1-3. (a) Tweelede kulimvwa biyeni atala akasimpe kamuBbayibbele? Amba chikozyano. (Langa zifanikisyo zili kumatalikilo aachiiyo.) (b) Njiili mibuzyo njitutalange-lange muchiiyo eechi?

KUBWEEDEZYA chintu chakawulwa, nchintu chizibinkene abantu biingi. Kuyeeyelwa kuti kulaamwi manyika, basikuula babweedezya 9 pesenti yazintu nzibakawula kuzintoolo. Alubo kuzintu zyuulwa kakubelesegwa Intaneti, kubweedezegwa zintu zyiinda ku30 pesenti. Chimwi chiindi basikuula babweedezya zintu nzibawula akaambo kakuti ngabajana kuti teenchibakali kulangilila pe, tachibeleki kabotu naakuti teenchibakali kuyanda pe. Nkinkaako, ngabayanda kuchichincha naakuti kuyanda mali yabo.

² Nikuba kuti tulakonzya kukumbila kuboozegwa mali njitwali twabelesya kuula chimwi chintu pesi tatuyandi kubweedezya naakuti ‘kuuzya’ ‘luzibo lwakasimpe’ kamuBbayibbele ‘nkitwakawula.’ (Bala Tusimpi 23:23; 1 Tim. 2:4) Mbuuli mbutwakabona muchiiyo chakayinda, twakajana kasimpe kwiinda mukubelesya chiindi kuti tukayiye. Kuyungizya waawo, kuti tuule kasimpe, kulakonzeka kuti twakasiya milimu iili aajulu, twakachincha nzila njitwakali kumvwananaayo abamwi naakuti twakasiya ziyanza  amichito iiteendelani azyeelelo zyamumagwalo. Nikuba boobo, zilongezyo nzitwakajana ziyandikana loko kuti twazikozyanisya aazintu nzitwakabelesya kuti tuule kasimpe.

³ Kuti katwaambuula atala akasimpe kamuBbayibbele, tulimvwa mbuuli mbaakalimvwa mwaalumi wakaambwa aJesu muchikozyano chimwi. Kuti tubone mbukayandikana kasimpe kaBwaami bwaLeza kubantu bakayanduula, Jesu wakaambuula atala amwaalumi muvubi wakayanduula ngale zibotu mpawo wakajana iimwi. Ngale eeyo yakali kudula loko zyakuti ‘wakawuzya’ zintu zyoonse nzyaakali aazyo kuti ayiwule. (Mt. 13:45, 46) Munzila iikozyenie, kasimpe kaBwaami bwaLeza atusimpe toonse ntutwakayiya muJwi lyaLeza, tuyandikana loko zyakuti tulilibambilide kuleka zimwi zintu nzituli aazyo kuti tutujane. Kuti kasimpe katukabona mbuuli chintu chiyandikana, ‘tatuzookawuzyi’ pe. Zilawusisya kuti bamwi bakombi baLeza bakakawubaansya kasimpe nkibakajene alubo bakakawuzya. Atubeleke changuzu kuti eezi zitachitiki pe kulindiswe! Kuti tutondeezye kuti tukabona kakayandikana loko kasimpe akuti tatuyandi kukawuzya, tweelede kuswiilila malayilile aamuBbayibbele aakuti ‘tweende mukasimpe.’ (Bala 3 Johane 2-4.) Kweenda mukasimpe kuswaanizya, kukabikka mubusena bwakusaanguna mubuumi bwesu akupona kweendelana ankako. Atulange-lange mibuzyo iitobela: Nkamboonzi alubo muunzilaanzi bamwi mubakonzya ‘kuuzya’ kasimpe? Kujana twachita biyeni kuti tutawuzyi kasimpe? Kujana twachita biyeni kuti tuzumanane ‘kweenda mukasimpe’?

4. Nkamboonzi bamwi bantu mumwaanda wamunyaka wakusaanguna ‘nibakawuzya’ kasimpe?

⁴ Mumwaanda wamunyaka wakusaanguna, bamwi bakasyoma njiisyo zyaJesu bakakachilwa kweenda mukasimpe. Muchikozyano, chiindi bantu biingi nibakasaninwa aJesu munzila yachigambyo, bakamutobela akuya kulilumwi lubazu lwaLwizi lwaGalilaya. Kuzwa waawo, Jesu wakabaambila chimwi chintu chakabagambya. Wakati: “Mwatalya mubili wa-Mwana a-Muntu, mwatanywa bulowa bwakwe, tamukwe buumi mulindinywe.” Muchiindi chakuti bakumbile Jesu kuti abapandulwide nzyaakali kwaamba, bakamunyemena akwaamba kuti: “Majwi aya mayumu, nguni uuti amvwe?” Majwi aaya akapa kuti ‘basikwiiya bakwe biingi bamusiye akuleka kweenda aawe.’​—Joh. 6:53-66.

5, 6. (a) Mazubaano, nkamboonzi bamwi nibakachilwa kukkalilila mukasimpe? (b) Niinzi chikonzya kupa kuti umwi muntu asiye kasimpe mbichaani-mbichaani?

⁵ Nikuba mazubaano, bamwi balakachilwa kukkalilila mukasimpe. Bamwi bakalebwa akaambo kakumvwisisisya kupya kwakasimpe kamuBbayibbele naakuti majwi amichito zyakachitwa awumwi mukwesu uuzibinkene. Bamwi bakalebwa akaambo kalulayo luzwa muMagwalo ndubakapegwa naakuti bakasiya kasimpe akaambo kakutamvwanana awumwi muKristu. Alubo bamwi bakatobela basiluleyo abasikukazya baamba twaambo twakubeja atala anzitusyoma. Eezi zyakapa kuti bamwi ‘balyaanzanie’ aJehova akuzwa mumbungano. (Heb. 3:12-14) Pesi zintu zyakali kunoobeendela kabotu kaansinga bakakkala kabali alusyomo lusimide akusyoma Jesu, mbuuli mbaakachita mwaapostolo Petro. Jesu naakabuzya basikwiiya bakwe kuti ambabo bakali kuyanda na kumusiya, Petro wakafwambaana kusandula akwaamba kuti: “Omwami, tuye kuli? Nduwe oojisi majwi aabuumi ubutamani.”​—Joh. 6:67-69.

 ⁶ Bamwi bakasiya kasimpe mbichaani-mbichaani kabatakubwene pe. Muntu uusiya kasimpe mbichaani-mbichaani uli mbuuli bwaato buya busunzuka kuzwa kunkomwe. Bbayibbele lyaamba kusunzuka ooku kuti ‘nkusweeka.’ (Heb. 2:1) Muntu uulyaanzania aakasimpe ulisiyene amuntu uusweeka nkaambo muntu uusweeka uchita mbichaani-mbichaani. Muntu uuchita oobo usaanisya bweenzinyina mbwali aabo aJehova alubo bulakonzya kumana. Kujana twachita biyeni kuti eezi zitatuchitikili?

7. Niinzi chiyootugwasya kuti tutawuzyi kasimpe?

⁷ Kuti tweende mukasimpe, tweelede kutambula akuswiilila malayilile aaJehova woonse. Kasimpe tweelede kukabikka mubusena bwakusaanguna mubuumi bwesu akupona kweendelana anjiisyo zyamuBbayibbele. Mwaami Davida wakakomba kuli Jehova kati: ‘Ndinooyenda mukasimpe kako.’ (Int. 86:11) Davida wakakanzide kuchita oobo. Andiswe tweelede kuba aachiyandisyo chakweenda mukasimpe kaLeza. Kuti twaleka kuba aachiyandisyo, chimwi chiindi tulakonzya kusunkwa kuti tubweedele zintu nzitwakaleka kuti tuule kasimpe. Nikuba boobo, tweelede kukajatisisya kasimpe koonse. Alubo tatusali kasimpe nkituyanda kuswiilila ankituteelede kuswiilila. Nkinkaako, tweelede kweenda ‘mukasimpe koonse.’ (Joh. 16:13) Atulange-lange zintu zili 5 nzitwakabelesya kuti tuule kasimpe. Kuchita oobo kuyootugwasya kuti tutazibweedeli zintu nzitwakasiya musule.—Mt. 6:19.

8. Muunzilaanzi kutachibelesya kabotu chiindi mukupa kuti muKristu asweeke mukasimpe? Amba chikozyano.

⁸ Chiindi. Kuti tutasweeki mukasimpe, tweelede kuchibelesya kabotu chiindi chesu. Kuti teetwachenjela, tulakonzya kubelesya chiindi chiingi muli zyakulikondelezya, mumagemu, mukubelesya Intaneti naakuti kweebela TV. Nikuba kuti zintu eezi teezibi pe pesi chiindi nchitubelesya kuzintu eezi chilakonzya kuba chiingi loko, zyakuti tulakachilwa kuchita zintu ziyandikana, ziswaanizya kuba achiiyo chesu atulikke azimwi zintu zyamubukombi. Atulange-lange chikozyano chawumwi muchizi muKristu uutegwa Emma. * Kuzwa kachili muniini, Emma wakali kukuyandisya kusaanisya mabbiza. Kufumbwa mpaakali kujana mweenya, wakali kwiinka kukusaanisya mabbiza. Nikwakiinda chiindi, wakasaanguna kukataazikana akaambo kachiindi nchaakali kubelesya kukusaanisya mabbiza. Wakasaanguna kuchincha mpawo wakaba amaboneno aalikabotu atala azyakulikondelezya. Alubo wakasungwaazigwa achikozyano chaCory Wells wakali kuchita musobano wakusaanisya mabbiza. * Lino Emma ulikubotelwa kuchita milimu yamubukombi abamumpuli yakwe abeenzinyina. Ulimvwa kali aafwiifwi aJehova alubo kali aluumuno nkaambo ulikuchibelesya kabotu chiindi chakwe.

9. Kuyandisya bunoti kubakachizya biyeni bamwi kuti baleke kuyanda zintu zyabukombi?

⁹ Zintu zyakumubili. Kuti katuyanda kuzumanana kweenda mukasimpe, tweelede kuba amaboneno aalikabotu atala azintu zyakumubili. Nitwakayiya kasimpe, twakabona kuti zintu zyakumubili zyeelede kuba mubusena bwachibili mubuumi, kazitobela zintu zyabukombi. Twakabotelwa kuti twakasiya zintu zyakumubili kuti tukonzye kweenda mukasimpe. Mukuya kwachiindi, tulakonzya kubona  bamwi kabalikuula zibelesyo zyamazubaano naakuti kabali kuliyandwiida bunoti. Eezi zilakonzya kupa kuti tubonaanga twasyaalila. Kutakkutisikana azintu nzitulaazyo, kulakonzya kupa kuti tubikke zintu zyabukombi kumbali akubikka bunoti mubusena bwakusaanguna. Makani aaya atuyeezya zyakachitika kuli Dema. Dema wakaleka kweenda aaPawulu akaambo kakuyandisya ‘zintu zyaansi aano.’ (2 Tim. 4:10) Niinzi chakapa kuti Dema ateendi aaPawulu? Amwi wakali wasaanguna kuyandisya bunoti kwiinda kukomba Leza naakuti taakachili kuyanda kulipeda kweenda aaPawulu pesi Bbayibbele talyaambi pe. Tatuyandi pe kuti kuyandisya bunoti akweemuzya zintu zyamunyika, kutukachizye kuyanda kasimpe.

10. Niinzi nzitweelede kutantamuka kuti tuzumanane kweenda mukasimpe?

¹⁰ Kumvwanana abamwi. Kuti katuyanda kuzumanana kweenda mukasimpe, tatweelede kuzumina kweenwa abamwi. Nitwakasaanguna kweenda mukasimpe, twakachincha mbutwakali kumvwanana abantu batali Bakamboni. Bamwi bakazilemeka nzitwakasaanguna kusyoma pesi bamwi bakatalika kutukazya. (1 Pet. 4:4) Nikuba kuti tuyanda kukkala katuli muluumuno abamumpuli akubatondeezya luzyalo pesi tweelede kuchenjelela kuti tutaleki kweenda mukasimpe katuyanda kubabotezya. Tunoozumanana kukkala katuli aaluumuno abamumpuli. Kuyeeyesesya nchenjezyo iijanika muli 1 BaKorinto 15:33 kutugwasya kuti tuliswaanizye abantu bayanda Jehova luzutu.

11. Niinzi chikonzya kutugwasya kutantamuka mizeezo amichito mibi?

¹¹ Kuyeeya zintu zibi akutalijata kabotu. Bantu boonse beenda mukasimpe beelede kusalala. (Is. 35:8; bala 1 Petro 1:14-16.) Kuti tuze mukasimpe, toonse twakali kuyandikana kuchincha kuti tupone kweendelana azyeelelo zyamuBbayibbele ziluleme. Bamwi bakeelede kuchincha munzila zyiingi. Kufumbwa kuchincha nkutwakachita, tweelede kukkala katuli amaponeno aasalala kutali kutobelezya maponeno aakutalilemeka aazwide munyika eeyi. Niinzi chikonzya kutugwasya kuti tuzunde maponeno aakutalijata? Nkuyeeyesesya atala achipo chidula loko Jehova nchaakatupa chitupa kuti tusalale. Wakatupa Mwanaakwe Jesu Kristu kuti atufwide. (1 Pet. 1:18, 19) Kuti tukkale katusalala mumeso aaJehova, tweelede kukkala katuyeeyesesya mbuchiyandikana chipo chachinunuzyo chaJesu mumoyo amumizeezo.

12, 13. (a) Nkamboonzi nitweelede kuba amaboneno aali mbuuli aaJehova atala amapobwe? (b) Tulalanga-langaanzi?

¹² Ziyanza amichito iiteendelani amagwalo. Bamumpuli, mbitubelekaabo ambitwiiyaabo, balakonzya kutusungilizya kuti tuliswaanizye mumapobwe ngibachita. Niinzi chiyootugwasya kuti tuzunde kusungilizigwa kuliswaanizya mumichito amumapobwe aatalemeki Jehova? Tulakonzya kuchita oobo kwiinda mukuba amaboneno aali mbuuli aaJehova mumakani aaya. Kulanga-langa makani aakapupululwa mumabbuku eesu aatondeezya mbaakatalika mapobwe aayo kuyootugwasya. Kuyeeyesesya twaambo twamuMagwalo tupa kuti tutaliswaanizyi mumapobwe aayo, kupa kuti tube aachoonzyo chakuti tulikweenda munzila ‘iibotezya Mwaami.’ (Ef. 5:10) Kusyoma Jehova aJwi lyakwe lyakasimpe kuyootukwabilila kuti ‘tutayoowi bantu.’​—Tus. 29:25.

¹³ Kweenda mukasimpe takumani pe alubo tuyanda kuchita oobo kusikila kukabe kutamani. Kujana twachita biyeni kuti tuzumanane kweenda mukasimpe? Atulange-lange nzila zitatu.

14. (a) Kuzumanana kuula kasimpe kutugwasya biyeni kuti tutakawuzyi? (b) Nkamboonzi busongo, lulayo abupampu niziyandikana?

¹⁴ Chakusaanguna, zumanana kubala atala akasimpe kayandikana kali muJwi lyaLeza akuyeeyesesya atala ankako. Wula kasimpe kwiinda mukuba aachiindi chakulya kasimpe kali muJwi lyaLeza. Kuchita oobo kuyoopa kuti ukabone kakayandikana kasimpe akuti utakawuzyi. Kuyungizya mukuula kasimpe, muli Tusimpi 23:23 tusungwaazigwa kuti tuule ‘busongo, lulayo abupampu.’ Tatweelede kugolela aakuja luzibo luzutu pe. Tweelede kupona kweendelana akasimpe mubuumi bwesu. Bupampu buyootugwasya kuti tubone mbaayendelana malayilile aaJehova oonse. Busongo buyootugwasya kuti tuchite kweendelana azintu nzituzi. Chimwi chiindi, kasimpe kalatululamika akututondeezya mputweelede kubambulula. Atwaaswiilile malayilile aaya chiindi choonse. Lulayo luyandikana loko kwiinda nsiliva.​—Tus. 8:10.

15. Bbanti lyakasimpe litukwabilila biyeni?

¹⁵ Chabili, kanza kupona kweendelana akasimpe buzuba abuzuba. Zwaata bbanti lyakasimpe muchibuno. (Ef. 6:14) Muchiindi chaBbayibbele, bbanti lyakali kugwasya akukwabilila silumamba munkondo. Kuti bbanti lyakwe limukwabilile, silumamba wakeelede kulisunga kabotu. Kuti taalisunga kabotu, teelyakali kumukwabilila kabotu. Bbanti lyamubukombi litukwabilila biyeni? Kuti kasimpe twakasunga kabotu mbuuli bbanti, kalatukwabilila kumizeezo yalweeno akutugwasya kuti tusale kabotu. Nitusunkwa anitwaba mumapenzi, kasimpe kamuBbayibbele kayootugwasya kuti tuchite zintu zilikabotu. Mbuuli mbuzyakatali kuchita kuti silumamba ayinke kunkondo katakwe bbanti, andiswe tatweelede kulitebezya pe bbanti lyesu lyakasimpe, nikuba kulyaangununa. Pesi tweelede kukkala katulisungide kabotu kwiinda mukupona kweendelana akasimpe kamuBbayibbele. Alubo bbanti silumamba wakali kulibelesya kusekka panga lyakwe. Eezi zitusisya kunzila yachitatu iitugwasya kuti tuzumanane kweenda mukasimpe.

16. Kuyiisya bamwi kasimpe kutugwasya biyeni kuti tuzumanane kweenda mukasimpe?

¹⁶ Chatatu, beleka changuzu mukuyiisya bamwi kasimpe kamuBbayibbele. Munzila eeyi, tunooli tulikujatisisya kupanga lyesu lyamubukombi nkukuti “iJwi lya-Leza.” (Ef. 6:17) Toonse tulakonzya kuyungizya luzibo lwesu mbutuli bayiisi, ‘bapandulula majwi aakasimpe mbuuli mbukweelede.’ (2 Tim. 2:15) Chiindi nitubelesya Bbayibbele kukugwasya bamwi kuti bawule kasimpe akuti basiye njiisyo zyakubeja, zipa kuti Jwi lyaLeza likkalilile mumizeezo amumyoyo yesu. Kuchita oobo kupa kuti tuzumanane kweenda mukasimpe.

17. Nkamboonzi kasimpe nikayandikana loko kulinduwe?

¹⁷ Kasimpe nchipo chiyandikana loko chizwa kuli Jehova. Kwiinda muchipo eechi, tuli aalukono ludula loko chaamba bweenzuma mbutuli aabo aTaateesu uuli kujulu. Zintu zyoonse nzyaakatuyiisya matalikilo biyo! Leza wakatusyomezya kuti unootuyiisya kusikila kukabe kutamani. Nkinkaako, kasimpe tweelede kukabona kakayandikana loko mbuuli ngale. Zumanana ‘kuula kasimpe, utakawuzyi pe.’ Mbuuli Davida uyoosyomezya Jehova kuti: ‘Ndinooyenda mukasimpe kako.’​—Int. 86:11.