1-3. (a) Oshili yOmbiimbeli otu na okukala tu yi uvitile ngiini? Shi thaneka. (Tala omathano gopetameko.) (b) Omapulo geni tatu ka kundathana moshitopolwa shika?

KUNENA, osha ha okushuna ko oshinima kositola. Otaku tengenekwa kutya miilongo yimwe, aalandi ohaya shuna ko koositola konyala oopelesenda 9 dhiinima mbyoka ya landa. Oopelesenda dhi vulithe po 30 lwaampono dhiinima mbyoka hayi landwa okupitila mointaneta, ohayi shunwa ko. Otashi vulika aalandi ya mono kutya shoka ya landa hasho ya li ya tegelela, nenge shi na epuko lyasha nenge kaaye shi hole. Onkee ano, ohaya pula ya pewe shimwe nenge ya galulilwe oshimaliwa shawo.

² Nonando otashi vulika tu pule tu galulilwe oshimaliwa shiinima mbyoka twa landa, itatu ka kala twa hala tu ethe po nenge tu ‘landithe po’ “oshili” yOmbiimbeli ndjoka twi “ilandela.” (Lesha Omayeletumbulo 23:23; 1 Tim. 2:4) Ngaashi twe shi kundathana moshitopolwa sha zi ko, oshili ohatu yi mono, ngele otwa longitha ethimbo olindji tu yi konakone. Shimwe ishewe, opo tu ilandele oshili, otashi vulika she tu pula tu ethe po eithano ndyoka lya li tali vulu oku tu petha oshimaliwa oshindji, sha guma ekwatathano lyetu nayalwe  nosho wo okudhiladhila kwetu neihumbato lyetu. Otashi vulika she tu pula tu ethe po iilonga iiwinayi nomikalondjigilile inaadhi yogoka. Ihe shoka twa thigi po, oshi vulike kokule komayambeko ngoka twa mona.

³ Ngele tashi ya poshili yOmbiimbeli, otu uvite ngaashi omulumentu ngoka a popiwa meyele lyaJesus. Opo a ulike kutya oshili yUukwaniilwa waKalunga oyi na ongushu yi thike peni kwaamboka taye yi mono, Jesus okwa popi kombinga yomuhalithi ngoka a li ta kongo uuwe wo opala e ta mono po kamwe. Molwaashono okawe hoka oka li ke na ondilo, okwa “landitha po” nziya ayihe mbyoka a li e na e te ki ilandele. (Mat. 13:45, 46) Sha faathana, oshili ndjoka twi ilonga kombinga yUukwaniilwa waKalunga nosho wo dhilwe, odhi na lela ongushu kutse, oshoka otwe etha po nziya iinima yontumba, opo tu yi imonene. Ngele otwa kala twa lenga oshili, katu na esiku tu ke yi ‘landithe po.’ Shiyemateka, yamwe yomoshigwana shaKalunga oya ndopa okukala ye na olupandu lwoshili ndjoka ya mona noye yi landitha po. Inatu etha nando shoka shi tu ningilwe! Opo tu ulike kutya otwa lenga noonkondo oshili nonokutya itatu ke yi landitha po, otwa pumbwa okuvulika kelombwelo ndika tali ti: “Kala moshili.” (Lesha 3 Johannes 2-4.) Okukala moshili okwa kwatela mo oku yi pititha komeho monkalamwenyo yetu nokukala metsokumwe nayo. Natu ka kundathaneni omapulo ngaka: Ongiini yamwe tashi vulika ya ‘landithe po’ oshili, nomolwashike? Ongiini tatu vulu okuyanda epuko ndyoka? Oshike tashi vulu oku tu kwathela tu kale twa tokola toko tu ‘kale moshili’?

4. Omolwashike yamwe ya “landitha po” oshili methelemimvo lyotango?

⁴ Methelemimvo lyotango, yamwe mboka ya li ya taamba ko omalongo gaJesus petameko, oye ke etha po oshili. Pashiholelwa, konima sho ongundu onene yaantu ya li ya kutithwa pashikumithalonga kuJesus, oye mu landula sigo handiyaka yEfuta lyaGalilea. Kehala hoka, Jesus okwe ya lombwele oshinima shoka she ya kumitha a ti: “Ngele itamu li onyama yOmuna [gwomuntu] ne itamu nu ombinzi ye, itamu kala mu na omwenyo meni lyeni.” Aantu mboka pehala ya pule Jesus e ya yelithile, oya pundukithwa kwaashoka a popi, e taya ti: “Elongo ndika ekukutu unene, olye ta vulu oku li pulakena?” Oshizemo, “oyendji yomaalongwa ye oya shuna monima yo inaa enda we pamwe naye.” — Joh. 6:53-66.

5, 6. (a) Omolwashike yamwe ye etha po oshili kunena? (b) Ongiini omuntu ta vulu okufalwafalwa sigo a zi mo moshili?

⁵ Shiyemateka, kunena yamwe oye etha po oshili. Yamwe oya pundukithwa kuuyelele uupe kombinga yomanyolo gontumba gomOmbiimbeli nenge kwaashoka sha popiwa nenge sha ningwa komumwatate e shiwike nawa. Yalwe oye etha po oshili, molwaashoka inaaya panda sho ya pewa omayele gopaMbiimbeli nenge molwokwaauvathana nAakriste ooyakwawo. Omanga yalwe ya landula aashunimonima nosho wo mboka haya pataneke eitaalo lyetu. Oshizemo? Yamwe oyi “iteka” Jehova negongalo. (Heb. 3:12-14) Kasha li tuu shi li nawa, ando oya kalele neitaalo nokukala yi inekela muJesus, ngaashi omuyapostoli Petrus! Sho Jesus a pula aayapostoli ngele nayo otaye mu thigi po, Petrus okwe mu yamukula nziya a ti: “Omuwa, otatu yi kulye? Ngoye ou na oohapu ndhoka tadhi gandja omwenyo gwaaluhe.” — Joh. 6:67-69.

⁶ Yalwe oya thiga po oshili, ye endele ko owala kashona nakashona, inaaye ye shi nongela. Omuntu ngoka he endele ko kashona nakashona, okwa fa ombautu ndjoka tayi zi komunkulo gwomulonga kashona nakashona yu uka momeya. Oshinima shoka Ombiimbeli otayi  shi ithana ‘okufalwafalwa.’ (Heb. 2:1) Omuntu ngoka ha falwafalwa sigo a zi mo moshili inee shi nongela, ina fa ngoka he shi ningile owina. Ihe omuntu ngoka ohe etha ekwatathano lye naJehova li nkundipale sigo lya kana po. Ongiini tatu vulu okuyanda oshinima shoka oshiwinayi?

7. Oshike tashi ke tu kwathela tu yande okulanditha po oshili?

⁷ Opo tu ende moshili, otu na okukala hatu taamba ko nokuvulika kwaashihe shoka Jehova ta ti. Otu na okukala twe yi pititha komeho nokukala metsokumwe nomakotampango gOmbiimbeli. Omukwaniilwa David okwa galikana kuJehova a ti: “[Otandi] ka vulika nokukala moshili.” (Eps. 86:11) David okwa li a tokola toko okukala moshili. Natse otu na okukala twa tokola okweenda moshili. Ngele hasho, otashi vulika tu tameke okudhiladhila kwaashoka twe etha po sho twi ilandele oshili, tashi vulika nokuli sigo twa tameke oku shi ninga. Onkee ano, otu na okukala twa dhiginina oshili ayihe yOmbiimbeli. Itatu vulu okukala hatu vulika owala kooshili dhimwe dho dhilwe tatu dhi ipwililikile. Otu na okuvulika ‘koshili ayihe.’ (Joh. 16:13) Natu ka taleni kiinima itano mbyoka tashi vulika twa futa, opo tu ilandele oshili. Iinima mbyoka ngele otwe yi konakona, otayi ke tu kwathela tu kale twa tokola toko kaatu shune kwaashoka twa thiga po, opo tu ilikolele oshili. — Mat. 6:19.

8. Ngele Omukriste iha longitha nawa ethimbo lye, otashi vulu ngiini oku mu ningitha a falwafalwe? Gandja oshiholelwa.

⁸ Ethimbo. Opo tu yande okufalwafalwa sigo twa zi mo moshili, otu na okukala hatu longitha nawa ethimbo lyetu. Ngele inatu kotoka, otashi vulika tu tameke okulongitha ethimbo olindji miinima ngaashi: momainyanyudho, miinima mbyoka tu hole, mokutalatala kointaneta nenge mokutala otiivii. Nonando iinima mbika inayi puka muyo yene, otashi vulika yi mane po ethimbo lyetu ndyoka twa li hatu longitha mokuninga ekonakonombiimbeli lyopaumwene nomiilonga yilwe yaJehova. Natu taleni shoka sha li sha ningilwa omumwameme Emma. * Okuza kuugundjuka, Emma okwa kala e hole oonkambe. Uuna a mono ompito, okwa li he dhi kayile. Lwanima, okwa tameke okukala kuu uvitile we ombili ethimbo lye ndyoka ha longitha mokukayila oonkambe. Okwa ningi omalunduluko, nahugunina okwa kala e na ondjele mokulongitha ethimbo lye. Okwa tsuwa wo omukumo koshimoniwa shomumwameme Cory Wells, ngoka a li ha kutha ombinga muudhano wokukayila oonkambe. * Ngashingeyi Emma oha longitha ethimbo olindji mokulongela Jehova nokukala noyaandjawo mboka ye li moshili nonookuume ke Aakriste. Oku uvite e li popepi naJehova noku na ombili, sho e shi kutya ethimbo lye ohe li longitha nawa.

9. Okulalakanena iinima yopamaliko otaku vulu ngiini oku tu ningitha kaatu kale twa pititha Jehova komeho?

⁹ Iinima yopamaliko. Ngele otwa hala tu kale moshili, otu na okukala tu na ondjele ngele tashi ya piinima yopamaliko. Sho twa tseya oshili, otwa kambadhala okupititha Jehova komeho. Otwa li twa nyanyukilwa okweetha po okwiikongela omaliko, opo tu kale moshili. Ihe mokweendela ko kwethimbo, otashi vulika tu mone yalwe taya landa iikwaelektronika mbyoka opo ya kondo nenge taya nyanyukilwa iinima yilwe yopamaliko. Otashi vulika tu tameke okukala tu uvite tu li konima yesiga. Onkee ano, okukala tu uvite ngawo otaku vulu oku tu ningitha kaatu kale twa gwanenwa naashoka tu na, e tatu etha po okupititha komeho okulongela  Jehova tu ilikolele omaliko. Shoka otashi tu dhimbulukitha omulumentu gwedhina Demas. Ohole ye yokuhola “uuyuni,” oye mu ningitha a thige po oshilonga shoka a li ha longo nomuyapostoli Paulus. (2 Tim. 4:10) Omolwashike Demas a thigi po Paulus? Ombiimbeli inayi shi popya, ihe otashi vulika a li e hole iinima yopamaliko shi vulithe okulongela Jehova nenge a li inaa hala we okuninga omaiyambo, opo a longe pamwe naPaulus. Inatu hala tu tameke okukala tu hole iinima yopamaliko noku yi etha yi tu ningithe tu kale kaatu hole we oshili.

10. Opo tu tsikile okukala moshili, otu na okuyanda shike?

¹⁰ Ekwatathano lyetu nayalwe. Opo tu kale moshili, inatu ninga shoka tatu thiminikilwa kuyalwe. Sho twa tameke okwiilonga oshili, ekwatathano lyetu naamboka kaaye shi Oonzapo kutya nduno ookuume nenge aakwanezimo, olya lunduluka. Otashi vulika yamwe ye shi taamba ko, ihe yalwe oye tu pataneke. (1 Pet. 4:4) Nonando otashi vulika tu kambadhale okukala nekwatathano ewanawa naakwanezimo yetu nokuungaunga nayo nombili, otu na okukotoka kaatu ninge iinima yi li ompinge naJehova, opo ando tu ya nyanyudhe. Otu na okutsikila okukambadhala tu kale nombili naakwanezimo yetu. Ihe ngaashi tatu londodhwa mAakorinto yotango 15:33, ookuume ketu kopothingo oye na owala okukala mboka ye hole Jehova.

11. Ongiini tatu vulu okuyanda omadhiladhilo inaaga yogoka neihumbato ewinayi?

¹¹ Omadhiladhilo inaaga yogoka neihumbato ewinayi. Ayehe mboka ye li moshili oye na okukala aayapuki. (Jes. 35:8; lesha 1 Petrus 1:14-16.) Sho twe ya moshili, atuheni otwa li tu na okuninga omalunduluko, opo tu kale metsokumwe nomithikampango dhOmbiimbeli ndhoka dhi li pauyuuki. Yamwe oya li ye na okuninga omalunduluko omanene. Onkee ano, natu kale twa kotoka kaatu ethe po eihumbato lyetu lya yogoka neyapuki, opo kaatu ihumbate ngaashi aantu muuyuni. Ongiini tatu vulu okuyanda eihumbato ewinayi? Omokudhiladhila kwaashoka Jehova a futa, ano ombinzi yi na ondilo yOmwana, Jesus Kristus, opo tu vule okukala aayapuki. (1 Pet. 1:18, 19) Opo tu kale twa yogoka koshipala shaJehova, otwa pumbwa okukala aluhe hatu dhiladhila kongushu yekuliloyambo lyaJesus.

12, 13. (a) Omolwashike sha simanenena okukala netaloko lya fa lyaJehova kombinga yomasiku gomafudho? (b) Oshike tatu ka kundathana?

¹² Iilonga iiwinayi nomikalondjigilile inaadhi yogoka. Aakwanezimo, aaniilonga pamwe natse naanasikola ooyakwetu, otashi vulika ya kambadhale oku tu ningitha tu kuthe ombinga miituthi yawo. Ongiini tatu vulu okutinda okukutha ombinga momikalondjigilile nomomasiku gomafudho ngoka itaaga simanekitha Jehova? Omokukala aluhe tu na etaloko lya fa lyaJehova kombinga yiinima mbyoka. Okulesha aluhe uuyelele miileshomwa yetu kombinga yomasiku gomafudho ngoka haga dhanwa apuhe kutya oga tamekela peni, otaku vulu oku tu kwathela. Uuna tatu dhiladhila komanyolo ngoka tage tu yelithile kutya omolwashike kaatu na okukutha ombinga mugo, ohatu kala tu uvite kutya otu na okuninga “shoka sho opalela Omuwa.” (Ef. 5:10) Okwiinekela muJehova nomOohapu dhe, otaku ke tu kwathela kaatu ‘tile aantu.’ — Omayel. 29:25.

¹³ Okweenda moshili oshinima tashi tsikile, notwa hala tu tsikile oku shi ninga sigo aluhe. Oshike tashi vulu oku tu kwathela tu kale twa tokola toko okweenda moshili? Natu ka kundathaneni iinima itatu.

14. (a) Okutsikila okwiilonga oshili yOmbiimbeli otaku ke tu kwathela ngiini kaatu yi landithe po? (b) Omolwashike owino, eputuko noondunge ya simana?

¹⁴ Shotango, tsikila okukonakona oshili yOohapu dhaKalunga ndjoka yi na ondilo nokutedhatedha  kuyo. Ilandela oshili, mokukala aluhe ho itulile po ethimbo lyokulesha Ombiimbeli. Kungawo, oto ka kala wu na lela olupandu lwoshili noto ka kala wa tokola kuu yi landithe po. Kakele kokwiilandela oshili, Omayeletumbulo 23:23 otayi ti kutya otu na wo okwiilandela “owino, eputuko noondunge.” Okukala owala nontseyo, inashi gwana. Onkene natu kale hatu tula miilonga oshili yOmbiimbeli. Oondunge ohadhi tu kwathele tu mone ashihe shoka Jehova a hala tu ninge, omanga owino hayi tu inyengitha tu ninge shoka tu shi. Omathimbo gamwe, oshili ohayi tu putudha moku tu ulukila mpoka twa pumbwa okuninga omalunduluko. Onkee ano, natu kale aluhe hatu vulika kewiliko ndyoka, oshoka oli na ongushu lela yi vule yoshisiliveli. — Omayel. 8:10.

15. Ngaashi epaya, oshili ohayi tu gamene ngiini?

¹⁵ Oshitiyali, esiku kehe kala wa tokola toko okukala metsokumwe noshili. Zala oshili, yi ninge epaya mombunda yoye. (Ef. 6:14) Pethimbo lyOmbiimbeli, epaya lyomukwiita olya li hali kwathele nokugamena ombunda ye niilyo ye yomeni. Ihe opo epaya lye li mu gamene, olya li li na okukala lya pama. Ngele olya yula, kalya li hali mu gamene lela. Ngaashi epaya, oshili ohayi tu gamene ngiini? Ngele oshili otwa kala twe yi zala ya pama ngaashi epaya, otayi ke tu gamena kaatu dhiladhile iinima ya puka notayi ke tu kwathela tu ninge omatokolo gopandunge. Uuna tatu makelwa nenge tu li muupyakadhi, oshili yOmbiimbeli otayi ke tu kwathela tu kale twa tokola toko okuninga shoka shi li mondjila. Ngaashi owala omukwiita ihaa dhiladhila a ye molugodhi inaa zala epaya, natse otu na okukala twa tokola kaatu ethe epaya lyetu lyoshili li yululuke nenge tu li kuthe mo. Pehala lyaashono, otu na okukambadhala tu kale twe li zala lya pama, mokukala metsokumwe noshili. Mepaya lyomukwiita omo wo mwa li hamu kala egongamwele. Shoka otashi tu fala koshinima shimwe shoka tu na okuninga, opo tu kale twa tokola toko okukala moshili.     

16. Okulonga yalwe oshili ohaku tu kwathele ngiini tu kale twa tokola okweenda moshili?

¹⁶ Oshititatu, kala ho kutha ombinga ngaashi to vulu miilonga yokulonga yalwe Ombiimbeli. Kungawo, oto ka kala wa dhiginina egongamwele, ano ‘oohapu dhaKalunga.’ (Ef. 6:17) Atuheni otatu vulu okukambadhala tu hwepopaleke uunkulungu wetu wokulonga aantu “oshili ya yela yomoohapu dhaKalunga.” (2 Tim. 2:15) Uuna tatu longitha Ombiimbeli tu kwathele yalwe yi ilonge oshili nokweetha iifundja, ohashi tu kwathele opo oshili yi ningine momadhiladhilo nomomitima dhetu. Momukalo ngoka, otashi ke tu kwathela tu kale twa tokola okweenda moshili.

17. Omolwashike oshili yi na ondilo kungoye?

¹⁷ Oshili omagano ge na ondilo ga za kuJehova. Omagano ngoka oge tu kwathela tu kale tu na oshinima sha simanenena, ano ekwatathano lyopothingo naTate yetu gwomegulu. Shoka e tu longa sigo ongashingeyi, etameko owala. Kalunga okwe tu uvanekela kutya ote tu longo oshili sigo aluhe. Onkee ano, kala wa lenga oshili ngaashi okawe kondilo. Tsikila ‘okwiilandela oshili, ihe ino yi landitha po.’ Kungawo, oto ka ninga ngaashi David, ngoka a uvanekele Jehova a ti: “[Otandi] ka vulika nokukala moshili.” — Eps. 86:11.