1-3. a) ¿Nénachi jatsiski para exeni Bibliaeri jurhimbikua ambe? Jatsiku je ejemplu ma (exea je imajenichani engaksï uénakuarhu jaka). b) ¿Náki kurhamarhikuechanchi mókuantaua ini artikulurhu?

IÁSÏ, kʼuiripuechaksï kánikua pʼindesti piáni ambe ma ka tátsekuaksï kʼuanhaskuntani. Máru paisicha jimbo, sáno 9% ísïksï kʼuanhaskuntasïndi ambe engaksï piájka tiendecharhu. Ka jukari 30% engaksï Interneti jimbo piájka. Jamberi jimbokaksï no jeiapanhintasïnga, no sési uérani ambe ma o solu jimbokaksï no tsitiska. Jimboksïsï kurhajkuarhijti eskaksï mójtakukuantauaka o eskaksï kʼuanhaskukuantauaka tumina.

² Ma ambe jingoni engachi no méni uéjka ísï úni, jindesti ima ambe jingoni engachi Bibliarhu jorhenguarhijka. Engachi na piájkia o jorhenguarhini jurhimbikuani, nochi uékasïnga jurajkuni o íntspikuarhini (1 Tim. 2:4; arhinta je Proverbios 23:23). Eskachi na exekia máteru artikulu jimbo, parachi konseguirini jurhimbikuani, uétarhispti kánikua tiempu arhutani. Máruksï jamberi jatsispti para jurajkuni ánchikuarhita ma engaksï jimbo kánikua tumina andenga o orhepani uérani nájkirukaksï imecheri familiaricha o amiguecha no sési kápiringa. Máteruechaksï mójtakusti ambe engaksï eratsienga o na engaksï jámenga, ka jamberiksï jurajkuati pʼindekuechani engaksï no terokuntajka Biblia jingoni. Ambe uéjki engachi jucha úka o  jurajkuni, no xáni kʼéri ambesti imani kóntperatechani jingoni engachi intsïnhaajka.

³ Para xarhatani na engaksï xáni jukaparharajka imecha engaksï exentajka jurhimbikua Tata Diosïri Reinuerini, Jesusi uandaspti achatiri ma enga perlechani jámenga jirinhaani. Enga exentapka ma enga kánikua jukaparhapka, sóntku “íntspikuarhi[spti] iámindu ambe enga jatsikuarhipka” para piáni imani perlani (Mat. 13:45, 46). Májkueni, para jucha xáni jukaparhakuesti Tata Diosïri Reinu ka ístu máteru ambe enga Biblia jorhentpijka, engachi jurajkujka ambe enga xáni uétarhijka parachi úni jurhimbikuarhu jarhani. Engachi seguirini jauaka jukaparharani, nochi méni jurajkuaka. Peru xáni no sési engaksï máru Tata Diosïri marhuaricha nóteru jukaparharakia jurhimbikuani ka niárastiksï jurajkuni. Ju je no méni úni inde ambe. Sánderu sési, jatsiskachi para úni ambe engajtsïni Biblia arhijka, eskachi seguirini jauaka jámani “eska na terokuntajka indeni ambe jingoni enga ísïka” o jurhimbitika (arhinta je 3 Juanu 2-4). I ambe arhikuekasïndi eskachi jatsiska para sánderu jukaparharani jurhimbikuani ka úni ambe engachi jorhenguarhijka. Ini artikulurhu, mókuantauakachi arini kurhamarhikuechani: ¿Ambe úski eskaksï máru jurajkuaka jurhimbikuani, ka nénaksï niáraski ísï úni? ¿Ambejtsïni jarhuata no úni indeni ambe enga xáni no sési jaka? ¿Ka nénachi uá méntkisï jurhimbikuarhu jarhani?

4. Primeru siglurhu, ¿máruksï andisï jurajkupi jurhimbikuani?

⁴ Primeru siglurhu, jarhasptiksï máru engaksï uénani jámani jiókuarhipka ambe enga Jesusi jorhentpienga, peru tátsekuaksï jurajkuspti jurhimbikuani. Por ejemplu, ma xanhari Jesusi milagru ma úspti para uánikua kʼuiripuni tʼirerani enga chúxapani japka. Sánderu tátsekua, kʼuiripu parhikuspti mari de Galileani imani jingoni. Peru jima, Jesusi arini ambe arhiaspti engaksï no úpka kurhanguni: “Engajtsï no arhaska Uájpa Achatiri kuerpuni ka itsïmantsï imeri iurhirini, nójtsï jatsiaka tsípikua”. Enbesdeksï arhini eska eksplikarikuapiringa ambe enga arhiapka, uandasptiksï: “Meru úkua jukasti inde uandakua. ¿Né uá kurhanguni?”. Indeni ambe jimbo, ‘uánikua imeri jorhenguarhitichaksï kʼuanhatsintaspti’ oksï jurajkuspti ‘ka nóteruksï jámasïrendia imani jingoni’ (Juanu 6:53-66).

5, 6. a) ¿Andiksïsï iásï máru eraku jurajkuni jurhimbikuani? b) ¿Máteruechaksï néna jarhariski o mirikurhini jurhimbikuani?

⁵ Xáni no sési engaksï ini jurhiatikuecha jimbo, máru jurajkuka jurhimbikuani. Máruksï no sési exesti solu jimboka iásï Bibliaeri karakata ma sánderu sési kurhangunhaskia o ambe ma jimbo enga úka o uandani erachi ma enga mítikateka. Máteruechaksï no sési exesti jimbokaksï Bibliaeri konseju ma intsïnhaska oksï no kurhangutsperani erachi ma jingoni. Jamberiksï máru apostatecha jingoni úkuarhiti o imani kʼuiripuecha jingoni engaksï no jiókuarhijka ambe engachi jucha jakajkujka. Ambe uéjki jimboeni, iámindu imechaksï erakusti ‘késtakukuni’ o jarharini Jeobani ka kúnguarhikuani (Ebr. 3:12-14). Sánderu sési japirindi engaksï seguiripiringa jakajkuni ka mintsikani Jesusini, ísï eska na úpka apostuli Pedru. Enga Jesusi kurhamarhiapka imeri apostulichani sinksï uékasïreni jurajkuni, Pedru jirejiresï arhispti: “Tata, ka jucha ¿néni niua andarhierani? Tʼuri jatsiaska uandakuechani engaksï jindeka para tsípikua méntkisï jatsini” (Juanu 6:67-69).

⁶ Peru máteruksï sánhani arhisti mirikurhini jurhimbikuani no jamberi kuenta íntskukuarhiparini. Biblia ísï terokutantaasïndi imani kʼuiripuechani komu barku ma enga sánhani arhijka támisï nirani (Ebr. 2:1). Sáno méntkisï, nóksï eratsisïrendi jurajkuni jurhimbikuani, peruksï ísï  ústi jimboka imecheri pájperakua Jeoba jingoni sánhani arhispka chkeni, astaksï nóteru jatsinia ambakiti pájperakua ma imani jingoni. ¿Ambechi uá úni parachi no indeni ambe úkuarhinchani?

7. ¿Ambejtsïni jarhuata no méni jurajkuni jurhimbikuani?

⁷ Para jurhimbikuarhu jarhani, jatsiskachi para jiókuarhini ka úni iámindu ambe engajtsïni Jeoba jorhendajka. Jatsiskachi para jurhimbikuani sánderu jukaparharani juchari irekuarhu ka úraani Bibliaeri prinsipiuechani. Ma xanhari, rei Dabidi aiakuspti Jeobani: “Chíti jurhimbikuarhu jauaka” (Sal. 86:11). Ísï eska Dabidi, jatsiskachi para seguru jarhani eskachi uékasïnga jurhimbikuarhu jarhani. Engachi no seguru jaka, uákachi uénani eratsini ambe engachi xáni jurajkuka para konseguirini jurhimbikuani ka jamberichi ménderu uékani jatsini imani ambe. Peru nochi méni jatsipiringa para indeni ambe úni. Mítiskachi eskachi no uáka erakuni náki jorhentperakuechani jiókuarhiani ka náki nómbe, sánderu sési, jatsiskachi para jiókuarhini “iámindu ambe enga sési jimboeka” o enga jurhimbitiika (Juanu 16:13). Máteru artikulu jimbochi exeska sinku ambe engachi a lo mejori jatsipka para jurajkuni parachi úni jurhimbikuarhu jarhani ka úni ambe engachi jorhenguarhika. Ju je exeni ambechi uá úni parachi no méni kʼuanhatsintani imani ambe úni (Mat. 6:19).

8. ¿Nénachi úpirini jurajkuni jurhimbikuani no jamberi kuenta íntskukuarhiparini? Jatsiku je ejemplu ma.

⁸ Tiempu. Parachi no jurajkuni jurhimbikuani no kuenta íntskukuarhiparini, jatsiskachi para sési úrani juchari tiempuni. Engachi no jingontku jámaska, uákachi jukari tiempu úrani tsípikuarhita ambe jingoni, imani ambe jingoni engachi kánikua tsitijka, Internetirhu o telebisioni exeni. Nájkiruka i ambe no no sési jaka, úpiringachi úrani imani tiempuni engachi arhutajka para estudiu personali jatsini o para Jeobani marhuakuni. Ju je exeni ambe enga úkuarhinchapka pirenchi ma enga Karmeni arhinhajka. * Desde enga nanaka sapichu máepka, kánikua tsitisïrendi kabaiuni jatani. Méntkisï enga uénga, ísï úsïrendi. Peru niáraspti no sési pʼikuarherani na enga xáni tiempu úrenga para inde ambe úni, jimbosï eratsipti mójtakuni máru ambe. Ístu jarhuataspti Cory Wellsiri istoria, enga torilicharhu kabaiuni jatarini uénga ambe ma (acrobasias). * Iásï, Karmeni sánderu tiempu úrasïndia para Jeobani marhuakuni ka para imeri amigu jembecha ka familiaricha jingoni jarhani engaksï Jeobani marhuakujka. Exesïndi eska sánderu andarheraskia Jeobani ka sési pʼikuarherasïndi jimboka mítiska eska sési úraxaka imeri tiempuni.

9. ¿Andichisï jatsi para no sánderu jukaparharani jatsikuarhikua ambe?

⁹ Jatsikuarhikua ambe. Engachi uéjka seguirini jurhimbikuarhu jarhani, jatsiskachi para no sánderu jukaparharani jatsikuarhikua ambe. Engachi jorhenguarhipka Jeobaeri ambe, sánderuchi jukaparharaspkia imeri ambe ka eska jatsikuarhikua ambe. Tsípikua jingonchi mójtakuspka ambe ma parachi úni jurhimbikuarhu jarhani. Peru tiempu jingoni, jamberichi exeaka eskaksï máteruecha kámaxaka sánderu jimbanhi aparatu ma oksï máteru jásï jatsikuarhikua ambe jatsini ka a lo mejorichi ísï exeni eskachi tsïtakuarhixaka ambe ma. Engachi nóteru konformi jakaia imani ambe jingoni enga meru uétarhijka, jamberichi niáraaka jurajkuni Jeobani solu para konseguirini sánderu jatsikuarhikua ambe. I ambejtsïni Demasiri ambe miátantasïndi. Ima xáni tsitispti “ini parhakpinirhu anapu ambe” enga nóteru pámbipkia apostuli Pabluni para aianhpini (2 Tim. 4:10). Bibliajtsïni no aiangusïndi  sini Demasi sánderu xénchaspi jatsikuarhikua ambeni ka eska Tata Diosïni marhuakuni, o sini nóteru uékaspkia jánguarhintani para Pablu jingoni marhuani. Ambe uéjki jimboeni, i ambejtsïni jorhendasïndi eskachi no jatsiska para ménderu uéntani tsitini jatsikuarhikua ambe, jimboka inde ambe uáka eskachi nóteru jukaparharaaka jurhimbikuani.

10. Para seguirini jurhimbikuarhu jarhani, ¿ambechi no jatsiski para úni?

¹⁰ Juchari pájperakua amiguecha jingoni ka familiaricha. Para seguirini jurhimbikuarhu jarhani, nochi jatsiska para imani ambe úni engaksï máteruecha uéjka. Engachi jorhenguarhipka jurhimbikueri ambe, juchari pájperakua amiguecha jingoni ka familiaricha engaksï no Testigueka nóteru májkuenistia. Máruksï respetaristi ambe engachi iásï jakajkujkia, peru máteruksï meru no sáni jaiapanhintasti (1 Ped. 4:4). Ísïsti eskachi jánguarhintasïnga sési pájperani ka sési kaani juchari parientichani. Peru jatsiskachi para jingontku jámani parachi no sánderu uékani imecha jingoni sési pakarani ka eska Jeoba jingoni. Exeparini ambe engajtsïni arhijka 1 Korintu 15:33, solu imecheri amigueuakachi engaksï xénchajka Jeobani.

11. ¿Ambejtsïni jarhuataa no no sési jásï ambe eratsini ka úni?

¹¹ No sési jásï ambe eratsini ka úni. Imecha engaksï jurhimbikuarhu jaka, jatsistiksï para pímbinhasïni (Is. 35:8 arhinta je 1 Pedru 1:14-16). Engachi jorhenguarhiapka Bibliaeri juramukuechani, iáminduechachi jatsispka para jurajkuni máru ambe. Máruksï méntku iámindu ambe mójtakusti imecheri irekuarhu. Ambe uéjkini engachi xáni úkia, nochi méni jatsiska para ménderu májkueni no sési eratsini o jámani eska i parhakpini anapuecha. ¿Ambejtsïni jarhuataa? Eratsintani na enga xáni meiampeka Jeoba parachi úni pímbinhasïni: imeri Uájperi iurhiri enga xáni ambakitika, tata Jesukristueri (1 Ped. 1:18, 19). Engachi méntkisï jatsiska juchari eratsikuarhu ka mintsitarhu na enga xáni jukaparhaka tata Jesukristueri uarhikua, seguirini jauakachi pímbinhasï jarhani Jeobaeri orhepani jimbo.

12, 13. a) ¿Andisï xáni uétarhijki ísï exeani pʼindekuechani eska Jeoba na exeajka? b) ¿Ambechi exea iáiasï?

¹² Pʼindekuecha engaksï no terokuntajka Biblia jingoni. Jamberijtsïni juchari familiaricha ka ánchikuarhitarhu o eskuelarhu anapu kompanieruecha pʼímarhiati máru kʼuínchikuecharhisï. ¿Ambejtsïni jarhuataa no nirani imani kʼuínchikuecharhu enga Jeoba kurhunhiajka? Sési mítitini jarhani andisï Jeoba kurhunhiajki. Ístu marhuasïndi ménderu arhiantani juchari publikasionichani engaksï arhijka nani engaksï uéraka inde pʼindekuecha. Engachi Bibliarhu jorhenguarhijka andichisï no nirajki imani kʼuínchikuecharhu, sánderuchi seguru jarhasïnga eskachi imani ambe úxaka enga Jeoba jaiapanhintajka (Efes. 5:10). Jeobani mintsikani ka imeri Karakatani, uáti eskachi no chéaka ambe engaksï máteruecha uandaaka (Prov. 29:25).

¹³ Erokuarhisïngachi méntkisï jurhimbikuarhu jarhani. Peru ¿ambejtsïni jarhuataa parachi méntkisï uékani jurhimbikuarhu jarhani? Ju je exeni tanimu ambe.

14. a) Engachi sánderu jorhenguarhiska jurhimbikueri ambe, ¿nénajtsïni jarhuataa parachi no méni jurajkuni? b) ¿Andisï xáni jukaparhakue mímixekua, jurhimberantskua ka jánhaskakua?

¹⁴ Primeru, ju je someni arhutani tiempu para jorhenguarhini jurhimbikua ambe enga Bibliarhu jaka ka eratsintani. Engachi sánderu estudiariska, sánderuchi jukaparharaaka jurhimbikuani ka nochi méni uékaaka jurajkuni. Peru no solu uétarhisïndi mítini, sino ístu úni imani ambe. Proverbios 23:23 arhisïndi eska aparti de piáni jurhimbikuani, ístuchi jatsiska para pʼirani ‘mímixekua ka jurhimberantskua ka  jánhaskakua’. Mímixekua piáni, arhikuekasïndi úni ambe engachi jorhenguarhijka. Engachi kurhangujka o jánhaskani, terokutantasïngachi ambe engachi jorhenguarhijka imani ambe jingoni engachi mítikia. Ístu, ima ambe enga Bibliarhu arhijka, ménisïjtsïni jurhimberantasïndi jimbokachi exesïnga ambe engachi uétarhinchani jaka mójtakuni. Jatsiskachi para méntkisï jirejiresï jiókuarhini jurhimberantskuani, jimboka Biblia arhisïnga eska inde sánderu jukaparhaska eska plata (Prov. 8:10).

15. ¿Nénajtsïni kuájchakusïni jurhimbikua enga ísïka komueska sinturoni ma?

¹⁵ Segundu, ju je pauani pauani ísï irekani eska na terokuntajka jurhimbikua jingoni. Sési jónguarhitini jarhani jurhimbikuani komu sinturoni ma (Efes. 6:14). Bibliaeri tiempuecha jimbo, soldaduechaksï sinturoni ma jónguarhisïrendi enga kuájchakuauenga guerrarhu. Peruksï jatsisïrendi para uinhamu jónguarhitini jarhani para úni marhuakuani. ¿Néna jimbo Bibliaeri jurhimbikua ambe ísïski komueska sinturoni ma? Engachi sési jónguarhitini jarhaska jurhimbikuani komueska sinturoni ma ochi no jurajkuni, kuájchakuatijtsïni chkuanderakua ambe jimbo ka jarhuatatijtsïni ambakiti ambe erakuni úni. Ka engachi tsʼéjkukua ma jatsiaka, uáti eskachi imani ambe erakuaka úni enga sési jaka. Soldadu ma no méni nipirindi guerrarhu ka no jónguarhini imeri sinturonini. Májkueni, juchajtuchi no méni jatsiska para chkerani o jurajkuni jurhimbikuani enga ísïka komueska sinturoni ma. Sánderu sési, ju je ísï úni eska na arhijka Biblia. Ístu, sinturoni marhuakusïrendi soldaduni para espadani jima páni. I ambejtsïni jarhuatasïndi exeni máteru ambe engajtsïni jarhuataaka parachi uékani seguirini jurhimbikuarhu jarhani.

16. Engachi jorhendaajka máteruechani jurhimbikuani, ¿andijtsïnisï jarhuatajki para no méni jurajkuni jurhimbikuani?

¹⁶ Terseru, ju je jánguarhintani jorhendaani máteruechani Bibliaeri jurhimbikuani. Ísï eska soldadu ma na sési jupikatini jarhenga espadani, juchajtuchi jatsiska para sési jupikatini jarhani Tata Diosïri Karakatani (Efes. 6:17). Iáminduechachi uáka jánguarhintani para sánderu sési jorhentpini ka sési úrani Tata Diosïri Karakatani (2 Tim. 2:15). Engachi úrajka Bibliani para jarhuataani máteruechani jorhenguarhini jurhimbikuani ka no jiókuarhini chkuanderakua ambe i parhakpiniri, sánderuchi úsïnga pérani Tata Diosïri ambe juchari eratsikuarhu ka mintsitarhu. I ambejtsïni jarhuatasïndi parachi no méni uékani jurajkuni jurhimbikuani.

17. ¿Cha andisï jukaparharajki jurhimbikuani?

¹⁷ Jurhimbikua, ambakiti intsïmperakua máesti engajtsïni íntskujka juchari Táti auandarhu anapu. Indeni ambe jimbo, úsïngachi jatsini ambe ma enga sánderu jukaparhaka: ambakiti pájperakua ma Jeoba jingoni. Iámindu ambe engajtsïni xáni jorhendakia Tata Diosï, apenasi uénani anapu ambesti, jimbokajtsïni aiachiska eskachi seguirini jauaka jorhenguarhini jurhimbikueri ambe para méntkisï. Ísï jimbo, ju je ísï exeni jurhimbikuani komueska perla ma enga kánikua jukaparhaka. Ju je seguirini jorhenguarhini ka no méni jurajkuni. Jiájkani, ísï eska Dabidi, kumpliriuakachi ambe engachi aiakuka Jeobani, eskachi méntkisï jurhimbikuarhu jauaka (Sal. 86:11).