba du ǁamaxū tidesa. Amaba ǁamas tawa î ga ra hā o, os ge ǂKhoamîdi 23:23 sa ra mî î da “gā-aisib tsî ǂgōǀaus tsî ǁnâuǃāb “ tsîna ǁama. ǂAns ge ǀguri ǂhâbasa tama hâ. Amaba da ūhâsa da ge sida ûib ǃnâ nî ǁgau. ǁNâuǃāb ge nî hui da î da Jehovab ǂâiǀgauba mûǂan. Tsîb ge gā-aisiba ra hui da î da ǂans ǃoagu ûi. Amab ge ra daoǁgauda î da mû mâ ǃâb sîda ûib dib ǃnâ da ǀkharaǀkharana nî dīsa. Ada nē daoǁgaus ǃoagu ǃgû re. Nēb ge kaise ǀō-aisa ǀgauba ǃhuniǀurib ǃgâ-ai.—ǂKhm. 8:10.

15. Amab di beltsa mati ra ǁkhauba da?

¹⁵ ǀGamǁîse, mîǁgui re ǁaeb hoaba ǀguiǃnâxase amab ǀkha ûisa. Kamanab âdo amab ǀkha ǃgaeǂnami re. (Efe. 6:14) Elobmîs ǁaeb ǃnâb ge soldaba beltsa gere ǃgae îb ǁîb kamanab tsî ǃnāb xūn tsîna ǁkhauba ǁkhā. ǁÎb ga belts xa ga ra ǁkhaubahe ǂgao o, ob ge ǁîba ǁîsa ǃgarise nî ǃgae. ǃGariseb ga beltsa ǃgae tama ga ra io, os ge nēsa ǁîba a hui ǁoa. Sida gagasi beltsa mati ra ǁkhauba da? ǁÎsa da ga ǃgarise ga ra ǃgae o, os ge ǁîsa ǂhumi ǃhoa ǀgauba xu nî ǁkhauba da tsî nî hui da î da ǃgâi mîǁguiga dī. ǃÂitsâhe tamas ka io da ga ǃgomsiga ga ra hōǃâ o, ob ge Elobmîs amaba sida nî ǀgaiǀgai tsî nî hui î da ǃgâina dīsa mîǁgui. Soldab ǁîb belts ose torob ǃnâ ǁhao tide khami da ge sada tsîna nî mîǁgui î da tā sida amab beltsa ūǁnâ. ǁNās ǀkha da ge ǁkhā da an hoana nî dītsâ î da sida amab di beltsa ǃgarise ǃgae ǁkhā. Tsî ǀnî hâ ǀgaub soldab belts ge kaise ǂhâǂhâsa îs ge, îb gôaba ǃgâi ǃkhais ai mâ. Nēs ge sao ra ǀgaub hîna da amab ǃnâ ǃgûsa a mîǁgui ǁkhāba a ǀgaiǀgai ǁkhā.

16. Nauna amab xa mîbasa mati sada mîǁguib amab ǃnâ ǃgû ǀgaras diba nî ǀgaiǀgai?

¹⁶ ǃNonaǁîse, ǁkhā da as kōse da ge Elobmîs amaba nau khoena nî ǁkhāǁkhā. Nē ǀgaub ǃnâ da ge sida gagasi beltsa ǃgarise nî ǃkhō, nēs ge ‘Elob di mîsa.’ (Efe. 6:17) Hoa da ge a dītsâ ǁkhā sida ǁkhāǁkhā ǀgauba ǁgauǃnâ-ao-i ase ǃgâiǃgâisa î da ‘amab di mîsa ǂhanuse ǀgoraǃā [sîsen-ū]’ ǁkhā. (2Tim. 2:15) Elobmîsa da ge ra sîsen-ū nau khoena huis ǃnâ în amaba ǁama tsî ǂhanu tama ǁkhāǁkhā ǀgauga ǂhābē tsî da ge sada tsîna Elobmîsa sida ǂâis tsî ǂgaob tsîn ǃnâ nî ǃomaǃkhō kai. Nē ǀgaub ǃnâ da ge amab ǃnâ ǃgû ǀgaras di mîǁguiba nî ǀgaiǀgai.

17. Tae-i ǃaromab amaba sado kaise a ǀō-aisaba?

¹⁷ Amab ge kaise a ǀō-aisa ǀkhaeba Jehovaba xū. Nē ǀkhaeb ge ge ǃaroma î da ǃgâi ǀgaisa ǀhōsagusisa sida ǀhomsi ǁGûb Jehovab ǀkha ūhâ. ǁÎb nēsi ra ǁkhāǁkhā dan ge tsoatsoas ǀguisa ī. Elob ge amaba da ge ǁama xawes tsîna ǀamosib kōse ûis di ǀkhaeba ge māda. ǁNās ǀkha amaba ǂoaǂamsa ǀuis ase ǃgôaǃgâ re. Mîǁgui re tita ge ‘amaba ǁama tsî ǁîba ǁamaxū’ tide. Tsî da ge ǁnās ǀkha Davib khami sida mîmâis hîna da ge Jehovab aiǃâ a dīsa nî sîsenǂûi mî rase: “Tita ge sa amab ǃnâ nîra ǃgû.”—Psa. 86:11.