1-3. (a) Kufanele siwatsatse njani emaciniso laseBhayibhelini? Shano sibonelo. (Buka sitfombe lesisekucaleni kwalesihloko.) (b) Ngumiphi imibuto letawuphendvulwa kulesihloko?

KUVAMILE kutsi bantfu batsenge tintfo esitolo baphindze batibuyisele. Kulinganiselwa kutsi kulamanye emave, bantfu babuyisela emaphesenti langu-9 etintfo letitsengwe esitolo. Emaphesenti langetulu kwa-30 etintfo letitsengwe kusetjentiswa i-internet tivame kujikiswa. Bavama kutfola kutsi akusiko loko bebakulindzele noma kuba kutsi abasakutsandzi loko labakutsengile. Babese bayakushintjisa noma bafune imali yabo.

² Ngeke size sente lokufanako ngelwati lolungulonalona loluseBhayibhelini. Nangabe ‘sesilitsengile,’ lokusho kulifundza, ngeke sifune ‘kulitsengisa,’ lokusho kulishiya. (Fundza Taga 23:23; 1 Thim. 2:4) Njengobe sifundzile esihlokweni lesendlulile, liciniso salitfola ngekutsi sitinike sikhatsi sekulifundza. Kungenteka sayekela umsebenti loholela kahle kute sifundze liciniso. Kungenteka buhlobo betfu nalabanye baphatamiseka. Kwadzingeka sente lushintjo endleleni lesicabanga nalesitiphatsa ngayo, noma silahle emasiko nemikhuba lengamjabulisi  Nkulunkulu. Konkhe lesikushiyile akusilutfo nakucatsaniswa netibusiso lesititfole ngekwati liciniso.

³ Indlela lesitiva ngayo ngemaciniso laseBhayibhelini ifana nendlela umtsengisi labetiva ngayo. Jesu wabekisa ngalomtsengisi kute akhombise kutsi liciniso leMbuso waNkulunkulu liligugu kanganani kulabo labalitfolako. Lomtsengisi wahamba etindzaweni letehlukene afuna ematje laligugu futsi watfola linye. Lelitje beliligugu kakhulu kangangekutsi ‘ngekushesha watsengisa’ konkhe labenako wase uyalitsenga. (Mat. 13:45, 46) Liciniso lesalitfola ngeMbuso waNkulunkulu kanye nalamanye emaciniso laligugu lesawafundza eVini laNkulunkulu aligugu kakhulu kitsi, kungako sakhetsa kudzela tonkhe tintfo kute siwatfole. Nangabe liciniso liligugu kitsi, ngeke size silishiye. Lokubuhlungu kutsi bantfu labanyenti balishiyile liciniso leliligugu labalitfola ngenca yekutsi alisasiyo intfo lebalulekile kubo. Shengatsi singete sakwenta loko. Kute sikhombise kutsi liciniso liligugu kitsi, kufanele singalitsengisi, kodvwa silandzele sicondziso lesiseBhayibhelini lesitsi sichubeke ‘sihamba ecinisweni.’ (Fundza 3 Johane 2-4.) Kuhamba ecinisweni kusho kuphila ngekuvumelana nalokushiwo liBhayibheli. Kulesihloko sitawucoca nganayi imibuto: Labanye balitsengisa njani liciniso futsi leni? Yini lesingayenta kute singalenti liphutsa lelifanako? Yini lesingayenta kute sichubeke ‘sihamba ecinisweni’?

4. Ekhulwini lekucala, yini leyenta labanye balishiya liciniso?

⁴ Ekhulwini lekucala, bantfu labanyenti bacale batemukela timfundziso taJesu, kepha babese bayalishiya liciniso. Nasi sibonelo, ngemuva kwekutsi Jesu aphe sicumbi sebantfu kudla ngalokusimangaliso, sabese siyamlandzela sewela naye Lwandle lwaseGalile. Jesu wabese usho intfo leyabamangalisa, watsi: “Ngaphandle kwekutsi nidle inyama yeNdvodzana yemuntfu, ninatse nengati yayo, nite kuphila.” Kunekutsi bamcele abachazele loko labekakusho, bakhubeka base batsi: “Lenkhulumo ihlasimulisa umtimba, futsi ayilaleleki.” Ngenca yaloko, “bafundzi bakhe labanyenti bamhlubuka babuyela etintfweni takadzeni, futsi abazange basahamba naye.”​—Joh. 6:53-66.

5, 6. (a) Esikhatsini lesiphila kuso, yini leyente bantfu labanyenti balishiya liciniso? (b) Yini lengenta umuntfu ashiye liciniso kancane kancane?

⁵ Lokubuhlungu kutsi bantfu labanyenti lamuhla balishiyile liciniso. Labanye bakhutjwa lushintjo endleleni lebesicondza ngayo umBhalo lotsite noma bakhutjwe ngulokwashiwo noma kwentiwa ngumzalwane lophatsiswe imisebenti letsite enhlanganweni. Labanye bakhutjwa kuniketwa seluleko lesiseBhayibhelini noma kungaboni ngaso linye nalabanye bazalwane. Labanye batihlanganisa netihlubuki kanye nalabanye labakhuluma emanga ngetinkholelo tetfu. Leti nguletinye tetizatfu letibenta ‘bakhweshe’ kuJehova kanye nasebandleni. (Heb. 3:12-14) Abazange balingise sibonelo semphostoli Phetro ngekutsi bachubeke banekukholwa futsi betsembe Jesu. Nakabuta baphostoli kutsi babebafuna yini kumshiya, Phetro waphendvula ngekushesha watsi: “Nkhosi, singahamba siyephi? Ngobe nguwe lonemavi ekuphila lokuphakadze.”​—Joh. 6:67-69.

⁶ Labanye balishiya kancane kancane liciniso bangakanaki. Umuntfu lowenta njalo ulingisa sikebhe lesikhwesha kancane  kancane elusetseni lwemfula. LiBhayibheli litsi bantfu labenta njalo ‘bayaphambuka.’ (Heb. 2:1) Ngalokuvamile, umuntfu lophambukako usuke angakacondzi kwenta njalo. Kodvwa usuke avumele buhlobo bakhe naJehova bube butsakatsaka futsi ngekuhamba kwesikhatsi bungaphela. Yini lesingayenta kute siciniseke kutsi loko akwenteki kitsi?

7. Nguyiphi intfo yekucala lengasisita kutsi singalishiyi liciniso?

⁷ Kute sihambe ecinisweni, kufanele semukele tonkhe timfundziso taJehova futsi siphile ngato. Liciniso kufanele silitsatse njengalelibaluleke kakhulu ekuphileni kwetfu futsi siphile ngekuvumelana nalo. INkhosi Davide yathantaza kuJehova yatsi: “Ngiyawuhamba ecinisweni lakho.” (Hla. 86:11) Davide bekatimisele. Natsi kufanele sitimisele kuchubeka sihamba ecinisweni. Nangabe singakatimiseli, singacala kucabanga ngetintfo lesatidzela bese sifuna kuphindze sibuyele kuto. Kunaloko, sibambelela ecinisweni. Kodvwa ngeke sitikhetsele kutsi ngumaphi emaciniso lesitawalalela nalesingeke siwalalele. Kufanele sihambe ‘kulo lonkhe liciniso.’ (Joh. 16:13, catsanisa neliBhayibheli lesiSwati lelivamile.) Ase sicoce ngetintfo letisihlanu lokungenteka satidzela kute sifundze liciniso futsi siphile ngalo. Kwenta njalo kutasisita kutsi singacabangi ngetintfo lesatidzela kute siphile ngemaciniso.​—Mat. 6:19.

8. Kusisebentisa kabi sikhatsi kungamenta njani umKhristu aphambuke emacinisweni? Shano sibonelo.

⁸ Sikhatsi. Kufanele sisebentise sikhatsi setfu kahle kute singaphambuki ecinisweni. Nangabe singakanaki singacala kucitsa sikhatsi lesinyenti etintfweni tekutijabulisa, kwenta tintfo lesititsandzako, ku-internet noma sibukela i-TV. Akusiko kubi kwenta letintfo, kepha singagcine sisebentisa sikhatsi lebesingasisebentisela kudadisha kanye netintfo letisenta sibe nebuhlobo lobuhle naJehova. Cabanga ngaloko lokwenteka ku-Emma. * Kusukela asemncane bekatsandza kugibela emahhashi. Sonkhe sikhatsi labesitfola bekasisebentisela kuyogibela emahhashi. Ngemuva kwesikhatsi, wabona kutsi sikhatsi lesinyenti sewusicitsa enta tintfo latitsandzako. Wenta lushintjo futsi wabese sewuyakhona kugcina tekutijabulisa kusendzaweni yako. Waphindze wakhutsatwa ngulokwenteka kuCory Wells naye labekutsandza kugibela emahhashi. * Emma sewucitsa sikhatsi lesinyenti enta tintfo letimayelana naNkulunkulu akanye nebazalwane nabodzadze. Sewutiva asondzelene kakhulu naJehova futsi unekuthula ngobe usisebentisa kahle sikhatsi sakhe.

9. Kufuna tintfo talelive kungasenta njani singasatinaki tintfo letimayelana naNkulunkulu?

⁹ Tintfo talelive. Nangabe sifuna kuchubeka sihamba ecinisweni, kufanele singatitsandzi kakhulu tintfo talelive. Nasisandza kufundza emaciniso, sabona kutsi kukhonta Jehova kubaluleke kakhulu kunetintfo talelive futsi sajabula nasitiyekela kute sifundze liciniso. Ngekuhamba kwesikhatsi, kungenteka sibone bantfu batsenga tintfo tebuchwephesha takamuva noma tintfo letinyenti talelive. Kungenteka sibone ngatsi siyashiyeka, noma singasanetiswa tintfo lesinato futsi sicale kunaka kutfola tintfo letinyenti talelive singasanaki kukhonta  Jehova. Loku kusikhumbuta ngalokwenteka kuDemasi. ‘Bekatsandza kakhulu’ tintfo talelive futsi waze washiya umsebenti labewenta nemphostoli Pawula. (2 Thim. 4:10) Kungani Demasi ashiya Pawula? Kungenteka bekatsandza kakhulu tintfo talelive kunekukhonta Nkulunkulu noma abengasafuni kutidzela kute ente umsebenti labewenta naPawula. Yini lesiyifundzako? Kungenteka besititsandza tintfo talelive. Nangabe singakanaki, singaphindze sicale kutitsandza kakhulu letintfo futsi singasawatsandzi emaciniso.

10. Yini lokufanele singayivumeli yenteke kitsi?

¹⁰ Buhlobo lesinabo nalabanye bantfu. Kute sichubeke sihamba ecinisweni, akukafaneli sivumele bantfu basentise tintfo letingamjabulisi Nkulunkulu. Ngesikhatsi sicala kufundza emaciniso, kwaba nelushintjo ebuhlotjeni lebesinabo nebantfu labangasibo boFakazi kanye nemalunga emndeni. Labanye batemukela tinkholelo tetfu kodvwa labanye bavele basiphikisa. (1 Phet. 4:4) Ngisho noma singafuna kuchubeka sinebuhlobo lobuhle nemalunga emndeni wetfu futsi siwaphatse ngemusa, kufanele sicaphele, singalishiyi liciniso ngoba sifuna kwemukelwa ngibo. Sitawuchubeka setama kutsi sivane nemalunga emindeni yetfu. Nasinakisisa secwayiso lesiku-1 Khorinte 15:33 sitawuba bangani bebantfu labatsandza Jehova.

11. Singakubalekela njani kwenta tintfo Jehova latenyanyako?

¹¹ Imicabango kanye netento letingamjabulisi Nkulunkulu. Bonkhe labahamba ecinisweni kufanele babe ngcwele. (Isa. 35:8; fundza 1 Phetro 1:14-16.) Nasicala kufundza emaciniso, sonkhe senta tingucuko kute siphile ngekuvumelana netimiso teliBhayibheli. Labanye kwadzingeka kutsi bente tingucuko letinyenti. Akukafaneli sivume kulahlekelwa yinjabulo sibili ngenca yetintfo talelive letimbi. Yini lesingayenta kute sibalekele kutiphatsa kabi? Cabanga ngendlela Jehova latidzela ngayo nakanikela ngengati yaJesu Khristu iNdvodzana yakhe leligugu kute sibe ngcwele. (1 Phet. 1:18, 19) Kute sibe msulwa emehlweni aJehova, kufanele sihlale sikukhumbula kubaluleka kwenhlawulo yaJesu Khristu.

12, 13. (a) Kubaluleke ngani kutsi sibe nembono waJehova ngemaholidi? (b) Yini lesitawucoca ngayo manje?

¹² Emasiko kanye nemikhuba lengamjabulisi Nkulunkulu. Emalunga emndeni, lesisebenta nabo kanye nalesifundza nabo bangahle betame kusenta kutsi sihlanganyele nabo nabagubha imikhosi letsite. Yini lengasisita sincobe silingo sekugubha imikhosi nemaholidi langamjabulisi Jehova? Singasitwa kuhlale sikhumbula kutsi lemikhuba ayimjabulisi Jehova. Kufanele siphindze sifundze tincwadzi tetfu letichaza ngemsuka wemaholidi bantfu labavame kuwagubha. Kutikhumbuta ngetizatfu letiseBhayibhelini letenta singawagubhi lamaholidi, kusenta siciniseke kutsi sihamba endleleni “leyemukelekako eNkhosini.” (Ef. 5:10) Angeke ‘sibesabe bantfu’ nangabe setsembela kuJehova kanye naseVini lakhe leliliciniso.​—Taga 29:25.

¹³ Sifisa kuchubeka sihamba ecinisweni kute kube phakadze. Yini lengasisita sitimisele kuchubeka sisecinisweni? Asesicoce ngetintfo letintsatfu lesingatenta.

14. (a) Kutinika sikhatsi sekufundza liciniso kutasisita njani kutsi singalishiyi? (b) Kubaluleke ngani kuhlakanipha, siyalo kanye nekucondza?

¹⁴ Kwekucala, chubeka udadisha emaciniso laligugu laseVini laNkulunkulu futsi  uzindle ngawo. Kufanele utsenge liciniso ngekutsi uhlale utinika sikhatsi sekufundza emaciniso laligugu laseBhayibhelini. Loko kutakusita kutsi ulitsandze kakhulu liciniso futsi utimisele kutsi ungalishiyi. Akukafaneli sigcine ngekwati liciniso, ngoba Taga 23:23 titsi: “Zuza kuhlakanipha, nemiyalo, nekucondza.” Kuba nelwati kuphela akukeneli. Kufanele siphile ngekuvumelana nemaciniso lesiwatiko. Kucondza kusisita kutsi sikuve konkhe loko Jehova lasitjela kona. Kuhlakanipha kusenta sikwente loko lesikwatiko. Ngaletinye tikhatsi, liciniso liyasiyala ngekutsi lisikhombise lapho kufanele sente khona lushintjo ekuphileni kwetfu. Shengatsi singahlale sisilalela sicondziso lesiseBhayibhelini, ngoba siligugu kakhulu kwendlula isiliva.​—Taga 8:10.

15. Libhande leliciniso lisivikela njani?

¹⁵ Kwesibili, timisele kuphila ngekuvumelana nalokushiwo liciniso leliseBhayibhelini. LiBhayibheli lifananisa liciniso nelibhande lebeliboshwa ngemasotja elukhalo. (Ef. 6:14) Ngetikhatsi tekubhalwa kweliBhayibheli, lelibhande belivikela liphindze lisite lisotja nalisemphini. Kepha lelisotja bekufanele lilibophe licine kute livikeleke. Libhande lelingakaboshwa lacina belingalisiti kangako lisotja. Liciniso lingasivikela njani? Nangabe sihlale sikusebentisa lokushiwo liBhayibheli ekuphileni kwetfu, angeke sibe nemicabango lemibi futsi sitawenta tincumo letihlakaniphile. Nangabe silingwa noma sibhekene netimo letamatima, liciniso leliseBhayibhelini litasisita sitimisele kwenta lokulungile. Njengobe lisotja lingeke liye emphini lingakalibophi lelibhande, natsi kufanele sitimisele kungalishiyi liciniso. Esikhundleni saloko, senta konkhe lesingakwenta kute siphile ngekuvumelana nemaciniso laseBhayibhelini. Libhande beliphindze lisite lisotja ngoba belikhona kufaka inkemba yalo kulo. Ase sicoce ngalokunye lokungasisita sikhulise sifiso setfu sekuchubeka sihamba ecinisweni.

16. Kufundzisa labanye emaciniso kusikhulisa njani sifiso setfu sekuchubeka sihamba ecinisweni?

¹⁶ Kwesitsatfu, hlanganyela ngalokugcwele emsebentini wekufundzisa labanye liciniso leliseBhayibhelini. Loko kutakusita kutsi ube nelikhono lekulisebentisa kahle “liVi laNkulunkulu”, lelifananiswa nenkemba. (Ef. 6:17) Njengobe sibafundzisi, sonkhe kufanele sitimisele kutfutfukisa emakhono etfu kute ‘siphatse livi leliciniso ngendlela lefanele.’ (2 Thim. 2:15) Sitawatsandza emaciniso futsi siwacondze kahle nangabe sisita labanye bawafundze futsi balahle timfundziso temanga. Nasenta kanjalo, sifiso setfu sekuchubeka sihamba ecinisweni sitawukhula.

17. Libaluleke ngani liciniso kuwe?

¹⁷ Liciniso lisipho lesiligugu Jehova lasiphe sona. Libaluleke kakhulu kitsi ngoba lisenta sibe nebuhlobo lobuhle naBabe wetfu losezulwini. Konkhe loko Jehova lasifundzise kona kusesicalo futsi wetsembisa kutsi utawuchubeka asifundzisa kute kube phakadze. Shengatsi singalitsandza liciniso njengobe lifana nelitje leliligugu. Chubeka ‘utsenga liciniso ungalitsengisi.’ Nawenta njalo utawulingisa Davide usifeze setsembiso lesitsi: “Ngiyawuhamba ecinisweni lakho.”​—Hla. 86:11.