1-3. (a) Hao nao iumi shud ting long truth wea iumi lanem long Bible? Explainim. (Lukim olketa piksa long start bilong study.) (b) Olketa wanem kwestin nao bae iumi storyim long disfala study?

DISTAEM staka pipol savve baem samting long stoa, bat then bihaen, olketa givim bak. And namba bilong pipol wea baem samting long Internet and givim bak hem winim datwan. Maet olketa duim olsem bikos olketa no barava laekem datfala samting or maet hem no waka gud. So olketa disaed for changem witim eni nara samting or askem bak selen bilong olketa.

² Iumi bae no duim datwan witim truth wea iumi lanem insaed Bible. Sapos iumi “baem” truth, iumi no laek for “salem” wea minim sapos iumi lanem truth iumi no laek lusim. Olsem Proverbs 23:23, NW hem sei: “Baem truth and no salem, and tu wisdom, discipline, and wei for minim samting.” (1 Tim. 2:4) Long study bifor diswan, iumi storyim samfala samting wea iumi lusim mekem iumi baem truth. Olsem wei wea iumi spendem taem for lanem truth, let go long waka wea mekem iumi kasem staka selen, and maet wei wea iumi fren witim olketa narawan hem change. And tu, iumi changem tingting and wei bilong iumi, and stap klia long olketa kastom and samting wea Jehovah heitim. Bat iumi sure truth wea  iumi lanem hem barava important winim eni samting wea iumi lusim finis.

³ Jesus storyim tokpiksa abaotem wanfala bisnisman wea lukaotem olketa naesfala pearl. Taem hem faendem wanfala pearl wea hem naes tumas winim olketa narawan, semtaem nomoa hem salem evri samting wea hem garem for baem datwan. Datfala pearl piksarem truth abaotem Kingdom bilong God. Samting wea Jesus storyim showimaot truth hem barava important tumas long olketa wea lukaotem datwan. (Matt. 13:45, 46) Taem iumi start for lane abaotem truth, wea hem nao truth abaotem Kingdom bilong God, and evri nambawan truth wea stap insaed Bible, iumi tu willing for let go long eni samting mekem iumi savve kasem datwan. Sapos iumi gohed for tinghae long truth, iumi bae no lusim. Bat sorre tumas, samfala pipol bilong God no gohed tinghae long truth and gogo olketa lusim. Iumi no laek for duim datwan! Iumi need for followim advaes insaed long Bible for “gohed followim olketa tru teaching.” (Readim 3 John 2-4.) Datwan minim truth mas first samting long laef and iumi showimaot datwan long wanem iumi duim. Bat why nao samfala maet “salem” or lusim truth, and hao nao maet olketa duim datwan? And wanem nao savve helpem iumi for disaed strong for “gohed followim olketa tru teaching”?

4. Long taem bilong Jesus, why nao samfala no gohed followim truth?

⁴ Long taem bilong Jesus, samfala acceptim truth firstaem, bat bihaen olketa no gohed followim. Olsem example, taem Jesus duim mirakol for feedim staka pipol, olketa followim hem go long narasaed long Sea long Galilee. Then Jesus talem samting wea mekem olketa seke tumas. Hem sei: “Sapos iufala no kaikaim body bilong Son bilong man and drinkim blood bilong hem, bae iufala no kasem laef.” Winim wei for askem Jesus for explainim wanem nao hem minim, olketa sei: “Disfala toktok hem here nogud tumas, bae hu nao laek herem?” From datwan, “plande long olketa disaepol go bak for duim olketa samting wea olketa duim bifor and no laek followim hem nao.”—John 6:53-66.

5, 6. (a) Why nao samfala distaem lusim truth? (b) Hao nao gogo man savve isisi go difren from truth?

⁵ Sorre samting nao, samfala distaem lusim truth. Maet olketa feel nogud from wei wea wanfala change kamap saed long wei for minim wanfala Bible verse, or wanfala brata wea garem responsibility talem or duim samting wea mekem olketa stambol. Samfala maet no laek acceptim kaonsel from Bible wea samwan givim or olketa garem problem witim samwan insaed kongregeson. Olketa narawan maet followim olketa laea teaching bilong olketa apostate or olketa wea talem olketa laea abaotem iumi. Diswan hem samfala long olketa reason wea mekem samfala disaed for lusim Jehovah and kongregeson. (Heb. 3:12-14) Bat hem bae gud sapos olketa trustim Jesus olsem aposol Peter. Taem samfala les for followim Jesus bikos long wanem hem talem, Jesus askem olketa aposol sapos olketa tu laek lusim hem. Peter kwiktaem sei: “Lord, no eniwan moa for mifala followim. Toktok bilong iu nomoa savve mekem man laef olowe.”—John 6:67-69.

⁶ Olketa narawan isisi lusim truth, and maet no luksavve nomoa long datwan. Man wea isisi lusim truth, hem olsem wanfala kanu wea isisi go farawe from shore. Bible warnim iumi for mas careful mekem iumi no “isisi go difren.” (Heb. 2:1) Staka taem, man wea isisi go difren from truth hem no min for duim datwan. Bat hem letem wei wea hem fren witim Jehovah hem kamap wik, and  gogo maet hem no fren nao witim Jehovah. Wanem nao iumi savve duim mekem iumi no olsem?

7. Wanem nao bae helpem iumi for no salem truth?

⁷ For iumi gohed wakabaot followim truth, iumi need for acceptim and obeyim evri samting wea Jehovah talem. Iumi mas mekem truth kamap important samting long laef bilong iumi, and obeyim olketa Bible principle long evri samting wea iumi duim. King David prea long Jehovah and talem disfala promis: “Mi [bae] obeim trutoktok blong yu.” (Sams 86:11) David disaed strong for gohed wakabaot followim truth, and iumi tu mas duim datwan. Sapos iumi no strong for followim truth, iumi maet start for tingim moa olketa samting wea iumi lusim finis, and maet iumi laek duim moa olketa samting hia. Iumi mas hol strong long evri truth wea iumi lanem insaed Bible. Iumi no chusim nomoa wanem truth iumi laek followim and wanem iumi no laek followim. Iumi mas followim “[evri] samting wea tru.” (John 16:13) Long lastfala study, iumi storyim faevfala samting wea maet iumi lusim finis mekem iumi lanem truth and followim. Distaem, bae iumi storyim wanem iumi savve duim for mek sure iumi no duim moa olketa samting wea iumi lusim finis.—Matt. 6:19.

8. Hao nao wei for no iusim gud taem bilong iumi savve mekem iumi start for isisi go difren from truth? Storyim example.

⁸ Taem. Iumi mas iusim gud taem bilong iumi mekem iumi no isisi go difren from truth. Sapos iumi no careful, iumi savve iusim staka taem for hapitaem, duim nomoa samting iumiseleva laekem, lukluk long Internet, or long TV. Nomata hem no rong for duim olketa samting hia, gogo iumi savve iusim nao taem wea iumi shud iusim for duim olketa spiritual samting. Hem nao samting wea kasem Emma. * Start taem hem smol gele yet, hem interest long olketa horse and hem iusim evri chance wea hem garem for raedem. Bat hem start for feel guilty bikos hem spendem tumas taem for raedem horse, so hem disaed for changem samfala samting. And tu, Emma lane from experience bilong Cory Wells, wanfala sista wea savve tumas hao for raedem horse long olketa show. * Distaem Emma garem staka taem for duim olketa spiritual samting, and hem garem moa taem witim famili and olketa fren wea worshipim Jehovah. Hem fren gud witim God and hem hapi from hem savve hao for iusim gud taem bilong hem.

9. Hao nao olketa material samting savve kamap important long iumi?

⁹ Olketa material samting. For gohed wakabaot followim truth, iumi mas no letem olketa material samting kamap main samting long laef bilong iumi. Taem iumi lanem truth, iumi luksavve wei for worshipim Jehovah hem important winim olketa material samting. So iumi willing for let go long olketa material samting mekem iumi wakabaot followim truth. Maet iumi start for lukim olketa narawan peim olketa samting saed long technology or hapi witim olketa material samting wea olketa garem. Gogo, iumi start for laekem tu olketa samting hia. Maet iumi no satisfae nao long wanem iumi garem finis, and start for aftarem olketa material samting winim wei for duim olketa spiritual samting. Datwan mekem iumi tingim samting wea kasem Demas. Hem laekem tumas “disfala world,” and gogo, hem lusim assignment wea hem duim witim aposol Paul. (2 Tim. 4:10) Maet Demas lovem tumas olketa material  samting winim wei for duim spiritual samting. Or maet hem no willing for sakrifaesim samfala samting mekem hem gohed waka witim Paul. Wanem nao iumi lanem? Maet bifor iumi laekem tumas olketa material samting. Sapos iumi no careful, iumi savve garem moa datfala feeling and hem savve kamap strong gogo hem winim nao love wea iumi garem for truth.

10. Olketa hu nao iumi mas no fraetem?

¹⁰ Olketa fren and relative. For gohed wakabaot followim truth, iumi mas no letem olketa wea no worshipim Jehovah for mekem iumi fraet and duim samting wea olketa laekem. Taem iumi start for lanem truth, wei wea iumi fren witim olketa relative and fren wea no Witness savve change. Maet samfala respectim biliv bilong iumi, bat olketa narawan maet no laekem datwan. (1 Pet. 4:4) Hem tru, iumi traem best for kaen long olketa relative and for stap gud witim olketa. Bat iumi bae no duim eni samting wea Jehovah no hapi long hem just for mekem olketa fren and relative hapi. Olsem 1 Corinth 15:33 storyim, iumi laek for fren gud nomoa witim olketa wea lovem Jehovah.

11. Wanem nao savve helpem iumi for stap klia long tingting and fasin wea no klin?

¹¹ Tingting and fasin wea no klin. Long tingting bilong Jehovah, olketa wea gohed wakabaot followim truth mas holy, or klin. (Aesaea 35:8; readim 1 Peter 1:14-16.) Taem iumi start for lanem truth, iumi changem samfala samting long laef bilong iumi mekem iumi followim olketa standard insaed Bible. Samfala mekem olketa big change long laef bilong olketa. Nomata olsem, iumi mas gohed keepim fasin bilong iumi wea klin and careful for no duim olketa samting wea no klin. Wanem nao savve helpem iumi for no foldaon long test for duim nogud samting? Ting abaotem samting wea Jehovah provaedem for mekem iumi holy. Hem givim spesol Son bilong hem Jesus Christ for dae for iumi! (1 Pet. 1:18, 19) Wei for evritaem tingim datfala nambawan ransom sakrifaes bilong Jesus, bae helpem iumi for gohed stap klin long eye bilong Jehovah.

12, 13. (a) Why nao iumi shud garem tingting bilong Jehovah abaotem olketa celebration? (b) Wanem moa bae iumi storyim?

¹² Olketa kastom and olketa samting wea God heitim. Olketa famili, olketa wakfren, and olketa skulfren maet trae for switim iumi for joinim olketa long olketa celebration. Wanem nao savve helpem iumi for no foldaon long test for joinim olketa celebration and kastom wea Jehovah heitim? Iumi mas evritaem tingim olketa reason why Jehovah againstim olketa celebration olsem. Iumi savve duim research long olketa pablikeson bilong iumi for savve celebration hia start kam from wea. Taem iumi ting raonem olketa reason why iumi no joinim olketa celebration hia, iumi barava sure iumi duim “samting wea Lord hapi long hem.” (Eph. 5:10) Sapos iumi trustim Jehovah and toktok bilong hem, iumi bae no fraet long wanem olketa narawan talem.—Provebs 29:25.

¹³ Iumi laek for gohed wakabaot followim truth for olowe. Wanem nao bae helpem iumi for disaed strong for gohed wakabaot followim truth? Iumi bae storyim thrifala samting.

14. (a) Hao nao wei for evritaem studyim Bible helpem iumi for disaed strong for no lusim truth? (b) Why nao iumi needim wisdom, discipline, and wei for minim samting?

¹⁴ First samting, gohed for studyim Bible and ting raonem wanem iu lanem. Markem taem for duim datwan. Taem iumi evritaem  studyim Bible, bae hem strongim go moa wei wea iumi tinghae long truth, and datwan bae helpem iumi for no lusim truth. Proverbs 23:23, NW hem sei: “Baem truth and no salem.” And hem sei tu for iumi mas baem “wisdom, discipline, and wei for minim samting.” Hem no inaf for iumi savve long truth insaed Bible nomoa bat iumi mas followim long laef bilong iumi. Taem iumi garem wei for minim samting, datwan helpem iumi for ting raonem wanem iumi lanem witim wanem iumi savve long hem finis. Wei for garem wisdom savve helpem iumi for duim samting followim wanem iumi savve finis. Samfala taem, iumi kasem discipline from Bible wea savve helpem iumi for changem samfala samting long laef bilong iumi. So iumi laek for kwiktaem followim datwan, bikos Bible sei discipline hem barava gud winim silver.—Provebs 8:10.

15. Hao nao truth hem olsem belt wea savve protectim iumi?

¹⁵ Mek-tu samting, iumi mas disaed strong for followim truth long evri samting wea iumi duim. Bible comparem truth olsem belt wea wanfala soldia werem. (Eph. 6:14) Long bifor, belt bilong soldia hem sapotim and protectim hem taem hem go faet. Bat hem mas taetem gud datfala belt. Sapos belt hem slak, datwan bae no sapotim and protectim hem. Hao nao truth protectim iumi olsem wanfala belt? Sapos iumi evritaem followim truth long Bible, datwan bae helpem iumi for garem stretfala tingting and helpem iumi for mekem olketa gudfala disison. Taem iumi garem wanfala big problem or iumi kasem test for duim samting wea no stret, truth insaed Bible bae helpem iumi for disaed strong for duim stret samting. Long sem wei wea wanfala soldia bae hard for go faet sapos hem no werem belt bilong hem, iumi tu bae followim truth from Bible long evri samting iumi duim. Wanfala soldia savve putim sword tu long saed belt bilong hem. So wanem nao next samting wea iumi savve duim for strongim iumi?

16. Hao nao wei for teachim truth long olketa narawan helpem iumi for gohed wakabaot followim truth?

¹⁶ Mek-thri samting, traem best for teachim truth insaed Bible long olketa narawan. Bible hem olsem wanfala sword. Long sem wei wea wanfala soldia mas hol strong long sword bilong hem, iumi tu mas hol strong long toktok bilong God. (Eph. 6:17) Iumi evriwan savve kamap olketa gudfala teacher wea “iusim long stretfala wei datfala toktok bilong God wea tru.” (2 Tim. 2:15) Taem iumi iusim Bible for teachim olketa narawan, iumi bae savve gud long truth, and barava tinghae long datwan. And iumi bae barava disaed strong for gohed wakabaot followim truth.

17. Why nao truth insaed Bible hem barava important long iu?

¹⁷ Truth hem nambawan present from Jehovah. Truth helpem iumi for fren gud witim Dadi bilong iumi long heven. Datwan nao hem barava important samting long laef bilong iumi. Jehovah teachim iumi staka samting finis, and hem promis for gohed teachim iumi for olowe. So tinghae long truth olsem wei wea iu tinghae long datfala gudfala pearl. Gohed for “baem truth and no salem.” And iu bae olsem David wea promis long Jehovah: “Mi [bae] obeim trutoktok blong yu.”—Sams 86:11.